اشاره- ایکی ایلده ن بری "گله جک بیزیمدیر" چاتی سی آلتیندا فعالیت گوستره ن و 19 اردیبهشت آذربایجان اویر نجی سی گونونو تانیملایان اویرنجی لرین میلی حرکتیمیزده اولان رول لاری انصافلی انسانلار طرفینده ن دانیلمازدیر. بو چاتی آلتیندا فعالیت گوستره نلر هئچده تصادفی اولاراق بو شعاری سئچمه میشلر. "گله جک بیزیمدیر" چاتی سی آلتیندا فعالیت گوستره نلر هر زامان میلی حرکتیمیزین ایچینده بیرلیک چاغیریسیندا اولموش، تئوریک موباحیثه لرین بوشلوغونو دولدورماغا چالیشمیش و عینی زاماندا حرکتیمیزی دیکاتوریا و غیر دمکراتیک چرچیوه لر ایچینه سوغماغا چالیشانلارین قارشیسیندا دیرنمیشدیر. بو چاتی کیمسه نین یئرینی داراتماق ایسته مه میش، آنجاق آذربایجان مرکزلی دوشونجه سیستمی و آذربایجانین میللی منافعی و قیرمیزی چیزگی لری نین کئشیگینده دورماغی باشارمیشدیر. تام بیلمه دیگیمیز نده نلره گوره بعضی لری بو شعاردان ناراحت اولموشلار. و حتی بعضی لری نه بیزی و نه بیزیم آدیمیزی گورمک ایسته مه میشلر. هر حالدا بیزیم آرزوموز گوجلو و واحید بیر آذربایجان اویرنجی حرکتی نین شاهیدی اولماق دیر. بوتون بو مسئله لری نظره آلاراق گله جک گونلرده اولان توپلانتی لار بیزیم حرکتیمیزین یولونو بلیرله یه جکدیر. اورتادا اوچ سناریو گورونمکده دیر.

1- گوجلو و واحید بیر اویرنجی حرکاتی یاراناجاق و بیزده اونون ایچینده فعالیت گوستره جه ییک.

2- رسما فعالیتیمیزی دوردوروب و گئری اوتوراجاغیق.

3- فعالیت دایره سینی بیر آز محدود لاشدیراراق عینی چاتی آلتیندا فیکری و تئوریک چالیشمالاریمیزی، سیاسی ائیلملرده ن اوزاق دوام ائتدیره جه ییک.

بیر باشقا موضوع: سون گونلرده بیلنمه یه ن نده نلر اوزه رینده ن بو چاتی نین رسمی وئبلاگی قاپانما دورومونا گلمیشدیر(www.oyrenci.mihanblog.com). ائله اونا گوره هله لیک یئنی سیته یولا دوشه نه قده ر اوزه ل یازی لاریمیزین آذربایجان سیته لری طرفینده ن یایلماسی بیزی ممنون ائده جکدیر.

" گله جک بیزیمدیر"ین فیکری تمل لری

علی موتلو(فعال دانشجوئی آذربایجان، کارشناس ارشد علوم سیاسی)

گونئی آذربایجان اویرنجی حرکاتی نین اورتایا چیخیشی و گلیشیم سوره جی حاققینداکی فیکیرلریمیزی داها اونجه کی یازیلاریمیزدا اینجه له مه یه چالیشمیشدیق. بو یازیدا آذربایجان اویرنجی سی نین بو گون منیمسه دیگی و اونون اطرافیندا بیرلشمک ایسته دیگی " گله جک بیزیمدیر" شعارینی آنالیز ائتمه یه چالیشاجاییق. آذربایجان اویرنجی حرکتی کیم لیک موجادله سی وئره ن بیر کوتله سل حرکتین پارچاسینی تشکیل ائتمکده دیر. بو حرکت میلی حرکتین تئوریک و فکری ملزه مه سینی (ابزار) حاضیرلاماقدادیر. اولکه ایچری سینده آغیر سیاسی شرایط نده نی ایله آذربایجان میلی حرکتینین انتلکوتئل یاپی سینین اولماماسی تئوریک یوکو اویرنجی حرکتینه یوکله میشدیر. بو ندنله آذربایجان اویرنجی حرکتی بیر طرفده ن اوز وارلیغینی دوام ائتدیرمک اوچون سیاسی و اجتماعی ائیلم لر گئرچک لشدیرمکده، دیگر طرفده ن ده میلی حرکتین احتیاجی اولان سیاسی ادبیاتینی یاراتماغا چالیشماقدادیر. اویرنجی حرکتی بو ایکی آلانداکی فعالیتینی ائتمک اوچون دوغرو، طرفسیز و گوجلو بیر چاتی یا احتیاج دویماقدادیر. سون ایکی ایلدیر اویرنجی حرکتی ایچریسینده ن چیخان "گله جک بیزیمدیر" چاتی سی بو گونه قده ر بو وظیفه نی خطاسیز اولاراق یئرینه گتیرمه یه چالیشمیشدیر. آنجاق هله ده " گله جک بیزیمدیر" شعاری بعضی میللی فعاللار طرفینده ن تانیم سیزدیر. بو یازی " گله جک بیزیمدیر" شعارینین فلسفی، تئوریک و استراتژیک تمللرینی آچیقلاماغا چالیشاجاقدیر. بوندان سونراکی آذربایجان اویرنجی حرکتی نین دارتیشمالارینی بو شعار اوزه رینده ن ایره لی گوتوره جه ییک.

فلسفی تملی

"گله جک بیزیمدیر" آذربایجان اویرنجی سی اوچون بیر وار اولما دوشونجه سی دیر. بو وار اولما دوشونجه سی اویرنجی حرکتینین اولوشوموندا و داواملی لیغیندا اونملی دیر. چونکو هر حرکت فلسفی چکیردگینی تشکیل ائده ره ک ایره لی داها دوغرو گوره بیلیر. آذربایجان اویرنجی سی ده ان آزی 15 ایل موجادله ده ن سونرا بئله بیر فلسفه تملینه احتیاج دویموشدور. بو فلسفی تمل حرکتین ایچه ریگینی و قورولوش فلسفه سی نی ده گوسترمکده دیر. بوتون حرکتلر چالیشمالارینی گله جه یه یونه لیک اورتایا قویورلار. پلانلارینی، هدفلرینی و هدفه گوتوره جک آراجلارینی گله جه یه دوغرو سئه چه رلر. " گله جک بیزیمدیر" شعاری آذربایجان اویرنجی حرکتینین گله جک فلسفه سینی تشکیل ائتمکده دیر. آذربایجان اویرنجی سی بو شعار آلتیندا بیر طرفده ن گله جه یه کسین اومود گوزو ایله باخماقدا، دیگر طرفده ن ده بو شعاری گئرچکلشدیرمک اوچون اوزونو میلتی قارشیسیندا مسئول حیس ائتمکده دیر. بو ندنله "گله جک بیزیمدیر" شعاری آذربایجان اویرنجی حرکتی اوچون بیر یاشام فلسفه سی دیر. حرکتینی، پلانلارینی، آراجلارینی و ان اونملی سی هدفلرینی بو شعارین چرچیوه سینده اولوشدورماغا چالیشیر.

تئوریک تمل

تئوریک و یا فیکیر یوروتمه گوجو هر حرکتین سوره جین بلیرلر. شبهه سیز آذربایجان اویرنجی حرکتی ده بو گونه قده ر دوام ائتدیگی اوچون تئوریک آچیدان بیر چوخ سواللارا جواب وئرمیشدیر. آنجاق میلی حرکت سوره جینده تئوریک بوشلوق اویرنجی حرکتین ده ائتگی له میشدیر. بو گون تئوریک آچیدان آذربایجان اویرنجی حرکتی میلی حرکتین قایناغی حالینه گلمیشدیر. آنجاق اویرنجی حرکتی اوز ایچینده تئوریک بوشلوقدان یوخسوندور. بونو اویرنجی حرکتی ایچریسنده و درگی لرینده آچیق شکیلده گورمکده ییک. "گله جک بیزیمدیر" شعاری چرچیوه سینده آذربایجان اویرنجی سی اوزونو فیکری اولاراق یئنی ده ن تانیملاما فرصتی الده ائتمیشدیر. چونکو بو شعارین تئوریک یونو اویرنجی حرکتی نین فیکری چرچیوه سینی تانیماقدا اون آددیمی آتمیشدیر. بو گونه قده ر اویرنجی لر، اویرنجی درگی لری و بعضی سیاسی ماهیت ده کی تشکیلاتلار چرچیوه سینده فعالیت گوسترمکده ایدیلر. "گله جک بیزیمدیر" شعاری ایسه اویرنجی حرکتینین ایچینده کی تئوریک بوشلوغا دارتیشما ایمکانی یاراتماقدادیر. اویرنجی لر بو شعار چرچیوه سینده فیکری آیریلیقلاری بئله موباحثه یه آجیق توتموشلار.

"گله جک بیزیمدیر" شعاری آذربایجان اویرنجی سینه اوزونو، حرکتینی و فیکری موجادله سینی یئنی ده ن تانیملاماقدا یاردیمجی اولماغی پلانلاماقدادیر. سیاسی چکیشمه لرین ائشیگینده گئرچک له شن بو فیکیری دارتیشمالار البته کی آذربایجان اویرنجی سی نین تئوریک ادبیاتینین یاردیلماسیندا اونملی رول اوینایاجاقدیر. بیزیم حرکتین مهم سورونلاردان بیریسی اولان تئوریک و فیکری مبحث لرین اولماماسینی "گله جک بیزیمدیر" شعاری ایچریسینده ان آزا یئندیرمک فیکری یاتماقدایر. آذربایجان اویرنجی سینه نه وئرمه لی دیر؟ اونون فیکری بازدا نئجه تغذیه اولونماسی نی بو شعار چرچیوه سینده دیرلندیرمک و چوزوم یوللاری آختارماق مومکوندور.

استراتژیک تمل

استراتژی لر و تاکتیک لر حرکتلرین گله جه یه یونه لیک پلانلاری نین ساغلام اولماسی اوچون حرکتین یولونو بلیرله ر. "گله جک بیزیمدیر" شعارینین آذربایجان اویرنجی حرکتی آچیسیندان بیر استراتژیک تملی تشکیل ائتدیگی نی دئمه میز البته کی بعضی ندن لره دایالی دیر. "گله جک بیزیمدیر" استراتژیک آچیدان نه آنلام ایفاده ائدیر؟ اویرنجی و میلی حرکتین استراتژی سی نین بلیرلنمه سینده بو شعارین یئری نه دیر؟ "گله جک بیزیمدیر" شعاری بورادا بیر شعاردان چوخ بیر حرکت پروژه سی دیر. بو گونه قده ر اورتایا قویدوغو سیاسی آنالیزلر و بیانیه لره باخدیغیمیزدا، شعار اویرنجی حرکتینین گله جه یه یونه لیک یول خریطه سینین اوزه تین (چکیده سین) بیزه گوستریر. بو یول خریطه سینده آذربایجان اویرنجی حرکتی نین هدفلری نین قیسا و اوزون مدت لی پروژه لر شکلینده گورمکده ییک. بو اصلینده آذربایجان اویرنجی حرکتی نین گیزلی بیر استراتژی سینی گوسترمکده دیر.

سونوج اولاراق:

بوگون آذربایجان اویرنجی حرکتی ایچریسنده ساغلام بیر یاپی نین اولوشومونو گورمکده ییک. بو حرکت آذربایجان اویرنجی سی حرکتی نی صاحیب لنمه فیکرینده دئیل دیر. چونکو آذربایجان اویرنجی حرکتی بوتون آذربایجانلی اویرنجی لری نین قاتیلی می ایله اورتایا چیخا بیله ر. بو ندنله بو حرکت اوزونو "گله جک بیزیمدیر" شعاری آلتیندا تانیملاماق ایسته مک ده دیر. اویرنجی حرکتی نین سیاسی ائیلم لرده ن اوزاق باغیمسیز بیر شکیلده فعالیت ائتمه سینی ساوونماقدادیر(مودافعه ائدیر). بو چاتی اویرنجی حرکتی نین انحرافا چکیلمه سی قارشیسیندا دیره نیش گوستره جکدیر. "گله جک بیزیمدیر" چاتی سی آلتیندا فعالیت گوستره ن اویرنجی لر، اویرنجی حرکتی نین باشاری لی و وئریملی اولماسی نی آرزو ائتمکده دیرلر.

بو موضوع حاققیندا فیکیر و یازی لارینیزی oyrenci_gunu@yahoo.com آدرئسینه گونده ره بیله رسینیز.

گله جک بیزیمدیر

گونئی آذربایجان

5تیر 1386