دونيا آناديلى گونو موبارک اولسون!

چوخ ميللتلى ايران اؤلکه‌سينده يالنيز فارسجا رسمى ديل تانينير. ايران اهاليسى‌نين چوخونلوغو فارس اولمايان  ميللتلر ديرلر. فارس ديلى ايجتيماعى، سياسى و مدنى باخيمدان حاکيميتين ديلى و آپاريجى ايدئولوژيک وسيله‌سى اولاراق اوستون دورومدا دير. دؤولت بودجه‌سى بوتون اهالى‌نين قويدوغو امگين بهره‌سى ديرسه ده،  ماعاريف پايى تکجه فارس ديلى‌نين آدينا دوشور. باشقا ديللرده تحصيل آلماق و مدرسه‌يه گئتمک مومکون دگيل. اونلار اؤکسوز و اؤگئى ساييليرلار!

ميللى دیللرین یاساقلانماسی تمامن سیاسی بیر آماج داشى‌يير و بیر چوخ ايقتيصادى و ايجتيماعى- سياسى ائشیتسیزلیکلرين یولونو آچير. مقصد اوزون وعده‌لى پیلانلار اساسيندا موستملکه وظولم بويندوروغو آلتیندا ياشايان میللتلری پاسیولشدیریب آسيميله ائتمکله کيمليکلرينى اونلارا اونوتدورماقدير، اونلارى اؤزلرینه یابانچی ائديب، حاکیم میللتین اوستونلوگونو و سلطه‌سينى سورکلى اولاراق  دوام ائتديرمکدير.

ايکى قات باسقى آلتيندا ياشايان ميللتلرين حقينده آپارتايد و شوونيستى سياستلر پهلوی‌لر دؤنمینده و ايسلام جومهوريتينده آرديجيلليقلا تطبيق ائديليبدير. ايسلام جومهوريتى ده بير میللت، بير دیل قورماق خولياسى ايله غئير فارس میللتلرین دیلينی یاساق ائديبدير.

هر ايکى رئژيم، پان فارسيزم ايدئولوژيسينى سيستماتيک و رسمى اولاراق باشارديقجا اعمال ائتميشلر. ايسلام جومهوريتينه يان ساخلاييب پان فارسيزمه وورولموشلار، ساغ و سول مئييللى اولمالارينا باخماياراق آردى  آراسى کسيلمه‌دن دائما آرياچيليغى و پان فارسيزمى تبليغ ائديب ديرى ساخللاماقلا اونون عؤمرونو اوزاديرلار.

رسمى دیل، کولتور و بونلارلا باغلى قورومولار دؤلتين ايدئولوژيک سولطه‌سينى و حاکميتينى تامين ائديرلر. ايسلام جومهوريتى‌نين پان فارسيزم، آرياچيليغا سؤيکنن پان ايرانيزم و شيعه‌چيليک اساسيندا قورولان پان اسلاميزمى ايله غئير فارس ميللتلرى بير ميللت اولاراق محو ائتمگه جان آتير. رئژيم اؤز وارلیغينی سوردورمک اوچون غئير فارس ميلتلرى موستملکه دوروموندا ساخلاماليدير.

غئيرفارس ميللتلر، رئژيمين سوردوگو سياست قارشيسيندا ديره نير و مقاومت گؤستريرلر. آذربايجانليلارين و تورکلرين مجال تاپيب ييغينجاقلاردا و ايدمان ياريشلارى عرصه‌سينده وئرديکلرى شعارلارين و ايرلى سوردوکلرى ميللى ايستکلرين نومونه لرينى شاهيد چکمک اولاندى:

 

اؤز ديلينده مدرسه           اولماليدير هر کسه!

هاراى هاراى من تورکم!

منيم ديليم اؤلن دگيل       فارس ديلينه دؤنن دگيل!

 

بيرلشميش ميللتلر تشکيلاتى‌نين و يونئسکونون  قرارلارى ايله فئورال آيى‌نين ۲۱- جى گونونو دونيا آنا ديلى گونو آدلانيبدير. مظلوم ميللتلر بونو اورکدن قوتلاييرلار. بو حاديثه بين الخالق عرصه‌سينده، دموکراسى اوغروندا آتيلميش بير آدديم دير.

آنا ديليميزى رسمى‌لشديرمک و ميللى حقلره چاتماغا گؤره آرديجيل و دواملى دؤگوش گرکدير. سيويل اطاعتسيزليگى  داهادا گوجلنديرمک و يئنى موباريزه يوللارى تاپماق بونا يارديمجى اولا بيلر.

ايراندا ياشايان ميللتلرين آراسيندا ال‌بيرليک و آرخاداشليق ياراتماقلا،  لائيک ، ميللى، دموکراتيک و  فئدئرال ايران جمهوريتينى قورماق اولاندى. غئير فارس ميلتلرين کيمليگى‌نين و وارليغى‌نين رسمى صورتده تصديق ائديلمه‌سى‌نين يولو گونده‌ليک موباريزه‌دن آسيلى دير. بير يئرده ياشاماق،  قارشيليقلى سايغى گؤسترمکله مومکوندور.

آذربايجان تورکجه‌سى‌نين رسمى‌ ايستاتوسا يييه‌لنمه‌سى، ايران تورکلرى‌نين کيمليگى‌نين دانيلماماسى و رسمى‌اولماسى واز کئچيلمز، آنادان گلمه، دوغال و دموکراتيک حق حؤکمونده دير. اونون اوغروندا موباريزه ائديلمه‌ليدير. حق وئريلمز، آلينماليدير!

دونيا آنا ديلى گونو قوتلو اولسون!

آذربايجان فدرال دموکرات حرکاتى فئورال- ۱۹۹۷ (۲۰۱۹)