نیسگیل بویالی خاطیره

تبریزین شوشه خانا بازارچاسیندا ایکینجی قاتدا اولان عابباس آقانین چایخاناسی اورتا یاشلی وگنج

آذربایجان آیدینلارینین گؤروش یئرلریندن بیریدی

چئوریلیشین ایکینجی یازی اولسادا سام یئلی اسیردی . دویغولار دونیاسیندا آرزو گوجویله چیچکله نن

گولوشلر دونموشدو یاریمچیلیق اومودلار حیران باخیشلاردا ارییردی خوش گورو چوکن فاجه نین

قارا کؤلگه سی آلتیندا سورونوردو اوتانیردی اودوزموش سئودالیلار سون دیره نیشه اؤزلرینی

زورلاسالاردا گونده بیر اویدورمادان آسلانیردیلار .

چایخانانین بازارا ساری وسط خالچایلا دؤشنن سکگی سی دینجلمه یه داها اویغون یئر ایدی پنجره یه

سؤیکه نیب خیالا دالمیشدیم چای پایلایان محررم چایین تایین گتیره نده گولومسه ییب دئدی

- آی بالام نه خبریندی اولمایا گمیلرین باتیب داریخما یا اؤزو گلر یا نامه سی

ائله بو زامان گؤزله دیگیم دوستومو گوردوم کی ایچریی گیردی

- بویور بودا دوستون دئدیم کی گلیب چاتار من اؤلوم او گون اوخودوغون شعری یاز وئر منه

اوکی دئییردی " دووران یئنه ده خوش گئچیر اعیانه ...."

آی بالام سیزه نه اولوب ایکینیزده بیر هاوا چالیرسیز یاخشی یاخشی اوتور بیر تازا دم چای گتیریم

کئفین سازالسین .

خوش بئشدن سونرا دوستوم اوتقونوب دئدی کیشیلرینده سسی یاساقلاندی قادین سسیله ماهنیلاری

یاساقلاندیراندا جددی اعتیراض اولسایدی بو گون بئله اولمازدی بیرجه مارش و اؤلوم هاوالاری!!

آزاد دیر نه قدر ایستیرسن آغلا باشیوا چال اؤزونو دوی بو دی کی وار سنین ادبیات برنامه وی

یاریمچیلیق پخش ائله دیلر سونوندا قدیرین سونا بولبوللرین کسدیلر ائله بیر" تک ساز "اوچون فتوا

وئریلمه ییب اونا گؤره ده شعر بؤلومو عدالتین سازی ودادستانپورون تاریله آنتنه گئتدی و ماهنیه

چاتاندا اؤلوم قوللوقچولاری سونا بولبولو ذبح ائله دیلر. بیر آز توموب بیردن بیره الینی توتوب دئدیم

بورا باخ دئییرم بیر ایش گؤرک من بیر یاخشی ساز چالان تانیرام آراز قیراغیندا بیر کندده موعللیمدیر

گئدیم اورا یالواریب یاخاریم بلکه ائل هاوالارینی سازدا چالسین اونلاری ضبط ائله یم هئچ اولماسا

اؤز خاق ملودیالاریمیز یاییلسین

ایگی گون سونرا مفروضلو کندینده ایدیم قارا سوواخ بیر ائوده اؤنجه آشیق بیر آز چکینیردی الی سازا گئتمیردی آخی قارا کوینکلی یئنی مامیز یاران اؤلوم قوللوقچولاری کیچیک بویوک تانیمیردیلار

پیس یاخشی بیلمیردیلر گؤزو باخلی قودورقان ارباب اولان نوکرلرین نوکریدیلر هر حیاسیزلیق ائده بیلردیلر

سونوندا قاپباجانی موحکمله دیب ائل هاوالاری آشیغین یوموشاق مضرابلاریله هاوالاندی

من بیر کؤکده چالینان هاوالاری سئراسیله یازسامدا ملودیالار یاغدیقجا اؤز یولونو تاپیردی

آشیق هاوالاری بسته کار ماهنیلارینا یول وئریردی اویون هاوالاری میدان سولوردو موغام

گیریشلری کؤنول کؤکلوردو گئجه نی ساز چوردوب دان یئری سؤکولنده آشیقلا ساغ اوللاشدیم

آخشام جانلی یاییندا آرتیق اؤز دوغما سازیمیز یارامیزی ساریردی رادیو دالغالاریندا سازین سئوگی

دونیاسیندا یار بیزه قوناق گلیردی باش آلیب گئدیردی موغانا جیران سارانی سئللر آپارسادا

یار قاداسین یار آلیردی

اسماعیل جمیلی قیش 2006-10-30

.