آذربایجان- ارمنستان آراسیندا امضالانان مقاوله ایله مخالف اولانلار کیملر دیلر؟...

سيف حاتملوى

مقاوله ایله مخالف اولانلاری اوچ دسته یه بؤلمک اولار:

- بونلاردان بیر عده سی نین حقلی اولاراق روسلارین قاراباغا گلمه سینده ن نگرانچیلیقلاری وار.

- بیر عده خبرسیزلیکده ن، حسسیاتا قاپیلیب و بئله بیر ساواشی اوشاق اویونو بیلیرلر.

- بیر عده ده خالق جبهه سینین اقتداردان اوزاقلاشماسینی اونودا بیلمه ییب و بو گونکی آذربایجان حاکمیت ینده ن آجیقلارینی بئله گؤسته رمک ایسته ییرلر.

بونلاردان بیر عده سی مخالفت لرینه مشروعیت وئرمک اوچون، بو گون مثلا تورکیه مئدیاسیندان فاکتلار گتیرمه یه چالیشیرلار.

حالبوکی بو بیر تورکیه لینین مسئله یه باخیشی دی. البته کی اولا بیلر کی، بیر شماللی و جنوبلی آذربایجانلی نین باخیشی ایله بعضا یئرده ن گؤیه قدر فرقلی اولسون.

آیریجا بیلمک لازیم دی کی، ایکی اؤلکه نین آراسیندا گئده ن ساواش دا هئچ زمان بیر طرف یوزده یوز غالب گله بیلمز. 

یوزده یوز غلبه، یانی قارشی طرفی بوتونلوکله محو ائدیب و یوخ ائتمک دئمک دیر. 

آذربایجان طرفی ارمنی لری محو ائتمک ایسته میردی و گله جکده ده  ایسته مه یه جکدی. ارمنستانین وارلیغی اورادا بیر گرچکلیک دی و اونلارین بیزلره قارشی ایشله دیکلری جنایت لره رغما، قونشو اولاراق اونلار ایله بیر یئرده یاشماغا مجبور و ناچاریق.

آذربایجان اردوسونون تاریخی غلبه سینده ن سونرا، اورالاردا یئنی بیر صحیفه آچیلمیشدی. 

آذربایجان بو قدر شهید وئرمه ییب کی، قاراباغی بیر دفعه ده ارمنی لره وئرسین.

روسلارین اورادا اولماسینین (روس ماراخلارینی قوروماقدان باشقا) بیرینجی سببی، غرب اؤلکه لرینه بو گارانتی نی وئرمک دی کی، آذربایجانلیلار ارمنی لری اورالاردان قوومایاجاقلار.

توتالیم کی، اونسوزدا بیر پارا ارمنی لر ( ایشله دیکلری جنایت لره گؤره) قورخودان داها قاراباغا گئری قاییتمازلار.

بیزیم بیر عده میز بو گون داها اون یئددی یاشیندا دئییلیک و اؤز اؤلچوموزده بیر عومور سیاست مئیدانیندا سوموک سیندیردیقدان سونرا، داها " رئالیست" اولماغیمیز گره ک دی.

رئال دونیادا، بیزلره دیکته ائدیرکی، "قاچ زین را بچسب، اسب سواری پیشکش ات".

اونون اوچون ایندی آرزولاریمیزی کیچیلدیب و بئله بیر قالیبا سالمالیییق.

گلین اؤنجه بو گونو یوخ، مثلا اوتوز ایل سونرانی تصور ائده ک:

من امینم کی بیر گون ایکی آذربایجان بیر بیری ایله بیرلشه جکدی. لاکن بو بیرلشمه "سیاست" مئیدانینان دان اؤنجه، "اقتصاد" مئیدانیندا اولاجاقدی.

بو پروسس چوخدان باشلامیشدی. لاکن اونو دوام ائتدیریب و یولونا قویماق اوچون، شمالی آذربایجان گره ک پایینا دوشنی ائله سین و:

- گلن بئش اون ایلده روسلار ایله آنلاشیب (بوندان سونرا ارمنی لر داها شمالی آذربایجانی جدی شکیلده اینجیتمه یه قادیر دئییللر) شمالی آذربایجان اراضی بوتوولویونو برپا ائتسین. بو پروسس باشلامیش و قطعیا و یوزده یوز امین اولاق کی، آذربایجان ین خئیرینه بیته جکدی.

- خالقی آموزش- پرورش، بهداشت، انفراسکتور، سیاسی کولتور، رفاه و مدنیت عرصه سی نین دیگر ساحه لرینده یاواش- یاواش ایگیرمی بیرینجی عصرده یاشاماغا حاضیرلاسین. بو پروسس ده، اورالاردا چوخدان باشلامیشدی.

جنوبی آذربایجانین عکسینه، چون یئنی نسیل شمالی آذربایجان دا غربی اؤلکه لرده قبول اولونموش "انسان حقلری ارزشلری" ایله تربیت اولور، قطعیا آذربایجاندا اوتوز ایل ده ن سونرا داها دموکراتیک و داها هومان بیر جامعه یه شاهیدی اولاجاغیق.

جنوب ین پایینا دوشن:

- جنوبدا فارس شوونیزمی نین تاپداغی آلتیندا اولان ملتیمیزین "الیت" حصه سینه یاواش- یاواش فارسلاردان، کوردلرده ن و ... باشقا ملتلرده ن فرقلی اولدوقلارینی باشا سالیب، تهرانین و ساغ - سول مرکزچیلرین شانتاژلارینا تسلیم اولمایاراق، ملی کیملیک ییمیزی داهادا آردیجیل قوروماغا چالیشمالییق.

- اؤنجه، گئت- گل، تجارت و آلیش- وئریش ساحه لرده ایکی آذربایجان آراسیندا سرحدلری آرادان قالدیرمالییق. بونون حیاتا کئچمه سینه هر ایکی اؤلکه ده مخالفلر وار. بو ایش اولدوقجا مهم دی. خصوصیله آذربایجان ملی سرمایه سینه یاخشی مئیدان آچا بیلر. فارسلار بونا قارشی چیخاجاقلار. لاکن بیز بو ایشه قادیریک، چونکی جنوبدا سرمایه صاحبلری تهرانین تضییق لرینده ن عاجز اولوبلار. قاراباغ ساواشیندا روحانی لرین، مجلس نماینده لری نین، آذربایجان اصلاح طلبری نین و ... تهراندان آیری حرکت ائتمه لری هر نه قدر بیر "مانور" اولسادا، گینه ده چوخ بارز شکیلده آذربایجانلی نین تهراندان اوزاقلاشماسینا جدی بیر فاکت دی. امین اولاق کی بو پروسس داهادا شدت لنه جکدی. 

- عین زماندا تورکیه ایله ده مناست لریمیزی داهادا گوجلندیرمه لیییک.

نتیجه: بو خمیر چوخ سو آپاراجاق.

آنا هدفی گؤزده ن قاچیرمادان، یاواش- یاواش ایره لی لمه لیییک.

شمالی آذربایجان اوتوز ایلدی کی، اراضی بوتوولویونو برپا ائتمک اوچون یاواش- یاواش ایره لی له ییر. بو مقاوله ده او آددیملاردان بیری دیر.

شمالی آذربایجان مستقل اولاندا حضیض ذلته دوشموش دورومدایدی. او زامان سیاست ده ن آنلامایان، آخماق - آخماق شعارلار و حرکتلر ایله قاراباغی و آذربایجان رایونلارینین ارمنی لرین اشغالینا وئره نلر، بو گون آذربایجاندا گینه اردوموزون شانلی ظفرینی کؤلگه آلتینا سالماق ایسته ییرلر. 

اوتوز ایل بوندان قاباق ایله مقایسه ده، بو گون آذربایجان جمهوریسی حربی، اقتصادی و سیاستی جهت ده ن ذیروه لرده دی.

آذربایجان جمهوریسی نین  ظفرینین عظمتی نی باشا دوشمک اوچون، ایروان دا و تهراندا اولانلارا باخماق لازیم دی.

ایروان دا آز قالا ایچ ساواش باشلاماقدادی، تهران ایسه یارالی قورد کیمی، باکی یا ساری اولاماقدادی.

بوتون چاتیشمامازلیقلارا رغما، شمالی آذربایجان ین حاکمیتی نه ائتدییی نی چوخ یاخشی بیلیر و یاخشی دا یولونا قویماقدادی.

قاراباغ آذربایجانین آیریلماز حصه سی دیر.

باخین خریطه ده شوشانین موقعیتینه: بیر پیکان کیمی قاراباغین اوره یینه ساپلانمیشدی.

امین اولون کی ساواش بیر دفعه ده باشلاسا، قاراباغین قالان حصه سینی آزاد ائتمک، آذربایجان اردوسو اوچون بیر ایکی هفته نین ایشی دیر.

بونو هامیدان چوخ یاخشی ایندی ایروان بیلیر.

لاکن بونا گره ک قالمایاجاقدی، قاراباغ و اورادا یاشایان ارمنی لر، یئتمیش بیر میوه کیمی، باکی نین قوجاغینا دوشه جکلر.

اونون اوچون عصب لریمیزه حاکیم اولاق.