ناکام اولمهرم

دؤيوشلرده برکيميشم، پيشميشم

قورخو ندير، اؤلوم ندير، بيلمهرم

آنامين سودونه من آند ايچميشم

وطن آدين اورهييمدن سيلمهرم

آزادليق اوغروندا قانيم تؤکولسه

مزاريمين اوستوندن يوللار چکيلسه

ساچلاريم آغارسا، بئليم بوکولسه

دوشمنه باش اييب سجده قيلمارام

شيرين آرزولاريم يئرين آلماسا

وطنيم ذيللتدن آزاد اولماسا

خالقيم سئوينمهسه، ائليم گولمهسه

اورهکدن شاد اولوب منده گولمهرم

شفق اولوب اورهکلره توکوللم

چينار اولوب يوللار اوسته اکيللم

بوداق اولوب يارپاقلارا بوکوللم

شهرت جببهسينه من بوکولمهرم

چيخيب ساوالانا يوردوما باخسام

تبريزين کؤکسونه اولدوزلار تاخسام

ظفر نغمهسينی زيلدن اوخوسام

من "جاوان حوسئنم" ناکام اولمهرم

آشيق حوسئن جوان