ويدادي موصطافايئو,

تاريخ علملري ناميزدي

رای

او گون موطلق گلهجک

آذربايجان تاريخينين شانلي و عئيني زاماندا فاجيعهلي صحيفهلريندن بيرينه – جنوبی آذربايجاندا مؤوجود اولموش ميلی حؤکومتينين بير ايلليک فعاليتينه حصر اولونموش چوخسايلي موختليف سپکيلي اثرلر سيراسينا گونئيلي گنج ژورناليست, شاعير و تدقيقاتچي عاليم, حال-حاضيردا کانادادا ياشايان ميانالي عليرضانين بير مودت اول وانکووئر شهرينده آذربايجان ديلينده عرب قرافيکاسي ايله نشر ائتديرديگي ايکي جيلدليک «سيلاحلا اؤلچولن تورپاق» (جنوبي آذربايجاندا ١٩٤٦-١٩٤۵-جي ايللر ميلی-دموکراتيک حرکات) کيتابي علاوه اولونموشدور. قئيد ائتمک لازيمدير کي, بو اثر همين مووضوعيا عايد سون اوچ ايلده يازيلميش اوچونجو کيتابدير. ٢۰۰٣-جو ايلده آ.م.ائ.آ. آکاد. ز.م.بونيادوو آدينا شرقشوناسليق اينستيتوتونون امکداشي اکرم رحيملينين «گونئي آذربايجاندا ميلی-دموکراتيک حرکات» (١٩٤٦-١٩٤١-جي ايللر), ٢۰۰٤-جو ايلده مرحوم سياسی-ايجتيماعي خاديم, تاريخچي عاليم ح.حسنووون «جنوبي آذربايجاندا ميلی-دموکراتيک حرکات (١٩٤٦-١٩٤١-جي ايللر) مونوقرافييالاري نشر اولونموشدور. بو فاکت ١٩٤٦-١٩٤١-جي ايللرده جنوبی آذربايجاندا باش وئرميش ميلی-دموکراتيک حرکاتين خالقين تاريخينده يئري, اهميتي و آکتوالليغي ايله ايضاح اولونا بيلر.

قيسا مودت عرضينده فعاليت گؤسترميش ميلی حؤکومتين فعاليتي او قدر فوندامئنتال, چوخجهتلي و موترقي خاراکتئر داشيميشدير کي, اونون بوتون آسپئکتلريني بير اثر چرچيوسينده هرطرفلي و دولغون شکيلده ايشيقلانديرماق چوخ چتيندير. آدي چکيلن اثرلر حرکاتين اساس حاديثهلري و مرحلهلريني عکس ائتديرمکده موعين قدر اوست-اوسته دوشسه ده, بوتؤولوکده بير-بيريني تکرار ائتمير, عکسينه, تاماملاييرلار. عئيني زاماندا مولليفلر فرقلي دونياگؤروشون, سياسی, ايجتيماعی يؤنومه ماليک اولدوقلاريندان حرکاتا, خوصوصن اونون آيري-ايري عونصورلرينه نيسبتن موختليف ياناشمالار نوماييش ائتديرميش, موختليف حاديثهلرين ايشيقلانديريلماسينا عئيني ديقت گؤسترمهميشلر. محض بو موختليفليک حرکات حاقيندا داها دولغون, اوبيئکتيو تصوور الده ائتمگه يارديم گؤسترير.

معلوم اولدوغو کيمي, قاجار طايفاسي و سولالهسينين تيمثاليندا ١٨ عصرين آخيرلاريندان ٢۰ عصرين اووللرينه کيمي ايراندا سياسی حاکيميته ماليک اولموش, اولکهنين سياسی, ايقتيصادي, مدني و معنوي حياتيندا, موترقي ايدئيالارين ياييلماسيندا آپاريجي رول اويناميش, لاکين يئني دووره کئچيد مرحلهسينين اووللرينده ميلی حياتين ائتنيک کومپونئنتلرينين هرطرفلي اينکيشافي اوچون لازيمي سياسی, مدني موحيطين ياراديلماسينا ديقت يئتيرمهميش جنوبي آذربايجانليلار اؤزلرينين حاکيميته گتيرديکلري رضا خانين شاهليق تاخت-تاجينا صاحيب اولماسيندان سونرا (١٩٢۵) داوام ائتديريلن مرکزلشديرمه سيياستي و اونون اساسيندا يئني کئيفيت کسب ائدن ميلی موناسيبتلرده قئيري-برابر مووقع توتاراق محکوم دوروما دوشموشلر. همين واختدان اعتيبارن ٢۰۰ مين کوادرات کيلومئتره قدر اراضيسي, ۵ ميليونا قدر اهاليسي (ايران اهاليسينين اوچده بيري) اولان جنوبی آذربايجان و اؤلکه اهاليسينين ياريدان چوخونو تشکيل ائدن آذربايجانليلار ميلی حوقوقلاردان محروم ائديلميش, سوسيال-ايقتيصادي جهتدن گئتديکجه گئريلمگه مجبور ائديلن بير ايالته و خالقا چئوريلميشدي. يئني سياسی رئژيمين شووينيست حاکيم ميللتچي سيياستي ديگر خالقلارين ائتنوميلي اينتئقراسييا و فورمالاشما پروسئسيني لنگيتمگه چاليشميش و بو شرايطده يالنيز جنوبی آذربايجاندا همين سيياسته موقاويمت حرکاتي يارانماغا باشلاميشدير. گئتديکجه حربي-پوليس ديکتاتوراسي خاراکتئري کسب ائدن «کونستيتوسييالي مونارخييا»نين حاکيم ميللتچي, شووينيست سيياستينه چتينليکله ده اولسا, مدني, ايدئولوژي و عملي موقاويمت گؤستريليردي. ١٩٤١-جي ايلده بئينالخالق موناسيبتلر سيستئمينده باش وئرميش اساسلي دييشيکليکلر و اونون ايرانا بيلاواسيطه تاثيري نتيجهسينده (کئچميش س.س.ر.اي., اينگيلتره, آبش, حربي قووهلرينين بو اؤلکهيه داخيل اولماسي) اؤلکهده يارانميش يئني سياسی دوروم (رضا شاهين اؤز بؤيوک اوغلونون خئيرينه حاکيميتدن گئتمهسي, سئنزورانين لغو ائديلمهسي, سياسی محبوسلارين آزاد ائديلمهسي و س.) ميلی-سياسی, ميلی-مدني تشکيلاتلاردا بيرلشن آذربايجانليلارا اؤز حوقوقلاريني تامين ائتمک اوغروندا نيسبتن موتشکيل موباريزهيه باشلاماق ايمکاني وئرميشدير. ايکينجي دونيا موحاريبهسينين باشا چاتماسي ايله موستملکه سيستئمينين لغو ائديلمهسينين گئنيش ووسعت آلديغي بير شرايطده ايراندا يارانميش موناسيب سياسی-ايجتيماعی موحيطدن بهرهلنن آذربايجانليلار اؤز ميلی-سياسی تشکيلاتلاريني (آذربايجان دموکرات پارتيياسي) ياراداراق, داها مقصديؤنلو شکيلده سياسی, سوسيال, مدني حوقوقلاريني برقرار ائتمک اوغروندا موباريزه آپارميش و ١٩٤۵-جي ايلين دئکابر آيينين ١٢-ده (آذر آيينين ٢١-ده) ميلی حؤکومت تاسيس ائتميشلر. آمما آز کئچمهميش همين حاديثه بئين الخالق موناسيبتلرين, خوصوصن دوننکي موتفيق بؤيوک دوولتلر آراسينداکي ايليشگيلرين گرگينليک اوبيئکتينه چئوريلدي. اوز تاثير و نوفوز دايرهلريني قلوبال سوييهده موحکملتمک و گئنيشلنديرمکله مشغول اولان بؤيوک دوولتلر بعضي رئگيونلاردا بير-بيرينه گوذشته گئتمگه مجبور اولوردولار. مرکزي, شرقي, جنوبی آوروپادا و اوزاق شرقده اؤز مووقعيني موحکملنديرمکده اولان کئچميش س.س.ر.اي. ياخين و اورتا شرقده, او جوملهدن ايراندا گئري چکيلمهلي اولدو. بو, جنوبی آذربايجاندا يئنيجه فعاليته باشلاميش ميلی حؤکومتين بئينالخالق دستکدن محروم اولماسي دئمک ايدي. بوندان سونرا بئينالخالق دستگه آرخالانان ايران ايرتيجاعسي ميلی حؤکومته قارشي تخريبات و تضييقي گئنيشلنديرهرک, جنوبی آذربايجانا سيلاحلي باسقين ائتدي و ٢۵ ميندن چوخ وطنپروري قتله يئتيريب ميلی حاکيميتين وارليغينا سون قويدو. يوز مينلرله آدام حبس و سورگونلره معروض قالدي, جنوبی آذربايجاندا داها ايرتيجاعچي, ميللتچي شووينيست سياست برقرار ائديلدي.

حرکاتين ياتيريلماسيندان سونرا اونون تاريخي, گئديشي, اهميتي گئنيش شکيلده اؤيرنيلمگه باشلاميش, اونا موختليف ياناشمالار و قييمتلنديرمهلر مئيدانا چيخميشدير. همين واخت و اوندان سونرا فارس شووينيزمي مؤوقعينده دوران مولليفلر جنوبي آذربايجانليلارين موستقيل ائتنو-سوسيال اورقانيزم اولدوغونو اينکار ائتديکلريندن, حرکاتين ميلی زمينه سؤيکنمهديگيني, خاريجدن (س.س.ر.اي.) صونعي شکيلده تشکيل ائديلديگيني وورغولاماغا چاليشيرلار.

عليرضا مييانالينين حاقيندا دانيشيلان کيتابي بو تيپلي اساسسيز ايديعالارا داها بير توتارلي جاوابدير. کيتابدا وئريلن خاطيرهلر, موخليف طبقهلري تمثيل ائدن اينسانلار حاقيندا معلوماتلار, ميلی حاکيميت اوغروندا ه گرگينليگيني, غلبهنين ياراتديغي خالق سئوينجيني, بايرام احوال-روحيهسيني, قوروب-ياراتماق عزميني تفرروعاتي ايله ايشيقلانديران فاکت و تحليللر بو حرکاتين خلقيليگينه هئچ بير شوبهه يئري قويمور. ميلی حؤکومتين مغلوبيتي سببلرينين کيتابدا بيرجه-بيرجه, صبرله و بوتؤولوکده اوبيئکتيو شکيلده آراشديريلماسي دا يوخاريداکي ايديعانين اساسسيز اولدوغونو اينانديريجي شکيلده اوزه چيخارير.

اصلينده آذربايجانليلارين ميلی حرکاتلارينين اونلارين اؤز حرکاتي اولدوغونو ثوبوت ائتمگه احتياج يوخدور. چونکي ميلی حوقوقلاردان محروم اولان, مادي و معنوي ثروتلري تالان ائديلن, کيمليگي تحقير اولونان خالقين آزادليق اوغروندا موباريزه آپارماسي طبيعي حالدير. ميلی موناسيبتلر سيستئمينده غئيري-برابر يئر توتان خالقين آزادليق موباريزهسيني خاريجي قووهلرين تاثيري ايله باغلاماق حاديثهنين ماهيتيني قصدن تحريف ائتمکدن باشقا بير شئي دئييلدير.

حاقيندا دانيشيلان کيتابين مزيتلري يوخاريدا قئيد اولونانلارلا محدودلاشمير. اثرده ميلی-دموکراتيک حرکاتين يارانما سببلري, حرکاتين گئديشي, يارانان سياسی, ايجتيماعی, مدني, ايقتيصادي, حربي قوروملار, ميلی حؤکومتين ايجتيماعی حياتين موخليف ساحهلرينده حياتا کئچيرديگی تدبيرلر رسمي سندلر, هاديثه ايشتيراکچيلارينين گوندهليکلري, خاطيرلري, دؤوري مطبوعات و علمي ادبيات اساسيندا هرطرفلي آراشديريلير و دؤورون, حرکاتين بوتؤو, جانلي اوبرازي ياراديلير. اثره يئنيليک گتيرن جهتلردن بيري دؤوری مطبوعاتدان, مئموار ادبياتيندان گئنيش شکيلده ايستيفاده اولونماسي, موعين مئموارلارين (اکثريتي چاپ اولونماييب) ايلک دفعه علمی دؤورييه داخيل ائديلمهسيدير. بو باخيمدان حاقيندا دانيشيلان اثر تدقيقاتچيلار اوچون دگرلي قايناق اولا بيلر.

اثر حجمجه بؤيوک اولسا دا, چوخ ماراقلا اوخونور. چونکي بورادا بديعي, پوبليسيستيک و علمی اوسلوبلار بير-بيرينه چولغاشاراق, عوضوي وحدت تشکيل ائدير و دؤورون بيتکين, آنلاشيقلي اوبرازينين ياراديلماسينا خيدمت گوسترير.

دئييلنلرله ياناشي, حاقيندا دانيشيلان اثر, فيکريميزجه, بعضي نوقعانلاردان دا خالي دئييلدير.

کيتاب سانکي داها چوخ حرکات ايشتيراکچيلاري, اونلارين اؤولادلاري و بيلاواسيطه حرکاتين تاريخي ايله ياخيندان تانيش اولانلار اوچون يازيلديغيندان بير سيرا موهوم و ايلکين معلوماتلارين قئيد اولونماسي اونودولموشدور. بونو جنوبی آذربايجاني, اونون ٢۰ عصرين بيرينجي ياريسينداکي تاريخيني دريندن بيلمهين اوخوجولار, او جوملهدن خاريجده ياشايان آذربايجانليلار درحال حيس ائدهجکلر. اگر اثر هر هانسي بير خاريجي ديله ترجومه ائديلسه, بو جهت اؤزونو داها آيدين گوسترهجکدير. اونا گؤره ياخشي اولاردي کي, اثرين گيريشينده جنوبی آذربايجان, آذربايجانليلار, حرکات عرفهسينده ايراندا ميلی موناسيبتلرين وضعيتي حاقيندا موختصر معلومات وئريلسين.

موليف حرکاتين ياتيريلماسيندا کئچميش س.س.ر.اي.-نين رولونا گئنيش يئر آييرسا دا, حرکاتا همين دؤولتين دستگيندن دانيشماميشدير. آيريجا وورغولاماق لازيمدير کي, کئچميش س.س.ر.اي.-نين دستگي جنوبي آذربايجانليلارين آزادليق حرکاتينين ميلی زمينده مئيدانا گليب اينکيشاف ائتديگي مودعاسينا قطعين کؤلگه سالا بيلمز. عوموميتله, تاريخده و خوصوصن ٢۰ عصرده بئينالخالق موناسيبتلرين داها اينتئنسيو و هرطرفلي ميقياس آلماسي, حربي-سياسی قروپلاشمالارين مئيدانا گلمهسي شرايطينده ميلی آزادليغا نايل اولموش اولکهلرين اکثريتي بونو بئينالخالق دستک سايهسينده الده ائتميشلر. بؤيوک دؤولتلر اؤز گئوسياسی, ايستراتئژي مقصدلريندن چيخيش ائتسهلر ده, ميلی آزادليق اوغروندا موباريزه آپاران خالقلارا موخليف فورما و سوييهده کؤمک گؤسترميشلر. ايستهنيلن حالدا مغلوبيتين آجيسي و فاجيعهسيني, غلبهنين سئوينجيني موباريزه آپاران خالق ياشاميشدير. اونا گؤره س.س.ر.اي.-نين حرکاتا هر ايکي موناسيبتيندن – هم دستگيندن, هم ده يوخاريدا قئيد ائديلن سببدن اونو دستکدن محروم ائتمهسيندن دانيشماق لازيم ايدي.

موليف همچينين او دؤورده شيمالي آذربايجانين کئچميش س.س.ر.اي.-نين ترکيب حيصهسي اولماسي فاکتيندان چيخيش ائدهرک, ميلی حرکاتدا شيمالي آذربايجانليلارين بو و يا ديگر درجهده ايشتيراکي مسالهسينه ده توخونماميشدير. هر بير آذربايجانلي همين شانلي و فاجيعهلي تاريخي بوتؤولوکده آذربايجان خالقينين تاريخينين بير صحيفهسي حساب ائدير. ائله همين دؤورده ده شيمالي آذربايجانليلار بوتون محدوديتلره باخماياراق, حرکاتا اللريندن گلن يارديمي گؤسترمگه چاليشميشلار. اصلينده ٤٦-١٩٤۵-جي ايللردهکي ميلی حرکات آذربايجانليلارين اؤز ميلی پروبلئملريني حل ائتمک يولوندا ايلک بيرگه تجروبهسي کيمي قييمتلنديريلمهليدير.

نهايت, اونو دا قئيد ائتمک لازيمدير کي, اثره ايري حجملي «گيريش» يازميش موليف اونو «نتيجه»سيز بيتيرميشدير. بيزه ائله گلير کي, موليف بونو موعيين مقصدله ائتميشدير. اثره نتيجه يازيلماماسي هلهليک حرکاتين بير نتيجهيه گليب چيخماماسيندان ايرلي گلير. حرکات داوام ائدير و الده ائديلهجک نتيجه قاباقدادير, اونا گؤره نتيجهسيز حرکات حاقيندا اثره نتيجه يازماق يئرسيز گثرونه بيلر. بو, بيزيم سوبيئکتيو مولاحيظهميزدير. هر حالدا اثره نتيجه يازماق نهاينکي اونون علمی دگريني آرتيراردي, عئيني زاماندا ميلی حرکاتين داوام ائتديگيني گؤسترمکله اونون بوگونکو وضعيتي حاقيندا موعين و لازيمي تصوور ياراداردي. آمما اينديکي حاليندا اثري اوخويارکن, ياخين کئچميشده ده اولسا, نه واختسا جنوبی آذربايجان آدلي بير اولکهده باش وئريب تاريخه چئوريلميش حاديثه خاطيرلانير. آمما معلوم اولدوغو کيمي, حرکاتين ياتيريلماسي زاماني آذربايجان خالقينين موترقي قووهلرينه, اونون ائليتاسينا هم ده بير رقيب کيمي ائنديريلن سارسيديجي ضربهيه, جنوبی آذربايجانين گئري قالان بير ايالته چئوريلمهسينه يؤنلميش سيياسته باخماياراق, آذربايجانليلار يئنيدن داها صبرله, داها آرديجيل و چئشيدلي فورمالاردا ميلی حوقوقلاري اوغروندا موباريزهني داوام ائتديرديلر. همين موباريزه نتيجهسينده ١٩٧٩-جو ايل ايران اينقيلابيندان سونرا آذربايجانليلارين ميلی-مدني حوقوقلاري قيسمن قانوني فورمادا (اساس قانون, ١۵-جي ماده) تانيندي. بو حوقوقلار ايندييه کيمي رئاللاشديريلماسا دا, معيشت سوييهسينده فارسلار ميلی اوستونلوکلريني آچيق شکيلده نوماييش ائتديرمکدن چکينمگه باشلاميشلار. حاضيرکي سياسی-مدني شرايط ميلی حوقوقلار اوغروندا موباريزهنين هم داخيلده, هم ده خاريجده يئني فورمادا و سوييهده داوام ائتديريلمهسينه زمين ياراتميشدير. آرتيق ميلی-آزادليق حرکاتيینين ايدئولوگيياسينين فورمالاشماسي باشا چاتماق اوزرهدير, حرکاتين سياسی فورماسي دا تشکول مرحلهسيني ياشايير.

ميلی حؤکومتله باشلانميش ميلی-آزادليق حرکاتي يئني مرحلهيه قدم قويموشدور. بونون گؤستريجيلريندن بيري ميلی حؤکومتين ايدئيا و ايدئاللارينين موعاصير حرکاتين ترکيب حيصهلريندن بيرينه چئوريلمهسيدير. اودور کي, ميلی حؤکومتين تاريخيني آراشديرماق, اونون فعاليتينين يئني-يئني جهتلريني موعيين ائتمک حرکاتين اينديکي وضعيتي باخيميندان دايم آکتوال و واجيب مسالهدير. بو معنادا حاقيندا دانيشيلان اثر ميلی-آزادليق حرکاتينين کونکرئت مرحلهسينين دولغون اوبرازيني ياراتماقلا حرکاتين ايدئولوگيياسينين اينيکشافينا دگرلي تؤحفهدير. بيز «سيلاحلا اؤلچولن تورپاق» کيتابينين موليفي قارداشيميز عليرضا بيگه خالقين ميلی-آزادليغي اوغروندا آپارديغي موباريزهده داها بؤيوک اوغورلار آرزولاييريق. اينانيريق کي, همين يولدا صرف ائديلميش امک هدر گئتميهجک و او گون موطلق گلهجکدير.