دکتر ضیا صدر و پاریس ییغیناجاغی

آیدین تبریزی

دکتر ضیا صدرالاشرافی بیزیم ان بیلگی لی و منطقی چالیشانلاریمیزداندیلار. اما دکتر صدر گرک بونو قبول ائتسینلر کی هر شئی آچیق و آیدین میللته چاتدیرماق دموکراسی اوچون چوخ اونملی دیر و دالدادا دانیشیق لار، هم دکتر صدره و هم بیزیم میللته خطرلی دیر. بیزیم انتظاریمیز یوخویدور کی بو سوزلری باشقالاریندان ائشیدک بلکه گرک هر کیمدن اونجه دکتر صدر بو مسائل دن میللته گزارش وئره لر. نه بو دلیله کی کیمسه فیکر ائده، بیز دکتر صدره اعتمادیمیز یوخدور (مساله اصلا بو دئییل و من شخصا دکتر صدر دن منطقی سیاستچی آذربایجان میللی حرکتینده تانیمیرام، دئمیرم یوخدور و آرزو ائدیرم کی داها چوخ اولسون بلکه دئییرم کی من تانیمیرام). آما بو دلیله گوره کی اگر هر شئی آچیق و آیدین اولورسا بیزیم میللت و باشقا ضیالی لار، اوز فیکیرلرین اورتایا قویا بیلر و شوونیست لرین بعضی آلداتیجی نقشه لرینی تانیماغا بیزه یاردیمجی اولا بیلر. چون بیزیم حقیمیز یوخدور بیر داها یانلیش یاپاق چون بونون هزینه سی چوخ آغیر اولا بیلر. پس بوردا بیر نفر و بیر فیکیر یوخ بوتون آذربایجان میللتینین فیکریندن فایدالانماق چوخ اونملی دیر.

منجه بو کی دکتر صدر آذربایجانی بیر میللت کی ایرانین "زیرمجموعه سی" اولا و اونو فارسلار، کردلر و... ایله برابر موقع ده قویا منطقی بیر فیکیر دیر و بونا گوره دکتر صدره اعتراض ائتمک دوز دئییل چون فدرالیسم بو آنلامدادیر کی نئچه میللت مساوی شرایط ده بیر مجموعه یه ییغیشیب و بیر اولکه یارادالار و هر میللت او اولکه نین بیر "زیر مجموعه سی" اولا.  بو سوزون هئچ اشکالی یوخدور. استقلالچی دوستلاریمیزدا انتظارلاری اولمامالیدیر کی فدرالچی لار آذربایجانی بیر مستقل میللت کیمی تعریف ائتسینلر! آنجاق بوکی بیز بو سوزلری باشقالاریندان ائشیدیریک اعتراض یئری وار. دکتر صدر و باشقالاری، سیاسی ییغیناجاقلاردا اشتراک ائده بیلرلر و بیزیم سوزلریمیزی باشقالارینا یئتیره بیلرلر و بو بیزیم حرکتین تانینماسیندا و دوشمنیمیزی پارچالامادا اونملی دیر (مثلا دکتر صدرین همین حرکتی سبب اولدو کیومرث نویدی بو مقاله نی یازا کی فارسلاری یاندیریب!) آما چوخ اونملی سی بودور کی او زامانا قدر کی بیزیم میللتین بوتون حاقلاری رسمیته تانینماییب و سندلی و معتبرلی تضمین لر وئریلمه ییب کیمسه گرک هئچ بیر سیاسی آنلاشمانین آلتین امضا ائتمه یه چون پاریس کیمی سیاسی ییغیناجاقلاردا کی دونیا گوجلری طرفیندن گوز آلتیندادیر، بیر ناقص آنلاشما چیخارسا اونو گله جکده بیزه قارشی استفاده ائده بیلرلر. پس هامیمیز گرک تام دیققت لی اولاق کی بو حساس گونلرده بیر یانلیش، گله جکده اوز اللریمیزی باغلاماسین. بونا گوره بیز دکتر صدردن ایسته ییریک کی بو کنفرانس و اونون آلدیغی قرارلاری آچیقلاسینلار و اعلان ائتسینلر کی هانسی آنلاشمالار امضالانیب یا امضالانماییب.

سیاست ده مذاکره و دانیشیق هر کیمسه ایله مجازدیر و گوروک کی آمریکا ایران ایله و آذربایجان، ارمنستان ایله مذاکره ائدیر آنجاق بو مذاکره لرده گرک حوصله لی اولاق و تئز بیر سونوجا چاتماق اوچون راحاتلیقلا موقعلریمیزدن دالی اوتورمایاق! دکتر صدر و بوتون فدرالچی لار گرک بیر اونملی موقعدن اصلا دالی اوتورمایالار اودا بودور کی بیزیم میللت اوز طالعینه مالکدیر و اگر بوگون فدرالیسمی قبول ائتسه ده، آنایاسادا گرک بیزیم میللتین گله جک ده استقلال حقی قانونی شکیلده رسمیته تانینسین و بو حقی بیر رفراندوم ایله حیاتا کئچیریله بیلمه سینه قانونی یول تانینسین کی اودا بیر رفراندم دور کی هر زامان آذربایجان پارلمانی صلاح بیلرسه، میللتین سسینه مراجعه ائدیب و بو استقلالی میللتین سسی ایله حیاتا کئچیره بیلسین. بو همان آیریلماق یا طلاق حقی دیر کی اگر اولماسا بیزی بیر آزاد انسان یوخ بیر برده و کنیز موقعینه گتیره بیلر و بوتون چالیشیقلاریمیزی هدره وئره بیلر. نیه کی اولسون کی اولده بیر فدرالیسم ده وئره لر آما اوندان سونرا کی یئرلرین محکم ائله دیلر تمام مخالف لری "تجزیه طلب" آدلاندیریب و سیاسی فعالیت دن محروم ائتسینلر.

پس بیر فدرالیسم کی اوندا استقلال حقی رسمیته تانینمایا سونوجا چاتمایاجاق و بیزی بیرداها اسیر ائده جک. گله جک آذربایجان ایالتینده، استقلالچی گروپلار گرک رسمی شکیلده آذربایجانین ایچینده پارتیا قورماق و قانونی فعالیت ائتمک حاقلاری اولسون. کیمسه نین حقی یوخدور بو موقعدن دالی اوتورسون. اگر بیز بیر کیچیک بهانه ده اونلارین الینه وئرسک همان بهانه ایله هامیمیزی سرکوب ائده بیلرلر! آنایاسادا "حفظ تمامیت ارضی" کیمی ترم لر چوخ خطرلی دیر کی سونرا بهانه کیمی استفاده اولا بیلر. اولا بیلر کی بیز مذاکره لرده بیر سیرا امتیازلار وئرک مثلا استقلال رفراندومون حیاتا کئچیریلمه سینین شرطینی آغیر ائدک مثلا 50% یوخ 55% یا 60% فاییز سس گرک لی اولسون، آما بو مساله نین اصلیندن، اصلا کئچمه مه لییک. بیرده بیز یاخشی انسان اولوب تئز امتیاز دا وئرمه مه لییک و مذاکره لرین اوزون سورمه سیندن قورخمامالییق! چون هر نه قدر بو مذاکره لر اوزون سورسه ده بوندان یاخشی دیر کی بیزیم اسیر و برده کیمی قالماغیمیزا قانونی و رسمی امکان یارادا کی سونرادا اونا اعتراض ائتمک اولمایا چون دئیرلر کی اوزونوز بو قانونو امضا ائدیبسیز و دونیادا بو سوزو قبول ائیله یر.