اؤزگورلویون سوراغیندا

 

اؤزگه لیین دوزاغیندا                                       ( غلامحسین ساعدی نین خاطره سینه)

اؤزگورلویون سوراغیندا

عومرون آخسار ایاغیندا

سونسوز غمله سون دوراغین

تبریزیندن  اوزاق اولدو

آینالینین  گؤزلر گؤزو

دولدو کهلیک  بولاغ اولدو

سنسیز سینه داغلی سهند

گوموش ساچلی ساوالانین

نیسگیلینه  اورتاق اولدو

داغ داغ ایله ایاق اولدو

یانیق کرم هاواسینا 

کوهنه گجیل قوناق اولدو

اصلینی دانمایان آشیق

کرم سیزلر قورقوسوندا 

دوستاق اولدو

اؤزون گئتدین  سؤزون قالدی

کؤنول کؤنول کؤزون قالدی

باغمئشه نین قلله سینده

ایکی قاپلی قهوه سینده

شوشر خانا بازاریندا

دادین قالدی دوزون قالدی

 

یاسلی بییللی قول قولا

خیولولار ساغدان سولا

ناغیللاردا   اویونلاردا

بهرزوندان صمد ایندن

مرضیه دن توتور سوراغ

لال اویونو تاماشالار

قوجا تبریز تئاترینا آچیر ایاق

قبّه زرّین  جانلاندیریر

پییس لری صحنه لرده

سنسیز  سسسیز هارایلارین

دولاشیری دوداق دوداق

 

 

 

تاپدالانان انسانلارین

قوردا دؤنن قویونلارین

اوست اؤرتولو اویونلارین

قالاق قالاق  زیبیللرین

دردی درین  دندیل لرین

نه دنلری  باخیش باخیش دیله گلیر

قارا قیشدا  دورغونلوغون  بوزون کسیر

دوشونجه نین  آستا آستا   مه هی اسیر

قار چیچگی تک باشینا  اومود  پایلیر

گوللو گونلره ته له سیر

 

اولاناقلار چمبرینده

بویوندوروق یاد دیلییدی سون یاراغین

دوغما  آنا سئوگیسیدی

آرخان   گووه نین   دایاغین

دردیمیزی دیله گلدین وراق وراق

دؤیولسنده  یئلماز اولدون دوستاق دوستاق

اولدوزلاری سپه له دین قارانلیغا چراغ چراغ

 

سن غریبلر کروانیندان

اؤز یوردوندا  ائلین غریب

اؤز ائلینده  دیلین غریب

سون دوراغین اوزاق غربت

اؤزون غریب   سؤزون غریب

گئج تئزی وار

غریب سردار تبریزینه دؤنن گونده

سورگون شهیدلر مزاری

چیچک لره بوروننده

ارکین یئنی صحنه سینده

یاشاناجاق  یادین سنین

سئوگی سایقی چلنگینه 

یازیلاجاق آدین سنین

 

                                              اسماعیل جمیلی