س. سیداوالی

اوجادان دوشونورکن

اؤزوم- اؤزومه یاخالاندیم

...

دواملی اولاراق نشره وئرمه یه چالیشدیغیم بو یازیلار, کئچن اوچ- دورت ایلین عرضینده مجازی دونیادا گؤردوکلریم, ائشیتدیکلریم و اوخودوقلاریمین معین تاثراتی کیمی قلمه آلینمیشدیلار.

یازیلارین چوخونلوغو, آنا دیلیمیز آذربایجان تورکجه سینده یازیلمیشدیلار. لاکن استثنا اولاراق و وضعیتده ن آسیلی, بعضا فارس دیلینده ده یازماق مجبوریتینده قالمیشام.

یازیلارین بیر چوخو, اوجادان دوشونر کیمی, اؤزوم- اؤزومه و یا یاخین بیر دوستا یازیلدیقلاری اوچون, اوخوجولارا تقدیم ائتدیکده, اونلاردا کیچیک دئییشیکلر آپارمیشام.

*****

(4)

شاعیر محمد حسین طهماسب پور (شهرک)

فئورال 2016

کئچن هفته آذربایجان ملی- دموکراتیک مبارزه سی ایله علاقه دار اولان سایت لارین بیرینده, شاعیر دوستوم شهرک ین ساتیریک شعرلرینده ن بیرینی گؤروب, او شعری ایمیل واسیطه سیله روسیه ده یاشایان قدیم دوستلاریمین بیرینه گؤنده ردیم. دوستومون یازدیغی جاوابی اوخودوقدان سونرا, او محبتلی سطیرلرین قانادلارینا مینیب و بیر دفعه ده انقلابین گونلرینه قاییدیب و امید و آرزولار ایله طراوتلنمیش او گونلرده, مجازی اولسادا ده رینده ن نفس آلدیم.

دوستوم یازیسیندا, او گونلرده خیاوانلاردا استبدادا قارشی کئچیریلن خالق نمایشلرینده, مشترک دوستوموز شهرک ین دیللرده ازبر اولان شعرلرینده ن یاد ائتمیش و منده ن شاعیرین ساتیریک شعرلرینده ن نمونه لر ایسته میشدی.

من او دوستوما شاعیرین ساتیریک شعرینده ن بعضی لرینی, ها بئله شاعیره حصر ائتدیییم بیر یازینی گؤنده ردیم. یازینین «شان نزولی» ایسه بوندان عبارت ایدی کی, شاعیر دوستوم فئدرال آلماندا سفر ده اولدوغو گونلرده, اوخوجولاری ایله اونو بیر داها گؤروشدورمک اوچون, دوستلارین کمکی ایله بیر آخشام ترتیب وئردیم. شهرک او آخشام گلن قوناقلارا شعرلرینی بیر آرتیست کیمی تام مهارت ایله اوخودو و منده پروگرامین اولینده شاعیری بو یازی واسیطه سیله گلن قوناقلارا تقدیم ائتدیم.

*****

مرام عشقده ال چکمک اولماز عهد و پیمان دان

کئچنمز عهد و پیمانینده ن عاشق، ال چکر جاندان

آذربایجان خالقینین درد و نیسگیل لرینی ترنم ائده ن شعر و شاعیرلرینده ن سؤز گئده ن ده، طالع سیز ملتیمیزین گؤرکملی شاعیرلری نین نزدینده، محمد حسین طهماسب پور شهرک ین اؤزونه مخصوص یئری و آدی واردیر. شمسی 1328- نجی ایلین بهمن آییندا بدوستان ماحالی نین شهرک کندینده آنادان اولان محمد حسین طهماسب پور، شعرده "شهرک" و "میرزا" تخلص ائدیر.

من بو آخشام اونون شعری و اینجه صنعت قابلیت لری حاقدا اوزون- اوزادی دانیشماق ایسته میره م. نئیه کی بو مجلیسه توپلانان دوستلارین بیر چوخو یا اونو یاخیندان تانیییر و یا هئچ اولماسا اونون شعری ایله آزما- چوخ تانیش دیلار. من یالنیز اونون شعری و ادبی قابلیت لری حاقدا شخصی دویغولاریمی سیزلر ایله پایلاشماق ایسته ییره م.

من شهرکین آدی ایله سیاسی مناسبته گؤره داها اؤنجه تانیش اولدوغوما باخمایاراق، اونون شعری ایله حقیقی معنادا بیر سازلی و سؤزلو ییغینجاق دا تانیش اولدوم. دیلیمیز و ملی وارلیغیمیزین دوشمانی اولان پهلوی لر سلاله سی نین قارا استبدادی و هر بیر مخالف سسی بوغان شاهلیق اوصول اداره سی نین سون گونلرینده تبریز ده برپا اولونان بو ییغینجاقدا، شهرکین اوخودوغو شعری, اون گونلرین طوفانلی- بورانلی سیاسی اتمسفرینده, دوغرودان یئرینه دوشدو:

سنی "تارین" آی عاشیق

پاسلی سازین تاقچادان اندیر

کؤینگینده ن چیخاریب

شوقیله باس باغریوا دیندیر

بیزه بیر تازه ناغیل بیر تازا سؤز سؤیله بو سازدا

عاشیقا عاشیق اولان ائللریوی بیرجه سئویندیر

شاققالا کهنه ناغیللاردا اولان اژداهانی

بیر ایچیم وئرمگه سو، مین لر ایله جان آلانی

نه زامان دئو جانینی ساخلایاجاقدیر شیشه ده

ال اوزاد شیشه نی سال

نعره تپ جامینی سیندیر، جانین آل

یئنی ده ن بیر هاوا چال

شهرک ین بو شعر ایله چیخیشی، اونون دوغما خالقینا، اؤز آنا دیلینه و کولتورونه نه قدر باغلی اولدوغونو و هابئله سیاسی دونیا گوروشونو, آیدین شکیلده نمایشه قویموشدور.

ائله او زامان خالق شاعیری ذولفقار کمالی نین "29 بهمن" شعری کیمی، شهرکین بیر چوخ شعرلری ده، او قانلی گونلرده آذربایجان خالقی نین چوخ میلیونلو سیاسی نمایش لرینده شعارا چئوریلمیشدی. خالقین دیلینده ازبر اولان و سیاسی بیر بایراغا چئوریلن:

شاه سنی تخت ده ن سالاجاق خالقیمیز

بیر قانا مین قان آلاجاق خالقیمیز

شعری نین عکس صداسی نی، حالادا تبریزین کوچه لرینده ائشیتمک اولار.

بهمن انقلابی نین غلبه سی ایله شهرک ین شعری ده داها سیاسی لشیر. او آتشین شعرلرینی تمامیله عقیده سی نین خدمتینده قویدوغو حالدا بیر نئچه پیس یازیر و اونلاری صحنه لشدیریر. من استعدادلی شاعیریمیزین او گونلرده قابیل بیر آرتیست کیمی صحنه ده ایفاچیلیغینا شاهید اولموشام. تاسف لر اولسون کی استبداد و مادی محرومیت لر، محمد حسین طهماسب پورون بو عرصه ده استعدادی نین داهادا آرتیق انکشاف ائتمه سینه امکان وئرمه میش دیر. شهرک بو دؤرده گئجه- گوندوز بیلمه ده ن و بیر چوخ فشار و محرومیتلره قاتلاشدیغینا باخمایاراق سیاسی فعالیت نزدینده، جنوبی آذربایجان شاعیرلر و یازیچی لار اتفاقی نین یارانماسیندا فعال اشتراک ائدیب، جمعیتین مدیره هئیتینه سئچیلیر و عین زاماندا بو جمعیت ین اورگانی اولان "اؤلکر" ده رگی سی نین بانی لرینده ن ده بیری اولموشدور. ملی حکومتین ییخیلماسیندان سونرا بیرینجی دفعه اولاراق آذربایجان یازیچی و شاعیرلرینی بیر یئره توپلایان بو جمعیتین حیاتی اوزون سورمه سه ده، اونون یارانماسی انقلابدان سونرا جنوبی آذربایجان یازیچی و شاعیرلرینین فعالیتینده بیر دؤنوش نقطه سی کیمی حساب اولونا بیلر.

آذربایجان خالقی نین بیر چوخ صداقتلی اولادلاری کیمی آزادلیق و عدالت اوغروندا بهمن انقلابی نین اؤن سیرالاریندا اشتراک ائده ن شهرکین طالعی ده، بو انقلابین گئریجی و فاناتیک قوه لر طرفینده ن غصب اولماسی ایله, باشقا اولا بیلمز ایدی. گئریجی حاکمیت ین انگیزیسیون اورگانلاری اونو ایشده ن چیخاریب، مادی محرومیتلرله اوز- به اوز قویماقلا کفایت لنمه ییب و نهایت شهرکی حبسه آلمیشدیلار. بئله لیک له خالقین باشی اوستونده قارا بیر بولوت کیمی آسلانان هده- قورخو، اعدام، اشکنجه و حبس ده ن ده, شهرک پایی نی آلیر. لاکن حبس و اشکنجه ایله شهرکی و باشقا یازیچی و شاعیرلریمیزی سوسدورماق ایسته یه ن اسلامی حاکمیت یانیلیر. حبسده ن چیخان و یوز مینلر وطن پرور انسان لار کیمی بوتون اجتماعی حق لرده ن محروم اولان محمد حسین طهماسب پور شهرک ین دیلی، یئنه دیش دورماییر:

نه چوخ دیر لاف ائده ن دیل لرده حق حق سویله ین اما

انا الحق سسله ین منصور حلاج، دارسیز اولماز.

شهرکین شعرینده ن دانیشاندا اونون ساتیریک شعرلرینی مطلق اونودماق اولماز. آذربایجان ساتیریک شعرینین نهنگ نماینده لری صابیر و معجز شبستری نین خلف دوامچی سی کیمی شهرکین ساتیریک شعرلری، خالقین حیات و مماتی ایله سیخی باغلی اولدوغو اوچون، بو شعرلر، اونون قلمینده ن آخار- آخماز ازیلمیش و آیاق یالین خالقین اوره گینه چؤکور و دیل لر ازبری اولور. اونون "نئیلیسن" مطلع لی شعری، ایران- عراق ساواشی نین قانلی گونلرینده، "ساواش نعمت دیر" دئیه ن لرین یالانچی شعارلار ایله خالقین جوانلارینی توولاییب جبهه لره گونده ره ن چاغا عاید دیر. شهرکین:

سن کی اؤزون فشارداسان میوه فشاری نئیلیسن

کار- کاسیبین باشین قاتان مفته شعاری نئیلیسن

عینالی یا گئده نمیسن کوفه حیجازی نئیلیسن

شعری، کوچه- باجادا سئویله- سئویله اوخوندوغو حالدا، بیر چوخو بو سؤزلری یارادانی تانیماسادا، اونو اؤزلرینده ن بیری کیمی بیلیر و قبول ائدیرلر.

آباد ائتدین شهری گزدین کندلری یا برجعلی

گؤرموسن شادلیقلاری حسرتلری یا برجعلی

بللنیر چوخ ایشله ییبسن سن گونوز بیلم گئجه

تیتره دیب آنجاق تؤکوبسن اتلری یا برجعلی

کیمی شعرلرده، مظلوم و هر بیر اجتماعی و سیاسی حق لرده ن محروم اولان زحمتکش لرین آرزو و ایستک لرینی ترنم ائده ن شاعیریمیز، هم گولدورور و همده آغلادیر.

محمد حسین طهماسب پور شهرک مجبورا تهراندا یاشادیغی ایللرده ده، ادبی و اجتماعی فعالییت ده ن کناردا قالمامیش دیر. او بو ایللرده اثرلری نین معین حیصه سینی چاپا وئردیگی ایله یاناشی، جنوبی آذربایجانین گؤرکملی شاعیرلری حبیب فرشباف، هاشیم ترلان و مظفر درفشی ایله بیرلیکده "صابیر ادبی جمعیتی" نی یارادیب، شعر آخشاملاری و دیگر ادبی ییغینجاقلارین برپاسیندا فعال ایشتراک ائتمیشدیر.

حؤزمتلی قوناقلار!

سیزین وقتینیزی بوندان آرتیق آلماق ایسته میره م. سیز منی یوخ، حورمتلی شاعیریمیز شهرکی دینله مه یه بورا گلمیسینیز. اجازه وئرین سؤزلریمی شاعیریمیزین بیر شعری ایله سونا چاتدیریم:

عیبیم اودور کی حق سؤز اوسته دایانمیشام

حق بیلدیگیم، بو حق سؤزومه آرخالانمیشام

جاهیل رقیب جهلیله، جهد ائیله ییب، چاشیب

من آنلاغیملا، صبر ایله ییب، حقی قانمیشام

...............

بیر عاشیقم، حقیقی دیر عشقیم، حقیقته

قلبین قیزیل قانیله، بو عشقی قازانمیشام

من خلقیمه بو عصریده قربان یارانمیشام

ساغ اولون

* آلمان سفرینده اولدوغو گونلرده, دوستوم شهرک ده ن اونون شعرلرینده ن سئچمه بیر کتابین چاپی اوچون اذن آلدیم. بو شعرلر تمامیله شاعیرین اؤز الیله ایله «آی جان آی جان», «دالدان آتیلان داش» و «خاطره ها» کتابلاریندان علامت قویدوغو شعرلرده ن عبارت اولمالیدی.

بو گون چوخداندی کی کتاب چاپا حاضیر اولوبدور.

یوخاریداکی یازی, بیر آز دئییشیکله, کتابین مقدمه سینده ن عبارت دی.