من وارام

من وارام مین ایللره یئنیلمه ین

ظالیم زامان باسقیسینا باش ایمه ین

بیر گون سلطان ساوالان تک اود پوسکورن

اوره گ اودو داشی یاخان

بیر گون درین دردین اودان

وولکانینی یاتیشدیران

بر گون دولو بولودلاری

زیروه لرده باریشدیران

اؤلکه اؤلکه اؤزگورلوگون

قوشلارینی اوچوشدوران

من وارام

بیرگون دردلی اوره گ کیمی

بیر گون اینجه ایپک کیمی

بیر گون پولاد بیلک کیمی

من وارام ائلیمین سارسیلماز گوج ایله

من وارام ده دم ده ده قورقود بیلینج ایله

من وارام تاریخ یازان اولو بابک قلینج ایله

من وارام نسیمینین انالحق هارایندا

من وارام فضولونون غزل سارایندا

من وارام ستارخانین غیرتینده

نگار هجر زینب پاشا جراتینده

من وارام اوزه ییرین نغمه سینده

شهریارین نیسگیل دولو سینه سینده

قارا داغدان قارا باغا اوزانلارین ساز سسینده

من وارام پارچالانان اوره گیمین اوتایندا بو تایندا

من وارام لایلا لارین گوی قورشاغی قانادیندا

دونیالار بزه ین اینجیلر دنیزی آنا دیلیمله

انسانلیغا نظامیلر مولانا لار بخش ائدن ائلیمله

من وارام آذزبایجان دنیاسینین سوفره سینده

کور اوغلونون داغ تیتره دن نعره سینده

یارینلارا اومودلانان آرزولارین دوداغیندا

یئنیلیگین یاشیللانان بوداغیندا

من وارام آزادلیغین سوراغیندا

خوش آرزویلا سئوگی دولو اوره گیله

شن یاشایش دیلگیله

من وارام وارلیغیما اویونه اویونه

وقتسیز سولان چیچگیمه دویونه دویونه

من وارام اؤلکه بویدا بیر دوستاقدا

اسلانلارین دؤزومونده

درین آیدین گؤزونده

قورتولوش عشقینین وولکان کؤزونده

من وارام

وار اولاجاغام چاغلا ایره لیین یئپرانماز

دار گونده یئلماز

ده ده قورقود بیلینجیله اولو بابک قلینجیله

اسماعیل جمیلی