نوامبر آیی نی ایکی سینده فئدرال آلمانین کؤلن شهرینده جنوبی آذربایجانلی لاری نین تشبثی ایله مهندس غلامرضا امانی نین آنما مراسیمی کئچیریلمیشدیر. بو مراسیمده بیر نئچه وطنداشیمیز او جمله ده ن س. حاتملوی چیخیش ائدیب و بو مبارز انسانین حیاتی و مبارزه سی باره ده دانیشمیشدیلار.

آشاغیدا س. حاتملوی نین دانیشغی نی وئرمک ایسته ریک:

 

دان یئری سؤکولوب چیخاجاق گونش     سهندیم ساوالان ساچین یولماسین

 

هر شئی ده ن اول آذربایجان ملی- دموکراتیک مبارزه سی نین دویوشچوسو غلامرضا امانی نین بیر اولدوز کیمی واخت سیز آخیب- گئتمه سی نی اونون عائله سینه، ایران تورک لرینه و او تایلی- بو تایلی آذربایجان ملتینه باش ساغلیغی دئییب، اونون عائله سینه صبر دیله ییره م. بیر آندا اوچ اوغولو ایتیرمک دوغرودان دا بویوک بیر سارسینتی دیر. هر اوره ک بونا دؤزمز. آجیمیز بویوک دور. تاسف لر اولسون کی بو بیزیم ایلک دردیمیز و کدریمیز دئییل و بئله کی گورونور سون کدریمیزده اولمایاجاق دیر. ائله بیر نئچه آی بوندان اول کؤلن شهرینین بو محله سینده بویوک یازیچی و تاریخچی میز صمد سرداری نیا اوچون آنما مراسیمی کئچیرمیش دیک. امید ائدیره م کی گله جک ده ملتیمیز اوچون خئیرلی و شاد مناسبت لرده بیر یئرده توپلاناق.

 

بیر تورک شاعیری دئمیش کی: وطن او زامان وطن اولا بیلر کی، اونون تورپاقلاریندا قان توکولسون.

بو سؤز هر نه قدر مباحثه لی اولسادا، منجه بو گون آذربایجان ملتی نین گلیشمه پروسه سینی گؤزه ل شکیلده ایفاده ائدیر.

بو گون جنوبی آذربایجاندا آذربایجان ملتی قان وئره-  وئره، بیر ملت سویه سینه یوکسلمکده دیر. البته شمالدا یاشایان ملتیمیزین طالعی ده ائله باشقا جور اولمامیشدیر. هله شمالدا استقلالا قووشمادان اول تؤکولن قانلارین ایزی، بو گونده ارمنستان اشغالچی لارینا قارشی گئده مجادله ده، هر گون آذربایجان تورپاقلاریندا توکولن قان لار ایله دوام ائدیر.

کئچن 90 ایلده ملت لرین زندانی اولان ایران ئؤلکه سینده، آذربایجان ملتی ئؤز حاق لارینی مدافعه ائتمک اوچون بویوک مجادله آپارمیشدیر. بو گون ده ئؤز مستقل وارلیغی ایله چیخیش ائده ن آذربایجان ملتی نین مبارزه سی هئچ ده کشمکش سیز، زندان سیز، اشکنجه سیز، اعدام سیز و ترور سیز اولماییب و تاسف لر اولسون کی ئؤزگولویونه قووشمایینجا گله جک ده اولمایاجاقدیر. تاسف کی هله بو باشلانقیج دیر. و بو ناحاق قانلارین تؤکولمه سی حالا دوام ائده جک دیر.

بیز هر گاه ایران- عراق ساواشیندان سونرا باشلانان « آنا دیلیمیزه اؤزگورلوگ» حرکتی نین گئدیشاتینا باخساق، گؤره ریک کی فارس شوونیزمی نی نماینده لیک ائده ن اسلامی رژیم، ملی- دموکراتیک مبارزه میزین فعال لارینا قارشی شدتی، گئت- گئده آرتیرمیشدیر.

«بابک قالا سی حرکاتی» دؤورونده ملی فعال لاریمیز رژیمین قولدورلاری واسیطه سیله دویولوب و حتی بعضاً حبسه آتیلسالاردا، اسلامی رژیم اونلاری ئؤلدورمک ده ن چکینیردی. او دؤورده، رژیم طلبه لریمیزه و معین فعال لاریمزا قارشی بعضی تضییقات آپارماقلا کفایت لندیردی.

لاکن بیر خرداد قیامیندان سونرا رژیمین ملی فعال لاریمیزا قارشی تاکتیکی تمامیله دئییمشدی. بو عظمت لی قیاندان سونرا رژیم باشا دوشدو کی کنترل، گئت- گئده اونون الینده ن چیخماقدادیر.

ائله او گونلرده ن باشلایاراق ملی فعال لاریمیزا قارشی ترور گئت- گئده آرتمیشدیر.

بیر خرداد قیامیندان سونرا آذربایجانین و ایرانین باشقا شهرلرینده زندان لار بئله بیر گون ده اولسون ملی- دموکراتیک مبارزه میزین یولوندا حبسه دوشن آذربایجانلی لار و ایران تورک لرینده ن بوش اولمامیشدیر.

او تاریخ ده ن رژیم مبارزلریمیزه قارشی «چین متدی» ایله مقابله ائتمگه باشلامیشدیر. بو متد اساسیندا رژیم  مبارزه لریمیزه قارشی  تضییق، پرووکاسیون و سیخما- بوغما تاکتیک لرینده ن فایدالانیر. او بیر طرفده ن ملی فعال لاریمیزی توتوب، حبس خانالاردا آغیر شرطلر آلیتندا اشکنجه واسیطه سیله روح سل و فیزیک سل سارسیتدیقدان سونرا ، آغیر وثیقه لرله حبس ده ن آزاد ائدیر. دیگر طرفده ن ملی فعال لاریمیزی زندان دا و خیاوانلاردا ئؤلدؤرور و بئله لیک له حرکتیمیزین دویوشچولری آراسیندا وحشت و قورخو یاراتماغا چالیشیر. رژیم عین زاماندا ملی فعال لاریمیزین آراسینا سوخدوغو آگنت لری واسیطه سیله آذربایجانچی گروهلار و پارتیالار آراسیندا حیدری- نعمتی ساواش سالیر و سجیلی سیز تشکیلات لار یاراتماق لا آذربایجان ملتی نی باشقا ملت لر ایله ئوز به ئوز قویماغا چالیشیر.

سؤزلریمه قوت اولاراق سون زامانلادا باش وئره ن حادثه لرده ن بیر نئچه نمونه گتیرمک ایسته ییره م:

-          بو ایل مای آییندا پاسدار ماشینلاری ماتور سیکلت له یولدا گئده ملی فعال لاریمیزدان قادیر صادیقی نی قووالاییب و نهایت اونون ماتورونا چارپاراق اونو ئؤلدورموشدولر.

-          - بو ایل یونی آییندا ملی فعال لاریمیزدان فرهاد محسنی نگارستان، اطلاعات اداره سینین تمشیت اتاقلاریندا ئؤلدورولوب، سونرا جنازه سی تبریز شهرینده ائل گؤلونه آتیلمیشدیر.

-          - بیر خردا قیامیندان سونرا یوزلر سیاسی محبوسوموز تبریز، اردبیل، ارومیه، زنگان، یزد و تهران شهرلری نین زندان لاریندا آغیر شرطلر آلتیندا حبس چکمگه مجبور قالمیشدیلار. بونلاردان کیچیک بیر نمونه اولاراق عباس لسانی، حسن اسدی، علی صادقی، حجت تاروردی، اکبر حسین زاده، احد رضوی، امیر محمد نباتی، فراز زهتاب، آیدین خواجه ای، داریوش حاتمی، سجاد مهر، امیر مردانی، منصور امینیان، مقصود عهدی، مجید ماکوئی، احسان نجفی نسب، صمد ملا قلی، اکبر آزاد، صیاد محمدیان، صمد عباس پور، حسین حیدری، شهباز ابراهیم نژاد، یوسف هوشیار، علی صدیقی و سون زامانلاردا ملتیمزین صداقتلی ائولادلاری علیرضا صرافی، سعید مغانلو، حسن راشدی و مهدی نعیمی ده ن آد آپارماق اولار.

بو گون ائله غلامرضا امانی نین فاجعه لی ئؤلومونی ده گره ک ائله بو گئدیشاتین بیر پارچاسی کیمی گؤره ک. بو کی امانی نین ئؤلومو رژیمین واسیطه سیله اولوب و یا بیر اوتوموبیل قضاسیندا باش وئرمیش دیر، منجه اصلینده هئچ بیر شئی یی دئییشمز.

عجبا ائله بو شوونیست و پان ایرانیست اسلامی رژیم دئییل کی امانی نی 5 ایل حبسه آتیب و اونو آغیر اشکنجه لره معروض قویموشدور؟ امانی حبسده ن چیخار- چیخماز رژیمین اطلاعات مامورلاری اونو دفعه لرله هده له ییب، سورغو- سئوالا چکیب، گئجه- گوندوز دالیسیجا دوشوب و حیاتی اونا دار ائتمیشدیلر.

بئله لیک له آذربایجانین و ایران تورک لری نین شرفلی قیز و اوغلانلارینا دیوان توتان اسلامی- پان ایرانیست و شوونیست رژیمده ن، هر شئی گؤزله مک اولار.

رژیم بو گون آذربایجاندا ترور اسدیریر. ملی فعال لاریمیز، قادینلار، ایشچی لر، کندلی لر، طلبه لر و دینی آزینلیق لار بو گون آذربایجاندا رژیمین امانسیز ترورونا معروض قالمیشدیلار.

ئؤز حاقلارینی طلب ائده ن آذربایجان قادینلاری، تبریز و تهران شهرلرینده دفعه لرله دویولوب، اطلاعات اداره سینده سورغو- سئوالا چکیلیب و حتی حبسه آتیلمیشدیلار.

آذربایجان ایشچی لری ئؤز صنفی تشکیلاتلارینی یاراتماق ایسته دیگی زامان، رژیمین سیخما- بوغماسینا معروض قالیب و اونلارین نماینده لری ایشده ن آتیلیب و حتی حبسه سالینمیشدیلار.

ئؤز تورپاقلارینی پاسدارلارین قولدورلوقلارینا قارشی مدافعه ائده ن مغان کندلی لری نین دینج نمایش لرینه آتشین سلاحلارلا جاواب وئریلیر.

آذربایجاندا یاشایان دینی آزینلیقلار، او جمله ده ن باهائی و علوی آذربایجانلی لار، فاناتیک رژیمین ال آلتی لاری واسطه سیله توتولوب و ئؤلدورولورلر.

بوتون بو حادثه لر بو گون آذربایجانچی گروه و پارتیالاردان بویوک متانت، داها آییق اولماق و داهادا شرطلره اویغون بیر مبارزه نی ایره لی آپارماغی طلب ائدیر.

اسلامی رژیم ملی- دموکراتیک مبارزلریمیزی ایسته دیگی زامان و ایسته دیگی شرطلر آلتیندا دویوشه چکمک ایسته ییر. ئؤنجه دئدییمین کیمی رژیم ملی فعال لاریمیزین آراسینا سوخدوغو آگنت لر واسیطه سیله آذربایجانچی گروهلار و پارتیالار آراسیندا حیدری- نعمتی ساواش سالماق و سجیلی سیز تشکیلات لار یارتماق لا آذربایجان ملتی نی باشقا ملت لر ایله ئوز به ئوز قویماغا چالیشیر.

اونودماماق لازیمدیر کی جدی حاضیرلیق آپارمادان سون دویوشه گئتمک یالنیز و یالنیز دوشمنین تاکتیکلرینه خدمت ائده بیلر.

بو گون آذربایجانچی پارتیالار و گروهلار گره ک بیر- بیرلرینه یاخینلاشیب، مشترک آماج اوغروندا واحید بیر جبهه نین یارانماسینا زمین حاضیرلاسینلار.

اویفوری یه قاپیلان، ایراندا و منطقه ده بویوک دولت لرین آپاردیقلاری سیاستلره امید باغلایان جریانلار بیلمه لیدیلر کی « بو خمیر چوخ سو آپاراجاقدیر».

بیرده کی اونودمامالییق کی بو گون آذربایجانلی نین دوستو یالنیز آذربایجانلی و تورک دور.

بیلمه لییک کی قاباقدا بویوک دوشلر اولاجاقدیر. بویوک دویوشلره تشکیلات سیز و حاضیرلیق سیز گئتمک اولماز.

بو گون ان عاجیل وظیفه میز آذربایجان ملتی نی بیر ملت کیمی حاقلی ایستک لریمیز و آماجلاریمیز اوغروندا سفربر ائتمک ده ن عبارت دیر. بو ایش اولمایانا قده ر، رژیم توتوقلایاجاق، اشکنجه ائدیب، آساجاق و ئؤلدوره جک دیر.

رژیمین ئؤزباشینالیغینا یالنیز بویوک آذربایجان ملتی سون قویا بیلر.

فرصت ده استفاده ائدیب دئمه لییم کی ملی- دموکراتیک مبارزه میدانیندا شهید دوشن یولداشلاریمیزین عایله لرینه، یارالی لاریمیزا و محبوسلاریمیزا یاردیم ائتمک خصوصیله خارج ده یاشایان آذربایجانلی لارین ان عاجیل وظیفه لرینده ن بیری ساییلیر. بو ایش اوچون بیرلشمک و قووه لریمیزی بیرلشدیرمک لازیمدیر.

سؤزلریمی بیتیرمه ده ن ستارخان، شیخ محمد خیابانی، پیشه وری، ابراهیمی، زهتاب، صمد و بهروز دهقانی نین یولونون دوامچی سی اولان غلامرضا امانی نین شخصاً شاهید اولدوغوم بیر مصاحبه سینه اشاره ائتمک ایسته ییره م:

گوناز- تی وی ایله آپاریلان بو مصاحبه ده بئش ایل آغیر شرطلر آلتیندا حبس ده ن یئنی آزاد اولموش امانی، « داردا قالان بیر شیر کیمی یاغیردی». ستارخان شهامتلی بو ملی- دموکراتیک مبارزه میزین عسگری، قورخمادان ملتی نین طالعینه غنیم کسیلن، اونون ان ابتدائی حاق لارینی تاپدالایان فاشیست و شوونیست لره، سینه گریب، رژیمه و اونون ال آلتی لارینا میدان اوخویوردو.

اونون فاجعه لی ئؤلومونون خبرینی ائشیده رکن بو خاطیره گؤزومون ئؤنونده جانلانیب، ئؤزوم- ئؤزومه دئدیم: امانی ده ملی- دموکراتیک مبارزه یمیزین شهیدلرینین سیراسینا قوشولدو.

سؤزومو شاعیر دوستوم اسماعیل جمیلی نین  امانی یه حصر ائتدیگی شعری نین بیر پارچا سی ایله بیتیرمک ایسته ییره م:

بلادیر قضادیر نه دیر بیلمیره م

بیلیره م یاراسی دریندیر درین

گؤزومده قان اولان یاشی سیلیره م

ساغ اولسون اییلمز باشی وطنین

 

سون باهار سونوندا چیچییم سولدو

سوورولدو تالاندی آرزی باغچاسی

وطنین باغریندا یئنی داغ اولدو

سئوگیلی نیسگیلی امان سیز یاسی

 

اولدوزلار آخارلار باتیب ئؤلمزلر

قارانلیق قودوروب چیلتیک چالماسین

دان یئری سؤکولوب چیخاجاق گونش

سهندیم ساوالان ساچین یولماسین

 

آذربایجان باشین ساغ اولسون.