محمدعلى فرزانه

ميرزه باغير حاج زادهنين حياتيندان روايتلر

عزيزيم، باغري قارا،

بير قوش وار باغري قارا.

لاله کيمي گول اولماز،

اونون دا باغري قارا! (آذربايجان خلق باياتيلاريندان)

ميرزه باغير حاج زاده و تبريز صحنهسي

آذربايجان و تبريز تئاتري، پهلوي حاکيميتي ايللرينده نئچه - نئچه قودرتلي رژيسور و آکتورون آدي ايله ايلگيليدير بو آرتيستلردن بير باغري قاراسي دا ميرزه باغير حاج زاده اولموشدور. حاجزاده، اؤز ايستاژيني (تئاتر اؤيره نجيليگيني) نئچه جنوبلو رژيسور و آرتيست ايله تيفليس کونسرواتوروندا بيتيرميش، قاييديب باکيدا صحنهيه چيخميش، سونرادا رژيسور و آرتيستلرين نئچهسي ايله تبريزه قاييتميشدير.

حاج زاده او ايللرده، روسيه انقلابينين ان گورولتولو ايللرينده، باکييا گئتمهسي، اورادا تئاتر دونياسينا قدم قويماسي اؤزلوگونده حاج زاده نين حياتيندا سونرادان درين تأثير بوراخان بير حادثهيه چئوريلميشدير.

حاجزاده نقل ائدردي: آتام تبريز بازاريندا پولو يوخ، آمما حؤرمتي چوخ آداملاردان بيري ايدي. او تبريز تاجرلرينين آل - وئر ايشلرينه گؤمروکده يا قونسولاتلاردا امانت چيليک ائدر و اوردان الينه چاتديغي تومناتلا کئچينردي. اونون بوتون تلاشي مني اوخوتماق و دوقتور اولماق اوچون تيفليسه گؤندرمک ايدي (اوندا تبريزده دوقتور اولماق ايستهينلر بير باشا تيفليسه گئدر و اورانين عالي طيب فاکولتهسينده تحصيله دوام ائدرديلر. حاديثهني حاجزاده دؤنه - دؤنه دئيهردي: کيشي مني آرزوينان- گورزوينن اوخودوب يولاسالدي کي، گئديب اوردا دوکتور اولوم، قاييديب گليم ايرانا و اورادا يازيق - بئچارالاري مجاني موعاليجه ائديم. دوکتورلوق اوخوماديم، آرتيسليک اوخودوم، بلکه اونلارين دوشونجهلرينده تأثير بوراخيم، آمما اونلارين يازيقليقلاري يئرينده دورسون، اؤز يازيقليغيما دا چارهساز اولماديم...

حاجزاده تبريزده امکداشلاري طرفيندن قورولموش تئاتر قروپونا قاتيلير و ايشه باشلايير. اونلارين عومده چاليشمالاري تبريزده تازاجا بينا ائديلميش مُودرن شير خورشيد صحنهسينده يئر به يئر اولوردو. ميرزا باغير هئيکلي، سيماسي، داورانيشلاري و سسينين توناژي ايله اويغون بيردرام آرتيسي کيمي، عؤهدهسينه دوشن روللاري، حتي اوتللو و شئيخ صنعان کيمي آغير پرسوناژلاري بؤيوک باجاريقلا ايفا ائديردي. او ايستر حوسئن جاويد، جعفر جبارلي، جليل محمد قوليزاده کيمي آذربايجان درام نويسلري و ايسترسهده غربي درام نويسلرين اثرلرينده پارلاييردي.

او ايللر ده، سؤز يوخ کي، تئاتر تبريزده و آذربايجانين آيري شهرلرينده آذري تورکجهسينده وئريليردي و معروف درام اثرلري بو ديلده صحنهيه چيخاريليردي. بو امر 10-1308 ايللرينه قدر دوام ائدير و حاج زاده صحنه فعاليتي گوندن- گونه يوکسليردي. بو ايللرده رژيم تورکجه تئاتر وئرمگي، کيتاب بوراخماغي، حتي يازماغي- اوخوماغي و سونرالار دانيشماغي دا ياساق ائتدي. بو قرار اجرا ائديلندن سونرا، حاجزاده اؤزو دئميشکن درام آرتيستدن بير کومدي درام آرتيسته چئوريليردي، چونکي اوفارسيني چارهسيز لهجه ايله دانيشير و تاماشاچيلاردان چوخو اونون سؤزلريني باشا دوشموردولر و تئاتر ديل يانسيتما صحنه سينه چئوريليردي.

بوتون بونلارا گؤره حاجزاده بير يوللوق صحنه حياتيني ترک ائدير، دالي اوتورور و بير چيخيش يولوتاپماق اوچون فاجيعهلي بير دربهدرليک ايله اوز- اوزه گلير. بيز گئچميش يازيلاردا يئري گلنده بو ماجراني بير فاکت کيمي گؤسترميشيک. آمما ايندي بورادا دا اونا اشاره ائتمگي لازم گؤروروک. حاجزاده خاطيره لرينده دئيير:

«1307- نجي ايلده، تبريزده شير خورشيد صحنهسي آچيلاندان سونرا بيز چوخلو نوماييشنامهلري مووفقيتله صحنهيه چيخارديق. بيز ايستر بو صحنهده و ايستر آراميان صحنهسينده کومدى نمايشلرله يان - يانا، جيدي اثرلرده اويناييرديق، نوماييشنامهلر گؤزلهنيلمز مووفقيت قازانيردي و اونلاردان بعضيلري آيلار صحنهده اوينانيليردي. بير گون شير خورشيد صحنهسينده، ياديمدا اولدوغو کيمي حوسئن جاويدين «شئيخ صنعان» اثريني تمرين ائديرديک. تمرين زاماني آرتيستلردن هئچ کيمسهني سالونا يول وئرميرديلر. لاکين، او گون بير گؤزلوکلو آقا دا سالوندا حاضير ايدي. بير رژيسوردن اونون بارهده سوروشدوق. رژيسور دئدي. بو، آقايغلامحسين خان ماعاريف، آذربايجان ماعاريف و اوقاف ايدارهسينين موفتيشيدير. نومايشي يوخلاماق اوچون گليب. او وقته قدر نومايشنامهلري يوخلاما ايشي مرسوم دگيلدي و بيز هاميميز بو موضوعدان شاشديق. تمرين قورتاراندان سونرا، آقاي غلامحوسئن خان بير سؤز دئمهدن يولونو توتوب گئتدي. بو ماجرادان نئچهگون سونرا، بيزه خبر وئرديلر کي، تامام آرتيستلر فيلان گون حضرت اجل آذربايجان ماعاريف و اوقاف رئيسي حوضورونا شرفياب اولماليديرلار. بيز هاميليقجا تعيين اولموش گونده ماعاريف ايدارهسينده حاضير اولدوق و بونا باخماياراق کي، حضرت اجل گؤروش ساعاتيني اؤزو موعين ائتميشدي، بيزي بير ساعات اينتيظار اوتاغيندا ساخلادي و سونرا هامان آقاي غلامحوسئن خانين وسيله سى ايله شرفياب حوضور اولماق روخصتي وئرديلر. بيز، بير مودت ده رياست اوتاغيندا اياق اوسته قالديق تا حضرت اشرف آغير- آغير رياست ميزينين داليندان دوروب، ايرهلي گلديلر و بيزلري تک به تک باشدان آياغا گؤزدن گئچيريب دئديلر:

- آقالار، بيليرسيز سيزلري نييه چاغيرميشام؟ چاغيرميشام کي، هامينيزا دئميش اولام کي، بوندان سونرا تورک ديلينده نوماييش وئرمک قدغن اولور، سيز نوماييش وئرمک ايستهسيز، حتماً گرک فارسجا اولا. البته، ايمکاني وارسيز گربه، گوربه، گيربه، کوربه دئيهسيز. لاکين،

- غلامحوسئن خان تورکوده گربهيه نه دئييلير؟

- قوربان پيشيک،

- بلي، حق نداريد پيشيک بگيد! باشا دوشدوز؟! ايندي گئده بيلرسيز.

من فاجيعهنين درينليگيني دويوردوم. هاميليقجا قاييتديق. من عصباني ايري آدديملارلا يوروردوم. رژيسور داليدان منه چاتيب سوروشدو: بو عجله ايله هارا؟ دئديم: گئديرم آذربايجان تئاترينين عزا مجلسيني سووام!... آيدين ميلي- دموکراتيک و ضيد امپرياليست روحيه داشييان آرتيستين، اؤز سؤزو ايله دئسک، ديلي دينج دورمور و بوبابتدن سايسيز سيخينتي لار و اهانتلره معروض قالير. صحنهدن چکيلمک و گؤره بيلهجاغي ايشين رؤيايا چئوريلمهسي، اونو بير طرفدن عصبيلشديرير و او بيري طرفدن بير چوخ ايشلره ال آتماغا وادار ائدير، لاکين بونلارين قولپو الينده قالير. البتده، خاطيرهلرين دواميندا گؤره جاغيميز کيمي، اونون ايقبال اولدوزو بو ايللرده آزدا اولسون پارلايير. لاکين بوپارلاما چوخ قيسسا اولور. بو ايللرده حاج زاده صحنه آرتيستليگيندن اوزاقلاشديقجا کوچه و بازار آرتيستينه چئوريلير و بو يئني وظيفهسينده خلقي هم سئوينديرير، هم گولدورور، هم کدرلنديرير و همده دوشوندورور. اونون بو سيماسي خلق آراسيندا، کوچهده- بازاردا، درين ايز بوراخير و اونو خلقين ايستکلي آرتيستينه چئويرير.

بونونلا ياناشي، حاج زاده ميلي- دموکراتيک روحيهسي ايلهايستر - ايستهمز سياسته ياناشير...

***

او بوتون بو ايشلرين هاميسيني، جاوانلاري «ايجبارى» زوراکى- سرباز آپارماقدان تا تيرياکيخا نالارين تبريزده و آذربايجانين آيري شهرلرينده ياييلماسيني اينگيليسلرين گؤزوندن گؤرور، رضاشاهي اونلارين آدامي بيلير، کئفلي واختلاري نهکي دربار وار، شاه وار هاميسيني ساپا دوزوردو.

هر دفعه گوزاريش وئريرديلر، ايطلاعاتين خفيهلري اونو آپاريرديلار کلانتريده کؤتک آلتينا ساليرديلار اونو دؤيمک و اينجيتمک اوچون، حاج زاده نين اؤزو دئديگي کيمي، گاه بئچهيانا، گاه مردانا باتوندان، گاه ايکي ديللي و گاه نئچه ديللي شاللاقدان، هئيوا آغاجي شويکهلريندن، تپيکدن، يومروقدان، سيلليدن ايستيفاده ائديرديلر.

او اطرافيندا کئچن حاديثهلري ايزلهييردي. کيشيلرين بؤر کونو دگيشمه و قادينلارين باشيني آچما اونون الينه عونوان وئريردي. او دفعهلرله آشاغيداکي ماجرالاري بير نوماييشنامه کيمي نقل ائدردي.

1ـ دلي علي آقا ماجراسي

دلي علي آقا گرک يادينيزدا قالميش اولا. او شئشگيلان محلهسي دليلريندن ايدي. شئشگيلان تبريزين اعيانلار محلهسي اولدوغوندان و ايداره رئيسلرينين اورا گليش - گئديشيندن هميشه «تميز» ساخلا نيليردي. اورادا کيشيلرين و آروادلارين بؤرک و باش اؤرتوسو مورتب ايدي. يالنيز خياباندا سحردن آخشاما وئللهنن علي آقانين، دوروموخوشا گليم دگيلدي بعضيلري، مخصوصاً خانيملار دئيهرديلر: او يوخاريدان آشاغا گليب اونا اؤجشمک گوناهدي. بعضيلري ده دئيه رديلر: او هاميدان آغيلليدير، او بير دانا چيرک و ياغلوچا کئچه بؤرکو قاشى نين اوستونه يانقيليجي قويموش، حتي کلانتري رئيسيندن ده چکينمزدي. هر يئره آپاريب بوراخسايديلار آز ديريلميش پيشيک کيمي قاييديب گليردي.

کلانتري رئيسي بير گون مأمورلارينا دئيير: سيز بونو ديله توتون، ناهار وعدهسي وئرين، بير پهلوي بؤرکو ده حاضيرلايين، باشينداکي بؤرکو گوتوروب، تازا بؤرکو ائهمالجا باشينا قويون. مأمورلار بو ايشي گؤرورلر. سونرادا آيناني قاباغينا توتوب دئييرلر: علي آقا! باخ گؤر نه ياراشيقلي اولدون، لاپ محمدخان حاج عليلويا (ارسباران خانلاريندان بيري) بنزه ييرسن.

علي آقا بير سؤز دئمهدن کلانتريدن چيخير، ياخينداکي سلماني دوکانينا گيرير. اوردا ديقتله اؤزونه و بؤرکه باخير و دوداق آلتي دئيير «علي آقا» لاپ قورومساق اولدون گئتدون. سونرا گليب کلانترينين قاپسيندان باشيني ايچري اوزادير و دئيير: اسدخان (اسدخان کلانتري رئيسينين کيچيک آديدير) منيم بؤرکومو دگيشديرمکله نه اولاجاق؟ اگر هونرين وار منيم بئينيمى دگيشدير..

2ـ اصغر داواتگر اوغلو ناييب کاظم، قديم نظميه چيلردن ايدي. او داها قوجالميشدي. آمما ياخشي آدام اولدوغوندان هله ناييب اولليک روتبهسي ايلهوار- گل ائدردي. بير گون حاج زاده گورور بير قادين حامامدان چيخيب گلير. ناييب کاظم دا کوچهده اوزبه اوزدن گلير. بو آرادا بير نظميه سرهنگي ده هاردانسا اوردا تاپيلير. ناييب کاظم سرهنگين الينه باهانا وئرمهمک اوچون، ياناشيرکي آروادين چاديراسين باشيندان آچسين. ناييب کاظمين الي آروادا طرف اوزاناندا او باغيريرکي «ناييب کاظم! سنده قورومساق اولدون؟» حاج زاده ناييب کاظمين يانيندان سوووشاندا ائشيديرکي سرهنگ اونا دئيير: صاباح اؤزونو ايطيلاعاتا تانيتديرسين. علي آقا بونو هاردان ائشيدير شئشگيلانا جار ساليرکي: ناييب کاظمي ايطيلاعاتا ايستهييبلر، صاباح اؤزوم گئده جاغام، اولارا نيشان وئرهجاغام!...

حاج زاده نين شهرين بوتون دليلريندن و «دوييهلريندن» خوشو گلير. اونلارلا خوش - بئشي وار ايدي. بعضن دئيهردي: کاش من ده اونلاردان بيري اولايديم، آمما حيئف اونلاردا اولان قورخمازليق منده يوخدو. او، آرزولاردي «علي بئداوام» اولسون. او دئيهردي «علي بئداوام» آغلير، اونون آغلاماسيني من دويورام، گؤز ياشلاري صوراتلارينا يوخ، دامجي - دامجي ايچريسينه دامير. او گؤز ياشلاريني چؤره يينه ياوانليق و ايچديگي ايسپيريته مزه ائلهيير...

آداملارين «تقليد»يني چيخارديغيندان اوشهنيرلر. بير گون او قهوهخانا دا ائشيديرکي، شاهين روزنامهسي بير موصحيح دالينجادير. شاهين روزنامهسينين موديري آقازاده شاهين، دموکراتليق سابيقهسي اولدوغو حالدا، ايندي روزنامهني يوللانديرماقدا دؤولتين يارديملاريندان فايدالانيردي. ميرزا باغير، شاهيني ياخيندان اوزاقدان تانيديغي و اونون بير آز «اتي آجي» آدام اولدوغونو بيلديگي حالدا، ياخين فورصتده اونون ايداره سينه گئدير. ايداره دئينده، بير داريسقال پيللهکان، نوح اياميندان قالميش ايکي اوتاق، بير انبارا بنزر دالدايئر، ايکي - اوچ ميز و بئش - آلتي صندليدن عيبارت ايدي. اوتاقلار بيري - بيرينه آچيليردي و شاهين ايکينجي اوتاقدا اوتوروردو. قاپيلار و پنجرهلر پردهسيز ايدي. شاهين اوزو اوجابوي، هايکويچو، خوشونا گلن سوزدن قاه - قاه چکيب اوجا سسله گولن و خوشونا گلمه ديگي ايشدن آجيغي توتوب قيشقير باغيرلا هويکورن بير آدام ايدي. او آياق سسي ائشيديب باشيني ميزدن قووزادي و حاجزادهني گؤرونجه بير آز توپارلاندي و باخيشلاري آشاغا رسمي بير ديالوق ايله سوروشدو:( شاهين اؤزوده وقتيله آرتيست ايدى!)

- هه، حاجزاده، خوش گؤرموشوک، نه عجب بو طرفلردن؟

- ائشيتديم سيزين موصحيحه احتيياجيز وار، گلديم گؤروم مني ايشه گؤتورورسوز؟

شاهين ايچينده مودتلردن سونرا بير موصحيحين تاپيلما سئوينجيني گيزلهدهرک اؤزونو اويانا قويمادان دئدي:

- سؤز بوندا دگيلکي منيم موصحيحه احتيياجيم وار، آمما اول دئ گؤروم سنون بو ايشده سرريشتهن وار. اساسن صحنهنين نه دخلي وار موصحيح ليگه؟

- من نوماييشلرده هر آرتيستين ديالوقونو آييريب اونا يازارديم، رژيسور دا اولموشام...

او حاج زاده سؤزونو کسيب دئدي:

- بونلار هاميسي اؤز يئرينده، آمما بو ايش تجروبه ايستر. هئچ دئمهدين هله سن صحنهني نييه بوراخدين، اوراکي سنون اؤلن يئرين ايدي؟

- ياخشي بيليرسيز صحنهده تورکو دانيشماغي قدغن ائلهديلر بيزيم جماعت ده فارسي بيلمير. من اؤزوم ده فارسيني سيزين کيمي چتين دانيشا بيليرم...

شاهين بو سؤزلري ائشيدنده باشيني آشاغا تيکدي. قاشلاري چاتيلدي، اودقونا - اودقونا ميزين اوستونده اولان بيرييغين کاغاذي قاريشديردي و اونلارين آراسيندان بيريني چيخاريب دئدي:

- گل، بونو آل، نامه وارده دير. اونون غلطلرينى دو زلت، اؤزونو ده پاکنويس ائله وئرمنه.

حاجزاده لازم گلنده اهل قلم ايدي او، بو ايشي چوخ ديقتله يئرينه يئتيريب، تميزلنميش نامهني شاهينه وئردي. شاهين ايشدن راضي قاليرکيمي دوداقلاري بير لحظه قاچدي، سونرا گئنه سيماسي اولکي حالا قاييتدي و دئدي:

- سن هلهليک گليب مشغول اولورسان، آمما بيلير سن منيم موزعيم ده يوخدور، سوراقلاش، بير نفرده موزع تاپ. او قاباقکي موصححله موزع سحردن آخشاما بيري - بيريله بوغوشوردولار. ايش اورا يئتيشدي کي، ايکيسيني ده جواب ائلهديم. بورا ماتي مئيخاناسي دگيلکي! حاج زاده اؤزيانيندا دئدي: سنون بو آجي ديلووه ميه موزع قالار؟...

ميرزا باغير دئيير: باش اوسته، من چاليشاجاغام بير نفرده زيرک موزع تاپيم. آمما، بويورون گؤرک بيزه حوقوق نئچه وئرهجاقسيز. من اؤزوم ائولي دگيلم، آما ائو کرايهسي وئريرم، اوزوم ده سيغار چکيرم، آمما، موزع بلکه ائولي اولدو. بيليرسيز سوباي آدامين خرجي داها چوخ اولور. شاهين دئدي: ياخشي اولدو دئدين، روزنامهنين وضعي ياخشي دگيل، بو قاليب سيزين باشاريغيزا، اگر روزنامهنين تکفروشوسونو چوخالدا بيلسيز، اوندان پورسنت آپاراجاقسيز. هلهليک بو حقوقا گرک قاتلاشاسيز.

حاج زاده اوتانير بير سؤز دئسين، مساله ائله بوجور اؤرتولوقالير. او، اؤزو ايشه باشلير و بير نفر موزع ده سوراقلاشير. گونلر سونرا ائشيديرکي، محمد بيريا (او بيرياني قاباقدان تانيردي. او سربازليغين قورتارميشدي و بئکار ايدي. بيريا بير شرط ايلهکي، حاج زاده اونا صحنهيه چيخماغي اؤيرتسين (بيريانين اؤزونون چوخ قدرتلي ديالوق و نطق باشاريغي وار ايدي) موزعليگي بوينونا آلير. بونلار هره سي اؤز ايشلريني گؤرورلر و گونده بير ساعات سحر طرفي شاهين گلمهميش يا آخشام او گئدندن سونرا تئاتردا اولان پرسوناژلاري تمرين ائديرديلر. روزنامهنين تکفروشيسي چوخ آز ايدي. اونلار هر ايکسيده خوش خوراک ايديلار و ناهارا معمولاً روزنامهيه ياخين اولان مش عابباسدان پيتي گتيريرديلر. بونلار گوندن گونه شاهين نين احوال روحيهسيله آرتيقدان آرتيغا تانيش اولوردولار. حاج زاده باخيرکي، شاهين نين جيبينده پولو اولاندا اودابانلاري اوسته يئرير و اؤزو ده شنگول گؤرونور. بو ايش عموماً بورجون سون گونلرينده اولوردو. بو گونلر آقازاده نين قولتوق جيبنده معمولاً بير يا ايکي باغلام تازا پول اولوردو. بوپوللارين باغلانديغي باند بئله آچيلماميشدي. حاج زاده امکداشي بيريا ايله بو قرارا گليرلرکي، ديزيني بير آي باشدان باشا نيسيه يئسينلر و سونرا مش عابباسا سيفاريش ائديرلر کي، سن پولوندان نيگران قالما، فقط آيين باشيندا بيريا گليب سني چاغيراندا الينده ياغين دا داشسا، قوي يئره و گل روزنامهده هاي- هاراي قوپارکي، آي جانيم، بونه موسلمانليقدير يئديگير ناهارلارين حسابيني نييه وئرميرسيز. نيسيه بير گون اولار، ايکي گون اولار، نهکي بير آي.

بورجون سونو اولور و شاهين دابانلاريني تاققيلدا دا- تاققيلدا دا و سلامين جوابيني گولر اوزله آلان گون بيريا گئديرومش عابباسا دئيير گلسين. مش، عابباس گلير و پيلله کانلاري چيخار- چيخماز باشليرکي: آي جانيم، گلميشم دئيهم کي، اگر حسابيزي چوروتمهسيز بو گوندن پيتي وئرمييه جاغام. هاردا گؤرونوب ناهار پولو بير آي نيسيه قالا؟ من ده کاسيب آدامام... آقازاده ايداره ده هايکويو خوشلامازدي، بونا گورهده چاغيرير:

- حاج زاده اوردا نه خبردي؟ کيمدي بو هايکوي سالان؟

- قوربان مش عابباس پيتي پزدي. بيز بير آي نيسييه پيتي گتيرمشيک، گليب پولونو ايستر.

شاهين دوداقلارين قيسدي، اونون الي قولتوق جيبينده گزيشدي، بير دانا تازا بئش تومنليک بارماقلاري آراسيندا چيخاريب، ميزين اوستونه آتدي و حيرصلي سسله دئدي:

- آدام کيمي دانيشانماسان؟ نييه داد تپيرسن، گل، گؤتور کسرين وئر... مش عابباس ياغلي، اؤنلوگونون جيبيندن قارا پول چيخاريب ميزين اوستونه قويدو، برکتيز چوخ اولسون دئييب اوتاقدان چيخدي. آقازاده بير آز سومسوندو، بير دسته تازا روزنامهيه اشاره ائديب دئدي.

- بونلارنييه پوستا وئريلمهييب؟ روزنامه چيخان گونون صاباحي گرک مشترکين آدرسينه چاتسين؟ حاج زاده دئدي:

- مارکاميز (تمبريميز) قورتاريب، ممد گلنده آليب گتيرهجاق.

پيتي برنامهسي بورادا قورتارمادي، هر بورجون آخير گونومش عباس گليب،هاي- بيديريق سالير و پيتيلرين پولونو آليب گئديردي.

شاهين اجزالاريندان (او دفتر ايشچيلريني بئله آدلانديريردي) چوخ راضي ايدي و اونلار دا صحنه تمرينلريني چوخ احتياطلا دوام ائتديريرديلر. محمد بيريانين هم صحنه حرکتلري و هم ده ديالوق باجاريغي چوخ گوجلو ايدي. او حوسئن جاويد کيمي ديالوقو شعر اساسيندا يارادان يازيچينين روللاريني بئله چوخ مهارتله اويرهنيب و ايفا ائديردي.

او گونلر، رضا شاهين تبريزه گلمک خبري چوخ سورعتله آذربايجاندا ياييليردي و بوتون ايداره لر و سازيمانلار بو ايش اوچون حاضيرليق آپاريرديلار. رضاخانين شهرده گليب کئچديگي مسيرين ديوارلاري آغارديلير. شهر تميزلهنير، اونون گؤرمگه گئدهجکي و يا اتوراق ائتديگي ائولر تميزلهنير، خيابانلار ايران بايراغي ايله بزهديلير و مسير بويو «تاق نوصرت» لر وورولوردو. رضا شاهين گلديگي تاريخ ياخينلاشديغي بو تشريفات چوخاليردي. بو سيرادا بير گون آقازاده شاهين ايداره يه گلير. اوتاغينا کئچيب. حاج زاده ني چاغيرير و اونا دئيير. ائشيتميش سن کي، اعلاحضرت آذربايجانا تشريف فرما اولاجاقلار. من ايستيرم (او من سؤزونو چوخ ايشلهديردي) شوماره مخصوص چيخاردام، آغ کاغاذدا، ايکي رنگ، باش صفحهده اعلاحضرتين نيظامي ليباسدا عکسي. حاج زاده، سن گرک بير ايش گؤرهسن، بو پالتاردا اولماز، گلرسن منيم پالتارلاريمدان بير دست آييراسان، گرک آغ کؤينک گئيهسن، کراوات ووراسان، ائله صاباحدان دا ايشه باشلاياسان. سنين ايشين بو اولاجاق کي، شوماره مخصوصدان بير نمره قيزيل سيني ايچينده سئرمونو (تشريفات) ايله، او گون کي ارباب جرايد شرفياب اولورلار، باشين يوخاري، سيني الده، آرام آدديملارلا، (اوبو سؤزلري دئينده بوينونوقاز بوينو کيمي يقهدن چيخاريب، اوتاقدا ايري آدديملارلا بو باشدان اوباشا گئدير) اعلاحضرتين دوردوغو يا اوتوردوغو يئره باخين، بير ديزيني يئره قويوب، روزنامهني تقديم ائدهسن. اگر اعلاحضرت بير سؤز سوروشسا، ادب- ارکانلا جواب وئرسن، اگر سوروشماسا، نئچه قدم (او يئنه تمرينه دوام ائدير) دالي- دالي گليب صفده دوراسان...

هله آقازاده نين سؤزو قورتارماميش حاج زاده دئيير: قوربان، بو ايش منيم ايشيم دگيل، من بو گونه قدر بو ايشلردن گؤرمهميشم، خوشوم دا گلمز. سيز بونا بير آيري آدام تاپين، سيزين يان- يؤرزده چوخلاري وار، بو ايش اوچون جان وئريرلر...

آقازادهنين رنگي سارالير، ياخين گليب حاج زاده ايله بورون بورونا دايانير و دئيير:

- بس سن هارانين آرتيستي سن؟ سنين اليندن فقط خلقه اؤجشمک گلير، اليمين امگي يوخدور. سندن چوخ اينجيديم. هله سندن ايندي جواب ايستهميرم، بير ايکي گون ياخشي فيکيرلش، منه «هَن» دئنه...

- آقاي شاهين من نظريمي جيدي حالداسيزه دئديم. بو ايشلر منيم اليمدن گلمز...

شاهين باشي آشاغي اوتاقدا اوباش- بو باشا گئديب، سونرا دؤنوب حاج زاده يه دئيير:

- آقاي حيدرزادهني توت، من دانيشيم...

شاهين، حيدرزاده تبريزين سانيلي سيمالاريندان بيري ايله اوزون- اوزادي دانيشيق آپارير. يقين حيدرزاده موناسيب بير آدامين تاپا بيلهجگيني وعده ائديرکي، حاج زاده نين ياخاسي شاهينين اليندن قورتارير. آمما او گوندن شاهين حاج زاده ايله باشي آغير دولانير، بعضنً حتي اونون سلامي نين دا جوابيني آلمير...

رضاشاه اوزون اينتيظاردان سونرا تبريزه گلير، عولما «ارباب جراييد»ين شرفياب اولدوغو وقت شاهينين چاپ ائتديگي « شوماره مخصوص» قيزيل سينيده حوضورا آپاريلير. رضا شاهين چوخ خوشوگلير و رييس کول تشريفاتاً دئيير اونون مرا حيميني ارباب جراييده، خوصوصييله شاهينه بيلديرسين.

مراسيم قورتارير و شاهين حيدرزاده نين و نئچه آيري تبريز مؤعتمدلريندن ناهاري بيرليکده يئمگي خواهيش ائدير.

اونلار ناهاري روزنامهيه گتيريلمهسينه ايصرار ائديرلر و حيدرزاده نين آدامي چيلوکاباب سيفاريش وئرمگه گئدير. بو حالدا اونلار روزنامه ايداره سينه چاتماقداديرلار. شاهين اوجا سسله (اونون سسي جينگيلتيلي ايدي) دئيير:

جناب حيدرزاده، اعلاحضرت هومايوني تمام ارباب جراييده، عليالخوصوص بندهيه مولاحيظه بويوردوز نئجه ايظهار مرحمت بويوردولار؟ ها، ها، ها، ها...

روزنامه ايله اوز به اوز ائوده عدليه وکيلي مرتضي هدي آلمانلي خانيمي، بولدوک تولاسي ايله ياشاييردي. تولا غئيرعادي گولمک سسي ائشيدينجه باشلير هورمهيه. شاهين بئله خيال ائديرکي بو سسي حاجزاده اونو يانسيلاماق اوچون چيخاردير. غضبله حاجزادهيه باخيب، آمما هئچ بير سؤز دئمير. بير هفته گئچير لاکين او اجزا سيله بير کلمه بئله دانيشمير. شاهينين روحيهسيني تانييان حاجزاده ياخيندا بير توفان قوپاجاغيني گؤزلهيير و توفان بير گون باش وئرير.

او گون شاهين ساعات اون بيرده يعني هر گونکوندن گئج ايداره يه گلير. سلام، صاباحسيز اؤز اوتاغينا گئچير، قاش - کيرپيگي يئر سوپورور و دوداقلاري اسير. او در حال حاجزادهني حوضورا چاغيريب و دئيير: آقاي موصحيح، بير دئنه گؤروم منيم شوماره مخصوصوم خيابان قاپيسيندا مشه مهدي علافين دوکانيندا نه ايشي وار؟ حاجزاده دئيير بو ايشدن اصلن خبري يوخدور و آرتيرير:

- آقاي شاهين! اگر سيز ايسته ميرسيز بيز بورادا اولاق گونو بوگون آخشام قويوب گئدهريک... شاهين باغيرير: آقا، هارا قويوب گئدرسيز، اگر رييس نظميه اولماسايدي، ايطيلاعات مني گؤندهريردي توقيفه. سنين ايشين اولماسا، حتماً او حرامزادا ممدين ايشيدير. او ايندي هاردادير؟

- گئتدي سيغار آلسين، ايندي قاييدير.

سونرا او بيرينجي اوتاغا قاييداندا گؤردو ممد گليب دئدي:

- ممد، ائله بيل آقاي شاهينين سنله ايشيوار، دئييرمنيم شوماره مخصوصوم خيابان قاپيسيندا مشه مهدي علافين دوکانيندا نه قاييرير، دئيير: وئريرميشله توقيفه رييس نظميه ضامين اولوب. اونلارين سسي آستادان دا اولسا. شاهين ممدين قاييتديغيني بيليب اونو سسلهدي.

- ممد، گل بورا. ممد آياغين ايچري قويدو - شاهين گؤزو اونا ساتا شجاغين فيشنگ کيمي پاتلادي - منه باخ گؤروم، ديزيق، حاميله. منيم روزنامم خيابان قاپيسيندا مشه مهدي علافين دوکانيندا نه قاييرير. ميه مشه مهدي منه آبونهدي، او آجيندان ياتيرگون اورتا دورور.

- آقاي شاهين، سن مؤهلت وئرسن شايد من سني باشا سالام، آمما سن کي مؤهلت وئرميسن، شاهين کئچيب ميزين داليندا اوتوردو، بوتون هئيکلي اسيردي - دئدي: خوب بويور گؤرک آمما اگر بير کلمه يالان دئسن دريوي فيلقي چيخاردارام.

- خاطير جمع اول، من يالان دانيشمارام، حاج مد جعفر آقانين شوماره مخصوصونو آپارديم قاپيلارينا، نه قدر قاپيني دؤيدوم، جواب وئرن اولمادي. آخيرده وئرديم مشهمهدي علافا قونشولوقدا و دؤنه - دؤنه تاپشيرديم، حاج مد جعفر آقا گلنده روزنامهني وئرسين اونا. ايندي داليسي نه ايتيفاق دوشوب منيم اوندان خبريم يوخدور.

- ياخشي، اؤزونو پاکا چيخارتماغا چاليشما! سيز ايکينيزده منيم باشيما بلا اولموسوز، ايکينيزده بيربئزين قيراغيسيز، بئلهليکله بو شهرده منه آبري قويماسيز. اوسنين يئکن دير، او گون بئش نفر کيشينين يانيندا منيم گولماغيمي چوچويون گولماغينا اوخشادير، بودا سن، دونن ارک باغيندا آرتيسلرين يانيندا منيم ادامي چيخارديسان، بوگون ده روزنامهمين شوماره مخصوصي گؤي مچيد کوچهسينده مشه مهدي علافين سينيق شوشهسي يئرينه ياپيشديريليب... ممد دئيير، آقاي شاهين سيز قضاوتده عجله ائديرسيز، ميرزا باغير هئچ واخت سيزي يانسيلاماز، او هميشه سيزه حؤرمت بسلهر، ايستر اوزده، ايستر دالدادا، بيز گئديب بو روزنامهنين مسالهسيني ايچ ائلييه جاغيق. ايستهسيز اؤزوزده گلين.

شاهين باخيشلاري يئرده دئيير: مساله منه ايچ اولوب، سيز گئدين اؤزوزه ايچ ائلهيين، سونرا دا قاپيلاري چيرپيب گئدير.

او گئدندن سونرا ميرزا باغير و ممد بيرليکده خيابان قاپيسيندا مشه مهدي علافين دوکانينا گئديرلر. مشه مهدي حاج زاده ني قاباقجادان تانى ييرميش. خوش پئشدن سونرا او چاي دئدي و سوروشدو حاج مامان (چوخلاري تبريزده حاج زاده يه محبتلريني بيلديرمک اوچون اونو بئله چاغيرار ديلار) نه عجب بو طرفلردن؟

حاج زاده دئيير: بو روزنامه مساله سي بيزه يامان دردسر آچيب. روزنامهنين مودوري شاهين دئييرکي سيز بو ايشي عمدنً گؤرموسوز و منيم آبريما توخونموسوز...

مشه مهدي حاج زاده نين سؤزون ياريدا قويوب دئيير: شاهين غلط ائلير، دئنه ديلقيرين بيري ديلقير، سنون آبرين وارکي، هله بيري ده اونا توخونا؟ گلميشدي بورا، دئديم هنده- منده دانيشما، دئيهرم ائله وورارلارکي، آغزين يئردن تزک قاپار. قضيه بودورکي، سيزين بو همکار گتيرير روزنامهني حاج مد جعفر آقايا وئرسين، ائوده يوخوموشلار. وئرير منيم شاگيرديم کريمه و دئيير:

- بونلار هر وقت گلديلر روزنامهني وئرهسن اونلارا. من اؤزوم ده روزنامهني گؤردوم، آمما ائله بيلديم بلديه يا نظميه اونو تبليغات اوچون چيخارديب. ايکي گون سونرا کريم دئدي کي، سويوق گئجهلر بوسينيق شوشهدن سويوق پوفگورور ايچري، آخي کريم گئجهلر دوکاندا ياتير، دئديم بوگونو- صاباحي دؤز، شوشه سالديرريق. اودا ساوادسيز آدامدي، گؤتوروب روزنامهني ياپشديريب پنجرهيه. اؤزوده رضا شاهين عکسيني ترسه ياپيشديريب، يعني باشي آشاغا، آياقلاري يوخاري. دونن آجان بونو گؤروب گئديب گوزاريش وئريب، از قرار معلوم دونن چاغيريبلارهاي- بيديريق گؤتوروبلر. گلدي بوراکي ائله- بئله. دئديم بير دانا ايشدي اولوب، سن اونو اؤزون هاميدان چوخ يئکلديسن. هله بو ايشين سيزه نه دخلي وار؟... آخي بيليرسن بيز اونون روزنامهسينده ايشليريک، بونلارين هامسيني بيزيم گؤزوموزدن گؤرور.

مشه مهدي دئدي: چوخ غلط ائلير. او چوخ يولچو صيفت. واتي آجي آدامين بيريدير. قديم نوباردا اولاندا اومندن اودون، کؤمور آپاراردي، آيلار پولوقالاردي.

گلدي زمان، کؤچدي زمان، موتفيقلر ايراني ايشغال ائتديلر. رضاشاه قودرتدن دوشوب ايراندان گئتمهلي اولدو. بو دفعه شاهين هامان رضاشاهين کيليشهسيني رنگلي يوخ، آغ - قارالي باشي آشاغي چاپ ائلهدي و آلتيندا يازدي «رضاشاه سرنگون شد» حاج زاده بير نوسخه بوتازا عکسدن گؤتوروب، بير نوسخهده ساخلاديغي او قديم رنگلي عکسي آليب روزنامهنين ايداره سينه گئتدي. روزنامهده البته گتير- گوتور وار ايدي. شاهين تب «فوقالعاده» چيخاريردي. او، بو دفعه آذربايجانين داشيني سينه سينه ووروردو. حاج زاده آياقلاريني دره - دره پيللهلري چيخدي، عکسلرين هر ايکيسيني ده بيرينجي اوتاغين شوشهسينه سووادي. آشاغا قاييتدي و آغزيني يوخاري توتوب باشلادي «هدا»نين آروادينين تولاسينين سسيني چيخارتماغا. شاهين هراسان پنجرهدن آشاغي باخيب، حاجزاده ني گوورونجه ايکي پيللهني بير ائلهييب آشاغا يئندي. او حاج زاده نين اليندن - اوزوندن اؤپوب دئدي: من سيزين بارهده چوخ ياراماز ايش گؤردوم مني باغيشلايين، حاجزاده دئدي: هر کسين اؤز ايشتيباهينا موقيّر اولماسي بير آدديم ياخشيلاشماغا طرف گئتمکدير. اينشالله بوندان سونرا بلکه بير آز ياخشيلاسان!...

بو آرادا وورور فيرقه تشکيل اولور. شاهين بو دفعه فيرقه يه سوخولور، فيرقه نين موراجيعتنامهسيني ايمضالير، آمما سئچگيلرده مرکز کوميتهيه سئچيله بيلمهديگي اوچون فيرقه دن اوز چئويرير و باشلير گاه نالا، گاه ميخا وورماغا. فيرقه داغيلير و اودا آرادا – بره ده گزيردي. تبريزين و بوتون آذربايجانين قانا بويانديغي 21 آذر 1325 - ده او عصاسي الينده هر طرفه فيرلانير، شهرداري قاباغيندا دکتر سلام الله جاويدي گؤروب اونون اوستونه جوموخور اليندهکي عصا ايله دکتر جاويدين باشيني يارير. بو فاصيلهده اوُوباش ستارخانين مجسمهسيني يئره ساليرلار. شاهين بو ايشدن او قدر احساساتي اولورکي، تيلفونون دستهسيني دانيشانين اليندن قاپيب دئيير: الو...الو ايواي فداتان بشوم، خودتان هستيد؟ او طرفدن دئييلر: آقا، سيزکيمسيز؟ تيلفون سيزده نه قاييرير لاکين شاهين زيقزاک گئدير و دستهني الدن وئرمير و آغلامسينا - آغلامسينا دئيير: اعلاحضرتا احساسات مردم بقدري شديد است که مجسمه ستارخان سردار ملي را هم خورد - خورد کردهاند... هو... هو... هو... هو...

حاج زاده سيغارساتان

آ حاج زاده نين ايرانا قاييداندان سونرا، اوقاف ايداره سيله اوزون - اوزادي داعوا- مورافيعهسي وار ايدي. آتاسي دونيادان گئتمهدن هاراني ايسه وقف ائتميش و اورادان بير حق نظارت کيچيک اوغلو اوچون آييرميشدي. بو اوغلان، آتانين اؤلمهسي ايله حاج زاده نين ايرانا دؤنمهسي فاصيلهده يوخا چيخميشدير. حاج زاده يئري - گؤيو آلت - اوست ائيميشدي. لاکين قارداشيندان سوراق وئرن اولماميشدي. حاج زاده بعضن عاييله سيندن صؤحبت آچاندا بوناکام اوشاقدان آجي - آجي ياد ائدردي و اونا قصد ائدنلره نيفرت ياغديراردي. حاج زاده هر واخت بئکار اولاندا و الي بوشاچيخاندا بو ايشين داليني توتار و اوقافدان بير شئي قوپاراردي. بو دفعه ده عرضحال وئرير و ايشين آردينا دوشور چوخ گل - گئتدن سونرا الينه بير پول توختايير. ياخينلاري مصلحت گؤرورلر او ال - آياغيني ييغيشديرماق اوچون بير پيلله آلتي کيمي يئر اجاره ائلهسين و اورادا بونهدي سيغاردان، توتوندن، کيبريتدن، آب ناباتدان و بئله - بئله شئيلر ساتسين، او، بئله بير پيلله آلتيني تبريزين ميار مياريندا، حاج شفيعنين قناديسينا ياخين بير يئرده تاپير، اوراني قفسه بندليک ائلهييب، جاماکي قويوب آل - وئره باشلايير. آمما، آخشاملار اونون دؤورهسينه ييغيلانلار حاجزاده ني راحات بوراخميرلار. آخشام ايشدن چيخانلار اونا باش ووروب سيغاردان، آب ناباتدان، جورابدان، فيلاندان آليرلار. بونلارين بعضيلري حاج زاده نين اوتانجاخليغيندان ايستيفاده ائديب باشلاييرلار نيسييه آپارماغا هر گلن بير جعبه سيغار يا ايکي جوت جوراب گؤتورور و دئيير: حاجزاده يازحسابا، حاج مامانين نيسييه دفتري گوندن گونه قالينلاشير، آمما پيلله آلتينين قفسهلري گوندن - گونه بوشالير، حاجزاده دونيا ييخيلسادا اؤز شکهلکلريندن ال گؤتورمييهجک. پيلله آلتي گوندن گونه بير گئش بير ديشلري تؤکولموش قوجا آغزينا اوخشايير. او چارهسيزليکدن توتون و سيغارلارين يئکه پاکاتلاريني پوفلهييب شيشيردير و يوخاريدان آشاغي دوزور قفسهلره. بير گونده آخشام طرفلري بئش - آلتي نفر اوردا ييغيليب، دئييب گولدوکلري زمان، بير ماليه مأمور و قولتوغوندا بير دوسيه (بو حاج زاده نين اؤز ايصطيلاحيدير) ايچينده کاغاذ- کوغاذ گلير و آداملاري اورادا گؤرونجه دئيير: آقالار، ايشي اولمايانلار بويورسونلار. اورداکيلار بير - بير گئديرلر و مأمور اوزونو توتوب حاجزادهيه دئيير: کيشي بو آز مودتده ياخشي توتدورموسان. حاجزاده ايستير دئسين هله هاراسين گورموسن؟ مأمور دئيير: بو ائله کاسيبلارين عادتيدير. ماشاءالله کاسيبليغي دا ياخشي تئز اؤيرهنميسن، دوزونو دئنه گؤروم گونده نهقدر جينس ساتيرسان؟ يوز اللي ساتيرسان؟ حاج زاده دئيير: يوز اللي نهدي، دئنه اوچ يوز. سنون هوشون هاردادير، بو پيلله آلتيندا هاميسي يوز اللي تومنليک جنس يوخدور، اوندا من يوز اللي تومني هاردان ساتيرام؟ مأمور باشين اگيب پاکاتلارا باخير و ايستير اونلارين بير نئچه سينه ال وورسون، حاج زاده دئييرسن اؤزووه زحمت آچما ايندي من دئيهرم هاميسي گلسينلر قوللوغووا. سونرا قفسهني تيترهدير و بوش پاکاتلار بير - بير تؤکولور يئره حتي ايکيسي يا اوچوده دوشور مأمورون باشينا. مأمور بو ايشدن دلخور اولان کيمي حاج زاده نين آديني - سانيني سوروشوب گئدير.

حاجزاده بوش پاکاتلاري يئرلرينه ييغماقدا ايکن حاج شفيع قنادي هؤولهسک ماغازادان چيخيب حاجزادهدن سوروشور: حاجزاده سني نئچه يازدي؟ حاجزاده دئيير: کيم مني نئچه يازدي. حاج شفيع دئيير. ائي بابا، او آدام دارائي مأمور و ايدي. نامرد بيزه 250 تومن ماليات يازدي. تازا ايندي حاج زاده نين ايکي قرانليغي دوشدو بيلديکي باشينا نئجه بؤرک گئچيب. حاج شفيع قنادينين هر گون حاج زاده نين بلکهده يوز برابري ساتيشي وار ايدي. بير آي سونرا بير آيري مأمور آژانلا بيرليکده گلديلر و حاج زاده يه 150 تومن مالياتين ايخطاريني گتيرديلر. حاج زاده نين بئله بير مالياتي وئرمگه ايمکاني يوخ ايدي، بونا گؤره ده ايش ايجرايا چکدي و بير گون گلديلر کى مالياتي دوکاندا اولان جينسلردن گؤتورسونلر. ال آتاندا گوردولر پاکاتلار هاميسي بوشدور، بونا گوره ده حاج زاده ني گؤتوروب اؤزلريله آپارديلار. اونو توقيفه وئرديلر. اونه قدر داد - بيداد ائلهدي فايدا وئرمهدي. حاج زاده نين هر يئرده صحنه علاقهمندلريندن تانيشي اولدوغو کيمي، ماليهده ده تانيشلاري وار ايدي. اونلارين بيري تصادفي حالدا توقيف اوتاغيندان سوووشاندا حاجزاده ني گؤرور و سوروشور: حاجزاده سنين بورادا نه ايشين وار؟ حاجزاده دئيير: مني ماليات بوشلوسو ائلهييبلر، گتيريبلر بورا، پيران (تبريز ماليات ايداره سينين عضولريندن و صحنه حياتي ايله آليشانلاردان ايدي، حاج زاده نين دئديگيندن گولماغي توتور. دئيير: کيشي، سن هارا، ماليات هارا؟ سنين يئددي گؤيده بير اولدوزون يوخدو. کيم سني ماليات بورجلوسو ائيلهييبدير؟ حاجزاده دئيير: بيلميرم، آمما گورورسن کي ايندي بوردايام.

پيران گئدير و نئچه دقيقه سونرا الينده بير دوسيه قاييدير و دئيير: بس بئله، سن شئيخ علي اتحاد اولموسان (بو آدام او ايللر تبريزده سيغار فابريکلريندن هاميدان بؤيوگونون صاحيبي ايدي و پيران بير لوغاز کيمي بو سؤزو حاج زاده يه دئيير) آمما بيزيم هئچ خبريميز اولماسين؟ سونرا بير ورق کاغاذ چيخاريب، بير سؤزلر ديکته ائدير و حاج زاده يازير. يازي اوتاقلاري گزير و ايکي - اوچ ساعات سونرا حاج ماماني بوراخيرلار. حاج زاده او گونو اوتانديغيندان يا قورخوسوندان ايش يئرينه قاييتمير. سونرا دا سيغار فوروشلوق گؤيلونو وورور، نيسييه لرده آلينماميش قالير، پيلله آلتي دا گؤزدن دوشور و اوجوز پولاساتيلير. حاج زاده ني سونرا مالياتدان ساري بير نئچه دفعه چاغيريرلار لاکين پيران اونون دادينا دورور و بورجون اؤ دونمهسيني دالييا سالير...

حاج زاده مئيخاناچي

حاج زاده گئنه بئکار سولهنير. بير آخشام دوستلاريندان بيري دئيير: ائله بيليرم، گئنه بئکارسان بو کافهنين صاحبي هايراپئت ائرمني، ايستير اوغلونون يانينا فيرنگيستانا گئتسين. سفري اوزون چکه جک ايستهمير کافه بومودتده باغلي قالسين. اگر سن ايستهسن اوراني سنه دوزلديم. حاج زاده تشکور ائلير، آمما دئيير قورخورام اورادا پيلله کان آلتي کيمي اولسون. اوردا دا گليب نيسييه يئييب - ايچسينلر، سورادان دا دوروب گئتسينلر. دوستو دئيير: يوخ جانيم، کافهده بئله ايش اولماز، اولسادا سنين اوتانجاخليغيندان فقط اولا بيلر. بير ياخشي همکاردا تاپارسان، ال - اله وئرهرسيز ايکي ياندان بوراني يولاسالارسيز. کافه اؤزو ده خوشنام کافهدير. تميز موشتريلري وار. فقط اونلاري قورويوب ساخلايا بيلهسيز. بورا باشا - باش مئيخانادير، سن موشترييه ياخشي باخماسان، او ايکي آدديم سندن قاباقدا يا اوچ آدديم سندن اوستهکينه گئدهجک، هايراپتئله دانيشيلر، قرار اولور خاليص قازانجي يارييا بؤلسونلر، ياريسيني هايراپئتين حسابينا تؤکسونلر، ياريسيني دا ايکي شريک گؤتورسونلر. ايش دوزهلير و تازا ايلدن (هانسي تاز ايل؟) ايشه باشليرلار.

حاج زاده پاساژدا کافه آچيب خبريني ائشيدنلر آخشاملار اورا ييغيليرلار. حاج زاده نين شريکي چوخ زيرک آدامدي، آمما مشروبدا ايفراط ائدير. او ناهاردان سونرا باشلير هر ساعاتدا بير ايستکان آتير. آخشام کافهني باغلاياندا لول کئفلي اولور. البته، حاج زاده اؤزو ده آخشامدان ياواش- ياواش باشلير مز- مزه ائدير. آمما اؤزونو قورويور. حاجزاده اؤزونه و همکارينا جيره تعيين ائدير: بير ايستکان آخشام ساعات آلتيدا، بير استکان دا ساعت 9- دا. خوره يه حاج زاده باخير، مشروبا دا شريکي باش چکير. کافه ياخشي ايشلهيير. حاج زاده بيرينجي آلتي آيدا هم ماليات بورجونون ياريسني وئرير، همده چوخدان آرزولاديغي بير دست رختخواب آلير. بونلارين هاميسيندان دگرلي او کوچهلردن ييغيشير، آخشام، گئجه ياريسي خسته - خراب ائوه گلير، سحر ساعت 9 دا دا کافه يه گئدير. جومعهلر کافه چوخ شولوغ اولور. موشتريلردن بير پاراسي احترام اوچون حاج زاده ني ميزلرينين باشينا چاغيريرلار و او بير دانا «جوک» دئمکله يا بيرشهکلهک چيخارتماقلا اونلاري گولدوروب دورور. گاهدان بير موشتريلردن اعتيراض سسي ائشيديلر: آي جانيم، بو کافه پاساژدا هاميدان تميز مشروب وئره ردي، بو مشروبلار سودادي وئرير. سس اوجالاندا حاج زاده اؤزو آرايا گيرر، بوطرونو دگيشير، تازا گتيرديکي بوطرونون باندرولونو هم اؤزو سينايير، همده موشترييه گؤسترير. آمما، اعتيراضلار گوندن گونه چوخالير. سندئمه شريکي «ياخشي آدام» مشروبلاري سؤرنگ ايله چکيب سودولدورور. بير گئجه گئج واختدير. کافهنين تعطيلينه آز قالير. موشترينين آياغي چکيلير بيردن قاپي آچيلير و قارني ييرتيق کاظم لول کئفلي ايچري گيرير. او بير ميزين داليندا اوتوروب مشروب ايستهيير. حاج زاده و همکاري اونا مشروب وئريب وئرمهمکده ال ساخليرلار. بو فاصيلهده بير روس کومانداني بير جوان ناييب دوم ايله کافهيه گيريرلر. کوماندان حاج زاده ايله خوش - بئش ائديب، بيرميزه اوتورورلار. اونلار اوتوران لحظهدن قارني ييرتيق کاظمين باخيشلاري جوان افسرين اوزونه ميخلانيب قالير. جوان افسر اولدوغو قدر خوش سيمادير. او چوخ سئوئر اوتوروب، کوماندانين سؤزلرينه قولاق آسسين و هردن بيرده گولومسهسيين. کاظم دستمالين چيخاريب بوينونو - بو غازيني سيليرو آستادان پيچيلدايير: ديلووي يئييم، سنه قوربان کسيليم و باخيشيني جوان افسرين اوزوندن چکمير. حاج زاده ايشين پيس يئرده اولدوغونو دويور. آستا آدديملارلا کاظيما ياخينلاشير و يوموشاق ديل ايله دئيير: ناييب اجازه وئرسيز ايستيرديک کافهني تعطيل ائدک، ساعات 11 دن سونرا مشروب ساتماق قدغن دير. کاظم دئيير: خفه! و دستمالي هاوادا يئلله دير بير ساعاتدير مني بوردا اوتورتموسان ايندي ده دئييرسن ايستيرم باغلايام. ميه اوشاق اله سالميسان. بس نييه اولارا هرنه ايستهييرلر وئريسن؟ منيم پولومون شئري قانجيقدير؟ حاج زاده دئيير: اونلار گورورسن مشروبو اؤزلري گتيريبلر. بوردا ايچميه جکلر خورهک سيفاريش وئريبلر اونودا اؤزلري ايله آپاراجاقلار. صاباح گل، خيدمتينده وارام. قارني تيرييق کاظيم دئيير منه والزاريات اوخوما، يوخسا بسا طووي آلت - اوست ائدهرم. حاج زاده نين شريکي بير بوطرو مشروب ايله بير ليوان گتيريب قويور کاظمين قاباغينا، کاظم ليواني دولدوروب چکير باشينا، مز - مزه ائدير و دئييرسن بونا دئييرسن مشروب؟ ائششک جدآبادين دير. سونرا بطري هاوادا فيرلانيبدهيير جاماکي شوشهسينه شوشه پرم - پرم اولوب داغيلير کافهنين تکينه. کوماندان بونو گورونجه آياغا قالخيب دئيير: اولمايا بو اوورش سنه اذيت ائلهمک ايستير؟ کاظم دئيير: منيم هئچ کسله سؤزوم يوخدو، دئييرم سنين او يانينداکينين ديليني يئييم. اونا من قوربان کسيليم... کوماندانين الي گئدير هفت تيره، کاظمين باشي اوستوندن، آياغي آلتيندان، ساغيندان - سولوندان يئددي دانا گولله پارتلايير. گوللهنين قولپهسي توخونوب چراغ کئچيرو شمع يانديرينجا قارني ييرتيق کاظم آرادان چيخير. جماعت گوللهلرين سسينه او بيري کافهلردن اورا هوجوم گتيريرلر. سحر حاج زاده ني کلانترييه چاغيريرلار و ايجاره نامه نينن آرادا اولماماسي اوچون کافه باغلانير...

نئچه گون سونرا قارني ييرتيق کاظم حاج زاده ني پاساژداگؤرور و کافهنين باغلانماسيني اوندان ائشيدير. کاظيم دئيير سنين کافهن جهنم او گئجه من موفتهسينه اؤلهجاغيديم، جنازم يئرده قالاجاق ايدي. آمما، اؤز آراميزدي اوغلان گئچمهلي دگيلدي... حاجزاده دئيير: آما بيلدينکي، کافهني باغلاديلار، من گئنه وئيلان قالديم کاظم دئيير: داريخما، آللاه کريمدي...

ايللر اؤتور، ايران شيمالدان، جنوبدان موتفيق قوشونلارى طرفيندن ايشغال ائديلير. تبريزده يئرلشن قيزيل اوردو طرفيندن موفصل تئاتر و کونسرت قروپلارى باکيدان چاغريلير و نئچه-نئچه شهرلرده نوماييشلر و کونسرتلر وئريلير. لاکين ، بو گونلر حاجزاده چوخ آجى و پوزغو حيات گئچيرير و يالنيز پاساژدا گؤرسنير. او چکينير کى، او تايدان گلن آرتيستلرين بيرى اونو گؤرر، تانييار و او اؤزو دئديگى کيمى اوندا گرک اؤله و يئره گئچه.

بونا باخماياراق، اونون دئديگى کيمى بير گئجه او گئج واخت پاساژدان قاييداندا يولونو او ساعاتدا خلوت اولان گووستان باغىنين يانيندان سالير. يولون آراسيندا او گؤرور قاباقدان بير قيزيل اوردو ضابيطى گلير. او اؤزونو ييغيشديرير و باشينى آشاغى سالير کى، اونونلا اوز-اوزه گلمهسين. لاکين ضابيط اونا ياخينلاشير، اونو گؤزدن گئچيريب سوووشور. او بير نئچه قدم گئديب قاييدير و دئيير:

- «آ، بورا باخ گؤروم!» - حاج زاده دايانير. او حاجزادهيه ياخينلاشير. اونو باشدان آياغا سوزور و دئيير:

- - «آ سن ميرزه باغير حاجزاده دگيلسن؟»

- - بلى، ميرزه باغيرام.

- منى تانىييرسان؟

- سسيز تانيش گلير، آمما اؤزوزى تانيميرام،

- او قدر پيانسان کى، اؤزونو ده تانيميرسان. من جعفر جعفروفام. سنله بيرگه تيفليس کونسرواتورونا گئتديک، سن باشقا همشهريلريزله قاييتدين کى، وطنداشلارى تئاتر يولو ايله آييلداسيز. لاکين گؤر اوزونو نه گونه قويميسان!

حاجزاده چاليشير کى، بير سؤز تاپيب دئسين، جعفروف اونا مجال وئرمير و دئيير:

- «منيمله گل، قورخما سنى کوماندانليغا آپارميرام، يولداشلارين يانينا آپاريرام». حاجزاده دئيير:

- آخى منيم بو وضعده اونلارين يانينا گئتمهگيم خوش دوشمز. جعفروف دئيير:

- دئمک اوتانيرسان، لاکين، ياخشى اولار اؤزوندن اوتاناسان!...

اونلار بيرليکده ياخيندا اولان «جهان نما» هوتلينه گليرلر. (اوندا قيزيل اوردو ضابيطلرينه بو هوتلده يئر وئرميشديلر) او گؤندرير و بوتون ضابيطلر چاغيردير. اونلار گلديکده دئيير: «تانيش اولون، بو ميرزه باغير حاجزاده منيم کونسرواتور يولداشلاريمداندير!»، اونلار حاجزادهنين بير باشينا باخير بير آياغينا و ائله بييرلر جعفروف شوخلوق ائدير. لاکين، جعفروف اونلارا آچيقلايير کى، جنوب آذربايجان تئاترىنين فلاکتينى ميرزه باغيردا گؤرمک اولار. سونرا اونلارين ايچيندن رژيسور بيريسى حاجزادهدن سوروشور کى، سن نئچه ايلدير صحنهنى ترک ائتميسن. او دئيير: اولار اون بير ايل يا اون ايکى ايل. سونرا دا سوروشور: ان سون رپت ائتديگيز پيئس ياديندادير؟ او دئيير: بلى، حوسئن جاويدين شئيخ صنعان اثرينى تمرين ائدرديک. رژيسور دئيير: اولار بير-ايکى پاراقراف اوندان ايجرا ائدهسن؟ حاجزاده نئچه تيکه شئيخ صنعانين و اونون آردينجا دا ترسا قيزىنين ديالوقوندان، سسلرين توناژلاريله، ايجرا ائدير و اونلارى حئيرتلنديرير. ضابيطلر او گون حوقوق آلميشديلار. جعفر جعفروف هرهدن بير پول آلير، اؤزو ده اونو اوستهلهيير وئرير حاجزادهيه و دئيير: صاباح آخشام تر-تميز اولوب گليرسن بورا: سنى آپاراجاغام تئاترا: اوردا سنى آرتيستلر ايله تانيش ائدهجگم.

حاجزاده صاباحيسى تازا پالتار و سمپاتيک قيافه ايله حاضير اولور، گئدير تئاترا و اؤز ايستهديکلرينه قاتيلير.

حاجزاده تئاترا قاتيلارکن دموکرات فيرقهسىنين موراجيعتنامهسى ياييلميش و فيرقه فعاليته باشلاميشدى. او فيرقهيه يازيلير و هر گون صحنهيه گلنده ارک کوچهسىنين آغزيندا اينگيليسلرين تبليغاتخانالارىنين قاباغيندان سوووشور. اوردا تبليغاتخانانين اوست طبقهسى قهوهخانادا و هابئله تبليغات دوکانىنين اؤنونده جمعيت توپلعانيب بىبىسى-يه قولاق آسيرلار. حاجثزاده هرگون بوردان گئچنده عصبىلشير و راديونون سسى بئينينه ايشلهيير. بير گون گجيل قاپيسيندان گئچنده ايکى دانا شاققيلداق (تاراققا) آلير. اونلارين بيرينى ساغ جيبينه و او بيريسينى سپل جيبينه قويور. او آيلاردا آمريکانين ژاپونون هيروشيما و ناکازاکى شهرلرينده ايشلتديگى آتوم بومبالارى هامينى وحشته سالميشدى. او، فيرقهده شهر کوميتهسى مسولونون يانينا گلير و دئيير: من سيزلردن نئچه دفعه ديلهميشم بو تبليغاتخانانين سسينى کسهسيز، سيز قولاق وئرمهميشسيز. من ايندى گئديرم او هرزه ايتين سسينى کسيم. بونو دئييب قاييدير.

فيرقه اورقانى بو ايشله مووافيق اولماديغينى بيلديرمکله، گيزلينجه اونون آردينجا فدايى يوللايير کى، اگر چتينليک ياراندى يارديم گؤسترسينلر. حاجزاده قهوهخانايا چاتير. بىبىسى گور-گور گورولدور. او پيللهلردن يوخاري قالخير، دوز هوپيانير چيخير قهوهچىنين قاباغيندا قويولموش ميزين اوستونه. قهوهخانانين ميزلرى اوستونه قليانلار سيرا ايله دوزولموش و تبريزين دراپ پالتوولو و لبهدارلى تکآياقليلارى اونلارا قوللاب وورورلار. حاج زاده سؤزه باشلير: جماعت بو گونلرده هر يئرده صؤحبت بومب آتومدان گئدير، دئييرلر و اشينقتون حؤکومتى اوندان ايکي داناسيني دا آذربايجانا سالاجاق. من سيزلره علاقهم اولدوغو اوچون اوبومبلاردان ايکيسيني اؤزومله گتيرميشم، اونلارين بيري ساغ جيبيمده، او بيريسي سول جيبيمده دير. بير دقيقه اول قولاق باتيران سس - کوي کسيليب، بوتون باخيشلار حاج زادهنين آغزى ايله جيبلرى آراسيندا گزير. بلى، اونلاردان بيري سينانميش، آمما او بيريسي باکيره دير. منيم او سينانميشلا ايشيم يوخدور، ايستيرم سيزين گؤزونوزون قاباغيندا او باکيرهنى ده سينايام. او بونو دئيه-دئيه ساغ جيبيندهکى تاراققا چيخاردير. قهوهخانا صاحيبي اونون قيچلاريني قوجاقلاييب دئيير: حاج زاده سني آند وئريرم آتاوون روحونا، منيم وار- يوخومو کول ائلمه! بير آيريسى حاجزادهنين قاباغيندا ديزه چؤکوب ايلتيماس ائلير: حاجزاده بيزيم بالالاريميزي يئتيم قويما! آمما حاجزاده شاققيلداغي قهوهخانانين آراسيندا شاققيلداتميشدى. مشتريلرين بير چوخو قهوهخانادان چيخماق اوچون دار پيللهکانلاردا بير – بيرلرينى ايتهلهيير، ييخير، دالدان گلن ييخيلانى آياقلايير. پنجرهيه ياخين اولانلار اؤزلرينى بالکوندان خيابانا آتيرلار. صاباحدان آپارات سسدن دوشور و قهوهخانادا قوو وورورسان قولاق توتولوردو.

اوزون - اوزادي کشمه- کشلر و چکيش - برکيشلردن سونرا 1325 - ين آذرينده فيرقه ايقتيداري تحويل آلير. تبريز کلانتريلريني تحويل آلماقدا نئچهلري داوطلب اولدو. حاج زاده ده ناحيه يئدديني تحويل آلماغا داوطلب اولور. هله يئددينجي کلانتريني نئيه؟ چونکي حاج زادهيه اوردا چوخ اذيت - آزار وئرميشديلر. اونو توقيفده ساخلاييب، اهانت ائديب، يئر سوپورتدورموشدولر. يئري گلنده اونو شاللاق يا باتونلا دؤيموشدولر. هر حالدا حاج زاده نئچه موسلح فدايى ايله ناحيه يئدديني تحويل آلماغا يوللانير. کلانتريلرده هئچ بيرمقاويمت گؤستريلميهجک، تکجه اسلحه - ابزار تحويل آلينيب صورتجلسه اولاجاقايدي. حاج زاده سيلاحلاشلاري ايله بيرليکده کلانترييه گلدي. آمما کلانتري خلوت ايدي، هر شئي، حتي سيلاحلار اسلحهخانادا اؤز يئرينده ايدي. فداييلردن بيري اوجادان سسلندي:

بورداکيموار، هر کس وار اوزه چيخسين آماندادي. حاج زاده اوتاقلارا باش چکه - چکه گلدي مأمورلارين ايستيراحت اوتاغينا. بو اوتاق قارانليق ايدي و تکجه بير بالاجا پنجرهسي کوچهيه طرف وار ايدي. حاج زادهنين گؤزو اول بير شئي گؤرمهدي. آمما بير آز اوتاغين فضاسينا آليشاندان سونرا نظرينه گلدي بيريسي کورکه بورونوب بير طرفده مورگولهيير.

کورکو اونون اوستوندن بير يانا آتير. حاجزاده قوجا آجان ابراهيم وکيلي تانير. اوکومسئرده حاجزادهني اذيت ائلهمزدي، لاکين حاجزاده اونا پول وئرندهکي سيغار يا پنير- چؤرک آلسين، قوجا آجان دا پولون قالانيني قايتارمازدي.

حاجزاده اوجا سسله دئيير: کيشي دور آياغا سن ده ياتماغا واخت تاپدين؟ تشکيلاتيز بيکديردي. گلميشم کلانتريني تحويل آلام. ابراهيم وکيل دئيير: بو کلانتري، بودا سن، بويور تحويل آل، مهيه سنون قاباغووي آلان وار؟ حاجزاده دئيير اوزون دانيشما دور آياغا هر شئيى ساي تحويل وئر. ابراهيم وکيل چوخ اعتيناسيز جواب وئرير: ميرزا باغير، سنکي بئله دگيلدين! هلهگل اوتور بير چوبوقلاشاق، بيزه بوايشدن نه قالير؟ حاج زاده دئيير: ايستيرسن نه قالسين؟ صاباح کوچهلرده ديلهنهجکس. قوجا آجان دئيير: يوخ سني آللاه، آغزيوي خيئيرليغا آچ! سن فلکين ايشين نه گؤرورسن؟ آلماني آت گؤيه، يئره دوشونجه يا نصيب يا قيسمت. بيرده حاجزاده بيليرسن بورا قوجا تبريزدي، من اوتوز بئش ايلدي بو پالتار اگنيمده بو نيشان باشيمدا. بيز ستارخانلار، باغيرخانلار، حوسئن باغوانلار يولا سالميشيق، شئخ محمد خيابانيلري، لاهوتيلري مئيداندان چيخارتميشيق، سن يامان داريلديرسان! دئديم: گل اوتور بير سيغار ياندير.

قوجا آجانين سؤزلري حاجزادهيه اوت وورور، اؤزيله آپارديغي فدائيلره دئيير: سيز بوراني بو کافتاردان تحويل آلين! من ياريم ساعاتاجان قاييديرام و کلانتريدن کوچهيه فيرلانير. او فيرقهده مشروبو ديلينهده وورماياجاغينا سؤز وئرديگي حالدا، اؤزونو ياخيندا اولان مئيخانايا سالير و بير قاب مشروبلا بير بؤيوک ليوان ايستهيير. مشروبو آلار-آلماز ليوانا اندهرير و مزهسيز، شبچرهسيز قورت - قورت باشينا چکير. سونرا دا مئيخاناچينين پولونو وئريب قائيدير. فدائيلر هر شئيي، اوزون برنولاري، کوله برنولاري، کمري سيلاحلاري، فيشنگ احتياطيني باتونلاريني هر نه کي وار تحويل آليرلار. لاکين، حاج زادهنين اورگي هله سويوماييب. او بير سؤز آختاريرکي قوجا آجانانين آتماجاسينا بلکه جواب اولا. اوباتونلاري گؤزدن گئچريب دئيير: بونلارين بئچهيانالارى بس هاني؟ (حاجزادهني کلانتريده دؤينده ابراهيم وکيله دئيرديلر باتون گتير. اودا هر دفعه دئيهردي: هانسيلاردان مردانا يا بئچهيانا؟ هميشه ده اونلار بئچه يانا ايسترديلر، بئچه يانالارين آجيسي داها آغير اولاردي. بدنين هاراسينا دگسئيدي. گؤم - گؤي گؤيردردي). ابراهيم وکيل هئچ انتظار گئتمهدن دئدي سوخموشوق سنون هرچيبترووه! حاجزاده بو سؤزدن اود توتوب آليشدي. او ابراهيم وکيلين ياخاسيندان توتوب آفتوماتي قوجانين بوغازينا دايادي، فدائيلر بونو گؤرونجه قوجاني حاج زادهنين چنگيندن قورتارديلار. ابراهيم وکيل داها ديليني قويموشدو قارنينا. او سويا دوشموش سيچان کيمي ديوارين ديبينه سيغينميش و تيترهييردي. حاجزاده سياههني فدائيلردن آليب، کلانتريني فدائيلره تاپشيردي و اؤزو گوزاريش وئرمگه کوميتهيه قاييتدي. اورايا چاتار - چاتماز دئديلر: يولداش پيشهوري سني ايستهييب. حاجزاده برک فيکره گئتدي، پيشهوري نهدن خاطيره اونو ايستهميش. او پيشهوهرييه درين حؤرمت بسلهديگي حالدا اوندان چکينردي. او قاپييا تققه وروب ايچري گيردي و سلام وئردي، پيشهوري اونو گؤرجک اليندهکي قلمي ميزين اوسته آتدي و بير آزدا آجيقلي دئدي: سن مهيه سؤز وئرمهميسنکي دا ديلووه مشروب ديمهسين؟ گؤرونور سن يا چوخ ايرادهسيز آدامسان، يا دا قول - قراريني ييرسين! حاجزاده دئيير يوخ، رفيق پيشهوري من نه ايرادهسيزم، نه دهکي قول - قراريني اونودانام. آنجاق او ابراهيم وکيل منه دئيهن سؤزي سيزه دئسه ايدي، من بير قابينان آجيغيمي اوتدوم، سيز هئچ ايکي قابينان دا آجيغيزي اوتانماسيز.

- بو ابراهيم کيمدي؟ او نئجه جاناواردي؟

- او بير چورموش رضاشاه آجانيدي، باشي گورا تيترير، آمما ديلي آداما اود وورور.

- آمما سنين، دئدين آدي نهدي؟

- ابراهيم!

- هه، سنين بو ابراهيملا نه شوخلوغون؟

- منيم اونونلا شوخلولوغوم يوخدي. گئتميشديم کلانتريني تحويل آليم، دؤنوب منه دئيير: بورا قوجا تبريزدي. بيز ستارخانلار، باغيرخانلار، حوسئن خان باغوانلار، علي مسيولار نه بيليم کيملر شئخ محمدخيابانيلر يولاسالميشيق، گل اوتور هله بير چوبوق پوسگورک، منيم ده حيرصيم باشيما ووردو اورادان چيخديم بلکه حيرصيمي سويودوم، بير وقت گؤردوم مئيخانادايام. بير قابينان حيرصيمي سويوتدوم، سيز اولسايديز هئچ ايکي قابينان دا بلکه سويومايايديز. پيشهوري گولوب اونا ياخينلاشدي و دئدي آتالار دئييبلر بير آجيياندا، بيرده گئجيينده اؤزونو ساخلا، سن تئاترا يارانميسان، قاييت صحنهيه!...

حاجزاده اوندان سورا حتا عؤمرونون سونوناجان مشروب ديلينه وورمادي. او صحنهده جيدي فعاليت گؤسترديگي حالدا، دوستلارينين ايصراري ايله ستارخان آتليلاري جيبههيه يوللاناندا اونلاردان ايستهييرکي اونو دا اؤزلري ايله آپارسينلار. فيرقه داغيلاندان سونرا، ذوالفقارينين آتليلاري اونو ياخالاييب آتيني و سيلاحيني آليرلار و زنجانين قان دوندوران قيش گئجهسينده اونو آللاه اوميدينه بوراخيرلار.

اونلاردان بيري دئيير: بير گولله حرام ائتمگه گلمز. قوي گئتسين شاختا اؤزو قرارين قويار. حاج زاده پيادا و الي يالين تبريزه يولا دوشور. تبريز قويوب گئتديگي تبريز دگيل، هر يئرده قان، اؤلوم، دهشت حؤکم سورور، تئاتر باغلانيب، بعضيلري توتولوب، بعضيلري گيزلنيب، ميلي اورکستر دار- باداغين اولوب، نه بير سؤز ائشيدن وار، نه بير هارايا چاتان. ائوي غارت اولوب، هر يئره اوز گتيرير قاپيلاري باغلي گؤرور، گئنه قارا گونلر ديش قيجيردير. بير گون بوردا، بير گون اوردا، بير گون سينمانين بيليت ساتان کيوسکوندا گئجهلري سحره چاتديرير. بير آخشامدا دالداناجاق فيکري ايله چارپيشاندا داليدان بير نفر اونو چاغيرير، دؤنوب باخير آدامي تانيمير، آمما آدام داليدان گلن ايکي توفنگچييه ايشاره ائدير: آپارين! اونلار حاج زادهني ساليرلار قاباقلارينا. حاج زاده اونلارين ايشارهسيندن آنليرکي، اونو 7ـ نجي کلانترييه آپاريرلار. بر ايل اول همين کلانتريني تحويل آلديغي گون ممد باديمجانچينين دئديکلري يادينا دوشور، آجي گولومسهيير...

اونو کلانترييه تحويل وئرديلر. هله نه ياخشيکي اذيت ائلهمهديلر. شايدده تازا گلن مامورلار اونو تانيماديلار. زيندانين دفترينده فيرقه زيندانيلري اونو گؤرونجه ايچرييه خبر وئرديلر و بير دقيقه چکمهدن ايچريدن هوررا سسي اوجالدي. حاج زاده زيندانين ايچري حيتينه گيرنده مينلرله فيرقه زيندانيسى حيته گلميش اونو گؤرمک، اونونلا گؤروشمک ايستهييرديلر. گئجه حاج زاده سون گونلر باشيندان گئچنلري نقل ائلهدي. باشيندان نه بلالار آشيرميش و نه تهلوکهلره توش اولموشدو. زندان چوخ باسان - باسان ايدي. او قدر آدامين ال - اوز يوماسي ايچون ايکي دانا سو شيري وار ايدي. حاج زاده الي شيره چاتاندان سونرا شيري ياريمجيق آچدي. ايکي اووج سو اوزونه ووردو، ايستيردي اللرين يوسونکي دالدان بير تانيش سس اوجالدي «ستارخان آتليسي، کؤپک اوغلو، قيرناني ائله آچمازلار. اودونوب باخاندا ممد باديمجانچيني گؤرور. ممد ايستير سؤزونه ايدامه وئرسين، حاج زاده اونا مجال وئرمير و دئيير: آژدان، سن منه دئدين يامان، من سنه دئيهرم مامان. بونو دئيه - دئيه او چيلتيک چاليب بورجودور. باديمجانچي اوزدن گئديب شير باشيندا دورانلارين گولوشلري آلتيندا اوردان اوزاقلاشير...

بير گون حاج زادهني مولاقاتا چاغيريرلار. حاج زادهنين هئچ واخت گؤروشو اولمازدي. بونا گؤره ده او تعجوب ائدير و اؤز - اوزونه دئيير:

اولمايا ايشتيباه اولوب. بونونلا بئله گئيينيب گئدير گؤروش يئرينه. گؤروش يئري برک ايزديحام ايدي، هايکويدن قولاق توتولوردو. آمما حاج زاده گؤروشه گلنلرين آراسيندا ساري قولوخاني گؤرور، ساري قولوخان دا اونو گؤرور. خوش - بئشدن سونرا (قولو) رضاخان دئيير: دئديم بير گليم سيزلري گؤروم. وکيلکئشيک سوروشورکي کيمي ايستيرسن؟ دئييرم: ستارخان آتديلاريني. دئيير: دئييم کيم گليبدي؟ - دئنه باغيرخان پياداسي گليب. سني اونلارين ايچينده گؤرمهديم، دئديم، چاغير، سنينلهده بير حال - احوال ائلهييم. روز- روزگارين نئجه گئچير؟ بيرآز سيغاردان - فيلاندان گتيرميشم. حاج زاده دئيير: خان چوخ لوطف ائلهميسن، منه خجالتليک وئرميسن. سونرا سالار (ساري قولوخان) چؤنورکي، حاجزاده عفو عومومي اوچون مجليسده دانيشيليب، آذربايجاندا او قدر ظولم - سيتم اولوب، ناحاق قانلار تؤکولوبکي، به قول معروف، او قدر شور اولوب خان دا باشا دوشوب. بو گون - صاباح آللاه قويسا زينداندان بوراخيليرسان. دئييرم صلاح اونداديرکي، بير حلال سود امميشيني تاپاق، يئرووي سالسين، پالتارووي يوسون، ياماسين، غذاوي پيشيرسين، بلکه بو وئيلانليقدان قورتاراسان!

حاجزاده دئيير: سالار، منيم نه ائويم وار، نه ائشيگيم وار، نه ايشيم وار. بو هاردان اولار؟

- آکيشي. بير آروادين قارنيني دويورماغا نه وارکي؟

- آمماخان، بئله اولماسينکي، من اونا آرواد اولوم!

- بئله بوش سؤزلر دانيشما، مينرسن بوينونا، سورهسن هارا ايسته سن!

بو سؤز بئله قالير تا حاجزاده آزاد اولور. اونلارائشيکدن، ايچريدن سُوراغلاشيب حاجزادهيه بير دول آرواد تاپيرلار. حاجزاده گئدير ائو اوسته. آرواد اول چوخ قوللوق ياراشديرير، او حاج زادهنين باشيندان گيريب آياغيندان چيخير. آروادين يانيندا بير ده بير گيديکاريوار، دئيير، خالام دير. منيم چوخ زحمتيمي چکيب، اونو آللاه اومودونا بوراخانمارام. خالا ياشي آلتميشي آشسا دا چوخ قيلديريم قاشدي. بير گون حاج زاده ائوه گلنده خالا قاچير قاباغاکي، بو گون ائوه ماما گلميشدي. گليني يوخلادي، او بويلودور. حاج زاده بو سؤزدن ائله ديسکينيرکي، اليندهکي قاتيق چاناغي زويوب دوشور يئره... حاجزاده تعجوبله دئيير: بير هله اوچ آى اولماييب کي، ائولنمشيک، آمما من هله هئچ... خالا عيشوه ايله دئيير: هله سن بونا بير باخ! بني آدمه ياخشيليق يوخدور. خالا دئيير: من سنه موشتولوق وئريرم، عوضينده سن قاتيق بارداغيني يئره چيرپيب مني بولاشديريرسان. حاجزاده اؤز يانيندا دئيير: بالام ائله بيل دوشاب آلميشيق، ميراببّا چيخيب...

او، چؤنوب خالايا دئيير: آخ بو ايش آدمدن خاتمه هاردا گؤرونوب، بلکهده او اؤزونو مريم بيلير؟ آمما من... آرواد حاجزاده آغزيني آچيب دانيشماغا مجال وئرمير. اونو ساغدان، سولدان توپارلايير.

- سن بو سؤزلري ديليوه آليب دانيشما. آرواد دئديگين آهنروبادير. بيرده گؤردون حامامدا اوتوروب يويوندوغو يئرده سککيدن قاپدي، عوام کيشي، هوپپاداني هوپ ائلهدي. حاج زاده ديشي باغيرساغيني کسير، آمما صلاحي اوندا گؤرور سحر آچيلانا قدر سسيني چيخارتماسين، سونرا گؤرسون باشينا نه چاره قيلابيلر. آروادين اؤزوندن ده لال - کار بير کلمه سس چيخمير. خالا گؤرور حريف بوينونا آلمادي، اؤزوده اولاردان دگيل کي حيهتي، ائوي اونون اوزونه چکهسن. بونا گؤرهده ايکينجي پردهني اويناماغي قرارا آلير و باشين آتيب ياتير. آمما حاجزاده ايلان ووران ياتير، او ياتير. سحره ياخين بير قيشقيريق سسينه يوخودان ديک داشلانير. خالا نهکي گوجو وار باغيرير: واي يانديم، واي الوولانديم!... حاجزاده يئريندن قالخيب گلير و سوروشور: خالا نه اولوب؟

- نه اولاجاق، آدي باتميش سانجيب.

- هاراني سانجيب؟

- دئمهلي ديي! ضربان ائلهييب، سن بس هارانين کيشيسي سن؟ بير آز مرهمدن زاددان تاپ گتير.

- بس اوباجين قيزي هانسي جهنمده دي؟ من گئجهنين بو واختي مرهمي هاردان تاپيم؟

- او دونن گئجهدن ناخوشلويوب اوزوقويلو دوشوب. تئز اول، نئيه مات - مات منه باخيرسان؟

حاجزاده وازليندن، پارافيندن بير شئي تاپيب گتيرير و دئيير: آلا بوندان سورت، او ضربان ائيلهين يئره!...

- بودوها سنه سورتمهلي گتيرديم! بونو دئييب، تومان کؤينکلي قاچير کوچهيه، تؤوشهيه- تؤوشهيه ساري قولوخانين کوچه قاپيسيني دؤيور. اودا قاپييا چيخيب حاج زادهني او حالدا، تومان- کؤينکلى گؤرونجه دئيير: سوبايليقدا گئجهلر گئدردينکي، گئج اولوب، اينده سحر آچيلماميش گليرسن؟ دانيش گؤروم نه اولوب؟ حاجزاده قيزارا - قيزارا ماجراني نقل ائدير. ساري قولو خان دئيير: ايش کيشي باشينا گلر، نييه بئله ال - آياغووي داغيديرسان؟ اونون شرريني سووماخ منيم بورجوم، آنجاق سؤز وئرکي، او آروادا بير شعر قوشاسان. حاج زادهنين قاشلاري چاتيليرکى:.

- خان آغا، سن ده ائله بيل شوخلوغا واخت تاپميسان. سحر آچيلسا، او منيم آبريمي قاپي - قونشو ايچينده تؤکر: منى بىآبير ائدر! هئچ بيلمهديم گئجه قصدي نه ايدي. آدي باتميش اونو سانجانماز، او آدي باتميشي سانجار...

رضا (قولو) خان سوروشور: هله او کافتارين آدي نهدي؟ حاجزاده دئيير بيلميرم. او اؤزو دئيير آدي زوبئيدهدير. قولوخان دئيير: هر واختکي شعري يازيب گتيردين، من ده او اژدها خدجهسىنين شرريني سنين باشيندان سووارام.

رضا (قولو)خان حاج زادهني ائوه تکليف ائلهدي، آمما او اوتانيب اوردان چيخير. شاختا آدامين آمانيني کسيردي. او گؤرور کوچهده قالسا دوناجاق. گيرير حاماما. حامامدا جاني قيزيشير، باشلايير خومارلانماغا، شعر گليب قونور دوداقلارينا:

زوبئيده، جان زوبئيده، جان زوبئيده،

بو شهري تاپميسان هاردان زوبئيده

تمامن دوققوز آيدى بوردا قيشدى،

بو قيش لاپ خلقين احوالينا ...شدى،

زوبئيده، جان زوبئيده، جان زوبئيده،

حيتده ياغدي قار، قالدي قالاندي،

دئسه تاپديم کؤمور هر کس يالاندي

سويوقدان دا......غيم لاپ خيردالاندى...

زوبئيده، جان زوبئيده، جان زوبئيده،

حامامدان چيخاندا گون ياييلميشدى، حاجزاده اوز قويور قوليخان گيله. قاؤينى چالير. سارى قوليخان سسلهنير: کيمدى؟

حاجزاده دئيير: خان منم!

- دئنه گؤروم شعرى قوشموسان؟

- خان سالار قوشموشام!

* * *

25-1324 نجي ايل (آذربايجان دموکرات فيرقهسينين قودرتده اولدوغو ايل، آذربايجاندا آرتيستلره و صحنه صنعتينده اولانلارا چوخ خوشبخت بير ايل ايدي. آذربايجان تئاتري بوتون شهرلرده خصوصيله تبريزده چوخ رونقلنميشدي. تئاتر اؤزو اوچون تازا ايمکانلار طلب ائديردي. تانينميش آرتيستلردن بيري، محمدعلي رشدي، منيم ايبتدائي مکتبده موعليميم اولموشدو. او منه ائله مدرسه ايللريندن قاراداغلي دئيهردي. اونون سون ايللر، منيم کيتابخانادا ايشلهديگيم ايللر، اورا گل، گئدي اولاردي. تبريز ماعاريف ايدارهسينين تفتيش ايدارهسي، بير سيرا نومايشلره کئچميشده «ناروا - ناموناسيب» مؤهورو يئديگي اوچون وضعيتين دگيشمهسيله «روا - موناسيب» اولموشدولار. بونلارين بير سيراسي چاپ اولموش، يا هله ال يازماسيندا ايديلر. رشدي اونلاردان نُوت گؤتورردي و من نوت گؤتورمکده اونا يارديم ائدرديم. بو ايشدن ساري من شير خورشيد صحنهسينه و يا آخشاملار بالاباغا (ارک باغينا) باش وورارديم. بوگؤروشلرده اورداکي آرتيستلردن و بو آرادا ميرزا باغير حاج زاده ده اولاردي. ياديمدادير رشدي بير گون ويکتور هوگونون «بينوايان» اثريندن کاوروشون ماجرالاريني آيريجا دفتره چيخارماغي خواهيش ائتدي. ظاهيراً اونو بير نومايشنامه حالينا گتيرمک فيکرينده ايدي، من چيخارديغيم يازيني اوخوياندا آرتيستلردن نئچهلري بيرده ميرزا باغير حاج زاده اورادا ايديلر. او، ديالوقلارا درين ديقت يئتيريردي. نئچه گون اوندان سونرا صؤحبت آراسي او سوروشدو: اوخودوقلارينين ايچينده بير «دلقک» سيماسيندا بيري اولوب؟ آز فيکيرلشندن سونرا دئديم: نييه، فرانسه ديلينده چوخ گؤزل بير قرائت کيتابي وار، کيتابين آدي ......... دير. اوندا بير «بوم - بوم، سيرک دلقکي»، عنوانلي بؤيوک آرتيستيدن بير ماجرا نقل ائديب، او قدرکي ياديمدادير کتابين اصليني بير ولايتي يازيچي يازميش اولا. قرار بئله اولدو ياخين گونلرده من او ماجراني نقل ائديم، اوقولاق وئرسين. سونکو قرار اونونلا ايدي.

ماجرانين مضمونو آشاغا - يوخاري بئله ايدي.

«پاريسين ايشچي محلهلريندن آبئس آديندا بير محلهده بير ايشيچي عاييلهسي ياشايير. عاييلهنين آلتي ياشيندا فرانسوا آديندا بير اوشاقلاري وار. فرانسوا اولدوقجا چئويک و شن بير اوشاقدير. بير گون آنا سحر اوشاغي ساغ - سلامت مدرسهيه آپارير. آمما ناهارا ياخين اوشاق قيزديرمادان پؤرتموش و هذيان دئديگي حالدا ائوه قايتاريلير. آنا ال - آياغيني ايتيرير. اوشاغين آتاسي اوزاق يئرده ايشلهيير. اونا خبر وئرمک ايمکاني يوخدو. آنا مورتب اوشاغين آياقلارين يويور، آلنينا ايسلاق حؤوله سالير، اونو بير کليمهده اولسون دانيشديرماغا چاليشير، اونون اويونجاقلاريني گؤزونون اؤنونه دوزور. چاليشير اوشاغا سود ايچيرسين، آغزينا قايناتما داميزسين، آمما اوشاق بوتون بونلاري قايتارير و حالسيز دوشور. آخشام آتا ائوه گلير، ماجرادان خبردار اولور. ايندي دوقتور ال چاتماز دير. اوشاق بو حالدا قالارسا سحره قدر الدن گئدهجک... فرانسوا، اوغلوم نه ايستيرسن؟ بو حالدا اوزونو و بيزي نيگران قويورسان. فرانسوانين آغزي و گؤزلري يومولودور، قولاقلاري اشيتمز. آتا، بالاجا اوتاقدا او طرف بو طرفه گئدير کئپىسيني الينده اووجدورور و آخيرين دفعه سوروشور، فرانسوا بير کليمه دانيش بيزي سئويندير: سن نه ايستيرسن؟ فرانسوا بيردن دانيشدي: من بوم بومو ايستهييرم! بوم - بوم، آتا فيکره دالدي. بو سؤزو او هاچان و هارادا ائشيتديگيني شاشدي. آلني قيرشدي و باخيشلاري کئچميشي جيرماقلادي. بيردن دوداقلارينين جؤجولرينه بير گولوش قوندو. بير اؤتري ايشيق اونون ذهنيني آيدينلاتدي. يادينا گتيردي بير ياي آخشامي سيرکده بوم بوم (دلقک) چوخ مهارتله آسلانير، او بنددن بير آيري بنده سيچرايير، سيرکدهکي اوشاقلاري هل - هلييه گتيرير. فرانسوا يوزلرله اوشاقلا آتيلير- دوشور و دلقکين اوجادان يئره هوپپانما سيله موزيک «بوم - بوم» سسي ايله ايکي ضربه آلير و يوزلرله اوشاق بير سسله بوم - بوم دئيه باغيريرلار. فرانسوا گئجهنين بو چاغي بوم - بوم ايستهييردي. آتا دونوب يئرينده قالدي. او بوم بومو هاردان تاپا بيلر؟ سيرکه قدر اوزون - اوزادي بير يولو گئتمهلي اولدو.

سيرکين برنامهسي قورتاريب، قوروجولار سيرکي يئر به يئر ائدير ديلر. بيريندن بؤيوک آرتيستين اوتاغيني سوروشدو. قوروجولاردان بيري دئدي: اينانا بيلميرم او ايندي بورادا قالميش اولا. بونونلا بئله او اوتاغا طرف يئريدي. بورکونو بو اليندن او بيري الينه آلدي. قاپييا ضربه ووردو، ايچريدن بير گور سس «بويورون» دئدي. قاپيني آچماغا جسارت ائلمهدي. قاپيني ايکينجي دفعه دؤيدو. بو دفعه قاپيني ايچريدن اوجا بويلو، ياراشيقلي، شيک گئيينميش بيريسي آچدي و طرفين کيم اولدوغونو بيلمهدن اونو ايچرييه يول وئردي. آتا باخيشلاري يئره تيکيلي، خجالتدن بئزميش حالدا ساييلي کلميهلره داياناراق دئدي: آدي فرانسوادي، يايدا سيزي سيرکده گؤروب يوخودان آييليندان بايليبدي. ايندي سيزي ايستهيير، حالي اولدوقجا ياماندير... دلقک قالين شينئليني چيگنينه اؤرته - اؤرته دئدي: اينديکي بالاجا فرانسوا مني ايستهيير ائله بو آياق گئتمهليييک.

آتا ايلتيماسلي سؤزلر ايله چاليشدي دئسين: گئجه بو وقتسيزه چتين اولاجاق، يول چوخ اوزاقدير، آما دلقک اونو ائشيتميرکيمي يولا دوشدو...

ائوه چاتاندا آتا بوم بومو قاباخلاييب ائوه گيردي. او شادليقلا اوجا دان دئدي: فرانسوا، بوم بوم، بوم بوم بيزيم ائويميزده دير. گؤزلريني بير دقيقه آچسان اونو گؤره جاقسان. فرانسوا بير لحظه ديرسکلندي گؤزلرين آچدي. باخدي، سونرا يئنه گؤزلري يومولدو و ديلي توتار - توتماز دئدي: من بوم - بومو ايستهييرم. بو، بوم - بوم دگيل. آتا و آنا حئيران اونا باخيرلار. آنا گؤز ياشلاريني ساخلايا بيلمير. آتا اوزو ديوارا باشي آشاغي، سيماسي دالغين دايانيب بوم - بوم ديله گلدي: فرانسوا دوغرو دئيير، من اونون ايستهديگي دلقک دگيلم. او بير لحظهده گؤزدن ايتير، اوتوراجاغا درين بير حوزن چوکموشدو. بو فاصلهلرده حاج زاده اؤزونو ساخلايا بيلمهديگيندن ديوارا طراف چونموشدو. اونون حتي بير دفعه گؤزلرينين ياشلاري اللريني ايسلاتديغيني گؤردوم. منيم ده حاليم اوندان ياخشي دگيلدي. ياريم ساعات کئچمهميشدي قاپى تاغواز آچيلدي. بو دفعه بوم - بوم اؤزو ايدي. قيرميزي پيرتلاشيق ساچلار. اوزون قاشلار، جؤجولر قولاقلارا قدر چکيلميش، قوندارما بورون، شينئل، چکمهلر. او اؤزو ايدي. او ووقارلي کيشي اوتاغين اورتاسيندا ماياللاق سالدي و آياقلاري يئره چاتاندا لنگرلي سسله دئدي بوم - بوم! فرانسوا گؤزلرين آچدي. سولموش دوداقلاريندا اينجه گولوش چوکدو او ياتاقدا اوتوروب، دوروب اوجادان سئوينه - سئوينه دئدي بو، بوم - بوم دي. بو، بوم - بوم اؤزودي. نئچه لحظه حوزن ايله دولو دخمهده شادليق آشيب داشيردي. اوندان سونرا بير هفته آبئس محلهسينين سکنهلري هر گون آخشام بير کالسکهنين فرانسوا گيلين قاپيلاريندا دايانديغيني گؤروردولر. کالسکهدن اؤزونو اؤرتويه چولقاميش بير آدامين کالسکهدن يئنيب ائوه گيرديگيني و بير ساعات سونرا اونون ائوي ترک ائتديگيني گوروردولر. آخير گون فرانسوادا يارانان سولغونلوق آرادان گئتميش، او ساپ - ساغ اولموشدو. آرتيست اوراني ترک ائدنده آتا يامان تشويشده ايدي. او بو بؤيوک کيشينين خجالتيندن نئجه چيخاجاق. او يئنه بؤرکونو الينده اووخارلير و قيريق کليمهلرله آرتيسته دئمگه چاليشير. سيز بؤيوک زحمت چکميسيز. من بيلميرم بو هامي زحمتين عوضينده نه ائده بيللم؟ اليمدن نه ايش گلر؟ بؤيوک آرتيست دئير: بو سؤزلر دانيشماغينا دگمز، سيزمنه ايجازه وئرين کارت ويزيتيمين اوستونده يازيلميش «پاريس سيرکينين دلقکي بوم - بوم» ون سونونا بو سؤزلري ده آرتيرم : «و بالاجا فرانسوانين ايختيصاصي دوکتورو».

بو ماجرا آرتسيتلر آراسيندا بؤيوک هيجان ياراتدي و سونرالار ائشيتديگيمه گؤره حاج زاده اونا ديالوق حاضيرلاماقدا ايدي. لاکين تاسفلر اولسون کي، حاديثهلر ماجرالاري ياريمچيق قويدو. حاج زاده هئچوقت بودرين اينسانليق دويغوسو ايله يوغرولموش ماجراني اونوتمادي، بونو تورکجه صحنهيه چيخمارتماق آرزوسو اونون قانيله قاريشدي. 1340 ايللرينده فورصتدن فايدالانماقلا بير سيرا يازيلار کيمي روزنامهلرين بيرينده چاپ ائتديم. او روزنامهنين ورقيني آييرميش و جيبينده گزديرردي. کيم بيلر، بلکه بير گون «تفتيش بدني»ده اونودا تاپيب پروندهيه قوشموشدولار.

حاج زاده 1325 دن سونرا

1325 و 26 نجي ايللري حاج زاده زيندان چکير. او «موتجاسيرلرين» عفو قانونو تصويب اولاندان سونرا بير چوخ زيندانيلر ايله آزاد اولور. زيندانيلرين بير چوخونون اعداما، يا آغير حبسلره محکوم اولدوقلاري اونو سيخير و روحوندا آجي خاطره ايزلري بوراخير.

او زينداندان آزاد اولاندان سونرا گئنه ايشسيزليک، گئنه سرگردانليق چکير. هر وقت هاوايا بولود گلنده اونو توقيف ائديرلر. سوال - سورغويا چکيرلر: سن فيلان يئرده فيلان سؤزو دانيشميسان، هانسي خبري هانکي آداما وئرميسن؟ سنکي دئييرسن دا ايندي مشروب ايچميرسن، نه اوچون اونلارلا گل - گئديوي کسميرسن؟ بو موزاحيمتلردن هئچ زامان حاج زادهنين ياديندان چيخمايان بير حادثهنين او «عميد ديوان» دان سؤز دوشنده نقل ائدردي. عميد ديوان او توخوملوق شهرباني افسرلريندن بيري ايدي. هئيوره بير جانا وار ايدي. وزني يوز اوتوزدان اوسته ايدي، درجهسي سرگورد ايدي و هميشه تبريز کلانتريلرينين بيرينده رييس ايدى. او بير بوينو يوغون موستمليکه افسري کيمي ساغي - سولو آياقلاييب کئچردي. دئيهرديلر سحر قليان آلتي بير ال جگر، اورک، بؤيرک و بير قاب پاچا ايشکنهسي ايله نوش جان ائدردي. او قزوينلي ايدي و تورکو ايله فارسيني قاتاردي و اؤزونه خاص بير ديل دانيشاردي. البته، اونون بو قولدور و قولچوماق اولدوغو اوز يئرينده تبريزين شوخ و جورأتلي آداملاري اونونلا باش - باشا قوشار، آخشام آلا تورانليغيندا عميد ديوانين يولو اوسته بير تينده گيزلنير و او کئچنده برکدن اونا «پورسوق!» ائدرديلر. بو ايش او قدر تکرار اولدوکي، او هميشه کوچهده ايکي نفر بوينويوغون آجان ايله حرکت ائدردي.

حاج زاده دئيير: بير گون ناهار يئمهميشم، پاساژدان ياواشجا سويروشورم داش مغازالارا، بلکه اورادا بير شئي تاپيب يئيهم کي، بيردن عميد ديوان آجانلاري ايله اوزبه اوز چيخدي. اصغر قزيل ديشين کمرينده بير «دستبند»ده وار. عميد ديوان دئدي «حاج زاده وا ايستد»، دوردوم. اصغرخان تفتيش بدني کند. اصغر ياخينا گئديب دابانلارين يئردن قالخيزيب عميد ديوانين قولاغينا پيچيلدادي. ظاهراً دئدي کوچهده تفتيش بدني ائتمهگين ياخشيلغي يوخدو. اونلار مني بير خلوته چکديلر. عميد ديوان دئدي «حوسئن وکيل صورتجلسه يازير». حوسئن اليندهکي کاغاذلارين آراسينا کوپى کاغاذي قويدو و اوستونده يازدي «صورتجلسه». اصغر قيزيلديش جيبلريمي گزدي. بيردانا ال - اوز قورولاما دستمالي، نئچه دانا اوشنو سيغاري، ياريم جعبه جب سينا، اوشنونون کاغازيندا بو سؤزلر يازيليب: ويلون ويلونم کرد، وارد زندانم کرد، حالاکي ميري به غربت، آسياوش کن بد مروت. اصغر کاغاذي اويان - بويان ائدير اوخويور، بير شئي باشادوشمور. عميد ديوانا اوزادير: قوربان باش تاپماق اولمور، رمزدير، خط ده اؤز خطي دير، عميد ديوان کاغاذي آليب، بارماقلاري آراسيندا ساخلاييب، چاليشير اوخوسون: ويلون، ويولونم کرد، يعني چه؟ واريدي تهرونم کرد، يعني چه؟ حالا که ميري به غربت، آسياوش کن بدمروت! اينها چييه؟ اصغر قيزيل ديش دئيير: قوربان، حتماً رمزدير...

عميد ديوان دئيير: سن دؤولت ايله مزاح ائلهرن، دادگاه جوابيني وئرير:

حاج زادهنين ايشي کلانترييه چکير. باز جولوق دوام ائدير. عميد ديوان سوروشور: ايندي سن نه ايش گؤروين؟ حاج زاده دئيير: من دللالليق ائديرم. عميد ديوان دئيير: دئ کي، وطن دللالىام. حاج زاده دئيير:

- رييس، منيم ددهمدن بير اوزوک قاليب نئچه ايل وار اونو ساتا بيلميرم، وطني هاردان ساتاجاغام؟ وطني ساتانلار مشروطه اينقيلابيندا بؤيوک ماليکلر و تاجرلر ايدي.

اونلار روس و اينگليس سفارتلرينه پول وئريب اونلارين بايراقلارين آليرديلار کي، لازيم اولاندا اونو ائولرينين يا تيجارتخانالارينين دامينا تاخسينلار کي، اينقيلابچيلارين اونلارلا ايشلري اولماسين!

بوردا حوسئن وکيل ال قالديريب دئيير: - قوربان، بو سؤزون جوابيني اجازه وئرسيز، من دئييم: بو هله آدين سياسي قويوب، آمما بيلمير هانسي بايراغي آلماق حلالدي، هانسيني آلماق اولماز، چونکي حرامدي. قيرميزي بايراغا پول وئرمک حرامدي، او بيدينلرين بايراغي دير، آمما شاهدان- شاها نه عئيبيوار. سن ايران پادشاهينين بايراغي عوضينه روس پادشاهي يا اينگليس پادشاهي بايراغي وور. سونرا بؤيوک بير معمايا جواب وئرميش کيمي باخيشلاري اول عميد ديواني، سونرا، اصغر قيزيلديشي داها سونرا حاج زادهني گزدي. اونا تکجه حاج زاده آستادان جواب وئردي: عغليوه دوعا يازيم، هله پيس - پيس آدين دا وکيل قويوب!...

پرونده «اؤزوم اولسم - رمزي ايله شهربانييه گوندريلدي. اوردا چوخ سؤزلردن سونرا دئييللر بيزيم اليميزده محرمانه گوزاريش وار کي، سن ايران کومونيستلري ايله چکسلاواکي کومونيستلري آراسيندا رابيط سن، بونون جزاسي اؤلومه قدر وار.

حاج زاده نين کوفرو چخير، اطلاعاتدا سسين سالير باشينا کي، کؤپک اوشاغي، ايت اوشاغي، دونن يازيق قارداشيمي، معصوم اوشاغي برمهگور ائلهديز. بو گون ده منيم اؤزومه پاپيش تيکرسيز؟ آي عدالت، آي قانون، آي مجليس، آي سازمان ميلل، گلين گؤرون بونلار من يازيق آدامدان نه ايستيرلر؟ ايش پيس يئرلره چکير، رييس نظميه اؤزو دخالت ائدير. دئييللر: بير نفر تاپ تا سنه ضامين اولسون، حاج زاده دئيير گؤندرين حسن قرهبوغ گلسين. شؤعبه رئيسي دئيير: او اولماز، چونکي اوندان دا گزارش وار. نئچه گون قاباق مئيخانادا دئييب ائله بيل روسلار گلير. حاج زاده دئيير: منيم اوندان ساواي آداميم يوخدو. دئيين او گلسين منه ضامين اولسون، من ده اونا ضامين اولوم. اونلار بو ايشي باشلاريندان آچماق اوچون بو ايکي باشلي ضمانته بويون قويورلار.

حسن قرهبوغ گلير، او اوتاغا گيرنده شؤعبه رئيسي قيافه توتوب دئيير: حسن گئنه نه بارا قويموسان؟ حسن دئيير: نه اولوب؟ شؤعبه رئيسي دئيير: نه اولاجاق، مئيخانادا دئميسن روسلار گلير. حسن دئيير: هله من ده دئييرم بس نه اولوب؟ او تلفون هاني؟

- تلفون اوردا، آمما تلفونلانه ايشين وار؟

- هئچ نه، تلفون ائلهييرم گلمهسينلر!...

1950 - 1952 نجي ايللرده صولح و قورتولوش حرکاتي دونيادا يوکسلير. آتوم بومبونون آمريکاليلار طرفيندن ژاپونون هروشيما و ناکازاکي شهرلرينده پارتلاييشي و شورالار بيرليگينين بو قودرتي الده ائتمک تلاشلاري بؤيوک بير رقابته چئوريلير و بو رقابت دونيا صولح و قورتولوش حرکاتيني بير عومومي دموکراتيک قيميلدانمايا چئوريلير و «من صولحه سس وئريرم» نيداسي هر يئره سس سالير. پيکاسونون باريش گؤيرچيني ماوي بايراقدا دالغانير و بوتون خلقلري باريش و دموکراسييه چاغيرير. ميرزا باقر ذاتاً بو حرکاتا قوشولمايا بيلمز ايدي. بئش ايل قانا بويانميش تبريز، هله يارالاري ساغالماميش بير اجتماعي - اينقيلابي حرکت اوجاغينا چئوريلير. «آذربايجاني نجات وئرمک» اوچون آپاريلان قتل - غارتلر، آمانسيز اولدوغو حالدا خلقي سارسيتماميشدير. صولح بيانيهلري «من صولحه سس وئريرم» هر طرفدن ائشيديليردي. حاج زاده ده بو آخينا قوشولموشدو. مرکزي حکومت قورخور و اؤزلري دئميشکن بو حرکت آيري بير دموکرات فيرقهسينين يارانماسينا سبب اولماسين دئيه، اونو قينيندا بوغماق قرارينا گلميشدير.

حاج زاده جوربه جور بهانهلر ايله تئز - تئز شهربانيه آپاريلير و سئوال - سورغويا آلينيردي. بير دفعه ايطيلاعات رييسي اوندان سوروشدو: آخي صولحون گؤيرچين ايله نه رابيطهسي اولا بيلر. او دئيير: ايندي گؤيرچيندير چوخ چکمزکي ماياللاغي اولاجاق.

تبريز زنداني دولوردو بو شاليردي و اورادکي محبوسلار ايستر ايشچي، ايستر دانيشجو، ايستر موعليم يا موحصيل و کاسيب حاج زادهنين يولونو گؤزلهييرديلر. حاج زادهنين شيرينکارليقلاري، دولغون ديالوقلاري هر دفعه گلنده تازا ماجرالار و ائشيديلمهميش «جوک» داغارجيغي ايله گلمهسي، زيندانين داريخديريجي حياتيني شنليگه چئويريردي. او گونلر حاج زاده اؤزونه تازا بير مشغله سئچميشدي. بو مشغله ائو کرايه ائتمک ايستهينلره ائو تاپماق ايدي.

تصادفاً بو آرادا دموکراتيک جمعيتلر اوچون موناسيب ائولري تاپماق دا اونون عؤهدهسينه دوشوردو. او بو ائولرين بيريني کلينيک آدينا، بيريني آموزشگاه شبانه، بيريني اسناد دفتري آدينا اجاره ائدير. وقت اولور بو ائولر لووا گئديرلر. گليب حاج زادهني آپاريرلار. گئنه سيم - جيم کي، سن بو ائولري توتاندا نييه بو اجارهچيلرين کيم اولدوقلاريني اؤيرنمهميسن. بو ايش اؤزو دؤولته - مملکته بؤيوک خيانت دگيل؟ حاج زاده دئيير: باش اوسته بوندان سونرا هر کس ايستهسهکي اونا ائو تاپام، دئيهرم اول گئت سوء سابيقه گتير، سونرا دانيشاق.

اوردا دقتله اوزونه و بؤرکه باحير و دوداق التي دئيير «علي آقا» لاپ قورومساق اولدون گئتدون. سونرا گليب کلانترينين قاپيسيندان باشيني ايچري اوزادير و دئيير: اسدخان (اسدخان کلانتري رئيسينين کيچيک آديدير) منيم بؤرکومو دگيشديرمکله نه اولاجاق؟ اگر هونرين وار منيم بئينيمي دگيشدير...

2ـ اصغر داواتگر اوغلو ناييب کاظم، قديم نظميهچيلردن ايدي. اوداها قوجالميشدي. آمما ياخشي آدام اولدوغوندان هله ناييب اولليک درجهسى ايله وار - گل ائدردي. بير گون حاج زاده گؤرور بير قادين حامامدان گلير. ناييب کاظم دا کوچهده اوز به اوزدن گلير. بو آرادا بير نظميه سرهنگيده هاردانسا اوردا تاپيلير. ناييب کاظم سرهنگين الينه باهانا وئرمهمک اوچون، ياناشيرکي آروادين چاديراسين باشيندان آچسين. ناييب کاظمين الي آروادا طرف اوزاناندا او باغيريرکي «ناييب کاظم! سنده قورومساق اولدون؟» حاج زاده ناييب کاظمين يانيندان سووشاندا ائشيديرکي سرهنگ اونا دئيير! صاباح اؤزونو ايطلاعاتا، تانيتديرسين. علي آقا بونو هاردان ائشيدير ششگيلانا جارساليرکي: ناييب کاظمي ايطيلاعاتا ايستهييبلر، صاباح اؤزوم گئده جاغام، اولارا نيشان وئرهجاغام!...

حاج زاده شهرين بوتون دليلريندن و «دوببه لريندن» خوشو گلير، اونلارلا خوش - بئشي وارايدي. بعضن دئيهردي: کاش من ده اونلاردان بيري اولايديم، آمما حئييف اونلاردا اولان قورخمازليق منده يوخدو. او، آرزولاردي «علي بئداوام» اولسون. او دئيهردي «علي بئداوام» آغلير، اونون آغلاماسيني من دويورام، گؤز ياشلاري صوراتلارينا يوخ، دامجي - دامجي ايچرسينه دامير. او گؤز ياشلاريني چؤرهيينه ياوانليق و ايچديگي اسپيرته مزه ائلهيير...