آذربايجان فدرال دموکرات حرکاتینين ايجراييه هئياتی

خورداد آيینين ميلی قيامینين ایکینجی ايلدؤنومونه عشق اولسون!

ایکی ایل اؤنجه 1385- جی ايلين خورداد آييندا، آذربایجان خلقی وایراندا یاشایان تورک میللتی ميلی ظولمه و تحقيره، آیری سئچگیلیگه و حقسيزليگه قارشی عصیان ائدیب بیرمیللت کیمی مئیدانا چیخدی! ميلی شوعورون يوکسلمهسی، تورکلرين بير ميلت اولاراق اؤز گوجونو گؤرمهسی کيمی نائيليتلر گؤرکملی قيامين گئری قاييتماز نتيجهلريندندير.

خورداد قيامی گونلريندهکی «هارای، هارای من تورکم!» باغيرتيسی چوخلارينين يوخوسونو پوزدو، رئژيم باشچيلارينين جانينی اؤلوم تری چولقادی!

خورداد قیامی گوستردی کی آذربایجان میللی حرکتی، بیر بؤیوک ومحتشم ایجتماعی حرکت دیر، اونون گوجو و ایمکانلاری توکنمزدیر!

ايران ايسلام جومهوريتی آيدين آشکار بوتون وارليغی ايله فارس شوونيزمینين منافعينی قورويور. رئژيم، چوخ ميلتلی ايران اؤلکهسينده ياشايان مظلوم ميلتلرين ميلی غنيمی و قانلى سي دير.

ميلتيميزين حقلی موباريزهسينه تؤوطيه آدی قويوماق، اونو ازيب، تاپداييب، بوغونتويا سالماق و غئير قانونو آدلانديرماق کيمی پاس باسميش شيوهلر داها کسردن دوشوبدو. رئژيم اؤزو هاميدان ياخشی بيلير کی، دؤنرگه دونوب و حقينی باشادوشن و گوجونو بيلن بير خلقی هده- قورخو ايله سوسدورماق اولماز. طبيعی حقلرينی ايستهين بير ميلتين سسينی عؤمور-ايتيم باتيرماق، اولاسی بير ايش دئييل!

ايسلامی رئژيم ، آذربایجانلیلارین خورداد قیام لاریندان سونرا، وار گوجونو ایشه سالیب آذربایجان میللی حرکاتینین ایچینده داغینیقلیق یارادیب و اختلاف سالسین ! آذربایجان میللی حرکاتی رئژیمین بو تشبوث لرین پوچا چیخارمالیدیر.

ميلی قورتولوش ایستگی ايران تورکلرينين و آذربايجانليلارين ايچريسينده دريندن کؤک ساليبدير. ١٣٨۵-جی ايلين خورداد قيامی ثابيت ائتدی کی، رئژيمين قوردوغو قورقولار ايستهنيلن نتيجهيه چاتماييبدير و آذربایجان تورک میللتینه گؤردوکلری يوخولار ايستهديکلری کيمی يوزولماياجاقدير!

عزيز وطنداشلار!

تورکون و آذبايجانلینين مسالهسی و ايستگی، ميلی مسالهنين يئرلی – ديبلی، کؤکوندن حل اولونماسيدير! ميلی ظولمون آرادان قالدیریلماسی دیر! بو دا اصلينده سياسی بير مسالهدير. بونون حلی اوچون ميلتين اؤز حاکيميتی اولماسی گرکدير. بوگون ايران ايسلام جومهوريتی بونون قارشيسينی آلان ان بؤيوک مانعه دير.

ميلی ظولمو محو ائتمک اوچون، آذربايجاندا و عوموميتله تورکلرين ياشاديقلاری بؤلگهلرده حؤکم سورن ايقتيصادی گئريده ساخلامالاری دايانديرماق اوچون، ايراندا ياشايان بوتون ميلتلرين اينکيشاف ائتمهسينه برابر ايمکانلار و فورصتلر ياراتماق اوچون، جينسی آپارتايدی و قادينلارين تاپدالانماسينی آرادان آپارماق اوچون، زحمت آداملارينين و يوخسول صينيفلرين حقينده ائديلن عدالتسيزليکلره سون قويماق اوچون ال بيرليک گرکدير! بونون اوچون آذربايجان ميلی حرکاتی، آذربايجانين فمينيستی قادين حرکاتی ايله، آذربايجانين کارگرلرله زحمت آداملارينين حرکاتی ايله سارسيلماز ال بيرليگی و ايش بيرليگی آپارماليدير!

موختليف ايجتيماعی و کولتورل صينيفلرين، قيشرلرين و درنکلرين تشکيلاتلانماسينا جيديتله يارديم ائتمک، آذربايجان ميلی حرکات کادرلارينين تاخيره سالينماز تعجيلی وظيفهسيدير.

آذربایجان فدرال _ دموکرات حرکاتینین خورداد قیامینین بیرنیجی ایل دؤنومو ایله علاقه ده قئید ائتدیگی ميللی حرکاتين ان اؤنملی ايستکلري، بوگون ده بئله اؤز قووه تینده دورور:

- آنا ياسانين (قانون اساسی) دييشديريلمهسی، ايرانين چوخ ميلتلی بير اؤلکه اولماسینين رسمی تانينماسی، دموکراتيک، لائيک و فدرال جومهوريتين قورولماسی

- تورک ديلینين رسمی تانينماسی و تحصيلاتين بوتون مرحلهلرينده اونون تطبيق ائديلمهسی،

- تورک ديلينده سرتاسری تلويزيونون تاسيس ائديلمهسی،

- بوتون سياسی محبوسلارين آزاد ائديلمهسی، خوراد قيامینين سياسی و ميلی – ايجتيماعی نوماييشچيلرينين اؤلدورولمهسی، تاپدالانماسی و ازيلمهسی اوچون مسوليت داشييانلارين جزالانديريلماسی،

- نيطق و يازی آزادليغی، بوتون سياسی، کولتورل و صينفی درنکلرين و حيزبلرين آچيقجا فعاليت ائتمهلرينين و دمونستراسيون آپارماسینين آزادليغی،

- آذربايجانين و تورکلرين ساکين اولدوغو بؤلگهلرين ايقتيصادياتی، پهلويلر دؤورونده و خوصوصن ايسلام جومهوريتینده اعمال اولونان ميلی ظولم و آيری سئچيجيليک سياستی نتيجهسينده سرمايالارين کؤچورولمهسينه و ماهير امک گوجونون گئنيش موهاجيرتينه معروض قالميشدير. بو غئيری طبيعی گئديش دايانديريلمالی و تئزليکله اطرافلی ايجتيماعی- ايقتيصادی گئريليگين قاباغی آلينماليدير!

تهراندا يئرلشن ايسلامی شورا مجليسی تکجه فارس شوونيزمینين اينحيصارچی منافعينی تمثيل ائدير. آذربايجان خلقینين و ايران تورکلرينين ايستکلرينی يئرينه يئتيرمگه گؤره، ميلی ظولمو و آيری سئچيجيليگی محو ائتمک اوچون، يوخاريدا سيرالانان سياستلری حياتا کئچيرمک اوچون، سياسی بير قوروم- قورولوش گرکدير، يالنيز آذربايجانين يئرلی ميلی پارليمانی بئله بير سياستی ايرلی آپاران قوروم اولا بيلر!

آذربايجان فدرال دموکرات حرکاتینين ايجراييه هئياتی –1387جی ايلين اورديبهيشت آيی