بو گونده (21 آذر )    

 

بو گونده   دیل  آچدی  آنا طبیعت

هر شئی اؤز آدیله گولدو اوزومه

بو گونده کیملیگیم قازاندی  دولت

دونیا گؤزه للندی   گولر گؤزومه

 

بو گونده یوردوندا قوجا بابکین

ستارخان ائلینین اسدی بایراغی

بو گونده  قانیله    قهرمانلارین

لاله یه بوروندو ساوالان داغی

 

بو گونده سیلاحلا   اؤلچولن تورپاق

قالادی آرزیلا  اومود       اوجاغین

یوردونا  دیلینه    ائل اولدو    دایاق

یاندیردی اؤزگورجه کندی چراغین

 

 

 

بو گونده قورولدو میللی    اوردوموز

قورویا وطنی       آزادلیق     اوچون

بو گونده اؤلکه سین سئون اوغلان  قیز

چیرمادی   قولونو        آبادلیق اوچون

 

بو گونده    آنا دیل        آنا یوردوندا

دیل آچدی   یاشادی    یاشاتدی بیزی

ائل گوجو سئل گوجو دوغرو یولوندا

آزادلیق  قبله سی      قیلدی  تبریزی

 

بو گونده قودورقان قوللوقچو یادلار

آسدیلار  کسدیلر    سئوگی  دیارین

قورودو  فیدانلار      یاندی کتابلار

قارا قیش تالادی     آرزی باهارین

 

آزادلیق دوشمنی ساتقین ظالیملر

اون مینلر انسانین توکدولر قانین

ائلینی دیلینی    دوستاق   ائتدیلر

ایگیتلر اؤلکه سی   آذربایجانین

                                                               اسماعیل جمیلی