21 آذرحرکاتینین ایلدؤنومو موناسیبتیله

بو بیر حقیقت دیر برنامه سیز وائلهجه ده تشکیلاتسیز هئچ بیر جيدی سیاسی ایش گؤرمک اولماز. البته برنامه وتشکیلات گرک زمان، مکان و موجود شراییط ایله اوخوسون. اگر موجود شراییط نظرده توتولماسا، لاپ کامیل برنامه بئله آنجاق کاغیز اوسته قالاجاق. 

آذربایجان دموکرات فيرقه سینین موسيسلری ده، او گونکو شراییطی نظره آلاراق 12شهریور موراجعتنامه سی ایله آذربایجان دموکرات فيرقه سی نی قوردولار وائله جه ده ميلی حؤکومتی یاراتدیلار!

آقای پيشهوری و آقای شبيستری آراسيندا آپاريلان اوزون موزاکيره و موکاتيبهدن سونرا نهايت آقای پيشهوری، شهريورين اوللرينده تهرانی ترک ائدیب تبريزه گلمهسی ایله فيرقهنین تشکيلي اوچون بيرينجى قدم گؤتورولموش اولدو. فيرقهنی تشکيل ائدن بو ايکي سيما مملکتين وضعيتيني جيدي صورتده موزاکيره ائتديکدن سونرا بو قرارا گلديلر کي، او وقت حیزب توده تشکيلاتينين صدري اولان آقای بادکانى نی دا جلب ائتسينلر. حيزب توده طبقاتی شوعارلار آلتيندا چاليشديغی اوچون عوموم اهاليني اطرافينا توپلاماغا قادير اولماميشدی. حالبوکي فيرقهنين موسسيسلری ميللي نئهضتی ويجودا گتيرمک اوچون عوموم طبقاتين موعين ميللی شوعارلار واسيطه سيله جلب ائتمک لوزومونو جيدی بير صورتده درک ائتميشديلر. اونا گؤره آقای پيشه وری، آقاي شبيستری و آقاي بادکان اوچ گونلوک موزاکيره دن سونرا بو قرارا گلديلر کی، آقاي پيشه وری و آقاي شبيستری اول دموکرات فيرقه سی آدی ایله ميللی بير تشکيلات ويجودا گتيرسينلر. آقای بادکان ايسه توده تشکيلاتلارینين باشچيلاری ايل موزاکيره ائديب ايکی فيرقه نين بيرلشمهسینين وسايیلينی فراهم ائتسين. بو تصميمدن سونرا آقای پيشه وري ايله، آقای شبيستری دموکرات فيرقه سی نين تشکيلينه باشلاديلار. او وقته دک فارس شوونیستلرینين آپارديقلاری تبليغات سايه سينده، آذربايجانلی اؤزونون ميللی خوصوصياتينی ايظهار ائتمگه جورأت نيشان وئره بيلمه ديگی اوچون مساله فوق العاده جيدی بير مساله ايدی، خلق عوموميتله ايسته ديگينی آشکار صورتده ديله گتيره بيلميردی. اونا گؤره ساده بير صورتده خلقه ياناشيب، فيرقه تشکيلينه دعوت ائتمک نتيجه وئره بيلميردی. بونو نظره آلديقدان سونرا آقاي پيشه وری فيرقه نين بيرينجی کتبي مدرکي، فعاليتين بونؤوره داشی اولان معروف 12- مادده لي « اون ايکي شهريور موراجيعتنامه»- سينى آذربايجان و فارس ديللرينده قلمه آلدی، بو موراجيعتنامه بير عيده آزاديخواهلارين ايمضاسينا يئتيشديکدن سونرا شهريورين 12 - ده مونتشير اولدی.

ايکي گون موراجيعتنامه دن سونرا آذربايجان روزنامه سی اينتيشار تاپدی، بو روزنامه سابيق، آذربايجان جمعييتی نين اورقانی اولوب آقای شبيستری نين مودورلوگو ايله مونتشير اولونوردی. اونا گؤره هامان آد، هامان موديريت ايله ايشه باشلاندی. آذربايجان روزنامه سينی بو دؤوره ده پيشه وری شخصن يازيب اونا موستقيمن رهبرليک ائتديگی اوچون فيرقه نين گونده ليک ايشلری نين آيناسی اولا بيلميشدی. مثلا بيرينجی نومره نين باش مقاله سينده آقای پيشه وری « فيرقه ميز ايشه باشلادی» سرلؤوحه سی آلتيندا بئله يازير: «دوشنبه گونو فيرقه ميزين موراجيعتنامه سی اينتيشار تاپدی. بو موراجيعتنامه خلقيميز طرفيندن گئنيش توجه و بؤيوک رغبتله قارشيلاندی. مينلرجه آذربايجانلی آذربايجان شهرلرينده، موراجيعتنامه ياپيشديريلميش ديوارلارين قاباغيندا توپلانيب اورک دؤگونتوسو ايله اونو اوخودو، دوشوندو، آلقيشلادی، بو واسيطه ايله سعادت و آزادليغی اوچون يول آچيلديغينی حيس ائتدی. موراجيعتنامه نین ديلی اولدوقجا آيدين و صريح ايدی. بورادا خلقين ايستکلری- آرزولاری، احتيياجلاری چوخ آيدين بير صورتده گؤستريلميشدی. بيز ايرانين ايستيقلالينا علاقه دار اولدوغوموز ايله برابر آذربايجان خلقی نين فرهنگی ايختيياراتی و اؤز موقددراتی نين اؤز گوجو ايله تعيين ائتمه سينی آرزو ائديريک. بيز اؤز ديليميزه ده فرهنگ، بئهداشت و دؤولت، ايداره سی طلب ائديريک. اؤز ديليميزه ده کيتابيميز و ادبيياتيميز آزاد بير صورتده ويجودا گلمه سينه خلقيميزين مترقی بير خلق اولماسينا ايمکان وئريلمه ليدير، بيز بيرينجي نؤوبه ده اؤز ائويميز اولان آذربايجاندان باشلاييب بورانين ترقی سينی تأمين ائتمگه چاليشيريق... فيرقه ميز ميللی بير فيرقه اولدوغو اوچون صينيف و طبقه نظرده توتماييب عوموم جماعتی اؤز بايراغی آلتينا چاغيرير....فيرقه سياسي و ايجتيماعي بير تشکيلاتدير، او خلقي هدايت و تشکيل ائده بيلير، لاکين اونا حؤکومت ائده بيلینمز، خلقه حؤکومت ائد ه بيلن تشکيلات ایالت انجومنی اولاجاقدير. بو انجومن گرک دموکراتيک اوصول ايله عوموم خلق طرفيندن اينتيخاب ائديلسين، بوتون دؤولت ايداره لري و اونلارين باشيندا دورانلار اؤز ايشلرينده بو ميللي تشکيلاتا تابع اولوب اونون دستورلاريني ايجرا ائتمگه مجبوردولار. آذربايجان ایالت انجومنی نين بؤيوک سياسی معناسی واردير. بو انجومن تئهران و ايرانين آيری شهرلرينده باش قالديرميش ايرتيجاع و ضيد- دموکراتیک جريانينا مؤحکم بير يوموروق و ديش سينديران بير جواب اولاجاقدير «.

موراجيعتنامه ده آذربايجان موختاريتی نين لوزومو متين و مؤحکم دليللر ايله ايثبات ائديلميش، بو موختاريت انجومن- ايالتی واسيطهسيله تامين ائديلمه سی اورتاليغا سورولموشدور. بو موراجيعتنامه ني ديقتله اوخودوقدا آشکار صورتده گؤروروک کي، فيرقه ايشه باشلاديغی وقت وضعييتی جيدی بير صورتده موطالیعه ائتميش، اؤز شوعارلارينی اونون اوزرينده قرار وئرميشدير.

ایندی ده آذربایجانین وایران تورکلرینین سیاسی فعالاری وتشکیلاتلاری گرک فيرقه نین وميلی حؤکومتین پارلاق عنعنه وسونتلرین گؤز اؤنونده توتاراق، اونون باشاريلارین هميده چاتیشمامازلیقلارین ونوقصانلارین دریندن اؤيرنهرک، بوگونگو وضعیتی و مؤوجود شراییطی نظرده آلماقلا آذربایجان خلقینین وایران تورکلرینین قورتولوش ساواشینی سرانجاما چاتدیرسینلار!

میللی حؤکومت- ین پارلاق عنعنه و سونتلری بونلاردان عبارت دیر:

١)- ٢١ آذر حرکاتی و ميللی حؤکومت دیکتاتورلوغا، ظولمه،عدالت سیزلیگه و سلطنت قورولوشونا قارشی ايدی.

٢)-٢١ آذر حرکاتی و ميللی حؤکومت آذربایجان اوچون دموکراتیک فدرالیزم وایران اوچون دموکراسی ایستهيیردی.

٣)-٢١ آذر حرکاتی و ميللی حؤکومت سؤز آزادليغينی، ويجدان آزادليغينی، مطبوعات آزادليغينی، توپلانتی و تشکيلاتلانما آزادليغينی، فردی آزادليقلارين تامين ائديلمه سينی اينسانليق و يورتداشليق حقوقونون توخونولماز اساسلاريندان سايير و اونون يولوندا موبارزه ائديردی.

٤)- ٢١ آذر حرکاتی و ميللی حؤکومت جيدی صورتده قادینلارین حوقوقوندان مودافيعه ائدیب و ایران تاریخینده بیرینجی دفعه اولاراق، ميللی حؤکومت دؤرونده، قادینلار سئچیب وسئچیلمه حقینه ماليک اولدولار. حتی آذربایجان نومایندهلرينين ایران دؤولتی ایله موذاکيره لرينده انتخابات قانونو لایحهسی ایله علاقهدار قادینلارین سئچیب وسئچیلمه حقینی مرکزی دؤولته تحمیل ائتديلر.

۵)-٢١- آذر حرکاتی و ميللی حؤکومت آذربایجان تورکجه سینی آذربایجاندا رسمی دؤولت دیلی اعلان ائديب و اونون اینکشافینا هر طرفلی ایمکان یاراتدی.

٦)-٢١آذر حرکاتی و ميللی حؤکومت ایراندا یاشایان خالقلارلا دوستلوق وامکداشليغا یول آچدی. او جومله دن تورک میللتی وکورد میللتی آراسیندا دوستلوق وصمیمی همکارلیق قراردادی باغلاندی.

٧)-٢١آذر حرکاتی و ميللی حؤکومت گئری قالمیش فئودال وارباب رعییت موناسيبتلرینه آذربایجاندا سون قویدی و زحمت آداملارینین یاشایيشلارینی یاخشیلاشدیرماق اوچون بؤیوک آدديملار آتدی.

ایندی ده بو عومومی پرنسیپلر اوز قووهتینده دورور. ٢١ آذر حرکاتی و ميللی حؤکومتين اينقيلابی و اينسانی سونتلرينه وفالی اولان هر بير جریان، تشکیلات :

جمهوری ايسلامینین آرادان قالدیريلماسيندان و ایراندا لائیک ودموکراتیک فدرالیزم سیستمینین قورولماقیندان مودافيعه ائتمهليدير!

فمینیزمدن وقادینلارلا کیشیلرین تام حقوق برابرلیگیندن سؤزسوز مودافيعه ائتمهليدير!

ایشچيلرين و زحمت آداملارینین ایستکلریندن واونلارین آزادجاسينا و موستقيل اولاراق سیندیکا قورمالاریندان دايانمادان مودافيعه ائتمهليدير!

آذربایجان تورکجه سی تورکلر یاشایان بولگه لرده رسمی وقانونی دیل اولماسيندان مودافيعه ائتمهليدير!

ایراندا یاشایان باشقا میلتلرله دوستلوق وامکداشلیقدان مودافيعه ائتمهليدير!

آذربایجان فدرال ـ دموکرات حرکاتی

آذر1392— دسامبر 2013