داش بئیینلر

 

دیره نمیش کین کاساسی

 یئرتیق دومانلی گؤزلر

آچیلمیش  یالان دولو

کوفسه میش سورتوک آغیزلار

اویوخموش  سیرتیق اؤزلر

قارالتیلار یئغینجاغی

یوز ایللرین اوز قاراسی

قانمازلیغین اویونجاغی

سورو سورو سوروننلر

قارا بختین قارا سینا بوروننلر

اؤلومه موشتولوق ایسته ینلر

دیریلرین قانین سوروب

اؤلولری  بسله ینلر

جهالتین توزاناغی

قوتسال قباحت دوزاغی

چال ساققالی شیشمان شیطان

قیزارمادان بوزارمادان

قان توکمه گه وئرن فرمان

 

میدانچادا یاری گؤمولن بیر انسان

داش بئیینلر اللرده داش

داشلاماغا  یاریشیرلار

بیر قادینی

یارانیشین اوجاغینی

محببتین قوجاغینی

بوزاران گونش بولودا بورونور

اوتانجیندان آخشاما سورونور

قوشلار قیسیلیر اوزاقلارا دورمادان

انساندان اوتانیر انسانلیق هر آن

سؤزه سیغمیر  قوتسال آچیق جنایت

نوختا قیران یوبازلیق کورامال نفرت

اؤزلره  سؤزلره      سوواشان ذللت

                                                                   اسماعیل جمیلی

                                                                  2006-11-03