اسماعیل جمیلی:

بوراسی آذربایجان

 

بوراسی وطن

بوراسی 21 آذر    دیللره دستان

بیر گؤزو شن باهار بیر گؤزو دولو قان

بوراسی باغ گلستان

دار ایاغیندا دادستان

نسیمی تک اؤلومو هئچ سانان

گونش جارچیسی انسان

 

بوراسی آرزیلار حسرتلر اؤلکه سی

اؤزوندن ایری فاجعه سی

 

بوراسی ساوالان  داغ اوره گی قان

  سارایلاری ویران شام قازان

 

بوراسی رشدیّه   آنادیلی یاساق

بوراسی معجز   صابیر  مینلر چراغ

بوراسی  بیریا  سهند  ساحیر  شهریار

بوراسی  سازلی سؤزلو  الوولو دیار

 

بوراسی موغان جیرانی یارالی

سورگون  مارالی

بوراسی قوزئی  قاراباغی  شیکسته

بوراسی گونئی  سه گاهی یئتیم نیگاری بسته

بوراسی اهر کلیبر بختی قارا قارا داغ

بوراسی شوشا  کلبه جر اسیر قارا باغ

 

 

 

 

بوراسی اولو جاوید

صمدلی  آراز

بوراسی یارالی مشفق

قانلی قیش   یاسلی یاز

 

بوراسی سون سنگر امیره قیز

بوراسی شرقین اینجیسی تبریز

بوراسی خیابانی  گول له له نن  آزادیستان

بوراسی   شهید ستارخان

بوراسی  ائلینه دیلینه زندان

بوراسی 21 آذر دیللره دستان

 بوراسی وطن   آذربایجان