بو ماتم خانه ایراندیر

یوبانما آی گؤزل گؤزلوم کؤنول جامی دولو قاندیر

ایشیم افغان سؤزوم ناله حالیم زار و پریشاندیر

باهاریم گل اوزون گؤستر آچیلسین گؤرمه ین گؤزلر

حیاتین گولشنی سنسیز خرابه بیر قبرستاندیر

دوشوب غنچه تراوتدن گولوش گولدن کوسوب چوخدان

توتوب بولبول یئرین قارقا قارا گونده گولوستاندیر

قاریلدیر سارسیلان سازلار اؤلوم ریتمین چالیر سانکی

مغنّی قاره کوینکده عبوس بیر قیللی قیلماندیر

بوشالمیش معنادن سؤزلر سوزالمیش جهلدن اوزلر

گؤره بیلمیر اؤنون گؤزلر معلّم بسکی ناداندیر

یوز ایللردیر کی ماتمدن چیخا بیلمیر یازیق ملّت

گونو گوندن گونو قاره گؤزو هر آندا گریاندیر

تسلّی وئرمه میش خلقه اؤزو عظما بلا اولدو

دینی غصب ائیله ین واعظ ازلدن خصم ایماندیر

چوروک تاجین یئرین توتد و جفا وجور اصحابی

قیلان فرعونودا آغ اوز اوزون سقّاللی شیطاندیر

تعقّل کعبه سی چوخدان اولوب مخروبه بو یئرده

جهالت امر ائدن گوندن سرای عقل ویراندیر

گولنمز شاه وشیخ ایله اوزون دؤز غربته گؤزله

اومودلار آرزیلار قبری بو ماتم خانه ایراندیر

اسماعیل جمیلی