بيلديريش

آذربايجان فدرال- دموکرات حرکاتى نين قوروجولار قورولتايى نين قورولماسى حقينده

آذربايجان فدرال- دموکرات حرکاتى نين قوروجولار قورولتايى ماى آيى نين ٢٨، ٢٩، ٣٠ – جو گونلرينده،- خورداد آيى نين ٧، ٨، و ٩- جو گونلرينده- تشکيل تاپدى.

آذربايجان فدرال- دموکرات حرکاتى نين قوروجولار قورولتايى آزادليق و اجتماعى عدالت اوغروندا قوربان گئدنلرين خاطيره سينى و مظلوم ميلتلرين شهيدلرينى ياد ائده رک بير دقيقه سوکوت ائتمکله قورولتايين آچيليشينى بيلديريب و ايشه باشلادى.

ايجلاسين رياست هئياتى سئچيليب و قورولتايين گونده ليگى و آيين نامه سى تصويب اولوندو.

بيرينجى نؤوبه ده گئچميش موقتى ايجراييه هئياتى طرفيندن، هئياتين مسولو ايکى قورولتاى آراسى گورولن ايشلرين و آذربايجان فدرال- دموکرات حرکاتى نين تاسيس اولونماسى و موقتى پلاتفورمون نشرينين اؤلکه نين ايچينده و ائشيگينده ياشايان ايران تورکلرينين و باشقا ميلتلرين ايچريسينده هابئله چئشيدلى سياسى جريانلارين آراسيندا نئجه قارشيلانماسيندان گوزاريش وئردى. اونون آردينجا «آچيق سؤز» سايتى نين مسولو سايتين ايشيندن گوزاريش وئريب و سونرا يولداشلار اؤز بؤلگه لرينين گوزاريشلرينى وئرديلر.

قورولتاى، آذربايجان فدرال- دموکرات حرکاتى نين ايندييه دک گؤردويو ايشلرى و ايقداماتى اولدوقجا موثبت دگرلنديردى.

اونون آردينجا قورولتاى برنامه کوميسيونونون تکليف ائتديگى پلاتفورمو موذاکيره ائتمگه باشلادى. برنامه کوميسيونونون مسولو پلاتفورمون اساس نوقطه لرينى و کوميسيون طرفيندن «موقتى پلاتفورما» آرتيريلان موريدلرى قيساجا ايضاح ائديب و موذاکيره نى آچدى.

کوميسيونون تکليف ائتديگى پلاتفورمون کوللياتى تصويب ائديلديکدن سونرا، پلاتفورمدا گلن اؤن سؤز و ماده لر بيرر- بيرر اوخونوب، کيفايتجه موذاکيره و تدقيق اولونوب و لازيمى دوزليشدن سونرا يئنه ده بيرر- بيرر تکليکده سسه قويولوب و تصويب ائديلدى.

چئشيدلى مؤوضوعلارا عاييد اولان بير سياسى بحث سونراکى ايجلاسين گونده ليگينده دوروردو:

ايسلام جومهوريتى نين وضعيتى و دورورومو، رياست جومهورلوق سئچگيلرى و بؤلگه نين بؤحرانى وضعيتى نين تحليل ائديلمه سى

باشقا قووه لرله ائتيلافلارا گيرمه و ايش بيرليگى آپارما سياستى باره سينده و کونکرت اولاراق «ايرانين فدرال ميليتلرى قورولتايى» حقينده هر طرفلى موذاکيره اولوندو سونرا، آذربايجان تشکيلاتلارى و قوروملارى ايله امکداشليغا توجه ائتمک اطرافلى صورتده موذاکيره اولونوب و تدقيق ائديلدى. قورولتايا قاتيلانلار آکتيوجه سينه موذاکيره لرده ايشتيراک ائتديلر. قورولتاى سس بوتوولوگو ايله رياست جمهورلوق سئچگيلرى هابئله سئچگيلرين تحريم ائديلمه سى باره ده بيلديريش وئرمگه تصميم توتدو.

قورولتاى، آمريکانين ايراندا موداخيله ائتمه سى، نيظامى هوجوم و ايرتيجاعى «آلترناتيو قوراشديرماق» حقينده بيانات وئرمگى لازيم بيلدى.

قورولتاى مظلوم ميلتلرله امکداشليغين اهميتينه تاکيد ائده رک تصميم توتدو کى، «ايرانين فدرال ميليتلرى قورولتايى» ايله مؤوجود شکيلده کى امکداشليغا سون قويولسون.

قورولتاى سياسى محبوسلارحقينده، هابئله انصافعلى هدايت ايله يوسف عزيزى بنى طرفون آزاد اولونماسينى ايسته ديگى باره ده بيلديريش وئردى.

قورولتاى نيظامنامه نين نشرينين نحوه سينى ايجراييه هئياتى نين عؤهده سينه قويدو.

قورولتاىآذربايجان فدرال- دموکرات حرکاتى نين مرکزى شوراسينى و يئددى نفر ايجراييه هئياتى نين عوضولرينى سئچدى. آشاغيدا آدلارى وئريلن يولداشلار ايجراييه هئياتى نين عوضولوگونه سئچيلديلر. ايجراييه هئياتى اؤزونون بيرينجى ايجلاسيندا ايش بؤلگوسو آپاردى.

١- آزادگر، محمد- ايجراييه هئياتى نين مسولو

٢- الاردبيلى، محمد رضا

٣- انور حقيقى، حسين

۴- سلطانزاده، هدايت

۵- شاملى، يونس

۶- قره جه لو، على

٧- ملازاده، على