یالقیز

قلم دوستو آره شین آیرلیغینا بلکه ده  داها دؤزه نمیردی یا.....نه بیلیم دیلیمیزین یالقیزلیغیندا ،آدینین – سانینین یاساقلیغیندا  " یالقیز" اولماق دردی دؤزولمز اولموشدو

اورک یاغیله سئوگی شامینی یانیق ساخلایان و بیر دوشوندوروجو گولوش پایلاماغا جان آتان شاعیر  یورغون باخیشلاریله ده آپارتایدین قفسینی یارماغا  بویلانیردی

     " یالقیز" اؤزونو بئله آدلاندیرسادا  یالقیز دئییردی ، قوجا تبریزین  یارالی ارکینینن 

یانیندا اولان کیتاب ائوینده   یالقیزین  اؤز یازار دوستلاریله  بوللو دادلی سؤزلری ، آتماجالاری ، ساتیریک شعرلری ، ائلین دردلرینه یانان بایاتیلاری و ادبی آلیش وئریشی واریدی

تبریز گئجه لرینین مدنی ائو توپلاشمالارینین دادی دوزو اولان ،  کؤنلو دولو درد اولسادا

یئنه دوستلارینا گؤلوش پایلایان   مجید آغامیز  داها  ائلیمیزین سئوگی سیله یاشاییر .....

یالقیز ائلینین  دادینا یالقیز  چاتان اولدون  

یاغسیز آشینا طنزیله  داد دوز قاتان اولدون

سنله اوزو گولدو گؤزو آغلار  ائل اوبانین

وجهینده غم آلساندا یئنه  بال ساتان اولدون

معنالی درین شوخ سؤزونون حیرانی اولدوق

هر گولمه جه ده ظالیمه بیر اوخ آتان اولدون

معجز  کیمی آیدینلیغا صرف اولدو حیاتین

گون تک ایشیغین پایلادین آی تک باتان اولدون

کؤنلونده ائلین سئوگی سراییندا یئرین وار

سونسوزلوغا کؤچدون نور ایچینده یاتان اولدون

                                                         اسماعیل جمیلی     قیش 2011 کالیفرنیا