فرانسا ملی مجلیسی صدری

کُپی سنا مجلیسی صدری

کُپی اساسی قانون شوراسئ صدری

جناب صدر،

بیز ده سیزینله ۲۰۱۱ نجی ایلین دسامبر آیئنئن ۲۲ نده ال قالدئرما یُلو ایله آزسایلئ وکیل لرین تصویب اِتدیگی قانون لایحه سینی قبول اِتمه مکده همرأی ایک.

اُرادان کئ پارلمان مخصوص بیر شرایطده سیزین شخصی عقیده نیزی سایمایاراق و بیزیم دوشونجه میزه پارلمان وکیل لرینه دخلی اُلمایان و تاریخچیلره عاید بیر ایشه ال قُیوبدور؛ سیزده ن خاهیش اِدیریک اُنلارئن نظرینده ن اوزاقدا قالمئش آشاغئداکئ مطلب لری اُنلارا چاتدئراسئنئز.

۲۰۱۱ نجی ایلین ۲۲ دسامبرئندا کِچیریلمیش قانون لایحه سی ۱۹۱۵ ده باش وِرمیش حادثه لره ایشاره اِتدیگی ایلده، آیرئ اؤلکه لرده ن گلمیش سیلاحلئ اِرمنی دسته لری تزار قُشونو مادّی یاردئمئ و بیر نِچه میسیونرین مصلحتی ایله جنوبی آذربایجانئن اورمو، سلماس، خوی شهرلری و هنده ورلرینده سیلاحسئز و دینج اهالی یه قارشئ سُی قئرئمئنا ال آتئب و ۴۰ مین آدامئ (کیشی، آرواد، قُجا و خصوصاً اوشاقلارئ) هلاک اِتمیشدیلر. اینگلیس و فرانسا کُنسول لارئنئن گؤنده ردیگی راپُرتلار بو جینایتلرین دهشتینی گؤرسده بیله ر.

۱۹۱۸ نجی ایلین مارس آیئندا (۲۰ مارس) سیلاحلئ اِرمنی داشناک دسته لری بالشویک لرله بیرلیکده ایندیکی آذربایجان جمهوریتی پایتختی باکئ شهرینده اُن مین آذربایجانلئ قئرمئشلار.

۱۹۹۲ نجی ایلده کِچمیش شوروی داغئلاندان سُنرا ارمنستان جمهوریتی شوروی جمهوریلرینده ن بیری اُلاراق روس موتوریزه قُشونونون حل اِدیجی کؤمه یی ایله اؤز قُنشوسو آذربایجانا هجوم اِدیب یوزده ایگیرمی تُرپاقلارئنئ اشغال اِدیبدیر. بو تجاووزون نتیجه سینده بیر سُی قئرئمئ باش وِریب و اُندا تک خُجالئ شهرینده فوریه (فِورالئن) ۲۰ سی گِجه سی ۶۱۳ دینج و سیلاحسئز اهالئ اؤلدورولوب کی، اُنلاردان ۶۳ اوشاق، ۱۰۶ قادئن و ۷۰ قُجا سایئلئبدئر.

بِله لیک له ۱۹۱۵ نجی ایلده ن بویانا، هر زمان ال لرینده فرصت دوشنده بو ناسیونالیست و داشناکلار اؤز قُنشولارئنئ قئرماقدان اسیرگه مه ییبلر.

بونا گؤره بیز اینسانلئق و عدالت آدئنا ایندی کی، فرانسا پارلمانئ خارجی اؤلکه لرده سُی قئرئمئ اوچون قانون وِرمه یه اؤزونو

صلاحیتلی گؤرور، اِرمنیلرین آذربایجانلئلارئ قئرماسئنئ دا کی، دفعه لرله باش وِریبدیر، سُی قئرئمئ کیمی تانئیئب قانون وِرسین.

جناب صدر، بیز سیزین شخص اؤزونوزه و باشچئلئق اِتدیگینیز مجلیسه حؤرمتیمیزی بیلدیریریک.