شمس سايتى:

شهريار و توركجه

دوقتور علي داشقين

بوتون پيسيخولوگلارين دوشونجه سينجه انسان اوغلو كيچيك ياشلاريندا اؤزلليك له 3-5 ياشلاريندا ياشامينين هر دؤنميندن آرتيق ائييتم و اؤيرتيم باجاريسيني داشييا بيلر.

بو ازودن هر كيشي نين منلييي اوچ اؤيه دن اولوشور دئميشلر بيليم آداملاري (گئن – ائييتيم – چئوره) . دئمك بو اوچ اويه نين هر بيريسي آزاليرسا ، كيشي منلييي اؤز دنگه و دوغال دورومونو ايتيره بيلر. بورادا سؤز قونوسو اولان و بيزيم ايچين اؤزل اؤنمي داشييان تورك اولوسونون بويوك و اونودلماز سؤيچوسو رحمتلي اوستاد شهريار دير.

او، ان كيچيك  چاغلاريندا تبريز ده اولموس آم تبريزين سيياسال گرگين ليكلري ، آتيشما و توتوشمالاري نووبتي اولاراق باشلار كن دوغا كؤيو قاييش قورشاغا يا خود دا حيدربالا تپه سينين قوينونا گؤتورلموشدور . كيم بيلير كي بلكه ده او تبريز ده قالالي اولسايدي چوخلاري كيمي اودا بير پوليتيكاجي، دئوريمجي ، اونلاردان بيرينين يانداشي و يا خود قيراقدا دوروب سئيريجي بيري اولاجاقدي.

شهريار دوغما كؤيونه دونر – دونمز يئرلي آخوندون سونرالار اؤزونون ده اؤيدويو آخوندون قوللوغونا آلينير و اؤز ديني حابئله كيشي سل و ايلكين ائييتي مينه باشلايير. بو ، اينديك محمد حسين خشكنابي و سونراكي اوستاد شهريارين اولو سال ، توپلومسال و ميستيك منلييي نين ايلك و ياشامينين سونونا دك سارسيلمايان تمل داشيني دا بئله باسميش اولور.

دونم ده ييشير و شهريار يئنه ده شهره ، تئهرانا و آيري – آيري شهر لره ، بيلم اوجاقلارينا يعني طيب بيليملري ، اوخولاري آردينجا گزيب دولاشماغا باشلايير و سونوجدا اونودا بوراخاركن داحا آيري بيرايشده چاليشماغا باشلايير. بؤيله آيرينتيلار هئچ بيريسي شهريارين كيچيك چاغلاريندا هم ده آنا ديلينده آلديغي ائيتيمي اوچروما ، يوخلوغا ،ؤ ياديرغاماغا اوغرادا بيلمه يير.

او چاغ گئچديكجه دوغما توركجه يه داحا آرتيق يانغي و سوسوز بولونور ، چييين لرينده گزديردييي ،  آغير بير يوكون آغيرليغيني داحا چوخ دويور . بوتون آذربايجان سؤيچولري كيمي اوزريينه دوشن گؤروي داحا چوخ آنلايير و اونون قاچينيملمازليغيني آچيقجا گؤرور. بو سوره ده ايراندا يئني بير ترپه نيش و يئني بير فيريلداق دا باشلانماقدايدي و توركو  تورك اولوسونو چكمه ين گؤرمه ين بير نئچه سي هم ده آلچاق پهلويلرين يانداشليغي ايله بو بويوك وارليغي كولتور و ديلي قارالاماق ايچن اونا قارشي يالانجي و هئچ بير چاغ اولمايان بير قوندارما آدي يعني آذري دوشونجه سيني ايلك اؤنجه اينگيل تره ده سونرا دا ايراندا اورتاليغا آتيرلاردي.

بو فيريلداق ايسه ساپي اؤزوموزدن اولان بير بالتا ايله يعني كسروي الي ايله بو بويوك وارليق چينارينا ائديريلمه لي ايدي. بو نا گؤره ده اؤنجه اونون اوزنو سونرادا اؤلكه ايچينده اولان اونون بارماق سايينجا آركاداشلاريني آلقيش لاييب، اؤدولر وئريب و اؤز اولو سلارينا قارشي داورانيش گؤسترديكلرينه گوره انورلانديرميشلاردي . اينديسه اولو شهريا سويونو ايچيب . چؤره ييني يئييب ، گؤزل هاواسيني اددوغو اولو توپراغي و اونون چاغلايانلار كيمي ديليني و كولتورونو نئجه دوشونمه لي ، اؤز سويونده نئجه سسلندير مه لي ايد؟!

شهريارين او گونكو چوخ قيسا سويملي بيرجه بئيتدن بئله اولوشان سؤيو بو گونكو و يارينكي بويوك و اؤنجه دن يابانجيلار اليله قونداريلان شانتاژا و قارايا چوخ گوجلو هم ده قانيتسال جاواب اولاجاقدي . او دئميشدير:

توكون ديلي تك سئوگيلي، ايستكلي ديل اولماز،

اؤزگه ديله قاتسان بو ديلي ، ديل اصيل اولماز!

بويوك شاعير آذري يا خود آذرينين ديلي تك دئمه ميش و يوزه – يوز بونو بيلركدن سؤيله ميشدير. بورادا ايكيجه قونو دوشونولمه لي و آراشديرمالي دير.

1ـ  شاعير توركو ديلي تك دئييل ، توركون ديلي تك يعني تورك اولوسونون ديلي تك دئميسدير و بئله ليكله اؤزونون ده باغلي اولدوغو اولوسون نئجه دئيرلر پاسا پورتونو بير داحا اونون و باشقالارينين قولاغينا سسلندير ميشدير. بئله اولدوقدا ، تورك اولوسونون نه اؤز نه ده ديلي اويدورولان آذري دئييمي اولماز . اونوتماياق كي ، آذري سوزونون و سوز جويونون ديليميزده باشقا آنلامي واردير و بيز بوردا اونا توخونماقدان واز گئچيريك

2ـ شاعيرين توخوندوغو اؤزگه ديل هانسي ديل ياخود ديللر اولابيلردي؟ بودا آچيق دير، او دوشوندويو ، باجاريب اوخودوغو ديللري دئيه بيلردي . چونكو بير چوخ ديللر تورك ديلي ايله كؤكداش اولموش و اونا اؤزگه ساييلماز لار . ديلين اصيل اولدوغونو آرادان آپاران يا خود آپارماغا چاليشان ديللر، او ديلدن دئييل، باشقا سويدان و كؤكدن اولان ديللر و ديل  اولا بيلر.

بونونلا دا آچيقجا دوشونمك اولوركي ، شهريارين تورك و تورك ديلي قونوسونداكي باخيشي و دونيا گؤرشو هم بو گون و هم يارين آذربايجان توركلري ايچين بويوك اؤنم داشيميش و داشيماقدادير. بويوك شاعير بيرجه بئيتده و بير دوزويون توتوموندا هم اؤز اولوسونو هم ده اونون آدلي – سانلي ، ان آشاغيسي 1250 ايل بوندان اونجه دوزگون و گليش ميش بير دورومدا يازيلميش تاپينتي سيني ده يرلنديرميش و بئله ليكله ده اؤز بورجونو اؤده ميشدير.

اونو آيري – آيري چيخيشلاري دا بو نو گؤسترير و بير داحا كيشي سل وارليغيني ، اولوسال دوشونجه و تربييه سيني اوزه چيخارير . اؤرنگ ايچين او ، تانينميش تورك و آذربايحان سؤيچو سو سهندين ياس توره نينده دئيير:

سهند آچان بوشلوغو من دولدورا بيلمرم چونكو من بير شهر شاعيري آما او بير دونيا شاعيري دير. من تورك دونياسينين شاعيرلريني تانيمازديم، سهند اونلاري منه تانيتديردي…

بو اعتيرافلار هئچ ده شهريارين نه اؤزونو نه ده شعريني كيچك دوشورمور ، تام ترسينه اونون داحا دا بؤيوكلويونو و تورك ديلي سؤيچو ايله اؤيوندويونو و اولوسال وارليغينا گووندييي ني گؤسترير. گؤرونوركي ، هر كسين دوزگون ائييتيم آلماسي همده آنا ديلينده آليشيب – يانماسي اونون سونرا كي ياشاييش تونقاللاريندا توسسوله مه دن گؤزرمه سينه ندن اولور . اونو قورويور، يئري گلديك ده باسقين چيلارا قارشي اونو ساوينير. اؤرنك ايچين يئنه ده بويوك شهريار پهلويلرين دؤنمينده داحا بير فيريلداغا و ساچمايا گؤزلجه هم ده قانيتسال اولاراق جاواب وئرير:

تو اهل پايتخي بايد اهل معرفت باشي…!

ايا تهرانيا انصاف مي كن ….

بو شهريارين پامبيقدان چكديردييي ايكي تييه لي هم ده كوتلمز قيلينج دير. هم يومشاق هم ده كسكين . شاعير همين  قيلينجي سهنديه و باشقا شعر آلانلاريندا دا الينه آلميش و اونون اينامينا ديلينه وارليغينا خور باخانلارين اوزدن ايراق بولاشيق اوزرينه يوروموشدو. چونكو اونون حكيم باباسي اولو نيظامي ده اؤز اولوسونو بئله جه ساوينميش و آچيجا سؤيله ميشدير:

پدر بر پدر مر مرا ترك بود

به فرزانگي هر يكي گرگ بود

اوچاق

ياريلدي بولودلار گؤزلنيمه دن

ائندي توپراغيما ياسلي بير اوچاق

الندي باشينا گول قوجاق – قوجاق

آليشدي مين اورك سوندو بير اوجاق

آغاردي ياي گونو سهندين باشي

دوزولدو كيپيرييه گؤزلرين ياشي

دوشوندوم :

دونيانين گؤزو دارايميش

او گلن ، تبريز لي شهريار ايميش!