ميانالى عليرضا

هدايت سلطانزاده نين "بيزيم او ساري چنگيز " يازيسى

من بو گون هدايت سلطانزادهنين "بيزيم او ساري چنگيز" يازيسيني اوخودوم. اوخودوم و دوشوندوم. دوشوندويوم بو اولدو کي، اؤز آنا ديليميزده يازيلان يئني بير يازينين اورتايا چيخديغيني گؤردوم و سئوينديم. سئوينديگيم ايسه بو اولدو کي، موطلق بونون آردي گلهجک.

بير کره مرحوم شاعيريميز بالاش آذر اوغلي بير يازيسيندا يازيردي: داغ دؤشوندن آخان بولاغين گؤزونو تيخاسان کي، آخماسين او همن يئردن ده اولماسا باشقا يئردن اوزونه يئنى بير يول تاپاجاق. من هدايت بىين بو يازيسيندا همن او جان آتمانين، ايشيغا چيخماسىنين شاهدي اولدوم. يازيدا گئدن صميميت، روح، دويغو و يازماغا مئيل مني بو قناعته گئتيردي کي، بونون آردي موطلق گلهجک. بو داها بولاغين جان آتماسي يوخ، بلکه آخار سويون خاصيتيدير. من سادهجه دئيه بيلرم يولون آچيق اولسون قارداش! گئجيکسن ده يازارلار عايلهميزه خوش گلدين. اوزو ده کي،اعلا گلدين. خئيرلي و گرکلي دويوملا باشلادين. قوي بو باشلانيش اولسون اونلارا کي، بيزيم يازارلار عايلهميزده گؤرونمک و قالماق ايستهييرلر.

فيکيرده، دوشونجهده وطنيميزه، ميللتيميزه هانيسي يوللا ،هانسي ديلله ايستهسن فايدالي اولماق اولار. آما بير ميللتين يازاري اولماق سادهجه او ميللتين معنوياتينين آچاري ساييلان ديلله اولور. ديگر فورمادا چاليشانلاريميز آز ايش گؤرمورلر. هانسيسا شاعيردن بير فيکير يادداشيمدا قاليب. بير گون بير عاشيق گئدير معشوقون قاپيسيني دؤيور. ايچريدن سس گلير - کيمدي؟ عاشيق جاواب وئرير :- منم. ايچريدن ائشيدير:- بوردا ايکينجي آداما يئر يوخدو. عاشيق گئدير و نئچه مدتدن سونرا يئنه گلير. ايچريدن يئنه جاواب گلير: -بوردا ايکينجي آداما يئر يوخدي.عاشيق يئنه گئري دؤنمگه مجبور اولور. گئدير و دوشونور. نئچه مدتدن سونرا گلير و يئنه قاپيني دؤيور. بو کره کيمدي قاپيني دؤين سوالينين جاوابيندا دئيير: - بو سنسن. قاپي آچيلير. عاشيق اؤز معشوقينا چاتير.

باخ ايندي دئمک اولار ميللتيميزه خاص اولان يازارلار بيرليگيميزين قاپيسي سنه آچيقدي قارداشيم. بو عايلهيه سادهجه سئوگي يئترليدي. سئوگي و عيناد بو عايلهنين داواميدي. سئوگي معلوم، عيناد ايسه يازماغا مئييلدي. بو دئييم طرزي بير آز سرت اولماغا ماييل اولسا دا اينانيرام کي،کيمسهده منفي ،کوبود،جان اوزن ايز بوراخماياجاق. من بيزيم بو عايلهميزي قوروماغا جان آتان هر کيمسهني جان- ديلدن باغريما باسيرام، و اؤپورم. آما بونودا دئمگه مجبورام. بونو هاچانسا باشلاماق لازيمدي. ايندي مقام گلدي من جسارت ائديب بير آز منه دوشن پايدان فاضلا ايرهلي گئتديم. قوي ائله اوزو قاراليق منه قالسين، آما ايشيميز دوز يولوندا گئتسين. بو هاميميز اوچون گرکلي اولان ايشدي. اؤز آنا ديليميزده يازماغا باشلاماليييق. بئله اولان حالدا ميللت آنلاييشيني درک ائتمک ده، قاوراماق دا اؤز دوزگون حليني تاپاجاق. اؤز يولوندا گئدهجک. آخي بيز اؤز آنا ديليميزده تحصيل آلماميشيق. ايستر-ايستهمز بو ايشى دوزگون بير حالا گئتيرمگيميز موطلق ورديشدن کئچهجک. يازا- يازا ياخشى يازماق اولار. بيردن دوروب آمئريکا کشف ائتمک اولماز. خوشبختليک اوردادير کي، بونون اساس قايناغى،کؤکو خالقدي. خالقا ياخينليق ايسه بو يولو داها دا جيلالانديرار. داها دا اوخوناقلي ائدر. باخ ائله هدايت بىيين بو يازيسي کيمي.