Güneyli
ziyalılarla yazıçı Anar arasında görüş keçirilib
Rza
Bərahaniyə Yazıçılar Birliyinin fəxri üzvlük
vəsiqəsi verilib
Dünya Azərbaycanlıları Konqresinin (DAK)
həmsədri, xalq şairi, millət vəkili Sabir
Rüstəmxanlının dəvətilə dünya şöhrətli
ziyalı, Kanada Qələm Təşkilatının
keçmiş sədri Rza Bərahani başda olmaqla ABŞ, Kanada, Almaniya,
İngiltərə, İsveç və s. ölkələrdə
yaşayan əslən Güney Azərbaycandan olan 12
tanınmış soydaşımız Azərbaycanda səfərdədir.
Oktyabrın 5-də onlar Tarix və Ədəbiyyat
muzeylərində olublar. Oktyabrın 6-da isə qonaqlar
Azərbaycan Yazıçılar Birliyində (AYB) birliyin sədri,
yazıçı Anarla görüşüblər.
Tədbiri açıq elan edən yazıçı Anar
qonaqları çox səmimi salamladı və ziyalıların
əslən Güney Azərbaycandan olmasını eşidən
zaman AYB-də belə bir görüşün keçirilməsini böyük
məmnuniyyətlə qəbul etdiyini bildirdi: Azərbaycan
parçalanıb, biz bölünmüş millətik, eyni millətik. Bu mövzu da
daima ədabiyyatımızda işıqlandırlıb.
Yəni dərdlərimizi heç zaman unutmamışıq. O,
qonaqlara dəstək olduğunu, onların neçə illər
ərzində vətəndən kənarda
yaşadıqlarını, onların dərdlərinə
şərik olduğunu vurğuladı: İran adlanan
yerdə Azərbaycan türklərinin öz hüquqlarını
əldə etməyin yeganə yolu ədəbiyyatdan keçir. Bu
dildə yazdıqlarınızı çap etmək hüququnu
kimsə əlinizdən ala bilər, amma yazmaq hüququnu heç kim
əlinizdən almır. Yazıçılar Birliyinin mətbuat
orqanlarının qapıları güneyli ziyalılara
həmişə açıqdır.
Sonra DAK həmsədri Sabir Rüstəmxanlı güneyli
ziyalıları yazıçı Anara təqdim etdi. Bundan əlavə,
o, qonaqlara yazıçı Anar, onun həyat və
yaradıcılığı barəsində ətraflı məlumat
verdi.
Bundan sonra görüş qarşılıqlı fikir mübadiləsi
formasında davam etdirildi. Güneyli ziyalılar Azərbaycanın
parçalanması, İran adlanan yerdə insan haqlarının
pozulması, qadın hüquqlarının
məhdudlaşdırılması, fars şovinist rejiminin öz
tarixi torpaqlarında yaşayan 35 milyondan artıq
soydaşımıza qarşı assimilyasiya siyasətini
sürdürməsi, təqib və təzyiqlərini gücləndirməsi,
davamlı həbslər həyata keçirməsi, eyni millər
arasında mədəniyyət, ədəbiyyat sahələrində
əlaqələrin daha güclənməsi, Güney
Azərbaycanın istiqlaliyyətinə qovuşmasının
vacibliyi, nəhayət, Quzey və Güneyin
birləşməsilə Bütöv Azərbaycanın qurulması
və s. dəyərli fikirləri qeyd ediblər.
Görüşün sonunda yazıçı Anar dünya şöhrətli
ziyalı, Kanada Qələm Təşkilatının
keçmiş sədri Rza Bərahaniyə AYB-nin fəxri üzvlük
vəsiqəsini təqdim edib.
