آذربایجان فدرال دموکرات حرکاتى

دونیا شهرتلی یازیچی، شاعیر و ادبی تنقید چی رضا براهنی ابدیته قووشدو

آذربایجان و ایران ادبیات سماسیندان گینه بیر اولدوز آخیب، سؤندو و آذربایجانلیلارین بایرام شنلیکلرینی یاس و عزایه چئویردی.

گؤرکملی یازیچی، شاعیر و منقد رضا براهنی کانادا اؤلکه سینین قوربتینده چوخ سئودییی آذربایجان و تبریز شهرینی بیر داها گؤرمک حسرتی ایله، حیاتا گؤز یومدو.

رضا براهنی ملتینه، دیلینه و ائلینه باغلی بیر انسان ایدی کی، ملتی نین مظلومیتی نی هر زمان و هر یئرده دیله گتیردیییی اوچون، شوونیست لرین واسیطه سیله چوخلی عذاب، تضییق و حتی بایکوت چاغریلارینا معروض قالدی.

بوتون حیاتی بویو شوونیست لر براهنی نی آنا دیلینه و خالقینا باغلی اولدوغو و بو باغلیلیغی دیله و قلمه گتیردییی اوچون، باغیشلامادیلار.

رضا براهنی آنا دیلینده ن سؤز آچدیغی و منسوب اولدوغو ملت ین حقلرینده ن دانیشدیغی اوچون، شوونیست لرین طرفینده ن پان تورکیست آدلاندیردی.

حالبوکی رضا براهنی نین "جرمی"، باشاردیغی قدر منسوب اولدوغو ملتی نین مظلومیت ینده ن، بو ملته قارشی آپاریلان تبعیض لرده ن و باسقی لاردان یازیب، دانیشماغیدی.

البته رضا براهنی بیر یازیچی دی و بیر حزب و فرقه نین عضوی اولمادیغی اوچون، سیاسته بیر ادبیاتچی و یازیچی عینکی ایله باخیب و ائله او قدر ده بو عرصه ده اشتراک ائتمیشدی.

محمد رضا پهلوی نین سلطنتی دؤورونده رضا براهنی مختلف تضییق لر نزدینده، ساواک ین واسیطه سیله توتولوب، کمیته ی مشترک ضد خرابکاری ده آغیر شکنجه لره معروض قالمیش و بیر مدت ائوین زندانیندادا حبس چکمه یه مجبور اولموشدور.

محمد رضا پهلوی نین سلطنتی دؤورونده آذربایجان تورکجه سینده یازیب- یاراتماق دوفاکتو قدغن اولدوغو اوچون، بیر چوخ آذربایجانلی یازیچی کیمی، براهنی ده اثرلرینی فارسجا یازماغا مجبور اولموشدور.

رضا براهنی یورولمادان هر بیر مجلس ده نه اوچون آنا دیلینده یازا بیلمه دییینی آنلادیردی.

او دئییردی کی، محصل اولدوغو دؤورانیندا بیر دیوار غزه تینده آذربایجان تورکجه سینده مطلب یازدیغی اوچون، مدرسه نین مدیرینده ن کتک یئییب و اونون کتک لری آلتیتدا آنا دیلینده یازدیقلارینی یالاماغا مجبور اولموشدور.

حادثه ده ن اون ایللر کئچمیش اولدوغونا رغما، رضا براهنی ائله بیر دویغو ایله او صحنه نی آنلادیردی کی، مجلس ده حاضیر اولانلار، تحسرده ن گؤز یاشلاری آخیدیردیلار.

رضا براهنی فارسجا یازماغا محبور اولسادا، اونون یاراتدیغی اثرلر فقط ایرانلیلارا عاید دئییل و بیر چوخ دونیا شهرتلی یازیچی و اینجه صنعت خادیمی کیمی، بشریت ین معنوی ارثیه سی کیمی ساییلیر.

اونون اوچون رضا براهنی ادبیات و اینجه صنعت ساحه سینده دونیادا تانینان، بارماقلا ساییلان نئچه نفر ایرانلیلاردان بیری ساییلیر.

اونون فارسی دیلینده یازدیغی "رازهای سرزمین من" و "آواز کشتگان" رومانلارینی اوخویان هر کس باشا دوشه بیلر کی، براهنی بو اثرلری یازدیغیندا یالنیز اؤز ملتی نی دوشونوب و اونلاری مجبور اولاراق فارسی دیلینده یازمیشدی.

اونون "آواز کشتگان" رومانینی اوخویان بیر آذربایجانلی و بیر فارسین دویغولاری مطلق عین اولا بیلمزلر. چونکی براهنی بو رومانی فارسلارا یوخ، آذربایجانلیلارا و ایران تورکلری اوچون یازمیشدی.

رضا براهنی اوستاد شهریارین یازدیغی کیمی "ائل" ینین،  "فارسیجادا دردینی سؤیله ر دیلی" اولموشدور.

بوتون بونلارا رغما گینه ده کؤنول ایسته ردی کی، رضا براهنی هئچ اولماسا بو رومانلاری اؤز آنا دیلینده یازمیش اولسون، لاکن بو آرزودان آسیلی اولمایاراق، بیلیریک کی، بیر یازیچی اوخونماسا، تانیلینماز و سؤزلری کیچیک بیر دایره ده ن کنارا چیخا بیلمز. یازیچی نین آرزوسو داها گنیش کوتله طرفینده ن اوخونماقدی. بو ائله ایراندا بیر چوخ آذربایجانلی یازیچی و اینجه صنعت خادیملری او جمله ده ن غلامحسین ساعدی و صمد بهرنگی نین فارسی دیلینده یازدیقلاری اثرلر حقده ده صدق ائدیر.

بؤیوک شهریار ملتیمیزین بو دردینی نه گؤزل تصویر ائتمیشدی:

"لعنت اول باد خزانه کی نظامی باغینین

بیر یاوا گلبسرین قویمادی کاکللنسین"

هر حالدا او زمانلار آنا دیلیمزده اوخویانلارین سایی چوخ آز اولدوغو اوچون، بلکه بو سؤزلر دوغرو اولا بیلردی، لاکن بو گون آنا دیلیمیزده اوخوماق یاواش- یاواش عایله لرین ایچینه گئدیب و ایراندا گئنیش کوتله آنا دیلیمیزده کیتاب اوخوما و فیلم گؤرمه یه عادت ائله دیکلری اوچون، آذربایجانلی و ایران تورکلرینه منسوب یازیچی و اینجه صنعت خادیملری، مطلق آنا دیلیمیزده یازیب، یاراتمالیدیلار.

رضا براهنی آذربایجان ملتی نین خلف اولاد ایدی.

کئچن یوز ایل ده ایراندا حاکیم اولان دیکتاتورلار و جلادلار، بیر چوخ ضیالیلار کیمی، رضا براهنی نی ده، عمرونون سون ایللرینده راحات یاشاماغا بوراخمادیلار.

اونون یازدیغی کتابلار و یاراتدیغی اثرلر، محمد رضا شاهین سلطنتی دؤورانی کیمی، اسلام جمهوری سینده ده تضییق و محدودیت لره معروض قالمیش و ارشاد اداره سی بیر چوخونون نشرینه مانع اولموشدور.

رضا براهنی محمد رضا شاهین سلطنتی دؤورونده "ایران یازیچیلار اتفاقی" نین بانی لرینده ن بیری اولدوغو اوچون، اسلام جمهوری سی دؤورونده ده، اطلاعات وزارتخانه سی نین مامورلاری طرفینده ن تعقیب و تهدیدلره معروض قالمیشدی.

اسلام جمهوریسی نین گیزلی سرویس لری، ایران یازیچیلار اتفاقی نین بیر نئچه عضوینی - او جمله ده ن محمد مختاری و محمد جعفر پوینده نی - قیلینج دان کئچیردیکده ن سونرا، براهنی ایرانی ترک ائتمک مجبورتینده قالمیشدی.رضا براهنی ایرانی ترک ائتمه سیدی، قطعیا او بیریلری کیمی اودا قتله یئتیریله بیلیردی.

رضا براهنی بوتون عمور بویو ادبیات ایله مشغول اولدوغو اوچون، زنگین و وارلی بیری دئییل ایدی و ایراندا کیتابلارینین ساتیشیندان و یا دانشگاه دان آلدیغی معاش دان یاشاماغا مجبور اولدوغو اوچون، طبیعی اولاراق کانادانین قوربتینده ده چتین لیکلر چکمه لی اولدو.

رضا براهنی بوتون عمرینی اوجا باش و آنلی آچیق یاشادی و قلمی نین شرافتینی قوروماقلا، استبداد، ظلم و حق سیزلیگه قارشی سینه گریب و بو یولدا شاهلیق و شیخ لیق رژیملری نین سونسوز اذیت و تضییق لرینه معروض قالدی. براهنی ازیلمیش و لوبیسی اولمایان انسانلارین یازیچی سیدی.

رضا براهنی، حاکیم طبقه لر واسیطه سیله سسلری و فریادلاری بوغولموش یوخسول و مظلوم انسانلارین یازیچی سی اولدوغو اوچون، بیر چوخ ایرانلی و خصوصیله آذربایجان ملتی نین اوره ییینده و خاطیره سینده ابدی قالاجاقدی.

رضا براهنی تبریز شهرینین "دولان با دولان کوچه لرینده" بویا باشا چاتیب، تهران شهرینده بیر چوخ یازیچی و شاعیرلرین یارادیجی لیغینا دامغا ووروب، کانادا اؤلکه سینده "کانادا قلم انجمنی نین- پن-" صدرینه یوکسلدیکده ن سونرا، ابدیته قووشدو.

آذربایجان ملتی ایگیت اولادی رضا براهنی نی اونوتمایاجاقدی.