این جنبش پرده های جهل را کنار می زند/زبان ها و فرهنگ های متنوع از ذخایر این سرزمین است‬‬

اؤزلرینی یاشیل حرکت آدلاندیران فارسچی تمامیتچیلرین باشچیسی میرحسین موسوی نین میللت آنلاییشی اوزره باخیش

ایشیق سؤنمز

کئچکیش یازیلاردا ایشاره اولدغو کیمی میللت مقوله سی دیل و مدنیت، گله نک و گؤره نکلره اساسلانان بیر مقوله ساییلار. میللت آنلاییشینی دؤلتلر آراسی سیاسی تانینمیش سرحدلر ایله ایضاح ائتمک و یوروملاماق میللی مسئله نین حللینه گئتمک دئییل، عوامفریبلیک ائتمک ساییلار. بو باخیمدان میرحسین موسوی نین میللت آنلاییشینا گؤز آتاراق بو ذاتین هانکی میللت، دیل و مدنیتین خیدمتینده اولدوغونو ایضاح ائتمک داها دوزرگون اولار دئیه دوشونوروک، اوخویوروق:>>

"این جنبش پرده های جهل را کنار می زند/زبان ها و فرهنگ های متنوع از ذخایر این سرزمین است"[1].

اوسته میرحسین موسوی نین "سرزمین" آنلاییشی فارس دؤلتچیلیک آنلاییشینا اساسلانار. بیلیندیگی کیمی بو آدی چکیلن یئر (سرزمین) ائتنیک دابانا اساسلانمیش بیر جوغرافی بؤلگه دئییل، قاجار ممالیکی محروسه سی، یوخسا ایران ممالیکی محروسه سی یئرینه قورولموش فارس ایمپئریاسینی نظرده توتموش سیاسی و ایستعمارچی بیر ایفاده ساییلار. دئمک، جهل و جهالتی سیلمک ایزلنیمینی توپلوملار آراسی یایماغا چالیشان و اؤزلرینی بیر سیاسی و دینچی خادیم کیمی قلمه آلان ذاتلار ایلک اؤنجه عاریف اولدوقلارینی گؤسترمک اوچون ایران ممالیکی محروسه سینده کی میللیتلرین میللی وارلیقلارینی تانیماق ایزلنیمینی یانسیتماغا چالیشمالیدیرلار. ایران ممالیکی محروسه سینده کی میللیتلری دوشوک مدنیتلی Subkultur (خرده فرهنگ) قلمه آلاراق فارس دؤلتچیلیگی اساسیندا بو دیل و مدنیتلری بیر "ذخایر" آدلاندیرماق بو دیل و مدنیتلری اولدوغو کیمی گؤسترمک دئییل، قاتیقلاماق (ماست مالی کردن) و فارسلیق ترکیبینده ایضاح ائتمک مقوله سینه خیدمت ائده جک ایستعمارچی یاناشما ساییلار. بئلنچی یاناشمالار بوگون آوروپا و آمریکا بیرلشمیش شتاتلاری نین دؤلت خادیملری طرفیندن بو مملکتلره کؤچ (مهاجرت) ائتمیش کیچیک قوروپلاشمالار اوچون ده ایشلنمیش یاییقین بیر ایفاده ساییلار. بو یاناشمالار هر هانکی بیر یئرلی دیل و مدنیت صاحابلاری اوزره ایشلنمیش بیر مدنی و انسانی ایفاده دئییل، هر هانکی بیر مملکته قوناق کیمی گلمیش، اورانین تابعیتینی آلمیش، آنجاق توپلوم طرفیندن جیددیه آلینمایاراق دیشلاندیقلاری اوچون، یئرلی تشکیلاتلار مجلیسه داها آرتیق آداقلی (نامزد) گؤندره بیلمک و حاکیمیتچیلیکده آرتیق اتکی و نفوذ قازانماق اوچون سئچیم زامانلاری اوسته آدی چکیلمیش شخصلرین وئره جکلری سسلریندن فایدالانماق آماجی ایله اونلاری "خاریجی وطنداشلاریمیز" دئیه اونلارین کؤنوللرینی اوخشامالارینی (نوازش ائتمکلرینی) آنیمساتمیش (خاطیرلاتمیش) بیر مقوله ساییلار. بئله لیکله ده ایلک اونلارین سسلریندن فایدالانماغا گئدیلر، سونرا ایسه اونلارین اوغول اوشاقلارینی اؤز حزبی سیاستلرینه تابع توتماغا چالیشیلار. سونوج و نتیجه اعتیباری ایله اؤزلرینی بوگون ایصلاحاتچی و یاشیل آدلاندیران فارسچی و فارس ایستعمار یانچیسی اولان شخص و تشکیلاتلارین ایران ممالیکی محروسه سینده کی فارس اولمایان ائتنوسلارا یاناشمالاری بو ممالیکی محروسه ده کی فارس اولمایان دیل و مدنیت صاحابلارینا اؤزگه یاشادیقلارینی سرگیلمیش مقامدا یئر آلار. گئنه ده اوخویوروق:

"تک تک اصول مغفول و یا کنار گذاشته شده قانون اساسی باید اجرا شود و اگر مشکلی در این بین باشد به نظر خواهی عمومی گذاشته شود/ در شرایط فعلی مناسب ترین امکان برای تبادل اخبار و کسب اطلاعات فضای مجازی است و در وضعیت حاضر به گشایش فضای رسانه های آزاد خوش بین نیستم/ نباید این جنبش را فقط در سطح خیابان ها تحلیل کرد. ریشه این جنبش غیر قابل انکار است زبان ها و فرهنگ های متنوع از ذخایر این سرزمین است. زبان و بویژه زبان اوجی و شعر قابل ترجمه نیست و هر زبان ظرفیت هایی دارد که جزو سرمایه ها و ذخایر ملی محسوب می شوند و اهمیت این ذخایر فرهنگی در کشور کمتر از ذخایر مادی نیست/ در هیچ جای ایران تجزیه طلبان با اراده معطوف به وحدت طلبی در سطح ملی اهمیت و جایگاهی ندارند"[2].

اوسته میرحسین موسوی "اصول مغفول" دئدیکده حاکیمیتی ایسلامی آدلاندیردیقلاری فارس حاکیمیت نین 1360- 1368 = 1981 – 1989 ایللرینده، سکیز ایل حاکیمیت باشقانی اولدوغو زامانی هانکی اساسدا ایددعا ائتدیگی بو اصیللری گؤز آردی ائتدیگینه و آنا یاسا قارشیسیندا بوینونا گؤتورموش یوکوملولوگو و وظیفه لری یئرینه یئتیرمدیگی دوغرولتوسوندا آچیقلاما وئرمه لی و کئچمیشده کی خطالاری اوچون ایران ممالیکی محروسه سینده کی فارس اولمایان میللتلره حئسابات وئرمه لیدیر دئیه دوشونمه لی ییک. گؤروندوگو کیمی کئچمیشده حاکیمیت باشچیسی اولاراق بوینونا گؤتوردوکلری مسئولیتلر اوزره و ندن فارسلیق اساسیندا بو ایددعا اولموش بشر حاقلاری مقوله سی نین یئرینه یئتیریلمه سی نین امکانسیز اولدوغونو آچیقلیغا قاویشدیرماق یئرینه عوامفریبلیک ائتمگه چالیشاراق هر هانکی بیر آنلاشمازلیق اولارسا، سؤزده خالقدان سس آلما "نظر خواهی عمومی" مقوله سینی بیر گؤز بویاما آلتی کیمی اورتایا آتماغا چالیشار. محمد خاتمی ده ایکی یول جمهوری ایسلامی آدلاندیردیقلاری حکومتین جمهور باشقانی اولدوغونا و باشقانلیق وظیفه لرینی یئرینه یئتیرمدیگینه باخمایاراق (1376 – 1384 = 1997- 2005) سون زامانلار جمهور باشقانلیغینا آداقلی (نامزد) اولدوغونو گؤتور قوی ائده رکن بیر داها جمهور باشقانی اولارسا، میرحسین موسوی ایددعا ائتدیگی بندلری حیاتا کئچیرمک قابیلیتینده اولمازسا، بو ایشه کیملرین مانع اولدوغونو ایفاده ائده جگینه داییر او زامانکی باسین (مطبوعات) اورقانلارینا عوامفریبلیک ایفاده سی وئرمگه چالیشمیشدیر.

ایران ممالیکی محروسه سینده میللیتلر مسئله سینه گلدیکده اوسته گؤروندوگو کیمی میرحسین موسوی گئنه ده عوامفریبلیک ائتمگه چالیشار. "ممالیکی محروسه" مقوله سینی "سرزمین" دئیه فارس حاکیمیتچیلیگی اساسیندا یوروملاماق و بو ممالیکی محروسه نین نفوسونون اکثریتینی تشکیل ائدن میللیتلرین دیل و مدنیتلریینی Subkultur (دوشوک مدنیت) مقوله سینه یئرلشدیرمکله میرحسین موسوی اؤزو ده فارس مدنیت راسیستلری سیراسیندا یئر آلمیش گؤرونر[3]. دئمک، ایران ممالیکی محروسه سینده کی بوگونکو دیل و مدنیت آخینلارینی "تجزیه طلبلیک" تهمتی ایله قارالاماغا چالیشماق هئچ ده اؤزونو آیدین و دئموکرات قلمه آلدیرماغا چالیشان ذاتلارا اویقون بیر یاناشما دئییل، بو یاناشما اؤز کیملیگینی فارس مدنیت راسیستلیگی اساسیندا تانیملاماغا (تعریفلمگه)، باشقا دیل و مدنیتلری فارس ایستعمارچیلیق تاپداغیندا یوخ ائتمگه چالیشان هر هانکی بیر فارس مدنیت راسیستی نین ایران ممالیکی محروسه سینده کی میللیتلر مسئله سینه یاناشما ایفاده سیدیر. گؤروندوگو کیمی "جمهوری ایرانی" شعارینی اورتایا آتمیش ذاتلار، اؤزلرینی "جنبش سبز" آدلاندیران ذاتلارین آچیق و آشکار تریبونو ساییلارلار. جمهوری ایرانی مقوله سینه اساساً ایران دیل قوروپلارینا عایید اولمایان دیل و مدنیت صاحابلاری او جومله دن آذربایجان تورکلری، تورکمنلر و عربلر ایران دیل قوروپوندا یئر آلمادیقلاری اوچون سسسیز و سمیرسیز فارس دیل و مدنیتینی قبول ائتمه لی، ترس دورومدا خاریجی قلمه آلیناراق یئری گلرسه، اونلارلا بیر خاریجی کیمی داورانیلمالیدیر ایزلنیمینی حاکیمیته گلمدیکدن بیله توپلوملار آراسی یایماغا چالیشارلار. ایرانیتچی و فارس ایستعمارچیلیق گؤروشونه اساساً کورد، لور، بلوچ، گیلک و باشقالاری ایسه ایران دیل قوروپو عضولری دئیه فارس دیل و مدنیتی نین بیر آلت قوروپو Subkultur اولاراق داها دا فارسلیغین اریتمه سیاستینه تابع توتولمالیدیرلار. میرحسین موسویدن گئنه ده اوخویوروق:

"..... وی با اشاره به مسائل آذربایجان ضمن تاکید مجدد بر حرکت جمعی همراه با حفظ اصول افزود: حتی با یک شاخص مشترک می توانیم با هم و برای رسیدن به اهداف مشترک حرکت کنیم. در هیچ جای ایران تجزیه طلبان در سطح ملی اهمیت و جایگاهی ندارند[4].

میرحسین موسوی نین گؤروشلرینی نظره آلدیقدا اورتادا بللی بیر اورتاقلیق دئییل، عوامفریبلیک و شیادلیق وار. بو عوامفریبلیگه اساساً حاکیمیتی دگیشمک اوچون انقلاب ایسلامی نین باشلانیشیندا باش وئردیگی و حیاتا کئچدیگی کیمی "همه باهم" شعاری وئریلمه لی، سونرا ایسه فارسلیق اساسیندا "من برهمه" شعارینی وئرمگه و بدویته دوغرو آددیم آتاراق بعضی ذاتلارین سادیستی مفکوره سینی حیاتا کئچیرمک اوچون عوامفریبلیک مقوله سی اؤز گونجللیگینی قورویاجاق بیر مقوله ساییلار. بو اساسدا فارس اولمایان ائتنوسلار اؤزلرینی یاشیل آدلاندیران فارس ایستعمارچیلارینا قارشین داها دا توتارلی داورانمالی و بیر داها اونلارا عوامفریبلیک و ایستحمارلیق سیاستی اویقولاماغا اولاناق و ایمکان وئرمه مه لیدیرلر دئیه دوشونمه لی ییک.

قایناقلار: