درینلردن یوکسه لیریک

 

درینلردن دالغالانیر بیزیم دنیز

درینلردن اوجالیریق هر آندا بیز

درینلردن پایلاشیریق یاز سئوگیسین

درینلردن  هایلاشیریق سئودا سسین

درینلردن بیرلشیریک

داملا داملا قوجاقلاشان

دنیز  بویدا دالغالانان سولار کیمی

درینلردن گله جه یه یوللانیریق

یورولمایان  یوللار کیمی

درینلردن کؤکله نیریک

آنا تورپاق سارسین کؤنول یاراسینی

گؤزو یولدا یار بوینونا

سالسین قولون بنوشه لر سارماشیغی

چالسین سازین ائل آشیغی

درینلردن دورولوروق بولاغ کیمی

زیروه لری اؤپن گونش

چیمیزدیرسین دان اولدوزون

ساوالانین گؤی گؤلونده

درینلردن پایلاشیریق

یوز ایللرین نیسگیل دولو ناغیللارین

 

 

 

گونو گوندن آلچالانلار

گئریلیگین لش قوخوسون

یاز گؤزله ین فیدانلارا اسدیرمه سین

درینلردن یارپاقلانیر اورمانیمیز

یابان خزان گؤز وورماسین گولوموزه

دیازلیقدا بوغولانلار

قارانلیقلا یوغرولانلار

سئرتیلماسین اوزوموزه

درینلردن بیرله شیریک

غیرتی دیللرده دستان

نور قایاسی آذربایجان

آلقیشلاسین گله جگی

سئوگیمیزین نغمه سیله

اؤزگورلوگون شن سسیله

درینلردن دالغالانیر بیزیم دنیز

درینلردن اوجالیریق هر آندا بیز

                                                      اسماعیل جمیلی