ديل و
ادبياتيميزا
اؤتري بير باخيش
نيگار
خياوي
آذربايجان توركجه
ادبياتي، ديلي و يازيسي ايله مشغول اولانلار بو گون بير سيرا مسأله‌لرله قارشي ـ
قارشياديرلار. دوستلارين گؤروشلري و يغينجاقلاريندا بو مساله‌لرين اوزرينده
دانيشيقلار گئدير، بحث‌لر اولونور. اومودوموز بودور كي ادبياتيميز و ديليميزين
قارشيلانديغي چتين‌ليكلر و مؤوضوعلار آكادميك مركزلرده بيلگين‌لر و عاليم‌لريميزين
واسيطه‌سيله آراشديريليب، چوزولوب و دوزگون يولا سالينسين.
بو يازيدا بير نئچه مساله‌يه
توخونولاجاقدير. البته بونلار منيم ادبياتيميزلا آز ـ چوخ مشغول اولدوغومدا قارشيلاشديغيم و
دوشوندويوم شخصي فيكيرلريمدير و اونلاري هر هانسي ايدّعادان اوزاق اولاراق سيزلرله
آرايا قويماق ايسته‌ييرم.
ايجازه وئرين سؤزو اوزاتمادان مطلبين اصلينه
كئچك.
1 ـ
بير ادبيات و كولتورون ايرليله‌مه‌سي اوچون نييه دوشونجه
لازيمدير؟
بيلديگينيز كيمي بير ديل و كولتور دائيما و
آرديجيل اولاراق نسيل‌دن نسيله دوغولوب، تؤرمه زوروندادير. يوخسا گئت ـ
گئده آريقلاياراق آرادان گئتمه‌لي اولاجاقدير. بيليريك
بيز ده بو گئديشين قاباغينا اوزون ايللر بويو البته داش ديغيرلانيب و اونا گؤره ده
ديليميزين دوغال آرخالاري ايتيريلميشدير، و بئله اولوب كي اوتوروب گؤزوموزو باشقا
يئرلره تيكميشيك، باشقالاري دوشونسونلر يازسينلار، بيزده اونلاري آنجاق يامسيلاياق.
باشقا بيريسي تؤره‌سين، گوج وئريب دوغسون سونرا بيز اونون تؤره‌تديگيني اؤزوموزه
اؤولاد گؤتوروب آنجاق آديميزي سيجيلينه
يازديراق. باشيميزي قالديريب، باشقا ميلّت‌لره باخاندا اونلارين ادبياتي‌نين،
ديلي‌نين و فلسفه‌سينين ال چاتماز ذيروه‌لره قاريش ـ قاريش يوكسلمه‌سينه شاهيد
اولوروق بير حالدا كي بيزلر هله ديليميزين دوزگون قرامريني اؤيرنمك دره‌لرينده
چاباليريق.
بلي دوغرودور! هاميميز بو موصيبتين سببلريني
بيليب و تانيريق. ائله بونا گؤره ده ادبياتچيلارين بوينونا آغير ـ آغير مسئوليت‌لر
يوكله‌نير.
دوستلار! دؤشه باشا چيرپماقلا، كئچميشه
گووه‌نمكله ايش قاباغا يئريمز: بيز ائله ايديك... بيز بئله ايديك... ائله‌دن
قيرديق... بئله‌دن چاپديق. حتا ديزه باشا دؤيمكله ده ايش دوزلمز : بيزه يامان ظولم
اولوب... ديليميز بادانيب... دوداغيميز تيكيليب... دوشونجه‌ميز قاپسانيب، آي آمان
گلين بيز اؤلموشوك، آغلايانيميز يوخدور... بو كيمي سؤزلري ساديلاماق جمعيتي داها
گئرييه سوروتله‌يه بيلر.
فلسفه‌سي و دوشونجهسي محدودلاشديريلميش بير
جمعيت، فلسفه و دوشونجه‌ني آنجاق و آنجاق ترجومه ائد‌ن بير جمعيت بلليدير فلسفه‌سيز
ودوشونجه‌سيز بير جمعيت اولاجاقدير. توپلوملارين و جمعيت‌لرين دوشونجه
بينؤوره‌سينين تمل داشي فلسفي دوشونن ضياليلار ايله بركيدير و يئني‌لشمه‌نين آنا
سكي‌سينين تهري بئله‌ليكله تؤكوله بيلر. سياسي و فرهنگي ضياليلارين دوشونجهسي
ده البته بو سكي اوزرينده فورمالاشماليدير.
بيلديگينير كيمي باتي اؤلکه‌لرينده هونر و
كولتورون دوغوب تؤره‌مه‌سيله برابر فلسفي دوشونجه‌لر ده زنگين‌لشيب
گئنيش‌لنمكده‌دير. بير ادبياتين زنگين اولماغينا فلسفي دوشونجه و دوشونجه‌لي
دانيشمالار گركدير. حال بو كي بيز هله هئچ دانيشيغا
باشلاماميشيق و مؤوجود اولان دانيشيقلاردا يالنيز سخنراني بيچيمينده گئدير. بئله
كي بير سيرا آداملار دانيشيرلار و باشقالاري اوتوروب آنجاق اونلاري دينله‌ييرلر. و
تا گئديش بؤيله گئديرسه، هئچ بير جمعيت اوزونه عايد اولان دوشونجه‌يه ييه‌له‌نه
بيلمه‌يه‌جكدير.
2 ـ
معيار ديل: هر ديل اوچون اورنك ديل (معيار ديل) لازيمدير. بيلديگينيز كيمي
هر ديلين اوچ لايي تانينماقدادير: ادبي لايي، محاوره لايي، كوتله‌وي لايي. هر ديلين
اورنك ديلي بونلارا اساسلاناراق قورولماليدير. بو او دئمكدير كي ديلين هم ادبي
لايي‌نين سوزجوكلري و هم محاوره لايي‌نين سوزجوكلري و هم‌ده كوتله‌وي لايي‌نين
سوزجوكلري بللي اولماليدير. البته بورادا بو اوچ لايين مرزلريني آييرد ائتمكدن
سؤز گئدير و يازيچي‌نين شخصي ذؤوقيندن سؤز
گئتمير.
3 ـ
اؤرنك ديل نه دئمكدير؟ اورنك ديل او ديلدير كي رسمي ييغينجاقلاردا دانيشيق
آپاران شخص اونون اوسلوبلارينا اساسلاناراق دانيشماليدير. هابئله بير ژورناليست
يازيلاريني ديلين او اوسلوبوندا يازماليدير. ائله ايسه اؤرنك ديلين سوزجوكلري و
دئييم طرزي بللي اولماليدير.
بير جمعيتده اؤرنك ديليني بئجرن، قورويان و
ياييملايان البته راديو، تلويزيون و مطبوعاتدير. حالبو كي بو ايمكانلار بيزده يا
يوخدور يادا راديو تلويزيوندان ياييملانان وئريليشلرده ديليميزي عيبه‌جر و انايين
بير شكيله سالماق قصدي ايرلي سورولمكده‌دير. گليشميش ديللرده بئله اولور كي آيري ـ
آيري ژورناليستلر، راپورت حاضيرلايانلار، ائله‌جه ده راديو تلويزيون خبرچيلري بير
موعين حاديثه‌دن يازيب، دانيشاركن گؤرورسن كي اونلارين جومله قورولوشلاري و ايشه
آلديقلاري سؤزجوكلر و عيباره‌لر بير ـ
بيرينه بنزر اولور، بونون سببي ندير؟ بلليدير اونلار جومله‌لريني
موعين‌لشديريلميش بير اؤرنك ديلين چرچيوه‌سينده دوزنله‌ييرلر. عكسينه هر هانسي
ديلين اؤرنك ديلي بللي اولماسا، هر كس اؤز هاواسيني چالاجاقدير. ظنيمجه بو فيكيرده
منه قاتيلاجاقسينيز كي بيزيم آذربايجانين اؤرنك ديلي اؤز قارنيندان و اؤز
سانجيلاريندان دوغولماليدير، اؤزونونكو اولماليدير. بو ديل هر هانسي يئردن چانتالار
ايچينده سوقات گتيريلمه‌يه‌جكدير بيزه! بيز قارداش ديلداش‌لاريميزين الده
ائتديكلريندن باشاريلاريندان فايدالاناراق ديل اؤلچو ـ بيچيميزي اؤزوموز موعين‌لشديرمه‌لي‌ييك.
نئجه كي هئچ زامان كلّ اولاراق آذربايجان
آلماسي دئييلمز بلكه قوبا آلماسي، مشكين آلماسي و مرند آلماسي آدلاناراق آييرد
ائديلير. چونكو هر بيريسي‌نين سويونون شيريلتيسي، تورپاغي‌نين قوخوسو و ياغيشي‌نين
داملاسي و هاوانين يئلله‌نمه‌سي باشقا ـ باشقا و اؤزونه عاييددير.
دوستلار منه قيزمايين! من ده سيزلر كيمي بو
كؤرپه ساخلانميش ديل و ادبياتين اودونا يانانلاردانام. گلين اؤزگه‌لر بيزي، لاغا
قويوب، گولمه‌ميشدن اؤنجه اؤزوموزو تنقيد ائد‌ك.
يوخسا اؤزوموزه ال چاليب بير ـ بيريميزي
گؤيه قالديرماقلا ادبيات بئجريلمز. يا بير ـ
بيريميزي دوهالي شخصيت آدلانديراراق شيشيرديب، قولتوغوموزا قارپيز وئريريك،
يادا آجيماسيزجاسينا بير _ بيريميزي آياقلاييريق. دوروموموزا آچيق گؤزلرله ياناشماق
گرك. سون اون _ اون بئش ايلين ايچينده ديليميزين و يازيميزين سال بوزلارينين اريمگه
باشلاديغي البته اومود وئريجي، سئوينديريجي حالدير. آنجاق دوستلار بيز ائله
دؤندورولموشوق كي بو دونوق حالدان چيخماميزا تونقاللار آليشديرماق
گركدير.