زهره وفايي - تبريز

دونيا قادين گونو – 8 مارت – تبريز

     مارت آينين سگگيزي ، دونيا قادين گونو موناسبتي له تبريزده قادين لار ساريسيندان چئشيدلي مراسيم لر و عزيزلمه لر گئتددي .

     ايلك مراسيم جوما 12 اسفند – 3 مارت گونونده آنا اوجاغي و اوشاق ايلقار گروپو ايله بيرليك ده بر پا اولدو . بو مراسم ده اشتراكچي خانيم لار گئچميش ايل عرضينده گورونه ن ايش لري ده يرلنديره رك ، گله ن بير ايل پلان لارين دانيشيب و قرارا گلديلر . شعر – موسيقي و تئاتر اجرالاري ايلقار گروپو سارسيندان بو مراسيم ده عموم قادين و آنا حاققيندا گئتددي .

     ايكينجي مراسيم 15 اسفند – 6 مارت گونونده شاعير – يازيچي و ژورناليست خانيم لار اشتراكي له بيرليك ده بر پا اولدو . بو مراسيم ده گئچميش ايلين عرضينده يايلان كيتاب لار – ده رگي لر – مقاله لر ... حاققيندا دانيشيليب و يئني ايل ايچون بير پارا يئني قرارلار ، قادين ژورنال لاري و ها بئله صنعت كار قادين لارين حمايه يوللاري حاققيندا  دانيشيلدي .

     اوچونجو مراسيم چارشنبه 17 اسفند – 8 مارت گونونده ياشيل يول جمعيتي له ديگر نئچه قادين گروپ لاريله بيرليك ده تبريزين عين آلي داغيندا بر پا اولدو . بو مراسيم ده دورت يوزه ياخين قادين اشتراك ائتميش لر . قادين ياشيل يول جمعيتي بر پا ائتديي 8 مارت مراسيمينده نئچه قادين دانيشيب و ها بئله ياشيل يولون گوردويو ايش لر گئچميش ايل عرضينده ده يرلننيب و اونلاراگوره اشتراگچي لار آراسيندا بير پارا كاتالوك لار يايلدي . مراسيم سونوندا             قادين لار ين ايسته ك لري و قرارلاري 8 مارت موناسبتينه اوخوندو و اشتراك چي لار  بيرليك ده اونلاري تصديق ائتديلر .

     دوردونجو مراسيم جوما آخشامي 18 اسفند – 9 مارت گونونده آييق قيزلار ده رنه يي طرفيندن بر پا اولدو . آلتي ساعات سوره ن بو مراسيم ده اشتراكچي قادين لار چئشيدلي قونلاردا دانيشيب و ها بئله شعر و موسيقي و آذربايجان رقص لري ايفا اولدو . آييق قيزلار   ده رنه يي مراسيمين سونوندا بير قطعنامه قادين لار طلب لري حاققيندا  اوخويوب و  اشتراكچي لار  بيرليك ده اونو تصديق ائتديلر .مراسيم آذربايجان مارشي له تامام اولدو .

     بئشينجي مراسيم جوما 19 اسفند – 10 مارت گونونده سحر ساعات 7 ده عين الي داغينا يوكسلمك له باشلادي . بو مراسيمده يوزلر قادين هر گروپ دان و هر ساحه دن اشتراك ائتميش لر و ديگر داغا گله ن عائله لر و داغچي لارا قرنفيل گولو وئرمك له بو گونو عزيزله ديلر .

     آلتينجي مراسيم جوما 19 اسفند – 10 مارت گونونده آقشام چاغي آنا اوجاغي ساريسيندان قورولدو . بو مراسيم ده اشتراك ائده ن قادين لار فيلم – كيتاب – كامپيوتر – قادين حاقلاري – بين الخالق مسئله لر و سايره قونولاردا دانيشيق لار آپاريب و سونوندا بير نئچه صنعت كار و چاليشقان قاديندان تقدير ائديليب و نهايت اشتراكچي لار آراسيندا بير پارا 8 مارت گونونه        اوزه ل هيكل لر – رسيم لر و ال ايش لري پايلاندي .

     بو بير هفته عرضينده هابئله  تبريز قادين لاري اوچ محبوس قاديني پول توپلاماق لا ، تبريز محبس خاناسيندان آزاد ائتمه يه باشارديلار . ها بئله ييه سيز اوشاقلار ائويندن گوروش ائتمك ، باباباغي خسته لري گوروشونه گئتمك ، بيرليك ده كميته امداد بر پا ائتديي عاطفه لر مراسيمنده اشتراك ائتمك  قادين لارين ديگر گوردويو ايش لر سايلير .

تصديق اولونان طلب لر و ايسته ك لر :

1 – ايش و تحصيل ده برابر حاقلاردان و امتيازلاردان فايدالانماق .

2 – قادين حاق لاريندان تبعيضي آرادان گوتورمك .

3 – ايش قانونلاري – بيمه – ارث – چوخ قادينليق – ائولنمه – بوشانما قانونلاريني اصلاح ائتمك .

4 – ائو قادين لاري و عائله باشچي سي اولان قادين لارين بيمه طرح لرينين هر نه تئزراق اجرا اولونماسي .

5- بوتون كيشي و قادين لار اجتماعي و مدني حاق لاردان برابر فايدالانماغي .

6- مذهب – مسلك – قوميت – صنفيت آيري سئچگي ليي قادين لاردان گوتورمك .

7- ايراندان بين الخالق كونوانسييونا بيرلشمه سيني ايسته مك .

8 –  ايران  بين الخالق قادين لارقانونو اوزوندن  هر نوعي تبعيض – اشكنجه  يه قاداغا مقاوله سيني قبول و اجرا ائتمك .

     اومود اولونور كي گله ن ايل  8 مارت داهادا گوجلو و هابئله آرتيق حمايه لرله بر پا اولسون .