علي ملازاده:

ميللي حركاتي لومپنيزيمدن قوروماق هامي نين بورجودور!

معلوم اولاني، بازارگونو آپريل آيي نين دؤردونده، "گون آذ تي وي"دن ياييلان بير پروقرامدا، GAIP آدلي پارتيانين سؤزچوسو، "بیانیه جمعی از فعالین ملی و مدافعین حقوق مردم آذربایجان" باشليقلي سندي ايمضالايان 170 آذربايجانلي حاقيندا او جومله­دن آشاغي­داكي سؤزلري دئميشدير:

ساتقينلار

ايرانچيلار

يالانچي­لار

ميللي دون گئييب، اؤزونو آذربايجانچي گؤسترنلر

اونلارين گؤزو فارسين گؤزودور

فارس حاكيميتينه قوربان وئرنلر

آذربايجانا دوشمان

آذربايجانلي­لارا خيانت ائدنلر

چيركين ماهيتلريني گيزلدنلر

كومونيستلر و جبهه ملي نين حركته سوخولموش آداملاري

كومونيست زيبيل لري

كومونيستلرين ميللي حركته يئرلشديردي­يي جاسوسلاري

نفوذي قوه­لر

فارس دؤولتيندن حاق ديلنچي­ليك ائدنلر

آذربايجان ميللي حركتينه خائن

فارس شوينيزمي­نين موفته نؤكرلري و موفته حامبالي

ايچيميزه سيزان خائنلر

آذربايجان شهيدلرينه اهانت ائدنلر

اونلار اوچون دموكراسي مبارزه­سي فارسستان­دان باشلايير

شهيدلريميزي اراذل و اوباش گؤرنلر

فارس قويروقلاري

فارس عاميل­لري

پرده آرخاسيندا موسويله آنلاشان عاميل لر

كومونيستلرله پرده آرخاسيندا گؤروشوب، اونلارا نيگران اولمايين بيز بونلاري يئرلرينده اوتورداريق ديينلر

ياشيل قويروغو

بيز بونلاري سورتوب و مهو ائده­جييك و سايير.

بو سؤزلر حتي لومپنيزم، اخلاق­سيزليق و قولدورلوغون ان ايرنج تطاهورلاريني چوخ گؤرميش دوستلاري­دا شوك ائتميشدير. آخي بو سؤزلر خصوصي بير گؤروشده يا بير ايجلاسدا يوخ، تئله­ويزيون ائكرانيندان ياييلميشدير.  معلوم­دور كي، بو قبيل­دن اولان سؤزلرين يئري، متعارف اخلاق نورمالاري­نين ريعايت اولماماديقلاري موحيطلر اولا بيلر. آمما تئله­ويزيا ائكرانيندان بو تيپلي حركتلر هئچ اينسانا ياراشان دئيل. حتي لومپنلر بئله، هر موحيط­ده بو ادبياتلا دانيشماديقلاري حالدا، سياسي بير پارتيانين سؤزچوسو آغزيندان بو ركيك سوزلرين جاري اولماسي، نه اينكي بو بياناتي ايمضالاميش 170 آذربايجانلي­يا، حتي بو تئله­ويزيون كانالينا باخان هر اينسانين شخصيتنه اهانت ساييلمالي­دير.

بير ساغلام شعورا ماليك اولان اينسان بو تيپلي ايفاده­لري حتي اؤز دوشمنينه قارشي ايستفاده ائتمز. نئجه كي، آذربايجانلي­لارين فارس راسيسمي­نين نوماينده­لرينه قارشي بئله ايفاده­لردن ايستيفاده اولمور.

بو مسئله يالنيز اخلاقي باخيمدان كراهتلي و اوتانديريجي دئيل، بوگون آذربايجان ميللي آزادليق حركاتي اؤز قووه­لريني توپلاماغا هر زاماندا آرتيق ائحتياجي اولدوغو بير واختدا، منطقي سيز عداوت و  كور دوشمانچي­ليق تبليغاتي دير.

هئچ بير سياسي حركت لومپنيزم و قولدورلوقلا قاباغا گئتمز. سياسي فيكير قاباغا آپارماق اوچون نورمال اخلاق قايدالاريني ريعايت ائده بيلن، سياسي اينسانلار گركدير. لومپنلر و قولدورلارين يئري سياسي فعاليت مئيداني دئيل­دير.

اتهام اولونونلار كيملرديرلر؟

"بیانیه جمعی از فعالین ملی و مدافعین حقوق مردم آذربایجان" باشليقلي بياناتي ايمضالايانلارين آراسيندا، آدلاري و ايمضالاري آذربايجان و دونيا مدنيت تاريخينده ابدي حك اولموش شخصيتلردن توتموش، حركاتيميزين سياسي-نظري زرادخاناسيني زنگينلشديرميش اثرلرين مؤلفي اولان ضييالي­لارا قدر راست گلمك اولور. سوي آدلاري حتي مشروطه اينقيلابي، خياباني حركاتي، ميللي حوكومت و سون 20 ايلين ان يوكسك سويه­ده خالقيميزين باشي اوجاليغينا ثوبوت اولان تدبيرلرين مبتكرلري و مؤلفلري اولان ميللي شخصيتلرين آدلاري واردير. بو اينسانلار اوزون ايللر بويو اوز ميللتلرينه صداقت و لياقتله خيدمت ائتديكلرله، اعتيبارلي ايمضا و هر مجلسده سايقي و حورمتله ياد اولان آد-سان قازانميشلار.  

اتهام ائدن كيمدير؟

ايتتهام ائدن شخصي، آديني داشييان يازيلار، پالتاك اوتاقلاريندا و سون ايللرده چوخ تاسسوفله "گون آذ تي وي"نين اعتيباريني لكه­له­ين بو تئله كانالدان چيخيشلاري گؤز قاباغيندادير و آتالار دئميشكن "گؤرسنن كنده بللدچي لازيم دئيلدير"

ميلتيميزين بو چيركين كامپانيايا  موناسيبتي نئجه اولموشدور؟

بوگون بيز 30 ميليونلوق گونئي آذربايجان تورك ميللتيندن دانيشاريق. ايران ايسلام جومهوريتي­نين باسقي­سي آلتيندا حياتا كئچيرلن هر بير ميللي اكسيادا مينلر، اون مينلر و يوزمينلر آينسان ايشتيراك ائدير. معاصير كامونيكاسيانين گؤبه­يي اولان اينترنت و اي مئيل قورپلاريندا دا ميللتيميزين حضورو گؤزه چارپاندير. بير گونده بير مقاله­ني بير سايتدا اوخويانلارين سايي و يوتوب­دا نشر اولان ويدئو كليپلرين باخانلاري، راحاتليقلا ميني آشا بيلير، هر بير اي مئيل قوروپو و فئيس بوك كيمي سوسيال شبكه­لرده يارانان هر بير قورويوپون عوضلري نين سايي يوزلردير. سئساتسي­يالاردان اوزاق، حتي خبري يايمايان اصلينده آناليتيك ماترياللارين نشرينه اوستونلوك وئرين "تريبون" سايتندا بير آندا حاضير اولانلارين سايي يوزي و حتي مين رقيميني آشير (بو سطيرلري يازاركن، شنبه گونو 10 آپريل، مركزي اؤروپا واختيلا تريبون ساينيندا اونلاين اولانلارين سايي 359 نفردير) و سايير.

حال باخاق كي، حاقيندا دانيشديغيميز بو چيركين كامپانيادان اولان ايستيقبال نه درجه­ده­دير؟ بو آندا  بير هفته يه  ياخين تئله­ويزيادان ياييلديغيندان كئچدي­يي بير حالدا، اوچ بؤلومده يوتوب­دا نشر اولموش نيفرت ياغديران ويدئو ماتريالين 17 نفر باخاني اولموشدور­. البته كي بيزيم ميللت آدينا سؤيله­دي­ييميز هر بير تعريف و آلقيشا لاييق­دير.

بير تكليف؟

اگر سياسي حركت، سياسي موخاليفت، سياسي مدنيت، سياسي ديل و سياسي ادبياتدان اوزاق اولان بو كامپانيا آپاران شخص، ميللتيميزين يواخريدا كي اسلاسلاردا، اونون عملينه وئردي­يي قيمتله راضي دئيلدير و يوخاريدا ترسيم اولاندان آرتيق حيمايه­سي اولماغي تصوور ائدير، اوندا آشاغيدا كي فورما بنزر بير رأي سورغوسو آپارماغي اونا تكليف ائديرم:

"رأي سورغوسو
لوطفاً منيم 4 آپريل تاريخينده گون آذ تي ويدن يايديغيم و ايندي يوتوبدا اوچ حيصه­ده مؤوجود اولان بيانتيما باخديقدان سونرا آشاغيدا كي سوآل­لارا موثبت جاواب وئردي­ييز حالدا، آدينيزي او سوآلين آلتينا يازين:

1.      منيم ديله گتيردي­ييم سوزلرين هئچ اولماسا ياريسيلا راضي سيزمي؟

2.      منيم دانيشديغيم ديل و ايشلتدي­ييم ادبيات، ان آشاغي سويه­ده اولان اخلاق نورمالاري قايدالاري­نين چرچيوه­سينه سيغيرمي؟

3.       آيا منيم بول-بول ايستيفاده ائتدي­ييم ايفاده­لري، حتي فارس راسيسيمي­نين نوماينده­لرينه قارشي ايشلتمك اولارمي؟

4.      منيم داورانيشيم، منيم مودافيعه ائتدييييم "ايستيقلالچي­ليق" شوعارينا قارا لكه­ اولماقدان باشقا بير خئيري وار مي؟

5.      آمستردام دييالوق توپلانتي­سي­نين قبول ائتدي­يي بياناتدا دئيلير:

 "تاريخي اهمييت داشييان آمستئردام توپلانتيسي ايشتيراکچيلاري آذربايجان ميللي حرکاتي نين سيرالاريندا چئشيدلي فيکير و سياسي آخيملارين وار اولدوغونو بير رئالليق و ساغلام دوروم کيمي گؤرورلر. بو گؤروش دييشيکليگي، مدني موختارييتي، فئدئراليزمي، ايستيقلالييتي و بوتؤو آذربايجان دؤولتي قورماق کيمي پلاتفورملاري ائحتيوا ائتمکده دير. توپلانتي بوتون دييشيک گؤروشلري آذربايجانين مشروع سياسي جريانلاريي کيمي قبول ائدير و فرقلي­ليکلرين بير زنگين­ليک اولدوغونا اينانير."

سيزجه منيم  آپارديغيم كامپانيالار و خصوصيله، 4 آپريل تاريخينده­كي دانيشيقلاريم، آمستردام بياناتي­نين روحو و يوخاريدا نقل اولان جومله­لره دابان-دابانا ضيددير يا يوخ؟

لوطفاً هر بير سوآلا جاوبينيز موثبت ديرسه، آدلارينزي او سوآلين آلتيندا يازيب و منيم آدرسيمه يول­لايين. بير هفته عرضينده منه گلن جاوابلاري اينترنت ده نشر ائده­جه­ييمه سوز وئريرم. لوطفاً تاخما آدلاردان ايستيفاده ائتمه­يين.

 حؤرمتله،
 4 آپريل و بيرچوخ اونا بنزر كامپانيالارين مؤلفي "GAIP-ين سؤزچوسو، صالح ايلديريم"
 منيم اي مئيل آدرسيم..... تاريخ...."

بو مئيدان بو شيطان!
من ظن ائديرم كي، حتي خسته بير اينسان دا، ميللتي ائله خسته حئساب ائده بيلمز كي بو سوآل­لارا كيمسه­دن موثبت بير جاواب بكله­سين. آمما نئجه دئيرلر، بو مئيدان بو شيطان!