«ديلماج» درگيسيندن www.ocaq.net

ديلسيز آنالار

فرانك فريد

آنا ديليندن سؤز آچاندا، ايسترـ ايستهمز، بير آنانين بالاسيني سئوينج دولو، شيرين سؤزلرله دينديرمهسي، اونا لايلا چالماسي، بوي اوخشاماسي يادا دوشور.

آنا سؤيلهديگي سؤزلره روح باغيشلاييب، اونلاري جانلانديرير، كلمهلرين قرينهلرجه درينليگيني، واريني، گوجونو اولادينا چاتديرير. جانينين جيرگين سؤزلرين جانينا جالاييب، اونون روحونا يئديرير.

نه يازيق كي بيزيم بعضي آنالار، اؤز اوشاقلاريني ترجومه واسيطهسي ايله ديل آچديرير، اونلارا آنا ديلينده دئييل باشقا بير ديلده سؤز اؤيرهديرلر. بو دا هامييا آيديندير كي ترجومه هئچ زامان اصل اولا بيلمز. بئله آنالار دائيما اؤز حيسّلريني ترجومه ائتمك حالينداديرلار، گاهدان گؤرونور كي ائله بو موترجيم آنالار نئجه قوهسيز، دويغوسوز و اؤز ايچريلريندن گلمهين كلمهلر ايله اوشاقلاريني دينديرير، سؤزلر تاخما ديش كيمي آغيزلاريندا لاققيلدايير.

بئلهليكله اوشاقلارا، آنالارين آغزيندا قوندارما بير شكيلده ايفا ائديلن سؤزلر ائشيتديرير. نييهسين سوروشاندا، اوشاقلارين آيري ديلي (يا ديللري) ياخشي اؤيرنمهسيني و يا اونلارين لهجهسيز دانيشماسيني دليل گتيريرلر. حال بوكي علمي آراشديرمالار بونو ثوبوتا يئتيريب كي آنا ديليني دوياـ سييا اؤيرنن اوشاقلار، باشقا ديللري اؤيرنمكده داها باجاريقلي اولوب و اگر اونو مدرسهلرده يازيب، اوخوسالار باشقا ديللرين قايدا، قانونلاريني دا آسانليقلا اؤز ديللريله توتوشدوروب (تطبيق وئريب)، اونون بنزريشين يا فرقلرين ياخشي باشا دوشورلر. آخي دونيا ديللرينين اوزرينده چاليشان ديلچيلر، ديللرده اورتاق (موشترك) عونصورلرين تاپيب، اونلاري يا ديلين كورهسلليگي (جهانيليگي)[1] آندلانديريرلار، اونلار هر ديلين اؤزونه خاص اولان اؤزلليكلرينه رغما، دونيا ديللرين واحيد بير قورولوشا ماليك اولدوقلاريني اينانيرلار.

***

باشقا بير مسألهيه ده توخونماق يئرسيز اولماز، اودا بو كي ديلي ايكي يولدان اؤيرنمك اولار :

1ـ بيلرك اؤيرنمك

2ـ بيلمهيرك اؤيرنمك

ديلي بيلرك اؤيرنمك يعني قايداـ قانونلاريني، اؤيرنمك يولو ايله ديل اؤيرنمك كي اونا “learning “ دئييرلر.

ديلي بيلمهيرك اؤيرنمك يعني ديلي دوغال (طبيعي) بير حالدا چئورهدن ايليشگيلر يولو ايله (موحيطدن ايرتباطات واسيطهسيله) اؤيرنمك و آلماقدير كي او دا ايكتساب يا aguisition آدلانير. ديل اؤيرنمكده ان راحات يول همين ايكينجي يولدور، يعني بيلمهيرك اؤيرنمك يولودور.

اينسان بئينينين سول طرفينده كي اؤزلليكلره گؤره ديلي اؤيرنمك يا آلماغين ان اويغون واقتي دا اوشاقليق چاغيندان، يئتگينليك ( بلوغ) دورانينا قدردير. بلوغ دورانيندان سونرا “اكتساب” يا خود ديل “آلماق” قابيليتي قاپانير[2].

بيز بو بؤيوك قابليتدن فايدالانماق عوضينه، اوشاقلاريميزا نئچه ديل اؤيرتمك يئرينه، اونلاري اؤز آنا ديليميزين زنگينليگيندن، دوغال آخيجيليغيندان، گئنيشليگيندن بئله محروم ساخلاييب، آتا – آنالاريميزين يوز ايللرجه ياشاديب، بيزه چاتديرديقلاري ديلي و اونا باغلي اولان سئوگي دولو، حسرت دولو سؤزلري، ياشاييش فلسفهسيني، دونيا گؤروشلريني عكس ائتديرن سؤزلو ادبياتي اؤز اؤلاديميزدان، ائلهجهده نوه ـ نتيجهلريميزدن اسيرگهييريك. بئلهليكله بير زنگين آناديلينين، آنالار الي ايله محو اولماسينا باعيث اولوروق..

---

1 - Language Universals

2- بو قونودا آرتيق معلومات اوچون آشاغيداكي قايناغا باخابيليرسينيز

The study of language �:George Yule – Cambridge university press 1999