آذربایجان فدرال دموکرات حرکاتی نین بیر مای موناسیبتییله بیلدیریشی

 

ایشچی صینفینه سلام!

 

آذربايجان ايشچى صينفى و زحمت آداملارى پارلاق موباريزه عنعنه لرينه صاحيبديرلر. ایرانين ایلک سندیکالارى و ایشچی ایتحادیه لری آذربایجان تورک ایشچی لری نین چالیشمالارییلا قورولموشدور. . بونا گؤره ده تورک ایشچی لری، پهلویلرین دؤورونده و هابئله ایسلام جومهوریتی نین قارا ایللرینده ان چوخ ظولمه، اذیته و باسقى يا معروض قالمیشلار.

 

ايشچيلر، امکچيلر و بوتون امک پايى ايله ياشايانلارتشکيلاتلانماسالار ايجتيماعى سياسى  حاديثه لره تاثير قويا بيلمزلر و اؤز صينفى ايستکلرينه ده چاتا بيلمزلر. بونا گؤره ده ایسلام جومهوریتی هر جور آزاد و موستقیل ایشچی تشکیلاتى نين قورولماسيندان وحشته دوشور. ایشچی لر و زحمت آداملاری سون 30 ایلده ایسلام حوکومتی نین ایشچی لره قارشى دوشمانلیغینی بوتون وارلیقلاری ایله حیس ائتمیشلر.

 

آذربايجانلى ايشچيلر و زحمت آداملارى، آذربايجانين هانسى بؤلگه سينده ياشاديقلارينا باخماياراق و چاليشديقلارى ايقتيصادى ساحه دن آسيلى اولماياراق ايلک آدديمدا مؤوجود سنديکالارى و ايتيحاديه لرى گوجلنديرمگه و تثبيت ائتمگه چاليشماليديرلار.

 

ایشچی سندیکاسی نین اولمادیغی کارخانالاردا و ایش یئرلرینده اونلاری قورمالیدیرلار و عئين شکیلده فرقلی ساحه لرده چاليشان ایشچی لر قوللارینی چیرمالاییب و اؤز صینفی تشکیلاتلارینی ياراتمالیدیرلار.

 

بللی دیر کی، امنيت اورگانلارينين کونترولی آلتیندا ایشچی ایتحادیه لرینی قورماق راحات دئییل. البته ایتحادیه لرین قورولماسینین ایمکانی اولمادیغی پلیسی شراییطده صینفی ايستکلرينین دالینی توتماق اوچون ایشچی لرین گیزلی مرکزلرینی قورماق لازيمدير. آذربایجانین ایشسیزایشچیلری اؤز تشکیلاتلارينى قورماغا چالیشمالیدیرلار.

 

آذربایجانلی تورک ایشچیلری تهراندا و آذربایجان مرزلرينين خاریجینده کی ایشچی سندیکالاریندا اؤز فراکسیونلارينى ياراتماليديرلار. ایتحادیه سی اولمایان  کارخانالاردا و ایش یئرلرینده ایتحادیه لرین قورولماسیندا و ایشچیلری بيرلشديرمکده آکتیو اولمالیدیرلار.

آذربایجانلی تورک ایشچی سی اؤز میللی هوویتی نی اوزه چکمکله، وطنداشلیق و میللی حوقوقونو مودافيعه ائتمکله ، آیری سئچکیلیک و خورباخماقلا (تحقیر و تبعیض ) موباریزه ده اؤز دامقاسینی باسمالی دیر.

 

ایشچی عينفى نين سون ياريم عصرده کى حرکتى چوخ دگرلی تجروبه لر قازانمیشدیر. و بو تجروبه لردن درس آلینمالی دیر.ایشچی لرین تجروبه لی کادرلاری، چالیشقانلاری و سندیکا چی لار ایشچی ایتحادیه لرينین صینفی مصلحتلری نین و منفعتلری نین جهتینده اولمالارینا چالیشمالی و لازیم اولمایان یئرده سیاسی مسئله لره قاریشماقدان اوزاق دورمالیديرلار

 

آذربایجان میللی حرکتی نین کادرلاری، فعاللاری، محفیللری و تشکیلاتلاری ایشچی لرین مساله لرینه و چتینلیکلرینه توجه ائدیب و ایشچی حرکتلرینده و اونلارین صینفی موطالیبه لرینی قازانماق اوچون آپاردیقلاری موباریزه ده اونلارین یانیندا دورمالیدیرلار.آذربایجان میللی حرکتی ایشچیلرین و زحمت آداملاری نین اعتيمادينى قازانمالی دیر و بو دا آنجاق  ایشچیلرین موباریزه لرینده عملده شیرکت ائتمک و اونلاری دستکله مکله مومکون اولابیلیر.

 

اونوتمامالییق کی آذربایجان میللی دموکراتیک حرکتی تک مضمونلی بیر حرکت دئییل و بئله ده اولماماليدير. آذربایجان میللی حرکتی بوتون میللتین آدینا دانیشماق و گئنیش بیر کوتله نی بسیج ائتمک  ایسته‌ييرسه، کی بئله ده ایسته يير، قادينلارين مساله لرینه و اونلارین ایستکلرینه جیددی شکیلده توجه ائتمه لی دیر و اونلارین یانیندا دايانماليدير، قادینلارین آزادلیغی یولوندا ایسلام جومهوریتی نین قادينلارين علئیهینه تطبيق ائتديگى گئری قالمیش و ایرتيجاعی  قانونلار ايله موباریزه ائتمه لی دیر.

 

عئین شکیلده ایشچیلرین و زحمت آداملارينین گونده ليک ایستکلرینی مودافيعه ائتمک، ایجتیماعی عدالتى، یاشام چئوره سینی و اینسان حقلرينى قوروماق آذربایجان میللی حرکتی نین وظیفه لریندن دیر.

 

آذربایجان فدرال دموکرات حرکاتی نین ایجرائیه هئياتى

7 اوردیبهيشت 1390

27 آپریل 2011