21آذر، آذربايجانين بير ايلليک دموکراتيک حؤکومتى نين آغيرلاماسينا گؤره

۱۳۸۰ – جی ایلین مورداد آیی / آوقوست ۲۰۰۱

ايرانين دئوريمچى (اينقيلابچى) ايشچيلرى تشکيلاتى نين(راه کارگر) آلتينجى قورولتايى نين
ايراندا ميللى مساله يه گؤره قبول ائتديگى قطعنامه

ايشچى يولو تشکيلاتى نين۶- نجى قورولتايى، ايراندا ميللى مساله حقينده اؤز سياستينى دوام ائتديره رک، آشاغيدا گلن قطعنامه نى تصويب ائتميشدير:

اليف- ايشچى يولو تشکيلاتى، ائل و عيرق اوستونلوگو اوزرينده تاکيد ائدن بوتون جريانلارى و شخصلرى عيرقچى سايير،

ب- «ايرانليلارين ميللى بيرليگينى» «ايسلامدا» و يا خود «فارس ديلينده» آرايانلار، اصلينده ايراندا ياشايان ميللتلرين و قوملارين بيرليگينه و آرخاداشليغينا ضرر يئتيرمکده ديرلر،

ج- فارس ديلى ايراندا ياشايان ميلليتلرين و قوملارين آراسيندا يالنيز «رابيطه چى» بير ديل (واسيطه چى ديل) رولونو اوينايير و بوندان آرتيق بير يوک داشيمايير،

د- ايرانين نفوسو، فارسلاردان علاوه، تورکلر، کوردلر، عربلر، بلوچلار و تورکمنلر کيمى ان آزى بئش قروپا بؤلونور. ميللى بيرليکلر ايچريسينده، ميللى قوروپلاردا و ديل قوروپلاريندا يئرلشنلرين رسمى ديللرى اونلارين اؤز ديللرى اولماليدير و فارس ديلى اولا بيلمز،

ه- ايراندا، يوخاريدا آدلارينى گتيرديگيميز ميللتلر و قوملاردان علاوه، آيرى- آيرى مذهب و مرام – مسلک صاحيبلرى ده ياشاييرلار. اونلار دا ايران وطنداشى اولاراق باشقا يورتداشلار کيمى کاميل صورتده برابر حوقوقا ماليک اولماليديرلار،

و- آنا ياساسى ايرانليلارين تک تکينى و ايران سرحدلرينين ايچريسينده ياشايان بوتون ميللتلرين و قوملارين بوتؤونو بيرلشديرمه ليدير. آنجاق، بونون ترسينه اولاراق، ايران ايسلام جومهوريتى نين آنا ياساسى، ايران خالقى نين بيرليگينى هر بير زاماندان چوخ پوزاراق آرادان آپاريبدير.

ز- ايران خالقى نين بيرلشمه سى، يالنيز بير فئدئراتيو جومهوريت بيچيمينده و مودئرن بير آناياسا اساسيندا اولاسيدير. بئله بير آنا ياسا، بوتون يورتداشلارين کاميل صورتده حوقوق برابرليگينى ضمانت ائتمکله، بوتون ميللتلرين و قوملارين اؤز موقدراتينى اؤزلرى تعيين ائتمک حقينى – اوجومله دن، اونلارين بوتؤلوکله آيريليب و اؤزلرينين موستقيل دؤولتلرينين ياراتمالارينى و هابئله اؤز موختاريتلرينى قوراندان سونرا کؤنوللوجه سينه فئدئراتيو بير جومهوريتده بيرلشمه لرينى رسمى اولاراق تانيماليدير.

ايشچيلر يولو تشکيلاتى نين 6- جى قورولتايى نين حساباتيندان (ميلى مساله يه گؤره)

قطعنامه حقینده آچيقلامالار

"یئری گلمیشکن دئمهلیییک کی، ايشچى یولو تشکیلاتی بری باشدان، چوخ ميللتلى اؤلکهمیزده ميللى مسألهیه خوصوصی دیقت یئتیریبدیر. تشکیلاتین تورکمن صحرا، خوزیستان، کوردوستان، آذربایجان (شریعتمدارینین طرفدارلاری اولان خلق موسلمان حیزبینین حرکتی) و بلوچیستان مسألهلرینه عایید و هابئله باشقا ميللى موناسیبتلرده قارشیدا توتدوغو پرنسيپه اويغون موضع و دوروملار اونون قووملارین و ميللتلرین اؤز موقدراتینی موعینلشدیرمک حقینه و يورتداشليق حقلرینه دریندن اینام بسلهدیگینی آچیب آیدینلاشدیریر.

ايشچى یولو تشکیلاتی يورولمادان و آردیجیللیقلا مذهب آزينليقلارينين، او جومله دن یهودولار و باهاییلارین حقلریندن مودافیعه ائدیب و ایسلام جومهوریتی رژیمینین ایرتیجاعچی و خلقه قارشی اولان سیاستلرینین ایچ اوزونو آچماقلا محکوم ائتمیشدیر.

۱۳۷۱- جی ایلین فروردین آییندا، مرکزی کومیته اؤزونون "ميللى مسأله حقینده سیاستیمیز" آدیندا وئردیگی قطعنامهسینده اؤز سیاستلرینی دقیقلشدیریب و ییغجاملامیشدیر. بو سند ده دئییلمیشدیر کی:

"چوخ ميللتلى اؤلکهمیزده حؤکم سورن ميللى ظولم، دموکراسییا چاتماغین قاباغین آلان ان اؤنملی و اهميتلى مانعهلردن بیریدیر. ميللى ظولمون دوام ائتمهسی، ایراندا یاشایان خلقلرین آراسیندا ميللى نیفرتین گئنیشلنمهسینه و اونلارین دموکراتیک و کؤنوللو اولاراق بیرلشمهلرینین زمینهسینین سارسیلماسینا گتیریب چیخاراجاقدیر؛

ميللتلر آراسی عرصهده باش وئرن دگيشيکليکلرين و خوصوصیله قاباقکی شورالار بیرلیگینین باشیندان گئچیردیگی تحووللرین نتیجهسینده، یاشادیغیمیز بؤلگهنی بوروین ناسیونالیزمین یئنی دالغالاری، ایراندا دا بیر نؤوع اؤزونون عکسینی تاپیب و تاپاجاقدیر. بئله بیر شراییطده ميللى نیفرتین هر جوره گئنیشلنمهسی، بیزیم بؤلگهده یئرلشن اؤلکهلرین او جوملهدن اؤز اؤلکهمیزین ايشچى حرکاتینی بؤیوک بیر خطر و تهلوکه ایله اوز- اوزه قویموشدور. بونا گؤره مرکزی کومیته بئله بیر قرارا گلمیشدیر کی، تشکیلاتچیلیق و تبلیغاتچیلیق ایشلرینده آشاغیدا گلن موریدلر تام دیقتله ریعایت اولونسون؛

الیف- دموکراسینین اساس پایا و تمللریندن بیری اولماسی اعتیباریله، بوتون ميللتلرین اؤز موقدراتینی تعیین ائتمک حقیندن و او جوملهدن اونلارین آیریلماق حقیندن، خوصوصیله اؤزوموزون چوخ ميللتلى اؤلکهمیزده فعالجاسینا و ایستیدلال ائتمک یولیله مودافیعه ائدیلمهلی و هابئله ظولم آلتدا یاشایان ميللتلرین بئلنچی حقلرینه چاتمالری اوغروندا آپاردیقلاری ساواشلارينا آکتیوجهسینه حیمایت گؤستریلمهلیدیر؛

ب- موختلیف ميللتلرین ايشچى و زحمت آداملارینی بیری بیریسینین قارشیسیندا قویماقلا، اونلارین کاپیتالیزم ایستیثماریندان قورتارمالارینین اساس شرطلریندن بیر ساییلان بینالمیللجهسینه آرخاداشلیغین مؤحکملنمهسینین قاباغینی آلان، ميللى نیفرتی آلوولاندیراان دوشونجهلر و مئیللر ایله فعالجاسینا فیکیر موجادیلهسی آپاریلمالیدیر. ایراندا یاشایان ميللتلرین دموکراتیک و کؤنوللوجهسینه بیرلشمهسیندن مودافیعه ائتمک بئلنچی فیکیر موجادیلهسینین گرکلی شرطی ساییلیر و بو دا ایراندا یاشایان ميللتلرین اؤز موقدراتینی تعیین ائتمک حقلرینه و او جوملهدن اونلارین آیریلمالاری حقینه حؤرمتله یاناشماقلا الده اولونا بیلر؛

ج- تشکیلاتین مرامنامهسینده آچیقجاسینا یازیلدیغی کیمی، ایراندا یاشایان بوتون ميللتلرین حقلری و ایمکانلارینین برابرلیگیندن، اونلارین دموکراتیک و کؤنوللوجهسینه بیرلشمهلرینین حیاتی شرطی کیمی فعالجاسینا مودافیعه ائدیلمهلیدیر؛

د- ایراندا یاشایان بوتون ميللتلرین، اؤزلرینین قونشو اؤلکهلرده یاشایان ديلداشلارى و ميللتجه قوهوملاریله ایلگیلر و علاقهلر قورماق حقیندن (آزادجاسینا گل- گئت ائتمگه تسهیلات یاراتماقدان توتموش تا کولتور، ایقتیصادیات، گؤمروک و باشقا ساحهلرده موقاویلهلرین باغلانماسی کیمی) حیمایت اولونمالیدیر. بئلنچی موناسیبتلر، ايران ميللتلرینین کؤنوللوجهسینه بیرلشمهسینی پوزماييب، چئشیدلی اؤلکهلرین ايشچى و زحمت آداملارینین بینالمیللجهسینه آرخاداشلیغینا، باريش و دموکراسییه چاتماق اوغروندا مؤوجود زمینهنی گوجلندیریر."