فدرال ايرانين مليتلر قورولتايی نين (کونگره سينين) بيانيه سی

ايران بوتون ايرانليلارين و ايراندا ياشايان مليتلرين هاميسی نين دير. اينديه قدر، اونلارين چوخوسونون بو حقی دانيليبدير.

بيز اونلارين باشلارينا گتيريلن ميلی ظولم و عدالتسيزليگی حيس ائديرک. بونا گؤره ده، اؤلکه ده آزادليق و عدالت قورماق اوغروندا درد چکيب و ازيته دؤزملی اولان ايران ائولادلارينين هاميسی نا حؤرمت بسله ييريک.

بيزجه، هربير حاکميت اؤز سياسی لئگيتيم ليگينی خلقين ايستک- ايراده سينی اعمال ائتمکله قازانا بيلير. ايران کيمی چوخ ميليتلی بير اؤلکه ده سياسی حاکيميتين لئگيتيم (مشروع) اولماسينا، موختليف ميليتلرين ايراده سينی دوغرولتماق و اونلارين برابر حوقوقلوغونو رعايت ائتمک گرکدير.

واقعی صولح و اينکيشاف ائتمه نی مومکون ائتمگه گؤره، بيزدن آلينميش آزادليقلاری اله گتيرمگه گؤره، اؤلکه نين دولانديرماسيندا(ايداره سينده) و ساکين اولدوقلاری بؤلگه لرين داخيلی ايشلرينی يولانديرماقدا برابر فورصتلر ايجاد ائتمک اوچون، ميليتلرين هاميسی ايشتيراک ائتمه ليديرلر. بيزجه، بوتون ميليتلرين دموکراتيک، آزاد و بيرگه ايران چرچوواسيندا سياسی ايراده لرينی اعمال ائتمک اوچون دواملی اولابيلن سياسی مکانيزم، يالنيز ميلی و جوغرافيائی معيارلار اساسيندا قورولان فدرال حؤکومتيدير. بواصولا داياناراق، بيز ، 2005- جی ايلين فئورل آيی نين 20- ده «فدرال ايرانين مليتلر قورولتايی»- ندا توپلانيب و ال بيرليک ائتميش ايرانلی ميليتلرين قورولوشلاری (تشکيلاتلاری) آشاغيداکی اساس پرينسيپلری اؤزوموزون گله جکده کی موشترک امکداشليق و فعاليت برنامه ميزين پرينسيپلری قرار وئريريرک:

1- ايسلام جومهوريتی آزادليغين و ايران خلقلرينين حوقوقونون ضيدينه اولان توتاليتر بير حؤکومتدير، بونا گؤره اونون دئوريلمه سی، ايراندا فدرال و دموکراتيک بر حؤکومتين قورولماسی نين باشليجا شرطی دير.

2- بيز دونيا اينسان حقلری اعلاميه سی و بين الخالق موقاويله لر اوزره ميلتلرين اؤز موقدراتينی تعيين ائتمگه ايراده لری اولمالاری حقينه دريندن ايناناراق، ايراندا، ايرانين چرچوواسيندا، ميلی – جوغرافيائی معيارلارين اساسيندا قورولموش فدرال حؤکومتی ايسته ييريک.

3- دين ايله دؤولتين کاميلجه سينه بير بيريندن آيريلماسی.

4- قادينلارلا کيشيلرين، بوتون سياسی، ايجتيماعی، ايقتيصادی...عرصه لرده حقوق برابرليگی نين تامين ائديلمه سی و هربير نوع جنسی آيری سئچگيليگين آرادان قالديريلماسی.

5- سياسی و ايجتيماعی قورولوشلارين (تشوکوللرين)، عقيده و بيان آزادليقلارينين تامين ائديلمه سی. بوتون وطنداشلارين بونلاردان قانونيجه سينه فايدالانمالاريندا، قانون قارشيسيندا برابر حوقوق اولمالارينين تضمين ائديلمه سی.

6- بوتون وطنداشلارين ياشاييش کئيفيتی نين ياخشيلاشديريلماسی، ايجتيماعی و ايقتيصادی عدالتين تامين ائديلمه سی.

7- بين الخالق موقاويله لری پوزمادان، قارشيليقلی حؤرمت اسا سيندا بوتون اؤلکه لرله صولح علاقه لری قورمالی، موناقيشه لری بين الخالق قانونلاردان و دينج يوللاردان ايستيفاده ائتمکله حل ائتمه لی.

8- منطقه ده تروريزم و کوتلوی قيرقين سيلاحلاری ايله موباريزه آپارمالی و اونون علئيهينه بين الخالق امکداشليق ائتمه لی، بين الخالق و منطقه ده کی موناقيشه لرين صولح يولو ايله حل اولونماسيندان مودافيعه ائتمه لی.

بو برنامه نين ايستکلرينه اينان سياسی تشکيلاتلار و شخصيتلردن طلب ائديريک بو قورولتايا قوشولماقلا بو اؤنملی ايشين قاباغا آپاريلماسيندا بيزه يارديم گؤسترسينلر.

بيانيه نی ايمضالايانلار:

1- بلوچيستان خالقی نين بيرلشميش جيبهه سی ( جبهه متحد مردم بلوچستان )

2- آذربايجان فدرال – دموکرات حرکاتی ( جنبش فدرال دموکرات آذر بایجان )

3- ايران کوردوستانی نين دموکرات حيزبی ( حزب دمکرات کردستان ایران )

4 - بلوچيستان خالق حيزبی (حزب مردم بلو چستان)

5- اهواز دموکراتيک البيرليک حيزبی (حزب همبستگی دمو کراتیک اهواز )

6- تورکمن خالقی نين حقلريندن مودافيعه تشکيلاتی ( سازمان دفاع از حقوق ملی خلق ترکمن)

7- کومله- ايران کوردوستاني نين اينقيلابچی زحمتکشلر تشکيلاتی(کومله- سازمان انقلابی زحمتکشان کردستان ايران)