بابک آدلی سؤنمز گونش

 

 

شفق سوروب قان سورمه سین ظلمت گؤزونده یاناجاق

دان اولدوزو    یئر دگیشیب      کلیبردن     بویلاناجاق

بذ قالاسی    قبله سینه  باش  ایه جک        ظالیم زمان

قارانلیغین   قارا ائوین     ایشیق ییخیب      اودلاناجاق

 

دایانیشما  تانریسینین      چاغریسینا       هن دئینلر

کیملیک  وارلیق دؤیوشونده گوجلو وارام من دئینلر

پوزاجاقلار   قورقوسونو  آیریلیغین    اؤزگه لیگین

قوراجاقلار  یئنی دوران   وطنه  جان     تن دئینلر

 

بابک آدلی سؤنمز گونش نور ساچاجاق  بو داغلارا

قورتولوشون  شن چیچگی  قوناجاقدیر    بوداغلارا

یئنی یازین    گلیشیله    گوله جکدیر      ائلین اؤزو

سون قویاجاق اؤزگور انسان بو دردلره  بو داغلارا

                                                                                               اسماعیل جمیلی