آذربایجان فدرال دموکرات حرکاتی نین بیر مای موناسیبتییله بیلدیریشی
آذربایجانین ایشچی طبقه سی و زحمت آداملارینین موباریزه ده پارلاق گئچمیشی وعنعنه لری واردیر. ایرانداکی ایلک سندیکالار و ایشچی ایتحادیه لری آذربایجان تورک ایشچی لری نین چالیشمالارییلا قورولموشدور.
سون (گئچمیش) یوز ایلده، ایشچی ایتحادیه لری نین قورولماسینا بیر ایمکان و فورصت وئریلدیگینده تورکلر اؤنجو اولموشلار. بونا گؤره پهلویلرین سلطنت دورونده و ایسلام جومهوریتی نین قارا ایللرینده ان چوخ ظولمه، اذیت و باسقییا تورک ایشچی لری معروض قالمیشلار.
موزد آلان و آیلیق چی طبقه سی (طبقه مزد و حقوق بگیر) صینفی تشکیلاتا صاحیب اولمادان نه ایجتیماعی- سیاسی دییشیکلیکلرده ائتکی (تأثیر) باغیشلایابیلیر و نه اؤز صینفی طلبلرینی اله گتیره بیلیر. بو اوزدن دیر کی ایسلام جومهوریتی هر چئشید آزاد و موستقیل ایشچی تشکیلاتیندان وحشته دوشور.
ایشچی لر و زحمت آداملاری سون 30 ایلده ایسلام حوکومتی نین ایشچی طبقه سیله اولان دوشمانلیغینی بوتون وارلیقلاری ایله حیس ائتمیشلر.
آذربایجانلی ایشچی لر و زحمت آداملاری (کارگران و زحمتکشان) آذربایجانین هر یئرینده کی یاشیرلار و ایقتیصادین هر قانادیندا کی ایشلیرلر ایلک آددیمدا موجود سندیکالاری و ایتحادیه لری گوجلندیرمه یه و تثبیت ائتمه یه چالیشمالیدیرلار. ایشچی سندیکاسی نین اولمادیغی کارخانالاردا و ایش یئرلرینده اونلاری قورمالیدیرلار و عینی شکیلده فرقلی صینیفلارداکی ایشچی لر قوللارینی چیرمالاییب و اؤز صینفی تشکیلاتلارینی قورمالیدیرلار.
بللی دیر کی ایشچی ایتحادیه لرینی قورماق امنیتی اورگانلارین کنترلی آلتیندا راحات دئییل. البته ایتحادیه لرین قورولماسینین ایمکانی اولمادیغی پلیسی شراییطده صینفی موطالیبه لری نین دالینی توتماق ایچین ایشچی لرین گیزلی مرکزلرینی قورماق مومکوندور.
آذربایجانین ایشسیزایشچیلری اؤز تشکیلاتلاری نی قورمایا چالیشمالیدیرلار.
آذربایجانلی تورک ایشچیلری باشکندده ( پایتاختدا ) و آذربایجان مرزلری نین خاریجینده کی ایشچی سندیکالاریندا اؤز فراکسیونلاری نی قورمالیدیرلار. و ایتحادیه سی اولمایان کارخانالاردا و ایش یئرلرینده ایتحادیه لرین قورولماسیندا و ایشچیلری موتشککیل ائتمه ده آکتیو اولمالیدیرلار.
آذربایجانلی تورک ایشچی سی اؤز میللی هوویتی نی اوزه چکمکله، وطنداشلیق و میللی حوقوقونو ساوونماقدا و آیری سئچکیلیک و خورباخماقلا (تحقیر و تبعیض ) موباریزه ده اؤز دامقاسینی باسمالی دیر.
ایشچی طبقه سینین حرکتی سون یاریم عصیرده چوخ دیرلی تجروبه لر قازانمیشدیر. و بو تجروبه لردن درس آلینمالی دیر.
ایشچی لرین تجروبه لی کادرلاری، چالیشقانلاری و سندیکا جی لار ایشچی ایتحادیه لری نین صینفی مصلحتلری نین و منفعتلری نین جهتینده اولمالارینا چالیشمالی و لازیم اولمایان یئرده سیاسی مسئله لره قاریشماقدان قاچینمالیدیرلار(اوزاق دورمالیلار) گرچی ایسلام جومهوریتی قوش بازلارین تشکیلاتلانما سیندان بئله وحشته دوشور.و حتی بو جمعیتلری ده تحمل ائده میر.
آذربایجان میللی حرکتی نین کادرلاری، فعاللاری، محفیللری و تشکیلاتلاری ایشچی لرین مسئله لرینه و چتینلیکلرینه توجه ائدیب و ایشچی حرکتلرینده و اونلارین صینفی موطالیبه لرینی قازانماق ایچین آپاردیقلاری موباریزه ده اونلارین یانیندا اولمالیدیرلار.آذربایجان میللی حرکتی ایشچیلرین و زحمت آداملاری نین گوونی (اعتماد) نی قازانمالی دیرو بو آنجاق ایشچیلرین موباریزه لرینده عملأ شیرکت ائتمک و اونلاری دستکلمک له مومکون اولابیلیر.
اونوتمامالییق کی آذربایجان میللی دموکراتیک حرکتی تک مضمونلی بیر حرکت دئییل و اولامازدا. آذربایجان میللی حرکتی اگر بوتون میللتین آدینا دانیشماق و گنیش بیر توده نی بسیج ائتمک ایستیر – کی ایستیرده، قادین مسئله لرینه و اونلارین ایستکلرینه جیددی شکیلده توجه ائتمه لی دیر و اونلارین یانیندا، قادینلارین آزادلیغی یولوندا ایسلام جومهوریتی نین قادین علئیینه اولان گئری قالمیش و ایرتجاعی قانونلارییلا موباریزه ائتمه لی دیر.
عینی شکیلده ایشچیلرین و زحمت آداملاری نین نقد و واسیطه سیز ایستکلرینی ساوونماق، ایجتیماعی عدالت، یاشام چئوره سی و اینسان حقلری اوچون موباریزه آپارماق، آذربایجان میللی حرکتی نین وظیفه لریندن دیر.
آذربایجان فدرال دموکرات حرکاتی نین ایجرائیه هیئتی
8 اردیبهشت 1389
28 آپریل 2010