بيلديريش

آذربايجان فدرال دموکرات حرکاتى

دموکراتيک بير ايران اوغروندا!

۱ - ايران، بوتون ايرانلىلارين، قؤوميت، ميللت، جينسيت، کولتور و مذهبيندن آسيلى اولماياراق ياشاديقلارى اورتاق اؤلکهدير. آزاد ياشاماق و اؤز آنا يوردلارىنين مقدراتينى تعيين ائتمک حوقوقوندان هامىنين برابرجهسينه يارارلانماق حقى واردير.

برى باشدان، توتاليتر و فاشيست ساياقى حؤکومتلرله اورتاق خوصوصيتلرينى گؤز اؤنونده سرگيلهين، قيرخ ايله ياخين ايراندا حؤکم سورن دينچى حاکميت، سياسى بيرحاکميتين عومومى حقسيزليک، ظولم و قانوسوزلوق آراجينا چئوريلمهسىنين اؤرنگى اولموشدور. تاريخين آجى تجروبهلرينه گؤره، ايدئولوژى و ايديعالاريندان آسيلى اولماياراق هر بير آزينليقدا اولان دسته و قوروپون ايستک و ايرادهسىنين جمعيته تحميل ائتمهسىنين سونسوز ايستيبداد ائتمگه گليب چاتماسى، گؤرونور. روحانيت قيشريىنين ايستک و ايرادهسىنين ولايت فقيه گئييمينده ايران جاميعهسينه تحميل ائديلمهسىنين نتيجهسى، حاکيميت يئريدن ايستيبداددان باشقا بير زاد دئگيلدير. بو بيرعومومى قانونا اويغونلوقدور. هر بير سياسى ايستيبدادين آرخاسيندا کونکرئت و مادى منفعتلر گيزلنير، ايستيبداد خاطيرينه ايستيبداد ائتمگين، آسمانى مقدسات اؤرتوگونه بورونسه بئله، ويجودى يوخدور. 1357 جى ايلين قياميندان سونرا ايقتيدارى اللرينه گئچيردن حاکيميت، اؤلکهنين يئرآلتى و يئراوستو وارينى اجنبى بيرايشغالچىدان قات قات آرتيقراق چاپماغا باشلاميشلار. آنجاق، ال قول قانا بلشمهسه تاراج ائتمک اولاسى دئگيلدير. بونا گؤره، غارتچيلر تالاماغا گيريشمهدن اؤنجه، ظاليم وعدالتسيز حؤکومت، آزادليغى اوغورلاييب بوغماقلا، دايمى زوراکيليق، شيدت و قولدورلوق ايله غارت ائتمک اوچون الوئريشلى شرايطى يارادير.

۲ ـ کيچيک ايجتيماعى بير قيشرين، اؤلکهنين وار يوخونا يييه چيخماسىنين ايلکين شرطى اينسانلارين فرد اولاراق حقلرينى دانيب محو ائتمک، هر نؤوع سياسى و صينفى تشکيلاتلارى داغيديب آرادان آپارماق و مدنى جمعيتى، دوشونجه، سؤز و سياسى آزادليقلارى تاپدالاييب ازمک ايدى. بونون باشقا اوزو، ايجتيماعى طبقهلرين گؤرونمهميش و چوخ بؤيوک درجهده بير بيريندن آرالانماسى، يوخسولوق و عومومى فلاکتين گئنيشلنمهسى اولموشدور. اوستهليک اؤلکهميزى، ياشاديغيميز بؤلگهده و بينالخالق عرصهده باش وئره بيلهجک گؤزلهنيلمز حاديثهلرين قارشيسيندا هر زاماندان چوخراق الى قولو باغلى و يارالانا بيلهجک دوروما سالميشدير.

۳ـ بيزجه، دموکراسى و اؤز موقدراتينى تعيين ائتمک حقى بير بيريندن آيريلمازدير. اؤز موقدراتينى تعيين ائتمک حقى دموکراسينى خالقين طالعينى الينه آلماسيندان، ايجتيماعى حقلرين ايقتيصاديات عرصهسينهدک درينلشديرمک و گئيشلنديرمکدن باشقا بير زاد دئگيلدير. دموکراسى خالق کوتلهلرىنين ايجتيماعى و ايقتيصادى ياشاييشينا کئچيب قاووشماسا ، معنا وئرمز. دموکراسىسيز، موقدراتينى تعيين ائتمک حقى ده ايچى بوش بير سؤز اولوب قالاجاقدير.

۴ ـ کئچن يوز ايلده، بير بيرىنين آرديجا گلن حؤکومتلر ايران توپلومونو اولوشدوران آيرى آيرى ديل، کولتور و مذهبلره صاحيب اولان چئشيتلى بويالى قؤوملر و ميلليتلرين حقلريندن بيريسينى بئله عملى اولاراق رسميته تانيماييبلار. دواملى آيرىسئچگىليگين اولماسى ايله دموکراتيک حياتين سؤزونو ده دئمک اولماز. ايراندا، فردى حقوق و آزادليقلار اؤزونون ان بگنيلن بيچيمنده اولارسا دا، ايران آدلانان اورتاق اؤلکهميزين سياسى سيستئمينده اؤزونو گؤسترمزسه، فارس اولمايان خالقلارين توپلو اولاراق (جمعى) حقلرينى قارانتى ائتمز.

فارسجانى قوروماغا و ايرلىلتمگه گؤره ديل قورومو (فرهنگستان) وارسا، مملکتين قانون وئريجيليک، قضاوت و ماعاريف سيستئمى يالنيز فارس ديليندهديرسه، اوندا چوخ ميليونلو غئيرى فارس خالقلارين ديللرى و کولتورلرىنين يئرى هاردادير؟ فارسجا اولمايان ديللرى subculture «خيردا کولتور» آدلانديرماق «آريا»چى ايرقچىليغين (راسيزمين) تاماملاييجىسيندان و خالقلارى آشاغيلامادان باشقا هانسى معنانى داشىيير؟ دموکراسىدن دانيشارکن بئلهجه بيرآيرىسئچمهنين و برابرسيزليگين قارشيسيندا سايمازجاسينا و لاقئيدليکله داورنماق اولماز. ايراندا ياشايان خالقلارين، بو کيمى دموکراتيک چاتيشمازليغا اوستون گلمهدن، ياناشى ياشامالارى و آرخاداشليقلارى اولاسى دئگيلدير، بئله بير دوروم راحاتجاسينا مرکزدن قاچان قووّهلرى کؤروکلهييب و يابانچيلارين موداخيلهسينه و يارارلانماسينا الوئريشلى شرايط ياراداجاقدير.

۵ ـ بوتون توپلوملار، ميليّتلر و قؤوميتلرين چئشيتلى ايجتيماعى قروپلار و طبقهلردن قورولدوغونا گؤره، مونوليت داشى کيمى بيرتيکه و بوتؤو دئگيلديرلر. بيزجه دموکراتيکجهسينه ياناشى ياشاماق و عومومى آزادليغين وارليغىنى شرطلنديرن، خالقين آزادجاسينا ايستک و ايرادهسيندن ايرلى گلميش قانون حاکيميتينى مودافيعه ائتمک و فرقلى ايناملاريندان آسيلى اولماياراق آزادليغى، سياسى و صينفى تشکيلاتلانمانى، دوشونجه و سؤز آزادليغينى قوروماقدير.

۶ ـ ايرانين سياسى سيستئمىنين دموکراتيک ايستروکتورداشيماسى اوچون، ايران توپلومونون اتنيکى ترکيبى و ديل چئشيتلىليگى گؤز اؤنونه آلينماليدير و جمعيتين چئشيتلىليگى اونون ايستروکتوروندا عکس اولونماليدير. دونيانين باشقا اؤلکهلرىنين حياتى و تجروبهلرى تاريخين بيزه سوندوغو سيناقدان کئچميش بير سياسى آراجدير. چئشيتلى ديللرى و اتنيک ترکيبلرى اولان بير چوخ اوچونجو دونيا اؤلکهلرى و گليشميش غرب مملکتلرى، اؤز داخيلى چليشکيلرينى و چتينليکلرينى چؤزمکده، اوغورلا فدراتيو حؤکومت اولگوسوندن يارارلانميشلار. بو دا اؤلکه ايچينده اونلارين دينج ياناشى ياشاماقلارينا يارديم ائتميشدير. ايران ايجتيماعيتىنين ده، اؤزونون بوتوؤ و بؤلونمز قالماسى اوچون بوندان باشقا بير يولو يوخدور.

۷ ـ قادينلارين علئيهينه يئريديلن جينسى، مدنى و سياسى برابرسيزليک ايرانين دؤولت ايدئولوژىسىنين ترکيب حيصهسى کيمى، جمعيتده و عاييله ايچريسينده، قادينلارين علئيهينه ايشلهديلن تايى گؤرونمهميش شيدّتى يايغينلاشديرميشدير. ايسلامى رئژيمين بيرينجى گوندن ازيب تاپدالاديغى ايلک قوربانلار قادينلار اولوبلار، اونون قارشيسيندا سدّ چکيب ايلکديرننلر ده قادينلار اولموشلار. قادينلارين، يالنيز موستقيلّ تشکيلاتلارينى مودافيعه ائتمکله کيفايتلنمک، دموکراسىنين مودافيعهائتمهسى دئمک دئگيلدير. جمعيتين مدنيتىنين و عومومى دمکراتيک باخيشىنين گؤسترگهسى قادينلارين کيشيلرايله بوتون سوييّهلرده حوقوقى باخيمدان برابرليگىدير. قادينلارين، جمعيتين ياريسى اولاراق بوتون سياسى، مدنى، قانون وئريجيليک وقضايى قوروملاردا، اؤلکهنين موقدّراتى ايله ايلگيلى قرار وئرمهلرده، کيشيلر ايله برابر سوييّهده ايمکاناتى و ايشتيراکى اولماسا، گئرچکده حقيقى دموکراسىدن ده دانيشماق يئرسيز اولاجاقدير. دموکراسى، عومومى حقلرين عومومىليگى و هامىيا شاميل اولماسى حؤکموندهدير. اونون بير تيکهسينى کسيب قيراغا قويماق، بوتونونون يوخا چيخارتماسى دئمکدير. بير جمعيتده ظولم و آيرىسئچگيليک وارسا، نه بيچيمده اولورسا اولسون، او بير آزاد جمعيت ساييلماز.

۸ ـ ايرانين سياسى سيستئمي، دموکراسىنين ضيدّى، فاسيد واؤز خالقينا ظاليم اولماسى يئرينده قالسين، اونون تاريخى نايليّتى خسته بير جمعيت دوزلتمکدن، (نارکوتيکا ) معتادليق، اخلاق پوزقونلوغو و يوخسوللوقدان باشقا اولماميشدير. ايران رئژيمى، ائله بيل گؤزه گؤرونمز قارالتيلارين بويوروغو ايله داورانان، آنارشى ايله هؤرولموش، خالقين نظارتيندن ايراقدا و دؤولت ايچينده يئرلشميش بير دؤولتدير.

۹ ـ بيزيم اينانديغيميزا گؤره، بؤيوک طبقاتى نابرابرليقلارى آرادان آپارماق، آيرىسئچگيليگى آزالتماق و خالقلارى بير بيرلرينه ياخينلاشديريب باريش ايله ياناشى ياشاماقلارى دوغرولتوسوندا آديم آتا بيلن حؤکومت يالنيز خالقين راضىليغى، ايستک و ايرادهسى اساسيندا قورولموش بير حؤکومت اولا بيلر.

۱۰ ـ اؤلکهميزده ياشام چئورهسى پروبلئمى بؤحران اؤلچوسوندهديرو تهلوکهلى درجهيه چاتميشدير. ياشام چئورهسى ايله ايلگيلى مسالهلر چئشيتلى سببلر اؤزوندن اولسا دا، بوتون ايدئولوژيک و سياسى فاکتورلارى بير يانا قويساق دا، هر نهدن اؤنجه جمهورى ايسلامىنين موديريت ساحهسينده اولان باشاريقسيزليغىنين تاثيراتينى گؤرمک چتين دئگيلدير. طبيعى بلالاردان بيريسى ده، رئژيمين اؤزونون ، اؤلکهده ياشام چئورهسينه وردوغو توختانيلماز يارالارا اوخشاماز.

۱۱ـ اؤلکهميزين دموکراتيک گلهجگىنين دوغرولماسى اوچون، جمهوری اسلامیدن اؤتهيه آشماقدان باشقا بير يول تجسوم ائتمک اولماز، بيز دوغرودان دوغرويا بونا اينانيريق. بو دوشونجه، حاکيميتين ايچينده اولان چاتيشمالارى، ضدييّتلرى و آيرى آيرى قانادلارا بؤلونمهسينى (جناح) گؤرمهمک و اوندان يارارلانماماق دئمک دئگيلدير. جمهورى ايسلامىنين هرزامان اؤز موخاليفتىنين (اوپوزيسيون) ايچريسينده اولان آيريليقلاردان و ضيديّتلردن فايدالانماقلا اونون علئيهينه آپاريلابيلن بيرگه موباريزهنين قاباغينى کسديگى کيمى، ائتمهلى. بئلهليکله، حؤکومتين داخيلى قانادلارينا اويوب و تورا دوشمهدن، اونلارين ايچرى چاتيشمالارينا اومود اولمادان، ايجتيماعى شوعورون يوکسلمهسينه و تشکيلاتلانما يا چاليشماقلا مستقيل حرکت خطى دوغرولتوسوندا ايرليلهمهلىييک. کوتلوى حرکتلرين سؤزسؤز اؤز ديناميزملرى و قانونا اويغونلوقلارى واردير، حرکتين بيچيمينى و نئجه ايرليلهمهسينى ده ان سونوندا حرکتلرين اؤزلرى موعيّنلشديرير.

۱۲- آذربایجان فدرال دموکرات حرکاتى، هر زامان «اؤزموقدراتينى موعيّنلشديرمک» حقىنين اصلى مضمونونى، يانى خالقا آرخالانماق پرنسيپينى و خالقين سياسى ايقتدارين کونترول ائتمهسينه حقلى اولماسينى وورغولاييبدير، بوندان دا دؤنمهيهجکدير. مدنى و سياسى حقلرى الده ائتمک اوغروندا موباريزهنين آغير شرايط آلتيندا آپاريلمالى اولماسى، اؤلکهميزين دموکراسىى و آزادليغا چاتماسىنين اؤنونده جيدى آراکسمهلر ياراتماسى، ايران ايجتيماعيتىنين قؤوملارا و ميلتلره تعصوبله ياناشماسى، بيزه آيدينجاسينا بللىدير. اوستهليک، اؤز فاسيد قيشرىنين قازانجينى عموم خالقين و او جوملهدن ايراندا ياشايان ملتلر و قؤوملرين حقلريندن اوستون توتان، بؤلگهده و بيئنالخالق سوييّهده ايرتيجاعچى سياستلرله البيرليکدن چکينمهين، اوزون سورن فاسيد، توتاليتر و ايستيبداد حاکميتىنين قارشيسيندا خالقلارين قارداشلغى و بيرگه چاليشمالاريندن باشقا بير يول تانيماييريق. بو يولون يولچوسو اولماغىنين چتينليکلرينى بيليريک. بوندان قيراغا چيخماق و اؤلکهدن ديشارىيا آرخالانماق يالنيز بيزى يولدان ائديب و ديشارى حمايتچيلرين ايستکلرى و منافعلرينى قارانتى ائدن جيغيرا سالاجاقدير. بو باره ده تاريخين سوندوغو آجى تجروبهلرى و درسلرى اونوتمامالىييق.

گلين آپ آچيق دانيشاق: داها، اوکتيابر اينقيلابىنين آرديجا گلن دؤنمده و يا موستملکهچيليگه ضيدّيت حرکاتى دؤورونده ياشاماييريق. اينديکى دونيا فرقلى دونيادير. آزادليق و دموکراسىنين، دموکراتيک اصل اولاراق موقدراتينى تعيين ائتمک حقّىنين اوزرينه گؤلگه سالميش غنيمين، کونسرواتيو و ساغ سياستلر و ايدئولوژيلرين، دونياسيندا ياشاييريق. عربيستان، کئچن اللى ايلين ايچريسينده، اورتا دوغودا [ شرقده] ان ايرتيجاعچى سياستلرين اؤزهگى و آغيرليق مرکزى اولموشدور. حتا عرب اؤلکهلرينده ده ان کيچيک دموکراتيک مئيللرله دوشمنچيليک ائتميشدير. دموکراتيک حقلر ايديعاسيندا اولان بير گروپ يا تشکيلاتين اؤز ايدئآلينى اونا دوگونلهمهسى سياسى نظردن اوزاغى گؤرمهمک وياخينا گؤز تيکمک دئمکدير. گلين يالنيزجاسينا و تکجه اؤز خالقيميزين دموکراتيک ايستکلرينه و آزادليق ايدئآلينا وفالى اولاق!

ساييق اول! چؤل حراميسى سنى ايلغيم ايله آلداتماسين، سو باشينا چاتماغا هله چوخ يول قاليبدير!

[دور است سرآب در این بادیه هشدار،
تا غول بیابان نفریبد به سرابت [!

آذربايجان فدرال دموکرات حرکاتى

2016 جى ايل، سپتامبرين 15 / 1395 جى ايل شهريورين 25