19 اردیبهشت 1374 تاریخینده آپارتاید علئیهینه باغیران اؤیرنجی لره اتحاف

 

او گون بیر سن ایدین و بیرده من. شهید پیشه وری نین قوردوغو بیلیم یوردو قارشیسیندا ایستی بیر گون اورتا چاغی بیر آرایا گلمیشدیک. چیینلریمیزده آغیر بیر یوک، یوکوموز ایسه تاپتالانمیش بیر میلتین منلیگی، دیلی، مدنیتی و گله جه یی.

 یورولموشدوق، آغیر-آغیر کوچومسه مه لر و آشاغی لامالاردان. او اوزده ن باغیرماق ایسته ییردیک بوتون دونیایا، قوی بیزیم سسیمیزی هر کس ائشیدسین، قوی هر کس بیزی آنلاسین.

 او گون بیر سن و بیرده من بو آغیر یوکو داشیماق زوروندایدیق. هر طرفیمیزی بایقوشلار آلمیشدیر. اونلار بیزه دوغرو یوگورمه یه باشلامیشلار، بیز ایسه تکجه سیلاحیمیز اللریمیزده اولان پلاکاردالاریمیز و بوغازیمیزدان هایخیریلان سس لر ستارخانلار، باقرخانلار، شیخ محمد خیابانی لر و پیشه وری لرین اونودولموش حاق سسی ایدی.

 او گون سن ومن آذربایجان یوکونو داشیمالییدیق. یولوموز داشلی و یوکوموز آغیر. قان تر ایچینده " بیز گئدیروخ تبریزه" هارایلارینی باغیراراق یورولمادان دینجلمه ده ن ایله ری گئدیردیک.

 کیمسه بیزی توتدوغوموز یولدان چیخارا بیلمزدیر. منلیگیمیزه و حشیجه سینه سالدیرمیشلار، دیلیمیزی ازمیشدیلر، قیزلاریمیزا و اوغلانلاریمیزا توخونموشلار. بیز ایسه بو قده ر آلچالماقدان واز گئچه بیلمزیدیک. یورا بیلمز یوللار بیزی سویله ییردیک. تبریز بیلیم یوردونون نرده لری بیزیم شاهیدیمیز ایدی.

 باتوملار تپه لریمیزه گلیردی، بیز ایسه آغلامادان، هونکورمه ده ن آبرسانا دوغرو گئتمک ایسته ییردیک.

 کیم بیلیر سن و من نه لر چکدیک؟ کیم بیلیر سن و من آغیر یوک چیگینلریمیزده اوزوموزو میللتیمیزه و آنا دیلیمیزه قوربان دئمیشدیک؟

و سن او گون باغیریردین " آذربایجان وار اولسون-دوشمنلری خوار اولسون". کیم بیلیر او گون سن او آغیر یوکونله آخشام "شیمی" درس وئرمک ایچین اونیورسیته ده ن مدرسه یه گئده جکدین؟

 سن او گون باغیریردین" اولوم اولسون آپارتایدا" و کیم بیلیر او گون سن نازلی بالانی ائوده یالنیز بوراخیب فرش تخته بندی اوزه ریندن اینیب بو یوکو داشیماقدا منه یاردیم ائتمک ایچین 40 متیر محله سینده ن تبریز بیلیم یوردو قارشیسینا گلمیش ایدین؟

 کیم بیلیر او گون سن پولسوز و پاراسیز چلبی محله سینده کیرالادیغین کیچیک  ائوده  ویا خانه سازی  ده اولان اویرنجی یاتاقخاناسیندا گئجه ده ن سحره قده ر اعتراض پلاکاردالاری یازیردین؟

 کیم بیلیر سن او گون یاتمادان سحرین ایشیقلانماسین بکله ییردین؟ کیم بیلیر سن او گون سحر بیلیم یوردونون بک چی لری گلمه ده ن، بوتون پانل لره اعتراض آفیش لری آسیردین؟

او گون سن و من او آغیر یوکو داشییب بو گونه چیخاردیق. کیمسه سنی تانییامادی، سن ایسه اوزونو کیمسه یه REKLAM ائتمه دین. سن منیم ابدی آرخا داشیم. سن ممنیم اولمز یولداشیم. کیم بیلیردی سنین اکدیگین او کیچیک توخوم لار بو گون اون بیر ایلده ن سونرا اردیبهشت آی نین اون دوققوزوندا گویه ریب قوجامان بیر آغاج اولاجاق؟

 داریخما یولداشیم. یورولما قارداشیم. بیلیره م سنین اوتانجین نه سنه ایذین وئریر "آراز رادیوسونا و نه گوناز تی وی" یه چیخاسان و هئچ خبرین اولمادیغین ایش لری ده بوینونا آلاسان.

بیلیره م سنین یوکون آغیردیر، سن بو یوکو چینینده ن یئره آتیب نه آمئریکایا گئدنسن و نه کانادایا.

آما داریخما یولداشیم، یولونو دوام ائت. تاپتالانمیش بیر میللتین یوکون هر کیمسه یه تاپشیرامازسین. بو آغیر یوکو قالدیرابیله ن  ساده جه "منم منم لیکده ن اوزاق" صداقتلی گنج اویرنجی یولداشلاریمیز اولاجاقدیر. و بیز بو یوکو اونلاردان باشقا کیمسه یه امانت ائده بیلمریک. یورور یولداشیم، یورو قارداشیم یولون آچیق اولسون. دامارلاریندا گزه ن تورک قانی حلالین اولسون. بو گون سنین گونون. بو گون سنه قوتلو اولسون.

 اویرنجی          18 اردیبهشت 1385