یاشایان ناغیل دکتر رضا براهنی جنابلارینین 70 ایللیگینه

بیر یاشیل دویغودور وارلیغین سنین

نیسگیللی تبریزین یارالی قوینوندا

اینجی یاراشیقدیر دردلی اوره گین

ائلین سئوگیسینین بوکوک بوینوندا

سن حصارا سیغیشمایان

سن یوخلوغا یاراشمایان

سئودالارین سرخوشوسان

کوف قاپسایان قارانلیغی هدف آلان

جان یایینین نور اوخوسان

دویغولارین گله جگین باخیشیدیر

آذربایجان مارالینین یارالانان ناخیشیدیر

بولاغ بولاغ دنیز یولون آچانلارین

اومود دولو آخیشیدیر

چوروک چاتلاق هیولالار

مزارلاردا اویانسادا

یوزایللرین اؤلولری

کفن یئرتیب دیریلیغا بویانسادا

جهالتین چیبانلاری دئشیلسه ده دوراق دوراق

چی باخیشلار ایز سالسادا زولاخ زولاخ

گونشیمیز کؤزه رسه ده دوستاقلاردا چیراغ چیراغ

داغ داغ اوسته داغا دؤنوب

پوسگوره جک اؤزوموزدن

اودلاناجاق آغیر گئجه

اؤره ک اؤره ک کؤزوموزدن

سن سو کیمی هاوا کیمی تورپاغ کیمی

آرزیمیزین اورمانیندا چینار بویلو یارپاغ کیمی

اؤزگورلوگون یوروشونده یورولمایان ایاغ کیمی

گله جگین بئشیگینده گولومسه ین دوداغ کیمی

سؤزوموزون ساراسینین ساچلارینی ناخیشلایان دراخ کیمی

سن یئپرانماز اونودولماز سن بیر آخار بولاغ

جهنّمین ائلچیلری آغ قوماشا بورونسه ده

قارین قولو قوروقچولارآدیم باشی گؤرونسه ده

وارلیغیمیز گؤز اؤنونده یالانلارلا هورونسه ده

قوجا دونیا دایانمادان دؤنمه ده دیر

دئییشیلمز دئییشیمدیر

یئنیلیگه اویمایانلار سؤنمه ده دیر

سن بو قورخو اؤرتوگونون آرخاسیندا

حسرت دولو باخیشلارین گؤزگوسوسن

دیلی باغلی باغچالارین سؤزجوسو سن

سن ساحرین سن صمدین یول یولداشی

سن مشفقین سن اوختایین سن مرضیه وطنداشی

سن بوغولان اولدوزلارین سن ساعدی قلمداشی

سن اؤزونو بیلن اؤزونو آشان

سن ناغیل اولوب یاشایان

اسماعیل جمیلی