سيروس بى مددى نين حقيقى مقصدى نه دير؟

«آذربايجان فدرال- دموکرات حرکاتى » و اونا عوضو اولان شخصلرين آدلارى ، دفعه لرله سيروس مددى نين «21 آذر و بوگون» باشليغى آلتيندا کى يازيسينا عايد بحثلرده و «گون آذ» تى وى ده گئدن موباحيثه لرده تکرار اولونماسى اوچون، «آذربايجان فدرال- دموکرات حرکاتى »نين ايجراييه هئياتى نين مسولو کيمى اؤزومو بير نئچه مساله نى، قيساجا آيدينلاشديرماغا بورجلو ساييرام .

1) بيز،س.مددينين، 21 آذر باهاناسى ايله يولا سالديغى موباحيثه لره قارشى ييق. بيزجه بوکيمى موباحيثه لرى آذربايجان ميلى حرکتينه تحميل ائتمک، ميلى حرکتى عملده ضعيفلنديريب و اينحيرافا سوق ائدر.

ايسلام جومهوريتى ، سلطنت طلبلرين(شاهچيلارين) موختليف نٶوعلرى و فيکير جيغيرداشلاري «پان تورکيزم» دن بير حربه کيمى ايستيفاده ائده رک٬ ايران تورکلرينين حقوقونو و حقلى ايستکلرينى آياق آلتينا ساليب و تاپدالاييبلار.

بو کيمى موباحيثه لر ، آذربايجان ميلى حرکتينه عملده تفريقه ساليب و داغيديجى اثرلر قويماقلا بيرليکده آشیری فارس ناسيوناليزمينه آذربايجان ميلى و دموکراتيک حرکاتى نين علئيهينه تبليغات نظريندن يارديم ائدر.

بو کيمى بحثلر آذربايجانين قاباقجيل، آزاديخاه و برابرحوقوقلوق ايسته ين حرکاتينى ازمکده، ايسلام جومهوريتي نين عمللرينى موجه جيلوه لنديرر .

2) مددى بى، دوستلارى ايله بيرليکده آذربايجان سايتيندا هايکوى ايله اؤزلرين دريدن قابيقدان چيخارير و چاليشيرلار بئله گؤسترسينلر کى، اونلارين بو کيمى موباحيثه لرى طرح ائتمکدن گوددوکلرى مقصد يالنيز آذربايجان ميلى دموکراتيک حرکتينه خيدمت ائتمکدير. آنجاق اونلارين يازيلارى و دوروملارى بو اديعانين خيلافينادير.

گونوموزون حساس شرايطينده محمد امين رسولزاده نين، ائلچى بگين يا خود پيشه ورينين سياسى بيوقرافيلارينا تحريف اولونموش، خام و بيرجهتلى ياناشماق و اوندان وسيله کيمى فايدالانماق، آذربايجان ميلى حرکتى نين خئيرينه اولماييب، بلکه بوتؤولوکله اونون قارشيسيندا دايانير.

مظلوم ميلتلره قارشى آپ-آچيقجاسينا ميلى ظولم اعمال ائتمک، ميليتلره و مذهبلره قارشى ميلى ومذهبی آپارتايد، قادينلارا قارشى جينسى آپارتايد اعمال ائتمک، ايسلام جومهوريتى نين ايدئولوژيک تمل لریندن ساييلير. ايران اؤلکه سينده چوخ ميليونلو تورکون مدرسه دئييل بيرجه دانا اوشاق باغچاسى بئله يوخدور. آنا ديلينده تحصيل آلماق کيمى ان ايبتيدايى حقوقدان محروم اولانلار بو نو ديله گتيرديکده آغير جزالارا دؤزمه لى اولورلار. اؤلکه ساکينلرينين چوخونلوغو يوخسوللوق و فلاکت ايچينده یاشاییرلار. بئله بير يئرده ، بو شراييطده اؤزونو اوتا کوله ووروب و قان ترى تؤکه- تؤکه آذربايجان ميلى حرکتى ايچريسينده سين- سين پان تورکيزم و تورانيزم داليجا گزمگين آدينى عاغيللى بير ايش قويماق اولماز.

آذربايجان ميلى حرکتى گرگين شراييط آلتيندا ايسلامى حٶکومت ايله طالع يوکلو موباريزه آپارماغا مشغولدور. بو موباريزه ايراندا ياشايان تورک ميلتى نين و آذربايجان خالقى نين مقدراتينى تامين ائتمک حقى اوغروندا دير٬ قادينلارين٬ ميليتلرين و شيعه اولمايان مذهبلرين حقينده اعمال اولونان جينسى٬ ميلى و مذهبى آپارتايدا سون قويماق اوچوندور و خالقى بوروموش يوخسوللوق و فلاکتلرى آرادان آپارماق مقصدينى داشى يير.

بئله بير وضعيتده فرعى موباحيثه مٶوضوعلارينى اورتايا آتماق ٬ تورانيزم و پان تورکيزمى باشليجا خطر کيمى ايرلى سورمگ عملده٬ ايسلامى حٶکومتين ظولمونو ياددان چيخارتماق دئمکدير.

3)واهاب تبريزلى کيميلرى (سيروس مددى نين دئديکلرينى فارسجايا چئويرن)٬ آذربايجان ميلى حرکتينده اولان آيريليقلاردان٬ فرقلى مئييللرى بيرى بيرينين قارشيسيندا قويماقلا تفريقه نى کٶروکله مکدن سئوينجينى گيزله ده بيلمه ييرلر. سٶزسوز بئله بير شادليق يئرسيز دئييل و آذربايجان ميلى حرکتيندن طرفدارليق ائتمک اٶرتوگو آلتيندا اٶزونو گيزله ديب و حرکته قارشى ايرنج قورقولار قوران اللرين ووجودونا دلالت ائدير.

4) بعضى شخصلر و او جومله دن سيروس مددى بگ٬ اورادا بورادا اديعا ائديبلر کى گويا «آذربايجان فدرال دموکرات حرکاتى» نين قوروجولاريندان(مواسيسلريندن) ديرلار. يئرى گلميشکن آچيقجاسينا دئمه لييم کى٬ بو شخصلر و سيروس مددى هئچ زامان «آذربايجان فدرال دموکرات حرکاتى» نين قوروجولاريندان اولماييب و هئچ واخت تشکيلاتيميزدا عوضو کيمى ده اولماييبلار .

5) «آذربايجان فدرال دموکرات حرکاتى» نين موخاليفلرى تشکيلاتين قورولدوغو بيرينجى گوندن بئله چاليشيبلار تشکيلاتين ايچينده آيريليق ساليب و فرقلى دسته لر کشف ائتسيلر (چيخارسينلار). منجه سيروس مددى نين٬ تشکيلاتيميزين ايجراييه هئياتينه و اونون مسولو محمد آزادگره خيطابن يازديغى مکتوب تشکيلاتى يارماق و آيريليق سالماق مقصدينه يٶنلميش بير تلاش کيمى دير.

بيزيم تشکيلاتين قورولوشو کومونيست پارتيالارينين کومينترنچى ايستالينچى بيچيمينده دئييل٬ بير شخصيته دايانماييب و ائليتلره اوزرينده اساسلانماييبدير .

تشکيلاتيميزدا٬ فرقلى مئييللره صاحيب اولماق حقى و تشکيلاتيميزين نيظامنامه سينده آچيقجاسينا تصريح ائديلديگى کيمى حتا فراکسيون قورماق حقى آزاددير. بيزيم تشکيلاتيميز باغلى و اؤرتولو ايدئولوژيک تشکيلات دئييل، بير سياسى تشکيلاتدير. بيزى بير آرايا گتيريب بير يئره ييغان عاميل «آذربايجان فدرال دموکرات حرکاتى» نين ميلى، دموکراتيک و عدالت سئور مودئرن پيلاتفورمودور، ايران تورکلرينين و آذربايجانليلارين برابر ميلى و وطنداشليق حقلرينه چاتماق يولوندا موباريزه آپارماقدير.

6) اصلينده پان تورکيزم٬ تورانيزم و بوزقورد خطرى آدلانانى٬ آذربايجان ميلى حرکتى نين دوشمنلرى قوراشديريبلار. آذربايجان ميلى حرکتينده آشيرى مئييللرين ده مٶوجود اولماسى اولدوقجا طبيعى دير و بونلار اينديليکده حرکت اوچون بير خطر ساييلمايير. بو کيمى آشيرى مئييللر٬ آشيرى پان ايرانيزمين و فارس چيليغين و اؤنوموزده دوران ايسلام جومهوريتى آدلانان قورردون تؤره تديگى بير عکس اولعملدير.

پان تورکيزم خطرينى قاباردانلار٬ بيرينجى نٶوبه ده پان ايرانيزم ٬ آشيرى فارس ناسيوناليزمى و ايسلام جومهوريتى نين راسيزمى ايله علاقه ده هانسى دورومو توتدوقلارينى بللى ائتسه ايديلر٬ ياخشى اولاردى.

يازينين سونوندا بونو دا خاطيرلاتمالييام کى٬ حاکيم ميلتين آشيرى ناسيونالزمى٬ راسيزم و آيرى سئچيجيليک اساسيندا قورولموش گئنيش ايدئولوژيک پروپاقاندا سيستئمينه صاحيبدير و تاپدالاييجى آپاراتلارا ماليکدير. ظولم آلتيندا ياشايان محکوم ميلتين آشيرى ناسيوناليزمى٬ حاکيم ميلتين آشيرى ناسيوناليزمى ايله برابر ساييلا بيلمز و موقاييسه ائديلمز.

محمد آزادگر- آذربايجان فدرال دموکرات حرکاتى نين ايجراييه هئياتى نين مسولو