علیقلی حیدرزاده

او گونون اودی وار اوره ییمیزده!

ایل وار گونه  ده یمز  ایللر ایچینده

نه بیر آدی واردی نه بیر نشانی

گون وار ثقلتیله ایللر ایچینده

بیر ایله بنزه ییر اونون هر آنی

بلی دئمه سینلر بو افسانه دیر

گونون ده بو قدر حکمی اولارمی

قدرتیم چاتماییر گوسته ریم بیر-بیر

او گونون قوردوغی مین احتشامی

او گون قرار وئردی

امضا دا قویدی

قوی ائللر سیلاحا ساریلسین داها

ظولمون سینه سینی سونگویله اویدی

اولسون او چیخماسین دئدی صاباها

خالق دولت یاراتدی او گون او سحر

دوستلار سئویندیکجه آغلادی دوشمن

چکدی کئشیینی آغ گونون ائللر

دئدیلر قارا گون گورمه سین وطن

گونش نفسیله اریتدی او گون

پاسلی زنجیرلری داش زندانلاری

آنا یوردوموزدا انسان عمرونون

او گوندن باشلاندی آزاد آنلاری

او گون قاناد تاخدی شعره صنعته

قلبیندن اود آلدی هر سونموش اوجاق

آزاد دوشونجه یه صاف محبته

او  اولدی یوردومدا ان بویوک دایاق

او گون هر قاپینی دویدی الیله

آچ دوغما دیلینم گلمیشم دئدی

او گونون سئوینجین کیم اولچر ایلله

حقیم وار من دئسم او قرینه دی

آچدی عدالتین حاقین دیلینی

او انسان اوغلونا حورمت یاراتدی

او قیشدا  گه تیردی باهار فصلینی

گول آچدی یوردومون عشقی مرادی

سیرامیز محکم دی  جرگه میز متین

آذرین شعاری دیلیمیزده دیر

صاباح دویوشرکن غالبیتین

ان گوجلی سیلاحی الیمیزده دیر