"سن گئتدین ائله بیر دونیا بوشالدی"

دوکتور محمد علی فرزانه نین ابدی خاطیره سینه

حمید دادیزاده(تبریزی)

بیر اوچیدیم او چیرپینان یئلینن

باغلاشیدیم داغدان آشان سئلینن

آغلاشیدیم اوزاق دوشن ائلینن،

بیر گوریدیم آیریلیغی کیم سالدی،

اولکه میزده کیم قیریلدی، کیم قالدی.(شهریار)

"سن گئتدین ائله بیل دونیا بوشالدی".آذربایجانین ادب ، کولتور ، هنر گویونده پارلایان اولدوزلارین بیریسی، استاد دوکتور محمد علی فرزانه غوربت ولایتده اوز دونیاسین دئیشدی. بو اوستادین ابدییته قووشماسی ، آذربایجانین تدقیقات دونیاسینا بیر آغیر ضایعه حئساب اولور. اوستادین یئری ایندی بوش اولسادا، اونون ادبی میراثی او قدر آغیر و زنگین دیر، کی ایللر بویو آذربایجانین ادبیات درنکلرینده بیزیم کولتور خادیملریمیزه، ده یرلی اثرلر حئساب اولونوجاقدیر. یئری دولونماز بو ایتگین، آذربایجانین تدقیقات و آراشدیرما دائره لرینده اوزون اورتایا قویاجاقدیر.

دوکتور فرزانه بیر میللتین میللی غورورون ، وارلیق شعوورن داشیان بیر عالیمیدی.ائله اونا گوره آذربایجانین تورک ریشه لی دیلین و اونون استروکتورلارین تاریخی اولاراق آراشدیریب، اوزوندن بویوک ادبی ارث بوراخیبدی. اوستاد فرزانه آذربایجان میللتی نین چاغداش تاریخین، اونون قیزیل کیمی میللی دموکراتیک حرکاتین، بیر آخار بولاق کیمی، سطیر به سطیر بیلیردی. چون کی او تاریخی سکسان ایل یاشامیشدی . اوستاد بیر تمل داشی کیمی آذربایجانین میتولوژی ، ساتیریک و فولکلوریک ادبیات ساحه لرینده فیکیر صاحیبی و نظریه پردازیدی.

بو اوستادین ابدییته قووشماسی خاطیره سینه، منده شاعیریمیزین سوزونه قاتیلیب، همن شعری کی 1347 –نجی ایللرینده، آذربایجانین گورکملی اوشاقلار ادبییاتچیسی صمد بهرنگی آرازا قوشماسی موناسبتینده دئیلدی، ایندی دوکتور فرزانه نین ئولمز خاطیره سینده دیلیمین ازبری اولوب، اوز تکلیکیمدده زمزمه ائدیب، کئدرلنیب، تکرار دئیرم: سن گئتدون، ائله بیل دونیا بوشالدی.

دوکتور فرزانه آذربایجانین باشینا نه گلمه سین ، آسیمیلیا یاخود دوندورما سیاستلرین نتیجه لرین چوخ بیر مدرک حکیم و حاذیق دوکتور کیمی گوروب، آنلایردی.ائله اونا گوره دردی بیلیردی. ائلیمیزین اوبامیزین اوز بالاسی کیمی، بابک توره نینده، شیدتلی مریض اولا اولا، اوره کدن فرحلنیب،منه بئله دئیردی: "کاش من ده بو توپلانتییا قاتیلا بیلیدیم".

دوکتور فرزانه شاه رژیمین قولدورلوقون گوروب، عاشیقلار دئمیشکن"ده ده دن بیلیگه چاتمامیشدی، اونا گوره اوز ائلینین دیلینین قدرین بیلیردی. منه بئله گلیر که ئولمز اوستادین هر بیر نه دن گوجلو وصییتی بیز آذربایجانلیلارا اوز تورکی دیلیمیزدن صاحیب چیخمامیزدی.اوستاد دونه- دونه دیلیمیزی بیزه تاپشیریب، دیلیمیزین قایغی سین چکمه نی بیزدن عومود ائدیردی.

شوبهه سیز ائل یولوندا عومور بویو جان قویان عالیملر میلتیمیزین دیری حافیظه سینده ابدی یاشیاجاقدیر. دوکتور فرزانه ده بیر لجند(legend ) یا خود افسانه وی کاراکتر کیمی؛ آذربایجانین آکتیو آیکانلاری کیمی گلن نسیللره قالاجاقدیر. داش آتانلارین و دیلیمیزین وارلیقیمیزین کوکون قازانلارین ئونونده دایانان، یورد چیراغین یاندیران،ائل دایاغی اولان ، بایاتیلار دونیاسینی میللتیمیزه تانیتدیران فزرانه قلبیمیزده فرزانه یاشایاجاقدیر.

دئمک بیزیم وارلیق سوفره میز چوخ گئنیش و دموکرات بیر مئیدان کیمی آچیلیر.بو سوفره نین اطرافیندا آذربایجانین میللی غوروری اولان ادبیات و تدقیقیاتچیلاریمیز چیین چیینه دوروبلار. بیر طرفدن عاشیق عبدولعلی نین سازی سسله نیر، اونون سازیندا فرزانه سوواران دیل، قافلانتی قوشان شعر و صفرخاندان یادگار قالان آرزولار بسله نیر. سوفره نین باش طرفینده فضولی گورونور:

منده مجنوندان فزون عاشیقلیق استعدادی وار.

عاشیق صادق منم مجنونون آنجاق آدی وار.

سوفره میزین بیر طرفینده دونیا شهرتلی میزا علی اکبر صابر سسله نیر:

مظلوملارین گوز یاشیب دریا اولاجاقمیش،

ئریالاری ، عوممانلاری نیلیردین، ایلاهی.

بیر طرفینده استاد شهریار ایله شیب و بئله دئیر:

بیر سوروشون بو قارغینمیش

نه ایسته ییر، بو قوردوغو کلک دن

دئینه کئچیرت اولدوزلاری الکدن

قوی توکولسون ، بو یئر اوزو داغیلسین،

بو شیطانلیق قورغوسو بیر یغیلیسن.

دوکتور فرزانه نی گورورم. سینه سی سوزدن دالغانیب،سوفره نین یوخارریسیندا ایله شیب ؛ آذربایجان دیلینین قایدالارین ، بدیعی مضمونلارینان سوز آچیر. سونرا محمد بیریایه اوز قویوب، تاریخلردن دانشیر.

ائله اونا گوره سوزوم بوراسیندا منده گورکملی شاعیریمیز اسماعیل جمیلی نین دیلی ایله همنواز اولورام:

ائل یولوندا عومور بویو جان قویان

قوجالمایان افسانه یه عشق اولسون

بایاتی تک وارلیغی سونسوز قالاشان

اونودولمار فرزانه یه عشق اولسون.

هله اینانا بیلمیرم فرزانه آرامیزدان گئدیب. هله اونون غورورلی سیماسی گوزومون ئونونده دیر. سسی قولاغیمدادیر که ده ده قورقوت داستانلاریندان بوی بویلایر، سوز سویله یر.

نه دن دئیم داخی؟

یئری دولونماز بیر ایتگیدن

سوزه سیغماز بیر آجیدان

اومود بولاغیندان

ائل دایاغیندان

یورد چیراغیندان

اینسانلیغا اولگو بیر اینساندان.

سوز بورا گلیب چاتاندا دای اوره گیم داغلانیر.اینسانلیغا اولگو اولان اوستادیم. تورپاقلارا اسیر اولوب .

سوزو سولماز بیر گولوستاندان

بایاتیلار باهاریندان

آنا دیلین دیاریندان.

دوکتور فرزانه آذربایجان دیلینین دایاسی کیمی، بو دیلین، میللی وارلیغین یوکسکلره قالدیردی. آذربایجانین معاصیر کولتور خادیملریندن تاریخ ساحه سینده پروفسور زهتابی، دیل ساحه سینده دوکتور فرزانه اوز یئنیلمزلیکلرین ذیروه لره قالدیردیلار.

بایاتیلار بهاریندان

آنا دیلین دیاریندان

وقتسیز سولان بیر چمندن

سوز دئمه یه سوز دایانیر

سوز اوتانیر سوز آغلایر.

منده بو غورنت یئرده، اودلار یوردو رادیوسوندان فرزانه میزین ابدی آیریلیقیندا بئله سوزومو باشا چاتدیرماق ایسترم:

سن گئتدون ائله بیل دونیا بوشالدی"

امما سن بیزیم دونیامیزی اوز اثرلرونله زنگینلشدیردون، دیلیمیزه بزه ک وارلیغیمیزا غورور بوراخدون. اوستاد فرزانه نین سون ائوی تبریزین دونیا شهرتلی "مقبره الشعرا" سیندا، دیگر ادبییات خادیملریله، چیین به چیین دورماسین آرزو ائدیرم.

روحی شاد و غریق رحمت اولسون