آذربایجان فدرال ـ دموکرات حرکاتینین مركزى شوراسى

گونئي آذربايجان ميللي آزادليق حركاتينين نائيليتلريني قوروماليييق!

ديرلي يورتداشلار،

بؤيوك تاريخي اوغورلارا ايمضا آتماق اوچون بيرطرفدن ميلتده ايستك و حاضيرليق باشقا ياندان محيط، بؤلگه و دونيادا مثبت دئيشيكليكلره موناسيب زمينه اولماليدير. بوگون گونئي آذربايجان هر ايكي باخيمدان اونا اعمال اولان ظولم دستگاهي يئرينه، ميللي دؤولتچيليييني برپا ائديب آزاد ياشاميني قورماق شانسينا ماليكدير. طبيعي كي ميللي آزادليق اؤزو-اؤزباشينا باش وئرمير و ميلتدن آييق و ساييق اولماق هابئله ميللي حركاتدان حدسيز فداكارليقلار و يوكسك سياسي اينتلكت طلب ائدير. بير ايل اؤنجه آمستردام بياناتي ميللي بير همرأيليكله قبول اولوب، ميللتيميزي سئوينديريب و دوشمانلاريميزين آجيغيني قازاندي.

بو تاريخي نائيليتين ايلك ايلدؤنومو عرفهسينده ميللي حركاتين قووۂلري سيراسيندا بير سيرا خوشاگلمز و هئچ توركو سئوينديره بيلمهين اوز-اوزه دورمالار باش وئرمكده دير. اصلينده ميللي بيرليگيميزه، ميللت و حركاتين بوتون قانادلاريني بيرلشديره بيلن بيرسيمولون قبول اولماسينا دائير موباحيثهلر، نظرده آلينميش مجراسيني آشيب، ميللتيميزه خئير بركت گتيرمهين يؤنلر تاپميشدير. ميللي حركاتين ماي قياميندان بوگونه كيمي سوركلي اينكيشافي و كوتلهويلشمهسي هابئله سون ايلياريمدا اؤز سيرالارينين ايستيقلاليتينين قوروماسيله، آذربايجان تورك ميللتينين سياسي پتانسيليني آكتوئل سياست مئيدانينا گتيرميشدير. بوگون بيزيم ان قدار دوشمنلريميز ده داها بيرده دونيانين اسگي داباندا فيرلانماسينا ايناملاريني ايتيرميش اولدوقلاريني آچيق-آشكار اعتيراف ائديرلر. چوخدان بريدير كي ميلتيميز و وطنيميز، بو قدر اؤز آزادليغينا قووشماغا ياخين اولماميشدير. هر توركه اوميد و سئوينج گتيرن بو تاريخي زامان، بيزدن ده تاريخي مسئوليتميزه لاييق داورانيش طلب ائدير.

آذربايجان فدرال دموكرات حركاتي، ميللي حركاتين بوتون قوللاريني ايشبيرليگي و بير-بيرلرينه سايقي و حورمتله ياناشماغا چاغيرير. بيز اينانيريق كي، ميللي بيرليگيميزين حقيقي سيمولو و سيمگهسي اطرافيندا بيرلشمهيه، يالنيز هرطرفلي ديالوگ و راضيلاشمالار يولوايله نائيل اولماق اولار. حتي اگر بو پراسئسده بوتون ميللت و حركاتن بوتون قووهلري ايشتيراك ائده بيلمهسهلر ده، اگر نتيجهيه آپاريب چيخاران پراسئس دوزگون و الده اولونان نتيجه منطيقي اولورسا، ميللتيميز اونو دستكلهيهجكدير. آمستردام بياناتينين ميللي قووهلر و فيكير صاحبلري طرفيندن مثبت قارشيلانماسي بو حاقدا گؤزل بير اؤرنك اولماليدير.

هر ميللي حركاتين بيرليك رمزلري اولدوغو كيمي آذربايجان ميللي آزادليق حركاتينين ده ميللي سيمووللارا ائحتياجي واردير. بو بوشلوغو آرادان قالديرماغين يولو يالنيز و يالنيز دييالوقدان كئچير و عومومي راضيليق اولمادان، باشقا قووهلري هده-قورخو يا تكفير گوجوايله بير راضيلاشماغا مجبور ائتمهنين عكس نتيجه وئرمهسي و بيرليك يئرينه، كين كيدورت يارانماسينا سون هفتهلرده شاهيد اولموشوق.

قيرميزي رنگ بير زاماندير كي استاديوملاردا گنجلر و ميللي فعاللارين طرفيندن گئنيش ايستيفاده اولونور و بير منطيقي پراسئسين نتيجهسي اولاراق، ميللي سيمگه استاتوسو قازانماق شانسينا ماليكدير. ميللي حركاتين سيرالاريندا، قيرميزي رنگين بوگونكو ستاتوسو، اؤزو، اؤزلويونده بير باشاريدير. بو باشاري داخيلده ميللي روحلو گنجلييميزين عذاب اذيتلري باهاسينا الده اولموشدور. وطن ديشيندا چاليشان ميللي قووهلر بو نائليته دوزگون ياناشماقلا، بو سيمگهني، ميللي بيرليك رمزي كيمي قبول ائتمكله، دونيادا تانيتماغا و بينالملللشديرمهيه چاليشا بيلرلر.

سؤز يوخدور كي گونئي آذربايجانين رسمي بايراغي يالنيز ميللي مجليس طرفيندن سئچيله بيلر، آنجاق بو مقام گليب چاتاجا قدر هم آيري-آيري لاييحهلري تبليغ ائتمك ميللي فعاللارين حقيدير و هم حركاتين سيرالاريني سيخلاشديرماق نامينه، بيرگه بياناتلارا ايمضا آتماق مومكون و لازيمدير. طبيعيدير كي، مسئوليت حيس ائدن ميللي قووهلر چاليشماليديرلار كي، بيزي بيرلشديرن سيموللار و سندلرين سايي چوخ، و سيرالاريميزي پارچالايان عاميللرين سايي چوخ آز اولسون. هر باشقا بير ايش كيمي بو يولدا دا، نييتلرين خوش اولماسيندان آسيلي اولماياراق، دوزگون تداروك اولمايان هر چابا، ميللي بيرليك يئرينه، نئقاتيو نتيجهلره گتيريب چيخارا بيلر.

بيز بو يولدا هرطرفلي دييالوقون آپاريلماسينا طرفداريق. بو مقصدله سون هفتهلرده خوشاگلمز قارشيدورمالاري دايانديرماق و آمستردام نائيليتينين ايلدؤنومو عرفهسينده، بوتون طرفلري دييرمي ماسا آرخاسيندا صميمي و مسئوليتلي دييالوقا راضيليق وئرمهلريني خواهيش ائديريك.

بيز اينانيريق كي، وطن ديشيندا بئله بير هرطرفلي راضيليق الده ائديليب، ائديلمهمهسيندن آسيلي اولماياراق، ميللي حركات، اوز نائيليتلريني قورويوب ساخلاماغي لياقتله باجاراجاقدير و بو نائيليتلري، شخصي گوج، لومپنيزم و اخلاقسيزليقلار اوچون سوء ايستيفاده ائدنلر، اؤز سهو ايشلري و پيس نييتلرينده مووفق اولماياجاقلار.

سون اولاراق، هئچ بير اينسانا ياراشمايان، لومپنيزمين بوتون تظاهورلاريني قيناييب، ميللي فعاللاري، سياسي حركاتيله، لومپنيزمين فرقيني آنلامايان آز ساييلي لومپنلرين ميللي حركاتا ياراشمايان عمللرينه آكتيو اعتيراض ائتمهيه دعوت ائديريك. بو لومپنلره شراييط ياراتماق و اونلارين فعاليت موحيطلرينده "محلل" رولو اويناماق، هئچ سياسي فعال، ضيالي و ساغلام اينسانا ياراشماز. آذربايجان ميللي آزادليق حركاتيني اؤز سيرالاريني ساغلام ساخلاماق مئخانيزملريني هميشه آكتيو ساخلامالي و بو يولدا آييق-ساييق اولماليدير.

آذربایجان فدرال ـ دموکرات حرکاتینین مركزي شوراسي

24 نويابر 2010