اولدوزلار اؤلمزلر  آخارلار

 

سازلار یاندیریلان گونلرده ،  قادا قورخو  توزاناغیندا ، سسلر بوغازلاردا، گولوش دویغوسو دوداغلاردا  بوغولاندا ، هه ره اؤز گوناهسیز جانینین گووه نینین  هارایینا

قالاندا ، آز سایدا سارسیلمادان اوزاق گوره نلرده وارایدی کی اؤزلرینی قوروماقلا یاناشی باشی بلالی ائلینین دردلرینی دوشونوردولر ، چیخیش یولو آختاریردیلار....

قوجامان تبریزین وور توت بیر ییغما موسیقی قوروپو وارایدی کی اودا  کوفولدایان

قارا بورراغاندان  اؤز پایینی آلیب یاساقلانمیشدی .قوندورولان رییس گؤزو باغلی

بیر آندا  آیریلیق نغمه سینین تانریسی علی آقا سلیمینین جان قویوب یاراتدیغی گوروپو

یئر سیز ، ائوسیز و ایشسیز قویموشدو

 استاد سلیمی سازمانی ائوده یاشادیغیندان دولایی ائوینی بوشاتمالی وکوچمه لیدی.

 

غیرتلی گؤزل انسان حسن آغا دمیرچی  سونوندا  ماحمود آغانین یئنی تیکیلمکده اولان

ائوینی باخمایاراق کی سوواقدان یئنی چیخمیشدی  دؤشه ییب علی آغانین وار یوخونو

کی بیر وانت ده اولمازدی اورایا یئرلشدیردی

بیر نئچه گوندن سونرا حسن آغا یومورتا دراغلاریندان حورولموش کیچیک اوتاقدا

بیر نئچه گنج ایله  علی آغانی گؤزلوردولر کی آذر بایجان سورودلاری  کاستینین

مشقینه باشلاسینلار.....

استاد سلیمینین اورکستری بیر گؤزگو کیمی  پارچالاندی هه ره اؤز ایشیغین یایدی

 کمان اوستاسی علی آغا فرشباف ،تار اوستاسی ماحمود آغا شاطریان او  قادا بلالی

گونلرده یاساق دیوارین سیندیریب ائولرده موسیقی اوخوللاری آچدیلار.....

 

 

 

سونرالار حسن آغا دمیرچیده بو کروانا قوشولوب  اؤز موسیقی مکتبینی آچدی.

گونی آذربایجان ملی موسیقیسینین هئچ هامار اولمایان یولونو گئدن  اونو یاشادان ،

استاد سلیمنین  دوامچیسی  اولان ،یوزلر یئنی یئتمه یه موسیقی دونیاسیننین قاپیسینی

آچان ، ملی موسیقیمیزی یاراشان  سویه ده   ائولره داشییان ، یئنی نسله تاپشیران ،

ووقاریله  اینجه روحلو دورو دویغولو گؤزل انسان وفالی دوست  صفالی تار اوستاسی

ماحمود آغا شاطریان دونیاسینی دئییشسه ده سئوگی یولوندا آذربایجان سئودالیلارینین

سونسوز دونیاسیندا  نغمه قانادلاریندا یاشاییر .

 

اولدوزلار اؤلمزلر سؤزگون آخارلار

درین قارانلیغی سوکوب یاخارلار

آیدین*گؤزله بو دونیایا باخارلار

کروان اؤتر

بیری چاتار  بیری ایتر

خزان سولار باهار بیتر

گونش باتار  گونش سؤنمز

اولدوز آخار اولدوز اؤلمز

                                                           اسماعیل جمیلی

                                                          سپتامبر2006کا لیفرنیا

* ماحمود آغانین اوغلو آیدین،آتاسینین اردملی دوامچیسی ، باشاریلی موسیقیچیدیر