تريبون: گونئي آذربايجان ضيالي لاري و ميللي فعال لاريندان بير هيئتين اوكتيابر آييندا باكي سفري، هرطرفلي گونئي - قوزئي ديالوقو ايله ياددا قالدي. بير چوخ گٶروشلردن علاوه، آذربايجان جومهوريتي نين مئديا مكاني نين بوتون ايمكانلاري دا بو ديالوقو داها بٶيوك بير آئوديتوريادا يايماغا يارديمچي اولدو. بير چوخ موصاحيبه لر و دييرمي ماسالاردان حاضيرلانميش خبرلر، چئشيتلي مطبوعات اورقانلاري و راديو تئله ويزيا كاناللاريندان ياييلدي. آشاغيدا كي موصاحيبه، آمئريكا سسيله اولموشدور و بوردا "خالق جبهه سي قازئتي"نين اينترنت سايتيندان نقل اولونور. خالق جبهه سي قازئتي نين ژورناليستي تورقوت بو موصاحيبه ني تقديم ائتميشدير.

   "آذربايجان تورکلري نين هدفي دييشمزدير"

علي رضا اردبيلي:  " گونئيده ميللي آزادليق مسئله سي، دئموکراتييا، اينسان حوقوقلاري اساس موزاکيره مؤوضولاريدير "  
  بو گونلرده دونيا آذربايجانليلاري کونقرئسي نين (داک) همسدري صابير روستمخانلي نين دعوتيله باکيدا صفرده اولموش ايسوئچين پايتاختي ستوکهولم شهريندن فعاليت گؤسترن  "تريبون"  اينتئرنئت صحيفه سي نين رئداکتورو علي رضا اردبيلي 1960-جي ايلده اردبيل شهرينده آنادان اولوب.   
 تورقوت

علي رضا اردبيلي دئيير کي، بو گون شاه رئژيمي قالسايدي دا، ايراندا مطبوعاتين وضعيتي اولکي کيمي اولا بيلمزدي:  "سؤزسوز کي، شاه دؤورو ايله موقاييسه ده حاضيردا مطبوعات آزادليغي قات-قات ياخشيدير. چونکي شاه دؤورونده مونوپولييا ايدي، يعني هر شئي رئژيمين الينده ايدي. ياريم صحيفه ليک بياناتي دا چاپ ائتمک اوچون چاپ آپاراتلاري لازيم ايدي. اونون اوستونده اينسانلار حبس اولونوردولار، گوللله نيرديلر و س. بو گون ايسه مين صحيفه ليک بيانات اولسا بئله اونو آچيقلاماق اوچون تئخنيکي ايمکانلار مؤوجوددور" .

اونون سؤزلرينه گؤره، ايراندا ائلئکترون قزئتلر، عوموميتله ائلئکترون اينفورماسييالار ساحه سينده وضعيت ياخشي دئييل:  "ايراندا بو ساحه ده ايکي جور پروبلئم وار. اونلاردان بيري تئخنيکيدير، يني اينتئرنئتين سورعتي چوخ آزدير. ايراندا اينسانا ايشگنجه لازيم دئييل. آوروپالي، غربلي اينسانلار ايرانا گئتسه، اونلارا ايشگنجه لازيم دئييل. اينتئرنئتين آشاغي سورعتي اؤزو اونلارا بير ايشگنجه دير. بو بير رئالليقدير. ايکينجيسي ايسه فيلتئر مسئله سيدير. بوتون موهوم اينتئرنئت سايتلاري، رئژيمين خوشو گلمه ديگي بوتون اينفورماسييا قايناقلاري نين هاميسينا فيلتئر قويولوب. بورادا دا  "سيچان-پيشيک"  اويونو يارانير. بير طرفدن اينسانلار فيلتئرلري سينديرير، ديگر طرفدن، رئژيم يئنيدن بو فيلتئرلري برپا ائدير. بو چتينليکلره باخماياراق، اينسانلاردا اينتئرنئتدن ايستيفاده يه ماراق بؤيوکدور. طبيعي کي، ائلئکترون اينقيلابي بوتون دونيايا تاثير ائتديگي کيمي، ايرانا دا تاثير گؤستريب. اينتئرنئت اينقيلابي نين ان گوجلو تاثيري ديکتاتور رئژيملرينه اولوب. اگر بو، دئموکراتيک اؤلکه لرده حياتين طبيعي بير حيصه سينه چئوريليبسه، ديکتاتورا اؤلکه لرينده جمعيتين سياسيلشميش طبقه سي نين حاکيميته قارشي، دئموکراتييا اوغروندا آپارديغي موباريزه ده بؤيوک بير دسته يه، آلته چئوريلميشدي. اگر 20 ايل اول گونئي آذربايجان 2 حيصه يه - خاريجي و داخيلي حيصه يه بؤلونموشدوسه، و يا شاه دؤورونده شاها قارشي گئدن راديکال و يا غئيري-راديکال سفئرايا بؤلونموشدوسه، بو گون يالنيز بير آتموسفئر مؤوجوددور. يني بو گون تبريزده يازيلان معلومات ستوکهولمدا نشر اولونور، ستوکهولمدا يازيلان يازي اردبيلده اوخونور، تئهراندا نشر اولونان معلومات واشينقتوندادي. ائله اولور کي، تبريزده باش وئرميش حاديثه دن بيز ستوکهولمدا معلومات الده ائتسک ده، بو معلومات هله عنعنه وي واسيطه لرله اردبيله چاتماييب. اونا گؤره ده چوخ واخت بيز اينفورماسيياني داخيلده کي لردن داها تئز آليريق.

گونئي آذربايجانليلاري نين موذاکيره ائتديگي مسئله لرين ماهيتي و يؤنو دييشمير. ميللي آزادليق مسئله سي، آذربايجاندا دئموکراتييا قورولماسي، و س. اساس مؤوضولاردير. آنجاق عئيني حالدا آکتوئل مسئله لر واختاشيري عوض اولونور. مثلاً، سون 6 آيدا ايلک نؤوبه ده ايراندا کئچيريلن پرئزيدئنت سئچکيسينه موداخيله ائدک، يوخسا ائتميک. ميللي کولوريتلي ناميزد اولموش دوکتور اکبر اعلمي يه قارشي مؤوقئعييميز نه اولسون. و يا ديگر ناميزدلره قارشي نئجه موناسيبت گؤسترمه لي ييک. داها سونرا ايسه سئچکي سونراسي پروسئسلره قاتيلماق مسئله سي گوندمه گلدي. بو مؤوضولار واختاشيري دييشير و اولا بيلر 3 آيدان سونرا تام فرقلي مسئله گونده ليگه چيخسين.