داریسقال کوچه لرده

 

اسگی جانلی جنازه لر

گئرییه یورویورلر

یوز ایللرین اپریمیش یوللاریندا

یورولمادان بئزمه دن

داریسقال کوچه لرده

لشلرین سورویورلر

یئنی جیغیرلاری گؤرمه دن

یوبانان ساباحلاربویلانماسین

پارام پارچا آرزوموزون

قان بویالی دیواریندان

گؤیه رن خیاللار الین اوزسون

سازلی سؤزلو کؤنلوموزون باهاریندان

 

 

آیدینلیغین عزاسیندا هالای چکیرلر

قیفیللی قافالار

اولدوزلاری سوکورلر

قوتسال یاراسالار

شیشیریلمیش اؤلولر یئنگه سیز قالماسین

 

قارا قورخو  قاسیرغاسی

چوروک چیرکین مویدالارلا

دان یئرینین پئشینده دیر

کندیرله نن گؤیرچینلر

گؤز یاشیله سحر یولون سولاماسین

سئوه نلری قینایانلار

 گؤزگولری داشلاییرلار

گؤره ن گؤزلر گؤزه لیگین

پاریلتیسین پایلاشماسین

 

داریلمادان

اولدوزلاری

گؤزلرینین آرخاسیندا قوناقلا

آرزوموزو یارینلارا گؤتورسون

اؤزگورلوگون تومورجوغون

 اوره گینده قونداقلا

یاز گلنده داغ دره نی گولدورسون

                                                           اسماعیل جمیلی