اؤیرنجی نین 1387- جی ایلین مورداد آیی نین اینسان حاقلاری راپورو

 

اؤیرنجی سایتی نین (www.oyrenci.com) آیلیق اینسان حاقلاری راپورو کی هر آیین ایلک گونلرینده یایینلانیر، کئچن آیدا گونئی آذربایجانلا ایلگیلی اینسان حاقلارینین دورومونو یانسیدماغا چالیشیر. بو راپوردا 1387- جی ایلین مورداد آیی نین اولای لارینی گؤرزدن کئچیرمک ایسته ییریک.

 

 

گؤزآلتینا آلینانلار ( نظارت آلتیندا اولان لار)

 

1)      ودود اسدی، اردبیل آزاد اونیوئرسیته سی ایسلامی انجمنی باش سوروملوسو، موردادین بیرینجی گونونده رشت شهری تهلوکه سیزلیک گوجلری طرفیندن گؤزآلتینا آلیندی. سؤز قونوسو اؤیرنجی، رشت شهری نین آزاد اونیوئرسیته سی نین ژئولوژیستلیک بؤلومونده تحصیل آلیر. او 1385- جی ایلین خورداد پروتئستولاریندا ( گؤستریلرینده) گؤزآلتینا آلینمیشدی.

2)      ایبراهیم رشیدی آذربایجانلی شاعیر و یازار مورداد آیی نین 15- ده تهلوکه سیزلیک گوجلری طرفیندن، 5 آیلیق حوکمونون اویغولانماسی اوچون اورمو حبس خاناسینا گؤتورولموشدو. بو چالیشقان اوردیبهشت آییندا توتوقلاندی و ایکی آی سورغولامانین آردیندان، اورمو محکمه سی 102 قولو طرفیندن حبس جزاسینا چارپدیریلمیشدی.

3)      اؤیرنجی چالیشقانلارینی قارشی گئنیش بیر سوییه ده باسقی لار و توتوقلانمالارین آردیندان، موردادین 23 " امیر مردانی" تبریز اونیوئرسیته سی اؤیرنجی سی گؤزآلتینا آلیندی. سؤز قونوسو اؤیرنجی بو آندا مکانیک بؤلومونون سون ترمینده تحصیل آلیر و 85- جی ایلین خورداد اولای لاریندا 20 گون گؤزآلتیندا ساخلانمیشدی. تهلوکه سیزلیک گوجلری گئجه نین سون ساعات لاریندا اونون آتاسی نین ائوین آراشدیرمیشدیلار.

4)      موردادین 21 تهلوکه سیزلیک گوجلری سورنا هاشمی نین ائوینه اولان هوجومون آردیندان، اؤزونو زنگان اینقیلاب محکمه سی نه تسلیم ائتدی. زنگان اونیوئرسیته سی اؤیرنجی لری نین توتوقلانمالاری، اونیوئرسیته معاوینی نین بیر اؤیرنجیه تجاوز ائتمه سوچلاری سببییله گرچکله شمیشدیر.

5)      منصور امینییان، تبریز اونیوئرسیته سی مکانیک بؤلومونده یوکسک لیسانس اؤیرنجی سی و فنی فاکولته سی  ایسلامی انجمن نین باش سوروملوسو و مقصود عهدی جوغرافییا بؤلومو اؤیرنجی سی و ایسلامی انجمن ین اویه سی موردادین 30- جو گونو ایطلاعات گوجلری طرفیندن گؤزآلتینا آلنمیشدیلار. منصور امینییان ژورنالیست و اؤزلوک، ستارخان، آذربایجان گونشی اؤیرنجی سل درگی لرین باش یازاری و آراز درگی سی امکداشلاریندان و منصور عهدی سهند درنه یی مرکزی شوراسی نین اویه سی ایدیلر.بو توتوقلامالار موردادین 23-و اونلارین ائولری نین آراشتیرماسی سونراسی گرچکله شیب. اؤیرنجی لرین ائوده اولمامالارینا رغمن اونلار شخصی وسایلی آراشدیریلیب.

 

 

سایتی لارین و اؤیرنجی سل درگی لرین باغلانماسی:

 

1) ستارخان آدلی بیر اؤیرنجی سل درگی کی آذربایجانین سورونلارینی آراشدیرماق و آییلیق اولاراق یایینلانیردی، باغلاندی. اؤیرنجی لرین بیری نین سؤزونه استیناد اولاراق، بو درگی نین ایلک سایی سیندان بو باسقی لار گؤرونمکده ایدی. نئجه کی ایکینجی سایی سیندان سونرا اونیوئرسیته سوروملولارنین باسقی سییلا 6 آیا دک باغلاندی و اوچونجو سایی سینین آردیندان، اونیوئرسیته نین حراستی، ایسلامی جامعه و دئوریم موحافیظلری شیکایتی سونوجوندا، 85- جی ایلین یاییندا سوروملو مودورو سوچلاریندان سووونما اوچون ( کمیته ناظر بر نشرییات) چاغریلدی. امما سوچلانماماغینا رغمن اونون یایینلانماسینا انگل اولدولار. بو اؤیرنجی بیلدیردی: سون زامان لاردا تبریز اونیوئرسیته سی اؤیرنجی لری و سوروملو مودورون ایسته یی ایله، بو درگی نین دؤدونجو سایی سی بیر اؤزل سایی ایله بیرلیکده ( اؤیرنجی لرین 87- جی ایلین خورداد آیینین اعتیراض لاری قونولو) یایینلانمیشدی. سؤز قونوسو اؤزل سایی بو درگی نین باغلانماسینا ندن اولموشدو.

 

اؤیرنجی لرین چاغیرما  و سورغولانماسی

 

 

الهه رادمهر اورمو اونیوئرسیته شهر تیکمه ( شهر سازی) اؤیرنجی سی، دوستاقدا اولان قارداشی نین ( سجاد رادمهر) دورومونو اؤیرنمک سوچلاریندان اؤتری، 2 دفعه اینظیباطی کومیته یه چاغریلدی و اونیوئرسیته سوروملولاری طرفیندن شانتاژ ائدیلدی.

 

موردادین 31- ینده تهلوکه سیزلیک گوجلری زنگان اونیوئرسیته ایسلامی انجمنی اویه سی علیرضا فیروزی توتوقلاندی و اونون آتاسی نین ائوی آراشدیریلدی. سؤز قونوسو اؤیرنجی نین ائوده اولماماقدان اؤتری، عاییله سی ندن شهریورین ایکیسینده اؤزونو محکمه یه تانیتدیرماسی ایسته نیلدی.

 

 

سیاسی، توپلومسال و کولتورل چالیشقانلارین موحاکیمه سی

 

یاشار حکاک پور، دادود عظیم زاده، علیرضا حقی، مجید پژوه فام و حامد یگانه پور، دانیشما،ماراغادا 85 خورداد اولای لارینا قاتیلما و اورگانیزه ائتمک ، زنجان سؤزلری درگی سی نین چاپ و یاییلماسی،ائشیکده اولان  آذربایجان تلئویزییاسی کانال لارییلا ایلگی قورماق سوچلاریندان اؤتری، موردادین 7- سینده ماراغانین اینقیلاب محکمه سی طرفیندن سورغولاندیلار.

 

حجت الاسلام عظیمی قدیم آذربایجانلی چالیشقان قومون لنگرود زیندانیدا بیر ایللیک حبس سوره سینی کئچیدیر، موردادین 22- سینده یئنی بیر پرونده (دوسیا) ده نیظاما قارشی تبلیغات ندنی ایله روحانییت اؤزل محکمه سینده سورغولاندی.

 

وثیقه قارشیلیغیندا آزادلیق

 

حمید والایی، 27 یاشلی مدنی چالیشقان کی حقوق بؤلومونده تحصیل آلیب، تیرین 24- ونده ایططلاعات ناظیرلیگینه گئده رک گؤزآلتینا آلینمیشدی.  13 گون سونرا موردادین 13- نده تداوی اوچون، وثیقه قارشیلیغیندا سربست بوراخیلمیشدی. ایشکنجه یه معروض قالدیغی سورجده اونون 4 دیشی سینمیشدی.هابئله بو ایشکنجه لر سونوجوندا اونون ساغ قیچی سینمیشدی و بو آن اعتیبارییله حرکت ائده بیلمه ییر و بیر نئچه دفعه ده باییلمیشدی. خاطیرلادمالیییق کی اونون عاییله سی موردادین 6- سیندا قوه قضائیه یه بیر مکتوب یازاراق، حمید والایی نین دورومونو آنلاتمیشدیلار.

 

شاهرخ حاتمی دوستاقدا اولان اؤیرنجی، داریوش حاتمی نین قارداشی، اونون دورومونو اؤیرنمک سوچلاریندان اؤتری، تهلوکه سیزلیک گوجلری طرفیندن گؤزآلتینا آلینمیشدی. 15 گون توتوقلو قالدیقدان سونرا موردادین 11- نده 50 میلیون تومنلیک وثیقه قارشیلیغیندا سربست بوراخیلمیشدی.

 

غلامرضا نجفی 36 یاشلی، آذربایجان میللی حرکتی چالیشقانلاریندان نیظاما قارشی تبلیغات سوچلاریندان اؤتری تهلوکه سیزلیک گوجلری طرفیندن گؤزآلتینا آلینمیشدی و موردادین 14- ینده وثیقه قارشیلیغیندا سربست بوراخیلمیشدی.

 

گله جک بیزیم دیر

دوشنبه 4 شهریور 1387

www.oyrenci.com