سئویملی یوردداشلار و فیکیرداشلار

زوریخ شهرینده یاشایان گونئیلی آکتیویستلر:

گونئی آذربایجانین میللی آزادلیق حرکاتی، اؤز اویانیش و دیرچلیشی یولوندا، چئشیتلی ائنیشلر و یوققوشلاری یاشاییب و یاشاماقدادیر  .

 یورد دیشیندا یاشایان گونئیلیلر، ایللردن بری چئشیتلی ایش بیرلیگی چابالارینین سونوندا، اؤتن ایل 21.آذر گونو، گؤزه چارپان شکیلده، ایش بیرلیگی و دیالوق توپلانتیسینی یاراتدیلار و آلتی آی سونرا بو توپلانتینین بیرینجی مئیوهسی اولان گاماج تئشکیلاتی یارادیلدی  .

چئشیتلی قارشی فیکیرلر و تئنقیدلره سایقیله یاناشارکن، دئمهلیئم کی یالنیز ایش بیرلیگی دوشونجهسینین یاشاماسی، گونئی حرکاتینا بیر بؤیوک باشاری و اوجا ذیروهدیر .

طبيعي کی بو اوجا ذیروهلره گؤز تیکمک، ایران رئژیمینی سانجیلادیب و قارشی تپگیلره ال آتماغا چاغیردی. بونو بیلرک کی قارشیمیزدا اولان قووه چوخ آغیللی و تجروبهلیدیر، چالیشاجاق دولایی یوللارینان اؤز ایستهيینه ال تاپسین. بو یوللارین ان اؤنملیسی، اؤز ایچیمیزده اولان قوخوموش لومپنلر و هابئله بعضی قافیل دوستلارین الیله، هر هانسی بیر بهانهايله اولور اولسون (اؤرنک: قیرمیزی سیمگه یاخود قیرمیزی بایراق)، اورتایا قاریشیقلیق و توزاناق سالیب، ایش بیرلیگی دیالوقونو ائتگیلئییب و آکتیو اینسانلاریمیزی روحدان سالماقدیر.

چالیشان و صاف اورکلی گونئیلیلرین بورجودور آچیق گؤزايله دوزو ائيریدن سئچیب، دوزه يئنهده دوز یولدا اولماسینا یاردیمجی اولوب و ائيرینی قیناسینلار.

بیزلر سوسوب و چالیشان اینسانلاریمیزی یالنیز بوراخساق، اونلارین هر هانسی بیر یانلیش آددیملارینا یاردیمجی اولموشوق. سئودیگیمیز و ایناندیغیمیز اینسانلاریمیزین یانلیش آددیملارینی سئوگی و سایقيلا تنقید ائتمک هامیمیزین بورجوموز و دانیلماز حاقیمیزدیر. آما هر یولدان کئچنه ایزین وئرمهمهليييك کی، تئنقیدی، تخریبه چئویریب و دوشمان اوجاغینا قوللوقجی اولسون.

او شخصلر کی بؤیوک ادعالارلا اوزون زامانلاردیر میللی حرکتده هئچ بیر ایش گورمهییبلر، و ایندی یئکه-یئکه تنقیدلرله (تخریباتلا) اورتایا چیخیرلار، ترپنیشلریندن چوخ موغایات اولمالیدیرلار، نیه کی هر کیمسهنین نئجه داورانیشی میللی حرکتین تاریخینده یازیلیر.

سوندا:

1. سايقي دیر فدرال دموکرات تشکیلاتینین وئردیيي بیلدیرييه دستک وئریب، بو گؤزل ایشلریني آلقیشلاییریق و آرزو ائدیریک گلهجکده ایش بیرلیگی دیالوقوندا داها بوندان آرتیق آکتیو اولسونلار.

2. سايقي دیر گونازتيوي-نی دستکلهییب و چکدیگی زحمتلئره گوره آلقیشلاییریق و آرزو ائدیریک داها آرتیق آکتیویستلریميزله ایلگیده اولسون و چئشیتلی باخیشلاری گؤز اونونده آلاراق آددیم آتسین، نیهکی میللی حرکت ایندی كئچمیشه گوره چوخ تجروبهلنیب و ساوادلیدیر. بو آچیدان هر بیر بؤیوک آددیما چوخلو دانیشیق گركدیر.

درین سایقیلاریمیزلا

زوریخ شهرینده یاشایان گونئیلی آکتیویستلر

سوئيس، زوریخ 28 نويابر 2010