سياسى دوستاقلارحقينده بيلديريش

آذربايجان فدرال دموکرات حرکاتى نين قوروجولار قورولتايى نين ايشتيراکچيلارى ايراندا ياشايان ميلتلر، خوصوصيله غئير فارس ميلتلرين دموکراسى، اجتيماعى عدالت و ميلى حقلر يولوندا موباريزه سيندن حيمايت ائديب و بو موباريز باجى- قارداشلاريميزا آتشين سلاملار گؤندرير. عئين حالدا بو قورولتاى دموکراسى، اجتيماعى عدالت و ميلى حقلرين برپاسى يولوندا موجاديله و موباريزه ده شهيد دوشن بوتون ايرانليلارين خاطيره سينى عزيز توتور.

بوگون دينى ايدولوژييه دايانان بير آزليق، ايراندا دموکراسى، اجتيماعى عدالت و ميلى حقلر يولوندا موباريزه ائدن اينسانلارين غنيمى اولاراق بوتون حق ايسته ين سسلارى بوغور و بو ضيد بشرى و ضيد دموکراتيک و اينسان حقلرينه، خوصوصيله ايران قادينلارين بوتون حقلرينه قارشى اولان ايسلامى رژيم اؤلکه نين قاباقجيل، عدالت پرور و موباريز اينسانلارينى حبسه آتيب و آغير ايشکنجه لره معروض قويور.

آ.ف.د.ح.- نين قوروجولار قورولتايى ني ايشتيراکچيلارى بو رژيمين بوتونلوگونه قارشى اولدوغو حالدا، ايراندا بوتون سياسى زيندانيلرين درحال آزادليغينى طلب ائدير.

پهلويلر سولاله سى نين شوويستى و ضيد تورک - آذربايجان سياستلرينين خلف دوامچيسى اولان ايسلامى رژيم، بوگون غئير فارس ميلتلرين ميلى ايستکلرينه اعتيناسيز اولاراق کئچن هشتاد ايلده آردى کسيلمه دن دوام ائدن آسيميلاسيون سياستينى يئنى متودلار ايله ايره لى سوروب و بو ميلتلره منسوب اولان موباريزلرين اعدام، حبس و ايشکنجه سيندن ده بئله چکينمه ييبدير.

ايران تورکلرى و آذربايجان خلقى نين غئيرتلى قيز و اوغلانلارى، بوتون بو باسقى و ايشکنجه لره رغمن اؤز ميلتى نين ميلى حقلرى و ايستکلرينى الده ائتمک اوچون موباريزه سينه دوام ائدير.و بو يولدا حبس و ايشکنجه لردن قورخمايير.

آ.ف.د.ح.- تى نين قوروجولار قورولتايى نين ايشتيراکچيلارى بو تورک – آذربايجانلى موباريزلره آتشين سلاملار گؤندرير و بو حقلى موباريزه ده اونلارين آرخاسيندا دورور. قورولتايين ايشتيراکچيلارى آذربايجانين موباريز ژورناليستى انصافعلى هدايتين حبسه آتماسينى کسگين شکيلده قيناييب و ميلتيليزين موباريز اوغلونون در حال آزادليغينى طلب ائدير. عئين زاماندا ايران تورکلرى و عرب ميلتى نين دوستلوغونون سيمبولى اولان يوسف عزيزى بنى طرفى نين حبسه آتيلماسينى قيناييب و ايران عربلرينين موباريز اوغلونون آزادليغينى در حال طلب ائدير.

آذربايجان فدرال- دموکرات حرکاتى نين قوروجولار قورولتايى، ٢٠٠۵- جى ايل ١٣٨۴