بيلديريش

ادبيات و اينجه صنعت خاديملرينين حقلرينين تاپدالانماسينى قيناييب و محکوم ائديريک!

آدليم يازيچى اکرم ايليسلىنين داش يوخو آدلى رومانىنين سون زامانلار روسجا نشرى و روماندا گئدن اؤزل باخيش آذربايجان رسپوبليکاسيندا، دؤولتى و ايجتيماعى محافيلده گرگين عکس العمللرله قارشيلانيبدير. خالق يازيچىسى عونوانى ايله تلطيف ائديلميش ايليسلى حقيقتلرى ساختالاشديرماق و آذربايجان خالقينا تؤوهين ائتمک اوچون تؤهمتلنديريليبدير.

يازيچى، ساوئتلرين چؤکمهسى دؤنميندهکى حاديثهلره، روس قيزيل اوردوسونون يارديمى ايله آذربايجان اراضىسينين يوزده 20- 25 نه قدرينى ائرمينلر واسيطه سيله ايشغال ائديلمهسينه، سوى قيريملارينا، قاراباغين ديدرگينلرينه ... فرقلى باخيش ايله ياناشير.

يازيچىنين يوخاريداکى مسالهلره نئجه ياناشماسيندان آسيلى اولماياراق، اؤز ياشاديغى کيچيک بؤلگهنين حاديثهلرينى عوموميلشديريب، بوتون آذربايجانا تطبيق ائتمهسينين دوغرو و ياخود يانليش اولماسينا باخماياراق کيمسه نين، خوصوصيله ايجتيماعى. سياسى و ايقتيدار اورقانلارينين بير يورتداشى فرقلى باخيشلارى اوجوندان هدهلهييب، اونو و عايله سينى ايشيندن قووب، کيتابلارينى يانديريب و تلطيف ائديلميش عونوانلارينى اليندن آليب، يازيچيلار ايتيفاقيندان چيخاريب، امک حقينى کسيب و ياشاديغى يئرين قارشيسيندا نوماييشلر قوروب، ... و قولاغينى کسمگه جايزه تعيين ائتمگه،هئچ نؤوع حقى يوخدور.

بو آرادا، دؤولت رسميلرى و پارلمان مقاملارينين بير پاراسينين، اؤزلليکله ويجدان و دوشونجه آزادليغينى، صنعت و ادبيات خاديملرينين قانونى حقلرينى قورومالى اولان يازيچيلار ايتيفاقينين دورومو تاسوفلنديريجيدير. بو ايشلر هئچ بير قانونا سيغمايير، عئين حالدا آذربايجان رسپوبليکاسينين آنا ياساسينى پوزماق دئمکدير. بو ايش يالنيز آذربايجان خالقىنين دوشمنلرينى سئوينديرر. رسمى ايقتيدارين و سياسى- ايجتيماعى قوروملارين و خاديملرين بير پاراسىنين بو مسالهيه ياناشما طرزينى محکوم ائديب و قينامالىييق.

بيز بوتون يازيچيلارين و آيدينلارين و صنعت خاديملرينين او جوملهدن اکرم ايليسلىنين آزادجاسينا ياراتمالارينى، دوشونجهلرينين يازيب يايماغينى مودافيعه ائديريک. آذربايجان رسپوبليکاسىنين آنا ياساسيندا وورغولانان کيمى، فيکيرلرين فرقلى اولماسى اونلارين ياساقلانماسينا گتيريب چيخارتماماليدير.

آذربايجان فدرال دموکرات حرکاتى